Dilo Tšeo Di Ka Go Thušago Go Ithuta
Dira Dilo tše Bohlokwa Pele
Ka moka ga rena re na le nako e lekanyeditšwego ya go ithuta. Re ka e diriša bjang ka bohlale? Thoma ka go ipha nako e lekanego ya go bala. O tlo holega kudu ge o ka bala karolwana e nyenyane ka kelohloko go e na le go bala dilo tše dintši ka lebelo.
Dira dilo tše bohlokwa pele. (Baef. 5:15, 16) O ka diriša ditšhišinyo tše di latelago:
Bala Beibele letšatši le letšatši. (Ps. 1:2) O ka thoma ka go diriša lenaneo la rena la mmalo wa Beibele wa diboka tša gare ga beke.
Lokišetša thuto ya Morokami le diboka tša gare ga beke. Lokišetša gabotse gore o tle o kgone go nea dikarabo.—Ps. 22:22.
O ka ipeela nako ya go hwetša dijo tše dingwe tša moya, mohlomongwe ka go bala dikgatišo tša Morokami wa batho bohle, go bogela dibidio goba go bala dihlogo tše dingwe tšeo di lego go jw.org.
Ithute ka dilo tšeo di go kgahlago. O ka dira nyakišišo ka bothata bjo o nago le bjona, potšišo ye o nago le yona goba taba e itšego ya ka Beibeleng yeo o nyakago go e kwešiša gakaone. E le go bona gore o ka dira bjang se, e ya go karolwana e rego “Mešomo ya go Ithuta” yeo e lego go jw.org/nso.