Na o Šetše o Kgethile?

Palo ya batho bao ba buiwago ka ntle le go tšhelwa madi e a oketšega dipetleleng lefaseng ka bophara. Na o tseba gabotse dikgetho tšeo motho a ka di dirago ge a nyaka go alafša ntle le go tšhelwa madi? O swanetše go di tseba e le gore o ka dira diphetho tšeo di akaretšago kalafo le go buiwa. Bogela bidio ya No Blood—Medicine Meets the Challenge. Ka morago ga moo, rapela ka diphetho tšeo o tla di dirago gomme o hlahlobe seo o ithutilego sona o diriša dipotšišo tše di lego ka mo tlase.—Tlhokomedišo: Ka ge bidio ye e akaretša diswantšho tše dikopana tša go buiwa, batswadi ba swanetše go diriša temogo ge ba bogela bidio ye le bana ba banyenyane.

(1) Lebaka le legolo leo ka lona Dihlatse tša Jehofa di ganago tšhelo ya madi ke lefe? (2) Ke’ng seo Dihlatse tša Jehofa di se kganyogago ge go tliwa tlhokomelong ya tša kalafo? (3) Ke tshwanelo efe ya motheo yeo balwetši ba nago le yona? (4) Ke ka baka la’ng e le mo go kwagalago le mo go bontšhago boikarabelo go kgetha mekgwa e mengwe ya go alafša ntle le tšhelo ya madi? (5) Ge motho a lahlegelwa ke madi a mantši, ke dilo dife tše pedi tša pele tše akgofilego tšeo dingaka di swanetšego go di dira? (6) Melao e mene ya motheo ya mekgwa ya go alafša ntle le tšhelo ya madi ke efe? (7) Ke bjang dingaka di ka (a) fokotšago tahlegelo ya madi, (b) seketšago disele tše dikhwibidu tša madi, (c) oketšago tšweletšo ya madi le (d) go tsošološa madi ao a lahlegilego? (8) Hlalosa mekgwa yeo e tsebjago e le (a) go fokotšwa ga disele le dikarolwana tše di tiilego mading (hemodilution) le (b) go šireletša disele (cell salvage.) (9) Ke’ng seo o swanetšego go nyaka go se tseba mabapi le kalafo e nngwe yeo e lego gona ye e sa akaretšego tšhelo ya madi? (10) Na go bua mo gogolo le mo go raraganego go ka dirwa ntle le go tšhelwa madi? (11) Ke tšwelopele efe e kgahlišago yeo e lego gona go bao ba šomago ka tša kalafo?

Go amogela mehuta e mengwe ya tša kalafo yeo e bontšhitšwego bidiong ke taba yeo motho a swanetšego go itirela phetho ka yona ka go dumelelana le letswalo la gagwe leo le tlwaeditšwego ka Beibele. Na o šetše o dirile phetho e feletšego mabapi le gore ke mehuta efe e mengwe ya tša kalafo le mekgwa yeo wena le bana ba gago le ikemišeditšego go e amogela gomme na le tladitše karata e mpsha ya Advance Medical Directive (AMD)a? Bakeng sa go ahlaahlwa mo go feletšego ga ditaba tše, hlahloba ka kelohloko “Dipotšišo tše Tšwago go Babadi” ka ditokollong tša Morokami wa June 15, 2004 le wa October 15, 2000. Ke moka o diriše letlakala la ditlhathollo la pampiri ya ka gare ya Tirelo ya Rena ya Mmušo ya January 2007 e rego: “Pono Ya-ka ke Efe ka Dikarolwana tša Madi le Mekgwa ya tša Kalafo Yeo e Akaretšago Madi A-ka?,” bakeng sa go dira diphetho mabapi le dilo tšeo o tla di amogelago goba go di gana. Mafelelong, kgonthišetša gore o ngwadile dilo tšeo o di kgethilego ka karateng ya gago ya AMD. Baemedi ba gago ba tša maphelo bao o ba kgethilego le ditho le ge e le dife tša lapa tšeo e sego Dihlatse di swanetše go hlalosetšwa gabotse mabapi le diphetho tšeo o di dirilego.

[Mongwalo wa tlase]