Bidio ya The Wonders of Creation Reveal God’s Glory
Batho ba bantši ba thabela go bogela tlholo. Eupša ba sego kae ba lemoga gore ge ba dira seo, ge e le gabotse ba topa seo se lego ka monaganong le pelong ya Mmopi wa rena yo Mogolo. (Baroma 1:20) Mehleng ya bogologolo, Dafida o ile a ithuta ka Jehofa a diriša Lentšu la Gagwe le le buduletšwego. Eupša o ile a ba a “bona” le go batamela go Yena ka go lebelela tlholo. (Ps. 8:3, 4) Bidio ya The Wonders of Creation Reveal God’s Glory e thuša rena, bana ba rena le barutwana ba rena ba Beibele gore re lebeledišiše tše dingwe tša dilo tšeo Jehofa a di hlodilego, re bone dika le semelo sa Mmopi wa rena yo Mogolo, ka go re’alo re batamele kgauswi le yena. Ka morago ga gore o e bogele, bona ge e ba o ka araba dipotšišo tše di latelago.
(1) Bogolo bja legohle gotee le tsela yeo le rulagantšwego ka yona di godiša bjang kwešišo ya gago ka Jehofa? (Jes. 40:26) (2) Ge re lebeledišiša tsela yeo meetse a lego ka yona, re ka ithuta’ng ka Yoo a a hlamilego? (Kut. 14:7) (3) Bogolo bja lefase gotee le bokgole bjoo le lego go bjona ge le bapetšwa le letšatši di bonagatša bjang bohlale bja Jehofa? (4) Kgwedi e phetha morero ofe? (Ps. 89:37) (5) Jehofa o bopile bjang batho gore ba thabele bophelo? (6) DNA ke eng? (Ps. 139:16) (7) Batho ba fapana bjang le dilo ka moka tšeo Jehofa a di bopilego lefaseng? (Gen. 1:26) (8) Ke eng seo o fagahletšego go se dira lefaseng le lefsa?
Extra Features: (9) Mebala e tšweletšwa bjang? (10) Meetse a kgona bjang go fenya matlakgogedi e le gore a fihle godimo ga makala a dihlare? (11) Meetse a kgatha tema efe mebeleng ya rena? (12) Nea mehlala ya kamoo diphedi di dirišanago ka gona. (13) Diphedi di kgona bjang go thušana seng sa tšona? (14) “Golden angle” ke eng, gomme e bontšhitšwe bjang tlholong?
“Šetšang ka Kelohloko” Mediro ya Jehofa: Jesu o re kgothaleditše gore re ‘šetšeng ka kelohloko dinonyana tša legodimo’ gomme re “ithuteng ka matšoba a naga ao a bitšwago dilili.” (Mat. 6:26, 28) Go dira ga rena seo go tla matlafatša tumelo ya rena, gwa dira gore re bote Mmopi wa rena gomme ra tšeela godimo bohlale bja Jehofa, matla a gagwe a go phološa gotee le lerato la gagwe. Go e na le gore o šitišwe ke mediro ya lefase le, dira nako le boiteko bja go lebeledišiša tlholo ya Jehofa, gomme o naganišiše ka seo e re rutago sona ka Modimo wa rena.—Ps. 19:1.