Wepesaete ya Rena ya Semmušo—E Hlametšwe go Thuša Rena le ba Bangwe
Jesu o re laetše gore re bolele ditaba tše dibotse tša Mmušo “lefaseng ka moka gore e be bohlatse go ditšhaba tšohle.” (Mat. 24:14) E le go re thuša gore re ‘phethe bodiredi bja rena ka botlalo,’ Wepesaete ya watchtower.org, ya jw-media.org le ya jw.org di kopantšwe gomme tša dirwa Wepesaete yeo e hlamilwego lefsa ya jw.org.—2 Tim. 4:5.
“Lefaseng ka Moka”: Mo e ka bago motho o tee go ba bangwe le ba bangwe ba bararo lefaseng o diriša Inthanete. E fetogile selo se segolo seo batho ba se dirišago go nyaka tsebišo, kudukudu bafsa. Wepesaete ya rena e nea batho bao ba dirišago Inthanete dikarabo tša maleba ka dipotšišo tša Beibele. E ba thuša gore ba tsebe mokgatlo wa Jehofa gomme e dira gore ba nolofalelwe ke go kgopela thuto e sa lefelelwego ya legae ya Beibele. E dira gore ditaba tše dibotse di kgone go fihla le mafelong ao batho ba gona ba kwago molaetša wa Mmušo ka sewelo.
“Ditšhaba Tšohle”: E le gore go newe bohlatse go “ditšhaba tšohle,” re swanetše go bolela therešo ya Beibele ka maleme a fapafapanego. Bao ba tsenago Wepesaeteng ya jw.org ba ka hwetša gabonolo tsebišo ka maleme a ka bago a 400, go feta a Wepesaete le ge e le efe yeo e lego gona.
E Diriše Gabotse: Wepesaete yeo e hlamilwego lefsa ya jw.org ga se ya dirwa feela ka morero wa go nea bohlatse go bao ba sa dumelego. E hlametšwe le gore Dihlatse tša Jehofa le tšona di e diriše. Ge e ba o na le Inthanete, re go kgothaletša gore o tlwaelane le Wepesaete ye ya jw.org. Go tla latela ditšhišinyo tša kamoo re ka e dirišago.
[Seswantšho go letlakala 3]
(Bakeng sa mongwalo o beakantšwego ka mokgwa wa kgatišo, bona kgatišo ka boyona)
Leka go e Diriša
1 Tlanya www.pr2711.com/nso moo go ngwalwago diaterese khomphutheng ya gago yeo e nago le Inthanete.
2 Bona seo se lego moo ka go kgotla dikarolo tše di nago le dihlogo, dikagare le dilinki.
3 Leka go diriša Wepesaete ya jw.org sedirišweng le ge e le sefe sa gago seo se nago le Inthanete. Tsela yeo matlakala a yona a tšwelelago ka yona a beakantšwe gore a lekane dikirining tše dinyenyane, eupša tsebišo yeo e lego moo ga se ya fetoga.