1921 Mengwaga E Lekgolo E Fetilego

BARUTWANA BA BEIBELE BA BOLELA DITABA TŠE DIBOTSE KA SEBETE

E le gore Barutwana ba Beibele ba kgone go botša batho ditaba tše dibotse, go be go hlokega gore ba be le sebete. Le gona, ba be ba tlo swanelwa ke go botša batho ba boleta “ditaba tše dibotse” le go botša batho ba babe ka “letšatši la tefetšo” la Modimo.

Ngwanabo rena J. H. Hoskin yoo a bego a dula Canada, ke yo mongwe wa batho bao ba bego ba botša batho ba bangwe ditaba tše dibotse ka sebete gaešita le ge a be a ganetšwa. Ka ngwaga wa 1921, o ile a kopana le moruti wa kereke ya Methodist. Ngwanabo rena Hoskin o ile a botša moruti yoo gore: “Ke kgopela go boledišana le wena ka taba e kgahlišago e tšwago ka Beibeleng eupša ge go ka ba le mo re ka se kwanego, yo mongwe le yo mongwe wa rena o tla sepela ka khutšo.” Eupša seo ga se sa kgonega. Ngwanabo rena Hoskin o re: “Re no boledišana ka metsotswana e sego kae feela. Eupša ge ke be ke bona moruti yoo a be a tswalela lebati a galefile, ke be ke bona eka galase ya lebati leo e tlo thubega.”

Moruti yoo o ile a rasa gomme a re: “Ke ka baka la’ng o sa ye wa boledišana le batho bao e sego Bakriste?” Ngwanabo rena Hoskin ga se a mo fetola. Eupša ge a sepela, o ile a bolela ka pelong gore, ‘moruti yo o itshwere eka yena ke yena Mokriste!’

Letšatšing le le latelago ge moruti yoo a be a rera kerekeng ya gagwe, o ile a bolela maaka ka ngwanabo rena Hoskin. Ngwanabo rena Hoskin o re: “Moruti yoo o ile a botša phuthego gore ke be ke le motho yo mobe kudu yoo a kilego a ba gona toropong yeo le gore ke be ke bolela maaka e bile ke be ke swanetše go bolawa.” Eupša seo ga se sa thibela Hoskin go tšwela pele a botša batho ditaba tše dibotse. O re: “Ke be ke thabela kudu go botša batho ditaba tše dibotse. Ba bangwe ba batho bao a bego a ba botša ditaba tše dibotse ba ile ba re: ‘Re a tseba gore o monna wa Modimo’ e bile ba ile ba ithaopela go nthuša ka dilo tšeo ke di hlokago.”

THUTO YA MOTHO KA NOŠI LE THUTO YA LAPA

Gore Barutwana ba Beibele ba thuše batho go kwešiša Beibele gakaone, ba be ba dula ba gatiša lenaneo la dipotšišo le dikarabo tša Beibele ka makasineng wa The Golden Agea woo ga bjale o bitšwago Phafoga! Go be go na le dipotšišo tša bafsa tšeo di theilwego Beibeleng tšeo batswadi ba bego ba ka boledišana le bana ba bona ka tšona. Batswadi ba be ba “botšiša bana ba bona dipotšišo tšeo gomme ba ba thuša go hwetša dikarabo ka Beibeleng.” E nngwe ya dipotšišo tšeo ke e rego, “Beibele e na le dipuku tše kae?” gomme e be e thuša bana le bafsa go kwešiša dilo tše bonolo ka Beibele. Potšišo e nngwe e be e re, “Na Bakriste ba therešo ka moka ba swanetše go tlaišwa?” gomme e be e thuša bafsa gore ba bolele ditaba tše dibotse ka sebete.

Le gona go be go na le lenaneo la dipotšišo le dikarabo tša Beibele leo le bego le diretšwe Barutwana ba Beibele bao ba bego ba tseba Beibele gakaone. Dikarabo tša dipotšišo tšeo di be di hwetšagala ka pukung ya Studies in the Scriptures. Barutwana ba bantši ba Beibele ba ile ba holwa ke mananeo ao. Eupša makasine wa The Golden Age wa December 21, 1921, o ile wa tsebiša gore mananeo ao a ka se sa hlwa a e ba gona. Ka baka la’ng?

PUKU E MPSHA!

Bana babo rena bao ba bego ba etelela pele ba ile ba lemoga gore Barutwana ba Beibele ba be ba swanetše go ithuta Beibele ka taba e itšego ka nako e tee. Ka gona ba ile ba lokolla puku ya The Harp of God ka November 1921. Batho bao ba ilego ba hwetša puku yeo ba ile ba thoma go ithuta Beibele ba nnoši ka go latela seo se ngwadilwego ka go yona. Puku yeo e ile ya thuša batho go ithuta gore Modimo o tlo re nea bophelo bjo bo sa felego nakong e tlago. Puku yeo e be e dirišwa bjang?

Ge motho a be a amogela puku o be a hwetša le karata e nyenyane yeo e tlago go mmontšha gore o swanetše go bala kae ka pukung yeo. Bekeng e latelago o be a hwetša karata e nngwe yeo e nago le dipotšišo tša go fapafapana tšeo di bolelago ka seo a bego a se bala. Mafelelong a karata yeo go be go ngwadilwe seo a bego a swanetše go tlo se bala bekeng e latelago.

Phuthego e be e romela morutwana karata e mpsha gatee ka beke ka dibeke tše 12. Gantši dikarata di be di romelwa ke batšofadi goba bao ba sa kgonego go ya ka ntlo le ntlo. Ka mohlala, Anna K. Gardner yoo a tšwago kua Millvale, Pennsylvania, U.S.A. o itše: “Ge puku ya The Harp of God e be e lokollwa e ile ya thuša sesi wa ka Thayle gore a be le mošomo o montši wa go romela dikarata tša go ba le dipotšišo beke le beke ka ge a thatafalelwa ke go sepela. Ge morutwana a be a fetša go araba dipotšišo tšeo, o be a etelwa ke yo mongwe ka phuthegong go mo thuša go kwešiša Beibele gakaone.

GO SA NA LE MODIRO O MONTŠI WA GO BOLELA DITABA TŠE DIBOTSE

Ge ngwaga o fela, ngwanabo rena J.F. Rutherford o ile a romela mangwalo diphuthegong ka moka. O be a ngwadile gore: “Barutwana ba Beibele ngwageng wo ba thušitše batho ba bantši kudu gore ba tle ka phuthegong mafelong a mantši go feta mengwageng e mengwe.” O ile a ngwala le gore: “Modiro wa go bolela ditaba tše dibotse e sa le o montši kudu. Ka gona, kgothaletšang ba bangwe gore le bona ba botše batho ba bangwe ditaba tše dibotse.” Barutwana ba Beibele ba ile ba dira seo a se boletšego. Ka 1922 Barutwana ba Beibele ba ile ba bolela ditaba tše dibotse ka sebete go feta le ge e le neng pele.