Letlolo La Dipotšišo

◼ Na ke mo go swanetšego gore diphuthego goba batho ba diriše maswao a mokgatlo ao a dirišwago ke Dihlatse tša Jehofa?

Leswao e ka ba leina, sešupo goba seka seo se hlametšwego gore selo se itšego se lemogwe gabonolo le ka tsela e sa belaetšego. Leswao la Watch Tower le emela Watch Tower Bible and Tract Society of Pennsylvania le mafapha a mangwe ao a dirišwago ke mokgatlo. Mafapha a mangwe ao a dirišwago ke Dihlatse tša Jehofa a na le maswao a fapanego.

Diphuthego goba batho ga se ba swanela go diriša maswao goba maina a molao a mokgatlo goba dilo tše di swanago le tšeo Diholong tša Mmušo, maswaong ao a bontšhago Holo ya Mmušo, mangwalong, dilong tša motho ka noši, bjalo-bjalo. Go dirišwa mo go bjalo ga maswao a mokgatlo go ka baka kgakanego go bahlankedi ba setšhaba, bagoeledi le ba bangwe mabapi le gore phuthego e tswalana bjang le dilo tša molao tša mokgatlo. Ka mo go swanago, mangwalo a ka tšewa e le ao a dumeletšwego goba a rometšwe a e-tšwa ntlong-kgolo ya lefase goba ofising ya lekala.

Leswao la Watch Tower, goba leo le swanago le lona, ga se la swanela go dirišwa nakong e tlago ge go agwa Diholo tša Mmušo gaešita le ge Holo ya Mmušo e le leineng la Watch Tower. Ga go nyakege gore diphuthego tšeo di nago le Diholo tša Mmušo tšeo di nago le leswao leo di dire diphetogo tša maswao goba mekgabišo, ka ge diphetogo tše bjalo di ka akaretša diphetogo tše dikgolo le nako e ntši, maiteko le ditshenyagalelo. Lega go le bjalo, go swanetše go naganwa ka go dira phetogo ye ge e ba e tla ba e nyenyane gomme e ka se be modiro o mogolo. Ge go se bjalo, e ka fetošwa nakong ya ge go tla be go mpshafatšwa moago goba leswao.