Dipotšišo Tše Di Tšwago Go Babadi
Ke eng seo Beibele e se bolelago ka go dikeno?
Keno ke ge motho a “tshepiša a tiišitše gore o tla dira selo se itšego gantši a re Modimo e tla ba hlatse.” E ka dirwa ka molomo goba ka go ngwalwa fase.
Batho ba bangwe ba nagana gore ke phošo go dira keno ka gobane Jesu o itše: “Le se ke la ena le gatee . . . Fela anke ‘ee’ ya lena e be ee, ‘aowa’ ya lena e be aowa; gobane se se fetago tše se tšwa go yo mobe.” (Mat. 5:33-37) Jesu o be a tseba gore Molao wa Moshe o be o laetše Baisiraele gore ba ikane maemong a mangwe le gore bahlanka ba Modimo bao ba botegago ba ile ba dira dikeno. (Gen. 14:22, 23; Ek. 22:10, 11) O be a tseba le gore Jehofa o ile a dira dikeno. (Baheb. 6:13-17) Jesu o be a sa bolele gore ga se ra swanela go ikana. Eupša o be a e ra gore ga se ra swanela go ikanela dilo tša go se re selo. Re swanetše go lebelela go phetha keno ya rena e le selo se se kgethwa. Re swanetše go dira seo re se tshepišitšego.
O swanetše go dira’ng ge e ba o ka kgopelwa gore o dire keno? Sa pele, kgonthišega gore o tla kgona go phetha seo o se ennego. Ge e ba o sa kgonthišege, go kaone gore o se ke wa dira keno yeo. Lentšu la Modimo le re lemošitše gore: “Go kaone ge o sa ene go e na le gore o ene gomme wa se phethe.” (Mmo. 5:5) Sa bobedi, nagana ka Melao ya motheo yeo e sepedišanago le keno yeo, ke moka o dire keno yeo e sepedišanago le letswalo la gago leo le tlwaeditšwego. E mengwe ya Melao yeo ya motheo ke efe?
Dikeno tše dingwe ga di ganetšane le melao ya Modimo. Ka mohlala, Dihlatse tša Jehofa di dira dikeno ge di nyalana. Banyalani ba ba tshepišana pele ga Modimo le batho gore ba tlo hlokomelana, ba ratane le go hlomphana ge “bobedi bja bona ba sa phela.” (Banyalani ba bangwe ba ka no se bolele mantšu a ka go lebanya eupša le bona ba dirile keno pele ga Modimo.) Mafelelong ba bitšwa monna le mosadi e bile lenyalo la bona le swanetše go ba la go ya go ile. (Gen. 2:24; 1 Bakor. 7:39) Keno ye ya lenyalo e nepagetše e bile e dumelelana le thato ya Modimo.
Dikeno tše dingwe di thulana le melao ya Modimo. Mokriste a ka se ikane gore o tla šireletša naga ka dibetša goba go latola tumelo ya gagwe go Modimo. Ge a dira bjalo o tla be a tshela melao ya Modimo. Bakriste ga se “karolo ya lefase,” ka gona ga se ra swanela go tšea karolo dingangišanong le dintweng tša lona.—Joh. 15:19; Jes. 2:4; Jak. 1:27.
Dikeno tše dingwe di ithekgile ka letswalo la motho. Ka dinako tše dingwe, re swanetše go naganišiša ka keletšo ya Jesu yeo e rego: “Neang Kesara tša Kesara eupša Modimo le mo nee tša Modimo” pele re ka dira keno.—Luka 20:25.
Ka mohlala, a re re Mokriste o tlatša fomo ya go ya go dula nageng e itšego go ba ya go dumelelwa go dula moo ka nakwana ke moka o hwetša gore o swanetše go dira keno ya gore o tlo phela ka go dumelelana le melao e itšego ya naga yeo. Ge e ba keno ya go phela ka go dumelelana le melao ya naga yeo e sa dumelelane le melao ya Modimo, letswalo la ngwanabo rena leo le tlwaeditšwego gabotse le ka se mo dumelele gore a dire keno yeo. Mmušo o ka dumelela gore molao o kaonefatšwe e le gore o se ke wa tshwenya letswalo la Mokriste.
Go dira keno o latela molao wo o kaonefaditšego o ka dumelelana le molao wa motheo wo o lego go Baroma 13:1, wo o rego: “Anke batho bohle ba ikokobeletše balaodi ba bagolo.” Ka gona Mokriste a ka phetha ka gore ga gona bothata go dira keno yeo e lego seo Modimo a laelago Bakriste gore ba se dire.
Ke ga bohlokwa gore re dire dilo ka go dumelelana le matswalo a rena ao a tlwaeditšego ke Beibele ge re kgopelwa go dira keno ka boitšhišinyo bjo itšego bja mmele. Baroma ba kgale le Basithe ba be ba dira dikeno ka go emiša ditšhoša tša bona ka go dira bjale ba be ba diriša leswao la modimo wa ntwa go kgonthišetša gore ba tla botegela dikeno tša bona. Bagerika ba be ba emišetša seatla legodimong ge ba be ba dira dikeno. Ge ba dira bjalo ba be ba bontšha gore ba be ba lemoga gore go na le Modimo yo a na go le matla yo a kwago dilo tšeo ba di bolelago le go bona dilo tšeo ba di dirago yo batho ba swanetšego go mo kwa.
Bahlanka ba Jehofa ga se ba swanela go ikana ba diriša maswao ao a sepedišanago le bodumedi bja maaka. Eupša o swanetše go dira’ng ge e ba kgoro ya tsheko e go kgopela gore o bee letsogo la gago godimo ga Beibele gomme o ikane gore o tlo bolela nnete? Ge e ba go le bjalo, o ka dumela go dira seo ka ge Beibele e re botša ka bahlanka ba Modimo bao ba botegago bao ba ilego ba diriša boitšhišinyo bja mmele go dira dikeno. (Gen. 24:2, 3, 9; 47:29-31) Go bohlokwa go gopola gore ge o dira keno yeo, o enela Modimo gore o tlo bolela nnete. O swanetše go ba o ikemišeditše go bolela nnete ge o araba potšišo enngwe le enngwe yeo ba go botšišago yona.
Ka ge segwera sa rena le Jehofa se le bohlokwa kudu, re swanetše go rapela le go naganišiša pele re dira keno yeo re kgopelwago go e dira, le gona re swanetše go kgonthišetša gore go dira keno yeo ga go thulane le melao ya Modimo e bile ga go tshwenye matswalo a rena. Ge e ba o kgetha go dira keno o swanetše go kgonthišetša gore wa e phetha.—1 Pet. 2:12.