Rulaganya Dilo Tšeo o Tlago go di Dira Nakong ya Sehla sa Segopotšo

Ngwaga o mongwe le o mongwe batho ba Jehofa ba fela pelo ya go thabela Segopotšo ba le gotee. Nakong ya sehla sa Segopotšo, re diriša sebaka seo go tumiša le go leboga Jehofa ka mpho ya topollo. (Ef 1:3, 7) Ka mohlala, re šoma ka thata go mema batho go tla Segopotšong. Ba bangwe ba dira dithulaganyo tša gore ba tle ba kgone go tšea bobulamadibogo bja go thuša bja diiri tše 30 goba tše 50 kgweding ya March goba ya April. Na o ka se thabele go oketša nako yeo o e fetšago o le tšhemong sehleng se sa Segopotšo? O ka thušwa ke eng gore o kgone go dira seo?

Re kgona go dira dilo tše dintši ge e ba re ile ra di rulaganya e sa le pele. (Die 21:5) Thoma gona bjale go rulaganya ka ge sehla sa Segopotšo se le kgauswi. Iphe nako ya go nagana e sa le pele gore o nyaka go oketša bjang nako yeo o e fetšago o le tšhemong sehleng sa Segopotšo, ke moka o bone gore o ka dira eng gore o kgone go fihlelela seo. Ka morago ga moo, kgopela Jehofa gore a šegofatše maiteko a gago.—1Jo 5:14, 15.

Ke mekgwa efe yeo o ka e dirišago go oketša nako yeo o e fetšago o le tšhemong nakong ya sehla sa Segopotšo?