Tšwelang Pele le “Agana”

1. Go ya ka 1 Bathesalonika 5:11, ka moka ga rena re swanetše go dira’ng?

NA PHUTHEGO ya geno e ile ya aga Holo ya Mmušo goba go e mpshafatša? Ge e ba go le bjalo o swanetše go ba o gopola letšatši la mathomo ge o eya Holong yeo. O be o leboga Jehofa kudu. Mohlomongwe o be o thabile kudu moo o ilego wa nyaka go lla e bile o palelwa ke go opela kopelo ya mathomo. Diholo tša rena tšeo di agilwego gabotse di tumiša Jehofa. Eupša re mo tumiša le go feta ge re diriša mohuta o mongwe wa go aga. Mohuta wo wa go aga o bohlokwa go feta go aga meago yeo re e bonago. O akaretša go aga batho bao ba tlago Diholong tša rena tša Mmušo. Moapostola Paulo o be a naganne ka mohuta wo wa go aga ge a be a ngwala mantšu ao a lego go 1 Bathesalonika 5:11, ao a tšwelelago sehlogong sa rena sa lehono.—Bala.

2. Re tlo boledišana ka eng sehlogong se?

² Moapostola Paulo ke mohlala o mobotse kudu wa motho yo a kgonago go aga Bakristegotee le yena le go ba kwela bohloko. Sehlogong se re tlo bona kamoo a thušitšego bana babo le dikgaetšedi gore (1) ba kgotlelele mathata, (2) ba be le khutšo (3) le go tiiša tumelo ya bona go Jehofa. A re boneng gore re ka mo ekiša bjang gore le rena re age bana babo rena le dikgaetšedi lehono.—1 Bakor. 11:1.

PAULO O ILE A THUŠA BANA BABO LE DIKGAETŠEDI GO KGOTLELELA MATHATA

3. Paulo o ile a bontšha bjang tekatekano?

³ Paulo o be a rata bana babo le dikgaetšedi kudu. O ile a kopana le mathata a mantši ka gona ge bana babo le dikgaetšedi ba be ba kopana le mathata, o be a ba kwela bohloko le go ba šokela. Ka letšatši le lengwe Paulo o ile a felelwa ke tšhelete gomme a swanelwa ke go šoma gore a kgone go itlhokomela le go hlokomela bao ba sepelago le yena. (Dit. 20:34) O be a šoma ka go dira ditente. Ge a fihla kua Korinthe, o ile a thoma ka go šoma le Akhwila le Perisila bao le bona ba bego ba dira ditente. Eupša ka “Sabatha e nngwe le e nngwe” o be a botša Bajuda ditaba tše dibotse. Ge Silase le Timotheo ba fihla, Paulo o ile a “swarega kudu ka lentšu.” (Dit. 18:2-5) Paulo ga se a ka a lebala gore morero o mogolo bophelong bja gagwe ke go hlankela Jehofa. Ka ge Paulo a be a šoma ka thata bodireding e bile a kgona go itlhokomela, o ile a kgothatša bana babo le dikgaetšedi. O ile a ba botša gore ba se ke ba dumelela mathata a bona a bophelo le go hlokomela malapa a bona go ba dira gore ba se sa hlankela Jehofa gabotse goba go se šetše “dilo tše bohlokwa kudu.”—Bafil. 1:10.

4. Paulo le Timotheo ba ile ba thuša Bakristegotee le bona bjang gore ba kgotlelele kganetšo?

⁴ Ka morago ga gore Phuthego ya Thesalonika e hlongwe, Bakriste ba moo ba ile ba kopana le kganetšo e kgolo kudu. Ge sehlopha sa baganetši se be se sa hwetše Paulo le Silase, se ile sa goga “ba bangwe ba bana babo go babuši ba motse,” gomme sa re: “Banna ba ka moka ba ganetšana le ditaelo tša Kesara.” (Dit. 17:6, 7) Nagana gore banna bao e sa tšwago go ba Bakriste ba be ba tšhogile bjang ge ba bona gore banna ba motse ba ba hlanogetše. Ba ka ba ba ile ba se sa ba le mafolofolo bodireding bja bona, eupša Paulo o be a sa nyake seo se direga. Le ge yena le Silase ba be ba swanetše go sepela, ba ile ba kgonthišetša gore phuthego yeo e mpsha e hlokomelwa gabotse. Paulo o ile a botša Bathesalonika gore: “Re ile ra roma Timotheo, e lego ngwanabo rena . . . , gore a le matlafatše le go le homotša ka baka la tumelo ya lena, gore go se be le yo a ka šišinywago ke ditlaišo tše.” (1 Bathes. 3:2, 3) Go ka direga gore Timotheo le yena a ka ba a ile a ganetšwa ge a be a le motseng wa gabo wa Lisitara. O bone kamoo Paulo a bego a matlafatša bana babo ba moo. Ka morago ga gore Timotheo a bone dilo ka moka tšeo Jehofa a ba diretšego tšona, o be a ka kgodiša bana babo le dikgaetšedi gore dilo ka moka di be di tlo loka.—Dit. 14:8, 19-22; Baheb. 12:2.

5. Ngwanabo rena Bryant o ile a holega bjang ka thušo yeo a e neilwego ke mogolo?

⁵ Paulo o ile a kgothatša Bakristegotee le yena ka tsela efe e nngwe? Ge Paulo le Baranaba ba be ba boela Lisitara, Ikonia le Antiokia, ba ile “ba kgetha bagolo ka diphuthegong.” (Dit. 14:21-23) Ke therešo gore bagolo bao ba bego ba kgethilwe ka nako yeo ba ile ba homotša diphuthego kudu go swana le ge bagolo ba homotša diphuthego lehono. Bona seo se boletšwego ke ngwanabo rena yo a bitšwago Bryant, o re: “Ge ke be ke na le mengwaga e 15 tate o ile a sepela ka gae gomme mma a kgaolwa. Ke ile ka nyama le go ikwa ke lahlegile.” Bryant o thušitšwe ke eng go kgotlelela dinako tšeo tše thata? O re: “Mogolo yo a bitšwago Tony o be a bolela le nna ge re le dibokeng le ka dinako tše dingwe. O ile a mpotša ka batho bao ba ilego ba kopana le mathata eupša ba tšwela pele ba thabile. O ile a mpalela Psalme 27:10 gomme a dula a mpotša ka Hesekia yoo a bego a tšwela pele a botega le ge tatagwe a se a mmeela mohlala o mobotse.” Mantšu a Tony a ile a thuša Bryant Bjang? O re: “Mantšu a Tony a ile a nkgothatša gomme ka thoma tirelo ya nako e tletšego.” Bagolo, dulang le ikemišeditše go thuša bana babo rena le dikgaetšedi ba go swana le Bryant bao ba hlokago “lentšu le lebotse” le kgothatšo.—Die. 12:25.

6. Paulo o be a diriša dikanegelo tša bophelo bjang go kgothatša bana babo le dikgaetšedi?

⁶ Paulo o ile a botša bana babo gore, “leru le legolo la dihlatse” le ile la kgona go kgotlelela mathata ka gobane Jehofa o be a le nea matla. (Baheb. 12:1) Paulo o be a kwešiša kamoo dikanegelo tša bahlanka ba Jehofa ba nakong e fetilego di bego di dira gore bana babo le dikgaetšedi ba be le sebete le go ba thuša gore ba dule ba le ‘motseng wa Modimo yo a phelago.’ (Baheb. 12:22) Le rena lehono re kgothatša ke mehlala ya bahlanka ba Jehofa ba nakong e fetilego. Ke mang a sa kago a matlafatšwa ke go bala kamoo Jehofa a thušitšego Gideone, Baraka, Dafida, Samuele, le ba bangwe ba bantši? (Baheb. 11:32-35) Le lehono re na le mehlala e mentši yeo e re matlafatšago. Kua ntlongkgolo ya Dihlatse tša Jehofa ba amogela mangwalo ao a tšwago go bana babo rena le dikgaetšedi bao ba matlafaditšwego ke go bala ka diphihlelo tša bahlanka ba Jehofa ba mehleng ya rena. 

PAULO O BONTŠHITŠE BANA BABO LE DIKGAETŠEDI GORE KE BJANG BA KA BAGO LE KHUTŠO

7. O ithuta’ng keletšong ya Paulo yeo e lego go Baroma 14:19-21?

⁷ Paulo o ile a bontšha bana babo le dikgaetšedi gore ba ka ba le khutšo bjang. Re aga bana babo rena le dikgaetšedi ge re dira gore go be le khutšo ka phuthegong. Ga se ra swanela go dumelela go fapana ga dikgopolo go re aroganya. Le gona ga se ra swanela go ganetša batho ba bangwe ba dira dilo tšeo di sa thulanego le melao ya Beibele. Nagana ka mohlala wo. Phuthego ya Roma e be e na le Bajuda le Bakriste bao e sego Bajuda. Le gona ka nako yeo, Molao wa Moshe wa gore ga se ba swanela go ja dijo tše dingwe o be o fedile. (Mar. 7:19) Go tloga ka nako yeo Bakriste ba Bajuda ba be ba ka ja dijo tše dingwe le tše dingwe tšeo ba di nyakago. Eupša Bakriste ba bangwe ba Bajuda ba be ba sa nyake go ja dijo tšeo Molao wa Moshe o bego o re ba se ke ba di ja. Phuthego e ile ya arogana ka baka la taba ye. Paulo o ile a bontšha bohlokwa bja go ba le khutšo ka gore: “Ke mo gobotse go se je nama, go se nwe beine goba go se dire selo le ge e le sefe seo ka sona ngwaneno a kgopišegago.” (Bala Baroma 14:19-21.) Paulo o ile a bontšha bana babo gape gore dingangišano tše di tlo gobatša phuthego. Le gona o be a ikemišeditše go fetoša tsela yeo a dirago dilo ka yona gore a se ke a kgopiša ba bangwe. (1 Bakor. 9:19-22) Le rena re ka aga ba bangwe le go dira gore go be le khutšo ge re sa ngangišane ka dilo tšeo motho a ikgethelago go di dira tšeo di sa thulanego le melao ya Modimo.

8. Paulo o ile a arabela bjang ge taba e bohlokwa e dira gore ka phuthegong go se sa ba le khutšo?

⁸ Paulo o re beetše mohlala o mobotse ka go dira khutšo le bao ba sa dumelelanego ka ditaba tše bohlokwa. Ba bangwe ka phuthegong ya Bakriste ba mehleng ya pele, ba be ba re Bakriste bao e sego Bajuda ba bolotšwe gore ba se ke ba kgetholla ke batho ba bangwe. (Bagal. 6:12) Paulo o be a sa dumelelane le taba yeo. Eupša go e na le gore a nyake gore ba latele tsela ya gagwe, o ile a iša bothata bjo go baapostola le bagolo ba Jerusalema. (Dit. 15:1, 2) Ka go dira bjalo, Paulo o ile a kgona go thuša Bakriste bao gore ba dule ba thabile le go ba le khutšo ka phuthegong.—Dit. 15:30, 31.

9. Re ka latela mohlala wa Paulo bjang?

⁹ Ge go ka tsoga bothata gare ga rena re swanetše go kgopela thušo go bao Jehofa a ba kgethilego gore ba hlokomele phuthego. Le gona re ka nyaka tlhahlo ka go lebelela dikgatišo tša rena tšeo di theilwego Beibeleng. Ge e ba re ka nyaka tlhahlo go dilo tše re boletšego ka tšona gomme ra se nyake gore go tšewe phetho yeo rena re naganago gore ke yona, re tlo dira khutšo ka phuthegong.

10. Ke eng se sengwe seo Paulo a ilego a se dira gore go be le khutšo ka phuthegong?

¹⁰ Paulo o dirile gore go be le khutšo ka go lebelela dika tše dibotse tša bana babo le dikgaetšedi e sego mafokodi a bona. Mafelelong a lengwalo leo Paulo a le ngwaletšego Baroma o ile a bitša bana babo ka maina le go bolela ka dika tša bona tše dibotse. Re ka ekiša mohlala wa Paulo ka go bolela ka dika tše dibotse tša bana babo rena le dikgaetšedi. Ge re dira bjalo segwera sa rena le bana babo rena le dikgaetšedi se tlo tia gomme ra ratana ka phuthegong.

11. Ge re e ba le dingangišano re ka dira’ng gore go be le khutšo?

¹¹ Ka dinako tše dingwe Bakriste bao e lego kgale ba hlankela Jehofa le bona ba ka ba le dingangišano. Se se ile sa diragalela Paulo le mogwera wa gagwe yo mogolo Baranaba. Ba ile ba ngangišana ka taba ya ge e ba ba swanetše go sepela le Mareka goba aowa. Go ile “gwa tsoga ngangišano e bogale” gare ga bona moo ba ilego ba phetha ka go se sa sepela mmogo. (Dit. 15:37-39) Eupša Paulo, Baranaba le Mareka ba ile ba lokiša segwera sa bona e lego seo se bontšhago gore ba be ba nyaka gore go be le khutšo ka phuthegong. Paulo ka morago o ile a bolela gabotse ka Baranaba le Mareka. (1 Bakor. 9:6; Bakol. 4:10) Le rena re swanetše go lokiša diphapano tša rena le bana babo rena le dikgaetšedi ka phuthegong gomme re lebelele dika tša bona tše dibotse. Ge re dira bjalo re tlo ba le khutšo le botee ka phuthegong.—Baef. 4:3.

PAULO O ILE A TIIŠA TUMELO YA BANA BABO RENA LE DIKGAETŠEDI

12. Ke mathata afe a mangwe ao bana babo rena le dikgaetšedi ba kopanago le ona?

¹² Re aga bana babo rena le dikgaetšedi ge re tiiša tumelo ya bona go Jehofa. Ba bangwe ga ba swarwe gabotse ke ba leloko, bao ba šomago le bona le bao ba tsenago le bona sekolo ka baka la ditumelo tša bona. Ba bangwe ba ka ba ba babja kudu goba ba kwele bohloko. Ba bangwe ba ka ba ba kolobeditšwe mengwageng e mentši e fetilego gomme ba eme nako e telele gore tshepedišo ye ya dilo e fele. Maemo a go swana le a a ka leka tumelo ya Bakriste lehono. Bakriste ba mehleng ya pele ba ile ba kopana le mathata a swanago. Paulo o ile a dira’ng go tiiša bana babo le dikgaetšedi?

13. Paulo o ile a thuša bjang bao ba bego ba kwerwa ka baka la ditumelo tša bona?

¹³ Paulo o be a diriša mangwalo go aga tumelo ya bana babo le dikgaetšedi. Ka mohlala Bakriste ba Bajuda ba be ba sa tsebe gore ba botše ba gabo bona eng, ge ba gabo bona ba be ba ba botša gore tumelo ya Sejuda e feta ya Bokriste. Ke therešo gore lengwalo leo Paulo a le ngwaletšego Baheberu le ile la matlafatša Bakriste bao. (Baheb. 1:5, 6; 2:2, 3; 9:24, 25) Dilo tšeo Paulo a di boletšego di be di ka thuša Bakriste bao gore ba tsebe gore ba ya go fetola ba maloko a bona bjang. Lehono re ka thuša Bakriste bao ba kwerwago go hwetša dikgatišo tšeo di theilwego Beibeleng tšeo di tlago go thuša go fetola bao ba ba kwerago. Ka mohlala ge bafsa ba kwerwa ka gore ba dumela gore dilo ga se tša no itiragalela, re ka ba thuša go hwetša poroutšhara ya Na Dilo tše di Phelago di Bopilwe? le ya Bophelo bo Thomile Bjang—Ekwa Dikarabo tša Dipotšišo tše Hlano Gore ba bontšhe batho bao ba ba kwerago gore ke ka baka la eng ba dumela gore dilo ga se tša no itiragalela.

14. Le ge Paulo a be a swaregile ka go bolela ditaba tše dibotse le go ruta, o le a dira eng se sengwe?

¹⁴ Paulo o ile a kgothaletša bana babo le dikgaetšedi gore ba bontšhane lerato ka ‘mediro e mebotse.’ (Baheb. 10:24) Ga se a no thuša bana babo le dikgaetšedi feela ka dilo tšeo a di bolelago eupša o ba thušitše le ka dilo tšeo a di dirago. Ka mohlala, ge Bakristegotee le yena ba kua Judea ba be ba wetšwe ke tlala, Paulo o ile a ba thuša ka dilo tšeo ba di hlokago. (Dit. 11:27-30) Le ge Paulo a be a swaregile ka go bolela ditaba tše dibotse le go ruta, o be a nyaka ditsela tšeo a ka thušago bana babo ka dilo tšeo ba di hlokago. (Bagal. 2:10) Ka go dira bjalo o ile a tiiša tumelo ya bana babo le go ba bontšha gore Jehofa o tlo ba hlokomela. Lehono ge re diriša matla a rena, nako ya rena le bokgoni bja rena go thuša ka modiro wa tlhakodišo, re aga tumelo ya bana babo rena le dikgaetšedi. Re ka dira se gape ka go neela modirong wa lefase ka moka. Ge re diriša ditsela tše le tše dingwe, re thuša bana babo rena le dikgaetšedi go tshepa gore Jehofa a ka se ba tlogele.

15-16. Re swanetše go swara bjang bao tumelo ya bona e fokolago?

¹⁵ Paulo o ile a tšwela pele a kgothatša bao tumelo ya bona e bego e fokola. O ile a ba bontšha lešoko e bile a bolela le bona ka tsela e borutho. (Baheb. 6:9; 10:39) Ka mohlala go lengwalo leo a le ngwaletšego Baheberu, gantši o be a šomiša mantšu “re” le “rena,” go bontšha gore le yena o be a swanetše go diriša keletšo yeo a bego a ba nea yona. (Baheb. 2:1, 3) Le rena re swanetše go ekiša Paulo ka go tšwela pele re kgothatša bao tumelo ya bona e fokolago. Re a ba aga le go ba bontšha gore re tloga re ba kgahlegela. Ka tsela ye re tloga re bontšha gore re a ba rata. Tsela yeo re kgethago mantšu ge re bolela le bona e ka ba aga.

¹⁶ Paulo o ile a kgonthišetša bana babo le dikgaetšedi gore Jehofa o bona mošomo wa bona o mobotse. (Baheb. 10:32-34) Re ka dira se se swanago ge re thuša ngwanabo rena yo tumelo ya gagwe e fokolago. Re ka mo kgopela gore a re botše kamoo a ilego a hwetša ditherešo ka gona goba ra mo kgopela gore a re botše kamoo Jehofa a ilego a mo thuša ka gona. Re ka diriša sebaka seo go mmotša gore Jehofa ga se a lebala seo a ilego a se dira ka ge a ile a mmontšha gore o a mo rata le gore Jehofa ka se tsoge a mo tlogetše. (Baheb. 6:10; 13:6) Dipoledišano tša mohuta wo di ka kgothatša bana babo rena le dikgaetšedi gore ba tšwele pele ba hlankela Jehofa.

“TŠWELANG PELE LE KGOTHATŠANA”

17. Re swanetše go dula re kaonefatša bokgoni bja go dira eng?

¹⁷ Go swana le ge motho yo a šomago ka go aga a dula a kaonefatša bokgoni bja gagwe, le rena re swanetše go kaonefatša bokgoni bja rena bja go agana. Re ka thuša ba bangwe go kgotlelela mathata a bona ka go abelana le bona mehlala ya bao ba ilego ba kgotlelela mathata. Re ka dira gore go be le khutšo ka go bolela ka dika tše dibotse tša bana babo rena le go rarolla mathata ge go e ba le dingangišano. Re ka tšwela pele re tiiša tumelo ya bana babo rena le dikgaetšedi ka go boledišana le bona ka ditherešo tša Beibele, ka go ba nea thušo le go thekga bao ba fodilego moyeng.

18. O ikemišeditše go dira’ng?

¹⁸ Bao ba šomago ka go aga meago ya mokgatlo ba ikwa ba thabile e bile ba kgotsofetše. Le rena re ka thaba le go kgotsofala ka go aga tumelo ya bana babo rena le dikgaetšedi. Go fapana le meago yeo re e bonago yeo e feleletšago e senyegile, ge re aga tumelo ya bana babo rena le dikgaetšedi go tlo dula go na le ditlamorago tše botse! A re duleng re ikemišeditše go “kgothatšana e bile [re] agana.”—1 Bathes. 5:11.