Na o “Ikemišeditše go Kwa”?

1. Ke ka baka la’ng nka thatafalelwa ke go kwa?

Na ka dinako tše dingwe o thatafalelwa ke go kwa? Kgoši Dafida le yena ka dinako tše dingwe o be a thatafalelwa ke go kwa, ke ka lebaka leo a ilego a rapela Modimo a mo kgopela a re: “Ntire gore ke be le moya wa go rata go kwa.” (Ps. 51:12) Dafida o be a rata Jehofa. Eupša ka dinako tše dingwe o be a fela a thatafalelwa ke go kwa, le rena re ka fela re thatafalelwa ke go kwa. Ka baka la’ng? Sa pele, ka gobane re belegwe re na le bothata bja go kwa bjo re bo hweditšego go tšwa go batswadi ba rena ba mathomo. Sa bobedi, Sathane o dula a re hlohleletša gore re se ke ra kwa go no swana le yena. (2 Bakor. 11:3) Sa boraro, re phela le batho bao ba nago le moya o mobe. Beibele e re ke “moya woo bjale o šomago go bana ba go se kwe.” (Baef. 2:2) Re swanetše go šoma ka thata gore re se ke ra dira sebe le gona re se ke ra dumelela Sathane le batho bao ba mo thekgago ba dira gore re se kwe. Le gona, re swanetše go šoma ka thata gore re kwe Jehofa e bile re kwe le bao a ba neilego matla a go laola.

2. Go “ikemišetša go kwa” go bolela’ng? (Jakobo 3:17)

² Bala Jakobo 3:17. Modimo o ile a dira gore Jakobo a ngwale gore batho ba bohlale ba “ikemišeditše go kwa.” O be a e ra gore’ng? Re swanetše go ikemišetša go kwa bao Jehofa a ba neilego matla a go laola. Eupša Jehofa ga a nyake gore re kwe motho yo a nyakago re dira dilo tšeo di ganetšanago le melao ya gagwe.—Dit. 4:​18-20.

3. Ke ka baka la’ng Jehofa a nyaka gore re kwe bao ba re beelago melao?

³ Go ka ba bonolo go kwa Jehofa ka gobane tlhahlo yeo a re neago yona, ga e na diphošo. (Ps. 19:7) Eupša go ka ba thata gore re kwe batho ka gobane ba fela ba dira diphošo. Le ge batho ba dira diphošo, Tatago rena wa legodimong o file batswadi, baetapele ba mmušo le bagolo matla a lekanyeditšwego a go laola. (Die. 6:20; 1 Bathes. 5:12; 1 Pet. 2:​13, 14) Ge re ba kwa re tla be re bontšha gore re kwa Jehofa. A re boneng gore re ka dira’ng gore re kwe batho bao Jehofa a ba neilego matla a go laola le ge ka dinako tše dingwe re sa dumelelane le dilo tšeo ba nyakago re di dira.

EKWA BATSWADI BA GAGO

4. Ke ka baka la’ng bana ba bantši ba sa kwe batswadi ba bona?

⁴ Bana ba bantši ba phela le dithaka tša bona tša “go se kwe batswadi.” (2 Tim. 3:​1, 2) Ke ka baka la’ng ba sa kwe batswadi? Ba bangwe ba nagana gore batswadi ba bona ba a ba gatelela. Ba nagana gore batswadi ba ba laela gore ba dire dilo tšeo bona ka bo bona ba palelwago ke go di dira. Ba bangwe ba bona melao yeo batswadi ba bona ba ba neago yona e le e thata le gore dikeletšo tša bona ke tša kgale e bile di ka se ba thuše ka selo. Baswa, na le lena le fela le ikwa ka mokgwa woo? Bana ba bantšhi ba re ga go bonolo go kwa taelo ya Jehofa yeo e rego: “Bana, kwang batswadi ba lena ka go dumelelana le thato ya Modimo gobane se se lokile.” (Baef. 6:1) Bjale le ka thušwa ke eng gore lekwe taelo ye?

5. Go ya ka Luka 2:​46-52 ke ka baka la’ng Jesu e le mohlala o mobotse wa gore baswa ba kwe batswadi ba bona?

⁵ Le ka thušwa ke go ekiša Jesu yo a beilego mohlala o mobotse wa go kwa. (1 Pet. 2:​21-24) O be a phethagetše eupša batswadi ba gagwe ba be ba se ba phethagala. Jesu o be a ekwa batswadi ba gagwe le ge ba be ba fela ba dira diphošo e bile ka dinako tše dingwe ba sa kwešiše dilo tšeo a di dirago. (Ek. 20:12) Ka mohlala, nagana ka seo se ilego sa direga ge Jesu a be a na le mengwaga e 12. (Bala Luka 2:​46-52.) Batswadi ba gagwe ba ile ba mo tlogela Jerusalema. E be e le boikarabelo bja Josefa le Maria go kgonthišetša gore bana ba bona ba na le bona ka moka ge ba boela gae. Eupša ge Josefa le Maria ba hwetša Jesu, Maria o ile a sola Jesu ka gore o šetše Jerusalema. Jesu a ka ba ile a botša batswadi ba gagwe gore ga se ba swanela go mo sola ka gobane ke bona ba mo tlogetšego. Eupša ga se a dira bjalo, go ena le moo o ile a ba araba ka tlhompho. Josefa le Maria “ba ile ba se kwešiše seo a ba botšago sona.” Eupša Jesu o ile “a tšwela pele a ikokobeleditše bona.”

6-7. Baswa ba ka thušwa ke’ng gore ba kwe batswadi ba bona?

⁶ Baswa, na le thatafalelwa ke go kwa batswadi ba lena ge ba dira diphošo goba ge ba sa le kwešiše? Ge e ba go le bjalo le ka thušwa ke’ng gore le dule le ba kwa? Sa pele, naganang gore Jehofa yena o ikwa bjang. Beibele e re ge le ekwa batswadi ba lena, “se se kgahliša kudu Moreneng.” (Bakol. 3:20) Jehofa o a tseba gore ka dinako tše dingwe batswadi ba lena ba ka no se le kwešiše goba ba le beela melao yeo go sego bonolo go ekwa. Eupša ge le ka ba kwa, le tlo thabiša Jehofa.

⁷ Sa bobedi, naganang gore batswadi ba lena bona ba ikwa bjang. Ge le ekwa batswadi ba lena, ba tlo thaba e bile ba tlo le tshepa. (Die. 23:​22-25) Le gona le tlo thoma go ba bagwera. Ngwanabo rena yo a bitšwago Alexandre yo a tšwago Belgium o re: “Ge ke be ke thoma go kwa batswadi ba ka, re ile ra ba bagwera e bile ra thaba kudu.”b Sa boraro, nagana ka moo go kwa batswadi ba gago gona bjale go tlago go go thuša nakong e tlago. Paulo yo a dulago Brazil o re: “Go kwa batswadi ba ka go nthušitše gore ke kwe Jehofa le bao ba nago le matla a go laola.” Beibele e re nea lebaka le legolo la gore re kwe batswadi ba rena. E re: “E le gore dilo di go sepelele gabotse le gore o phele galelele lefaseng.”—Baef. 6:​2, 3.

8. Ke ka baka la’ng Baswa ba bantši ba kgetha go kwa batswadi ba bona?

⁸ Baswa ba bantši ba ile ba bona gore ge ba ekwa batswadi dilo di ba sepelela gabotse. Luiza yo le yena a tšwago Brazil o be a sa kwešiše gore ke ka baka la’ng batswadi ba gagwe ba sa nyake a e ba le founo ka gobane baswa ba go lekana le yena ba be ba šetše ba ena le difouno. Eupša o ile a bona gore batswadi ba gagwe ba be ba mo šireletša. Gona bjale, ga a sa bona melao yeo batswadi ba gagwe ba bego ba mo nea yona e mo gatelela ka gobane o šetše a bone gore e a mo hola. Kgaetšedi Elizabeth yo a tšwago United States, ka dinako tše dingwe o be a thatafalelwa ke go kwa batswadi ba gagwe. O re: “Ge ke sa kwešiše melao yeo batswadi ba ka ba e beago, ke gopola ka moo melao yeo ba ilego ba mpeela yona e ntšhireleditšego ka gona.” Monica yo a dulago Armenia, o re dilo di be di dula di mo sepelela gabotse ge a be a ekwa batswadi ba gagwe go feta ge a be a sa ba kwe.

EKWA “BALAODI BA BAGOLO”

9. Batho ba bantši ba ikwa bjang ka go latela molao?

⁹ Batho ba bantšhi ba re re swanetše go ba le mebušo e bile re swanetše go kwa e mengwe ya melao yeo “balaodi ba bagolo” ba re beelago yona. (Baroma 13:1) Eupša bona batho bao ba ka no se kwe melao yeo ba sa e ratego goba yeo ba naganago gore e a ba gatelela. Ka mohlala, nagana ka go lefa motšhelo. Nageng e nngwe ya Europe batho ba bantšhi ba re “ga se wa swanela go lefa motšhelo ge e ba o bona okare o a go gatelela.” Ke ka baka leo batho ba nageng yeo ba sa lefego metšhelo ka moka yeo mmušo o nyakago ba e lefa.

10. Ke ka baka la’ng re swanetše go kwa le melao yeo re sa e ratego?

¹⁰ Beibele e re botša gore mebušo ya batho ke yona yeo e hlolago mathata, e laolwa ke Sathane e bile go se gokae e tlo fedišwa. (Ps. 110:​5, 6; Mmo. 8:9; Luka 4:​5, 6) Le gona, e re botša gore “yo a ganetšago bolaodi o lwantšhana le thulaganyo ya Modimo.” Jehofa o dumeletše balaodi ba bagolo gore ba buše ka nakwana e le gore dilo di kgone go sepela gabotse. Ka gona re swanetše go “Nea bohle tše di ba swanelago” e lego go ba hlompha, go ba kwa le go lefa metšhelo. (Baroma 13:​1-7) Re ka no bona eka melao yeo ba re neago yona ga e kwagale, e a gatelela e bile ga go bonolo go e kwa. Eupša ka ge re ekwa Jehofa, re kwa le taelo yeo a re neilego yona ya gore re kwe balaodi ba bagolo ge fela ba sa re nee melao yeo e ganetšanago le melao ya gagwe.—Dit. 5:29.

11-12. Josefa le Maria ba ile ba dira’ng gore ba kwe molao le ge o be o ka ba imetša, gona go ile gwa ba le mafelelo afe? (Luka 2:​46-52) (Bona le seswantšho)

¹¹ Re ka ithuta go mohlala wa Josefa le Maria bao ba bego ba ikemišeditše go kwa balaodi ba bagolo le ge go be go se bonolo. (Bala Luka 2:​1-6.) Ge Maria a be a le kgauswi kudu le go belega, mmušo o ile wa laela gore yena le Josefa ba dire selo se sengwe se thata kudu. Augustose yo a bego a buša Roma o ile ntšha taelo ya gore batho ba ngwadišwe. Josefa le Maria ba ile ba swanelwa ke go ya Betlelehema, e lego leeto la dikhilomithara tše 150 leo le bego le sa sepelege. Leeto leo le be le tlo thatafalela Maria kudu. Yena le Josefa ba ka ba ba ile ba ipotšiša ge e ba leseana la bona leo le sa imilwego le tla dula le šireletšegile. Ba ka ba ba ile ba ipotšiša gore go be go tlo direga’ng ge a ka belegwa ba le tseleng. O be a imile ngwana yo e bego e tlo ba Mesia. Na le e be e le lebaka la gore ba se ke ba kwa mmušo?

¹² Josefa le Maria ga se ba ka ba dumelela dilo tše ka moka di ba dira gore ba se ke ba kwa molao wa mmušo. Jehofa o ile a ba šegofatša ka ge ba ile ba kwa. Maria o ile a fihla a bolokegile Betlelehema, a belega ngwana yoo a phetšego gabotse e bile ba dira le gore boporofeta bja Beibele bo phethagale.—Mika 5:2.

13. Go kwa ga rena go ka šireletša bjang bana babo rena le dikgaetšedi?

¹³ Ge re ekwa balaodi ba bagolo re tlo holega ra ba ra hola le ba bangwe. Bjang? Ge re ekwa melao ya mmušo yeo e sa thulanego le ya Modimo, mmušo o ka se re otle. (Baroma 13:4) Ge e ba re ekwa balaodi ba bagolo, ba tlo bona gore Dihlatse tša Jehofa ke batho ba go loka. Ka mohlala, mengwaga e mentši e fetilego kua Nigeria, mašole a ile a tsena ka Holong ya Mmušo ka nako ya diboka, ba nyaka batho bao ba bego ba gwantela gore go se ke gwa ntšhwa motšhelo. Moetapele wa bona o ile a ba botša gore ba sepele a re: “Dihlatse tša Jehofa di lefa motšhelo.” Ge e ba re dula re ekwa melao ya mmušo, re dira gore batho ba bone gore Dihlatse tša Jehofa ke batho ba go loka e bile seo se ka tla sa šireletša bana ba borena le dikgaetšedi ka letšatši le lengwe.—Mat. 5:16.

14. Kgaetšedi yo mongwe o ile a thušwa ke’ng gore a ikemišetše go kwa “balaodi ba bagolo?”

¹⁴ Le ge re ekwa balaodi ba bagolo, re ka fela re thatafalelwa ke go dira seo ba re kgopelago sona. Joanna yo a dulago United States o re: “Go bolela nnete, go be go le thata gore ke kwe balaodi ba bagolo ka gobane ba ile ba tlaiša ba bangwe ka lapeng la gešo.” Eupša Joanna o ile a leka ka thata gore a se sa hlwa a nagana ka mokgwa woo. O ile a thušwa ke eng? Sa pele o ile a thušwa ke go tlogela go bala dilo tšeo di bolelago gampe ka mmušo inthaneteng tšeo di bego di dira gore a thatafalelwe ke go hlompha balaodi ba bagolo. (Die. 20:3) Sa bobedi, o ile a rapela Jehofa gore a mo thuše gore a tshepe gore ke Jehofa feela yo a ka lokišago dilo e sego mebušo ya batho. (Ps. 9:​9, 10) Sa boraro, o ile a bala dikgatišo tša rena tšeo di bolelago ka go se tšee karolo dipolotiking. (Joh. 17:16) Joanna o re go hlompha balaodi ba bagolo le go ba kwa go dirile gore a be le “khutšo ya monagano.”

EKWA TLHAHLO YEO E TŠWAGO GO MOKGATLO WA JEHOFA

15. Ke ka lebaka la’ng re ka thatafalelwa ke go kwa tlhahlo yeo e tšwago mokgatlong wa Jehofa?

¹⁵ Jehofa o nyaka gore re “kwe bao ba etelelago pele” ka phuthegong. (Baheb. 13:17) Le ge Moetapele wa rena Jesu Kriste a phethagetše, bao a ba kgethilego gore ba etelele pele mo lefaseng ga se ba phethagala. Re ka thatafalelwa ke go ba kwa, kudu ge ba re kgopela gore re dire selo seo re sa nyakego go se dira. Moapostola Petro le yena ka nako e nngwe o ile a thatafalelwa ke go kwa. Ge morongwa a be a mo laela gore a je dijo tšeo di bego di se tša hlweka go ya ka Molao wa Moshe, o ile a gana gararo. (Dit. 10:​9-16) Ka baka la’ng? O be a sa kwešiše tlhahlo e mpsha. O be a tlwaetše tsela ya kgale ya go dira dilo. Petro o ile a thatafalelwa ke go kwa taelo yeo e tšwago go morongwa yo a phethagetšego, nagana fela gore rena go ka ba thata bjang gore re kwe taelo yeo e tšwago go batho bao ba sa phethagalago.

16. Paulo o ile a dira’ng le ge a ka ba a ile a nagana gore tlhahlo yeo a e neilwego ga e kwagale? (Ditiro 21:​23, 24, 26)

¹⁶ Moapostola Paulo o be a “ikemišeditše go kwa” le ge a ile a hwetša taelo yeo a bego a ka bona eka ga e kwagale. Bakriste ba Bajuda ba kwele mabarebare ka Paulo gore o ruta batho “go hlanogela Moshe” le gore ba se ke ba hlompha Molao wa Moshe. (Dit. 21:21) Banna ba Bakriste bao ba bego ba le Jerusalema ba ile ba laela Paulo gore a tšee banna ba bane a ye le bona tempeleng gore a itlhwekiše go bontšha gore o sa phela ka Molao wa Moshe. Eupša Paulo o be a tseba gore Bakriste ga ba sa phela ka tlase ga Molao wa Moshe le gore a se a ka a dira phošo. Eupša Paulo o ile a dira seo ba mo kgopelago sona. O ile “a sepela le banna bao letšatšing le le latelago, a itlhwekiša ka mokgwa wa setlwaedi le bona.” (Bala Ditiro 21:​23, 24, 26.) Go kwa ga Paulo go dirile gore ka phuthegong go be le botee le khutšo.—Baroma 14:​19, 21.

17. O ithuta’ng mohlaleng wa kgaetšedi Stephanie?

¹⁷ Kgaetšedi yo a bitšwago Stephanie o re o ile a thatafalelwa ke go kwa phetho yeo bana babo rena bao ba nago le maikarabelo ba e dirilego nageng ya gabo. Yena le monna wa gagwe ba be ba hlankela sehlopheng seo se bolelago leleme leo e sego la gabo bona. Ofisi ya lekala e ile ya phetha ka gore sehlopha seo se se ke sa tšwela pele gomme ya laela banyalani bao gore ba ye go hlankela phuthegong ya leleme la gabo bona. Stephanie o re: “Ke be ke se ka thaba. Ke be ke sa nagane gore go na le tlhokagalo phuthegong ya leleme la gešo.” Lega go le bjalo o ile a thekga phetho yeo e dirilwego. O itše: “Ge nako e dutše e eya, ke ile ka kwešiša gore ke ka baka la’ng phetho yeo bana bešo ba e dirilego e le e bohlale. Gona bjale re batswadi go batho bao e lego Dihlatse ba nnoši ka malapeng a gabo bona. Ke ithuta Beibele le kgaetšedi yo a sa tšwago go bušetšwa ka phuthegong. Gona bjale ke na le nako e oketšegilego ya go dira thuto ya motho ka noši.” O oketša ka gore: “Gona bjale ke na le letswalo leo le hlwekilego ka gobane ke ile ka dira sohle seo nka se kgonago gore ke kwe bao ba etelelago pele.”

18. Re holega bjang ge re ekwa?

¹⁸ Re ka ithuta go kwa. Jesu ga se a ithuta go kwa feela ge dilo di be di mo sepelela gabotse, eupša “o ithutile go kwa dilong tšeo a tlaišegilego ka tšona.” (Baheb. 5:8) Go swana le Jesu, le rena re ithuta go kwa gantšhi ge re le ka tlase ga maemo a thata. Ka mohlala, na o kile wa thatafalelwa ke go kwa nakong ya leuba la bolwetši bja COVID-19 ge re be re kgopelwa gore re se sa kopanela Diholong tša rena tša Mmušo gotee le go emiša modiro wa rena wa ntlo le ntlo? Go kwa ga gago go ile gwa go šireletša, gwa dira gore phuthego e be le botee gomme seo sa thabiša Jehofa. Ga bjale yo mongwe le yo mongwe wa rena o itokišeleditše go kwa tlhahlo e nngwe le e nngwe nakong ya masetlapelo a magolo. Go kwa tlhahlo yeo go ka phološa maphelo a rena.—Jobo 36:11

19. Ke ka baka la’ng o nyaka go kwa?

¹⁹ Re ithutile gore go kwa go tliša ditšhegofatšo tše dintši. Eupša re theetša Jehofa kudu ka gobane re mo rata e bile re nyaka go mo kgahliša. (1 Joh. 5:3) Re ka se bušetše Jehofa ka baka la dilo ka moka tšeo a re direlago tšona. (Ps. 116:12) Eupša re ka kgona go mo theetša le go theetša bao ba re etelelago pele. Ge eba re theetša re bontšha gore re bohlale. Batho ba bohlale ba thabiša pelo ya Jehofa.—Die. 27:11.