Bolela le “Batho ba Mehuta ka Moka”

1. Baebangedi ba fišegago ba swana bjang le batho bao ba nago le bokgoni bja mošomo wa diatla?

¹ Motho yo a nago le bokgoni bja go dira mošomo wa diatla o na le didirišwa tše dintši, e bile o tseba gore a ka diriša se sengwe le se sengwe sa tšona neng le gona bjang. Ka mo go swanago, re na le didirišwa tše di fapafapanego tša go re thuša go phetha modiro wa rena re le baebangedi. Ka mohlala, go tšweleditšwe diporoutšha tše di bolelago ka ditaba tše di fapafapanego go re thuša go bolela le “batho ba mehuta ka moka.” (1 Bakor. 9:22) Letlakala la ka gare le lokeletša tše dingwe tša diporoutšha tše, le hlalosa batho bao di reretšwego bona le go šišinya ditsela tšeo di ka sepedišwago ka tšona.

2. Re ka diriša neng diporoutšha bodireding?

² Nako ya go Diriša Diporoutšha: Motho yo a dirago mošomo wa diatla o tla diriša sedirišwa neng le neng ge go nyakega. Ka mo go swanago, re ka sepediša poroutšha neng le neng ge re bona gore e ka hola motho, e sego feela dikgweding tšeo e sepedišwago ka tšona. Ka mohlala, ge e ba kgatišo e sepedišwago e le puku ya Seo Beibele e se Rutago e bile re boledišana le motho yo e sego Mokriste gomme a sa kgahlegele Beibele gakaalo, e ka ba mo go swanetšego go sepediša poroutšha e swanetšego ke moka ra rola puku ya Seo Beibele e se Rutago ka morago ga ge re šetše re hlagoletše kgahlego ya motho yoo.

3. Ke ka baka la’ng re swanetše go diriša ka bokgoni didirišwa tša rena tša go nea bohlatse?

³ Mangwalo a bolela gabotse ka bao ba nago le bokgoni modirong wa bona. (Die. 22:29) Ka kgonthe, ga go na modiro wo o lego bohlokwa lehono go feta “modiro o mokgethwa wa ditaba tše dibotse.” (Baroma 15:16) E le gore re be ‘bao ba šomago go se seo se re hlabišago dihlong,’ re tla katanela go diriša didirišwa tša rena ka bokgoni.—2 Tim. 2:15.