Go Agana ge re le Bodireding
1 Ka moka ga rena re thabela go botšwa “lentšu [le le kgothatšago] le bolêlwaxo lebakeng la xôna.” (Die. 25:11) Ge re šoma le ba bangwe bodireding, re ka kgonthišetša bjang gore poledišano ya rena e ba e kgothatšago?
2 Poledišano e Agago: Ke mo go agago gakaakang go akaretša dilo tša moya dipoledišanong tša rena ge re le modirong wa boboledi! (Ps. 37:30) Re ka bolela ka thero ya rena goba ra anega diphihlelo tše kgothatšago tšeo re bilego le tšona morago bjale tirelong ya tšhemo. (Dit. 15:3) Na go na le ntlha e kgahlišago yeo re e hweditšego mmalong wa rena wa motho ka noši wa Beibele, dimakasineng tša morago bjale goba sebokeng sa phuthego? Re ka boledišana ka dintlha tšeo di boletšwego polelong ya phatlalatša yeo re sa tšwago go e kwa Holong ya Mmušo.
3 Re ka nyama ge mong wa ntlo a tsoša kganetšo yeo re palelwago ke go e fenya. E tla ba mo go holago ge re ka tšea metsotso e sego kae re boledišana le motho yo re sepelago le yena mabapi le kamoo go ka swaraganwago le boemo bjo bjalo nakong e tlago, mohlomongwe ka go hlahloba puku ya Go Boledišana. Le gona ge e ba re kgahlilwe ke selo se itšego therong ya motho yo re sepelago le yena, theto e tšwago pelong e ka mo kgothatša.
4 Gata Mogato wa Pele: Na go na le ba bangwe sehlopheng sa rena sa thuto ya puku bao re sego ra hlwa re šoma le bona morago bjale? Go ba laletša gore ba sepele le rena bodireding go ka feleletša ka “go kgothatšana.” (Baroma 1:12) Babulamadibogo ba ka mehla le ba go thuša ba thabela go sepela le ba bangwe, kudu-kudu mesong kudu goba mantšiboa, nakong ya ge go e-na le bagoeledi ba sego kae bodireding. Re ka thekga babulamadibogo ka go sepela le bona. Na go na le mogoeledi yo a babjago yoo boemo bja gagwe bja tša maphelo bo mo paledišago go dira kamoo a ka kgonago ka gona bodireding? Go rulaganya go sepela le motho yo bjalo, mohlomongwe go ya le yena thutong ya Beibele, e ka ba mo go holago.—Die. 27:17.
5 Theto le mantšu a tebogo ke a kgothatšago ka mehla, gaešita le ditabeng tše dinyenyane. Re swanetše go dula re gopola seo ge re šoma le ba bangwe bodireding, ka ge re nyaka go ‘tšwela pele re agana.’—1 Bathes. 5:11.