Na o ka Leka go Thuša Molekane yo e Sego Modumedi?

1. Ke ka baka la’ng Bakriste bao ba dulago le balekane bao e sego badumedi e se bona feela bao ba nyakago go ba thuša gore ba amogele therešo?

¹ Na go na le bagoeledi ka phuthegong ya gabo lena bao ba nago le balekane bao e sego badumedi? Ge e ba ba le gona, gona ga go na pelaelo gore bagoeledi ba ba kganyoga gore balekane ba bona ba be gotee le bona borapeding bja therešo. Eupša ga se bona feela. Go swana le Modimo, phuthego ka moka e kganyoga gore “mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:4) Re ka thuša bjang balekane ba bagoeledi ba phuthegong ya gabo rena?

2. Go ba le temogo go tla dira bjang gore re kgone go thuša molekane yo e sego modumedi?

² Sa mathomo, re swanetše go ipea boemong bja molekane yo e sego modumedi. Balekane ba bantši bao e sego badumedi ba rata malapa a bona e bile ba leka go ba balekane ba bakaone goba batswadi ba bakaone. Mohlomongwe ba bodumeding bjo bo fapanego le bja rena. Go ka ba go na le seo ba se tsebago ka Dihlatse tša Jehofa ntle le seo batho ba bangwe bao ba sa re ratego ba ka bago ba ba boditše sona. Ba bangwe ba kgopišwa ke ge balekane ba bona ba fetša nako e ntši ba swaregile ka mediro ya borapedi go feta nako yeo ba bego ba e fetša ka gae. Go ba le temogo go tla re thuša go swara molekane yo e sego modumedi ka botho le ka tlhompho gomme ra phema go se dudišege ge a le gona.—Die. 16:20-23.

3. Tsela e kaone ya go rua molekane yo a sa dumelego e ka ba efe?

³ Bontšha Gore o a Tshwenyega: Tsela e kaone ya go dira gore molekane yo e sego modumedi a rate therešo e ka ba ka ditiro tša rena, e sego ka go fo dula re mmotša ka Beibele. (1 Pet. 3:1, 2) Selo sa bohlokwa tabeng ye ke go mmontšha gore o tshwenyega ka yena. Dikgaetšedi ka phuthegong di ka bontšha gore di tshwenyega ka mosadi yo e sego modumedi gomme le bana babo rena ba ka bontšha gore ba tshwenyega ka monna yo e sego modumedi. Bjang?

4. Re ka bontšha bjang gore re tshwenyega ka motho yo a itšego?

⁴ Ge e ba o sa ka wa kopana le molekane wa modumedi yo a itšego, o ka tlwaelana le yena ka go botšiša molekane wa gagwe yo e lego Mokriste. O se ke wa nyama ge e ba molekane yo e sego modumedi a sa go amogele. Go mmontšha bogwera le go tshwenyega ka yena go ka dira gore a rate Dihlatse tša Jehofa. (Baroma 12:20) Bakriste ba bangwe bao ba godilego ka tsebo ba ile ba laletša motho yo e sego modumedi le lapa la gagwe dijong tša mantšiboa, ka morero wa go nyaka go mo tlwaela gakaone le go fediša kgethollo le ge e le efe yeo e ka bago gona. Ba ile ba bolela le yena ka dilo tšeo a di ratago go e na le go gapeletša go bolela ka dilo tša moya. Ge motho yo yo e sego modumedi a thoma go lokologa, poledišano ya Mangwalo e ka tsena. Goba a ka dumela go tla go se sengwe sa diboka tša rena ge re mo laletša gore a tle a bone seo mosadi wa gagwe a ithutago sona, kudukudu ka ge a šetše a tseba ba bangwe ka phuthegong. Gaešita le ge ga bjale a se a ikemišetša go amogela therešo, a ka retwa ka baka la thekgo yeo a e neago molekane wa gagwe yo e lego modumedi.

5. Bagolo ba ka thuša bjang yo e sego modumedi?

⁵ Ke bagolo bao ka mo go kgethegilego ba swanetšego go nyaka go thuša balekane bao e sego badumedi gomme ba phafogele dibaka tša go nea bohlatse. Motho yo e sego modumedi yo a bego a sa nyake gore le boledišane ka Beibele a ka theetša kgothatšo ya Mangwalo ge a le sepetlele goba a lebane le mathata a magolo a tša maphelo. Ge lapa leo le sego bodumeding botee le welwa ke mathata a bjalo ka go hwelwa ke setho sa lapa, bagolo ba ka laletša yo e sego modumedi gore le yena a be gona ge ba homotša lapa.

6. Re na le mabaka afe a go leka go thuša balekane bao ba sa dumelego?

⁶ Nagana ka lethabo leo Mokriste yo a lego phuthegong ya gabo rena a tla bago le lona ge molekane wa gagwe a amogela therešo! Tiragalo yeo ye e kgahlišago e tla thabiša Jehofa, barongwa le phuthego ka moka. (Luka 15:7, 10) Lega go le bjalo, ge mathomong motho yo e sego modumedi a sa re amogele, re sa dutše re ka thabela gore maiteko ao re tšwelago pele re a dira a kgahliša Jehofa yoo a sa ‘ratego gore go fedišwe le ge e le mang, eupša a ratago gore bohle ba fihlelele boitsholo.’—2 Pet. 3:9.

[Seswantšho go letlakala 6]

Tsela e kaone ya go dira gore molekane yo e sego modumedi a rate therešo e ka ba ka ditiro tša rena, e sego ka go fo dula re mmotša ka Beibele.