Go Gwerana le Bana Babo Rena le Dikgaetšedi go a re Hola

1-2. Ke selo sefe seo se lego bohlokwa go Jehofa, le gona o nyaka re dira eng?

TSELA yeo re swarago batho ba bangwe ka yona e bohlokwa kudu go Jehofa. Jesu o rutile gore re swanetše go rata baagišane ba rena ka mokgwa wo re ithatago ka gona. (Mat. 22:​37-39) Re swanetše go bontšha botho le go batho bao ba sa dumelego seo re se dumelago. Ge re dira bjalo re tla be re ekiša Jehofa Modimo “ka ge a hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.”—Mat. 5:45.

² Le ge Jehofa a rata batho ba mehuta ka moka, o tloga a rata bao ba mo kwago. (Joh. 14:21) O nyaka gore le rena re mo ekiše. O re kgothaletša gore re rate bana babo rena le dikgaetšedi ka “lerato le le tseneletšego” ebile o nyaka gore re ba bontšhe “borutho.” (1 Pet. 4:8; Baroma 12:10) Go bontšha lerato le bjalo le borutho go motho yo mongwe, go swana le kamoo re ikwago ka yona ka wa leloko goba mogwera wa rena yo mogolo.

3. Ke eng seo re swanetšego go se gopola ka lerato?

³ Go no swana le ge re hlokomela semela gore se gole, le rena re swanetše go šoma ka thata gore re bontšhe ba bangwe gore re a ba rata. Moapostola Paulo o kgothaleditše Bakriste gore: “Lerato la lena la borwarre a le tšwele pele.” (Baheb. 13:1) Jehofa o nyaka gore re dule re šoma ka thata gore re bontšhe ba bangwe gore re a ba rata. Sehlogong se re tlo kwa gore ke ka baka la eng go le bohlokwa gore re batamele kgauswi le Bakristegotee le rena, le gore re ka thušwa ke eng gore re tšwele pele le dira bjalo.

KE KA BAKA LA’NG RE SWANETŠE GO GWERANA LE BANA BABO RENA?

4. Re ka bontšha bjang gore re tšeela godimo botee bjo re nago le bjona le bana babo rena le dikgaetšedi? (Psalme 133:1) (Bona le diswantšho.)

⁴ Bala Psalme 133:1. Re dumelelana le mopsalme yo a ngwadilego gore go gwerana le batho bao ba ratago Jehofa ke mo “gobotse” le mo go “kgahlišago.” Go no swana le ge motho a ka no se sa bona bobotse bja mohlare o itšego o motelele ka ge a o tlwaeditše mahlo, le rena re ka no thoma go se sa tšeela godimo botee bjo re nago le bjona le Bakristegotee le rena. Re bona bana babo rena le dikgaetšedi gantšhinyana mo bekeng. Re ka dira’ng gore re dule re ba tšeela godimo? Ge re ka fetša nako e ntšhi re naganišiša kamoo bana babo rena le dikgaetšedi ba lego bohlokwa ka gona go rena le ka phuthegong, re tlo ba rata kudu.

5. Tsela yeo re ratanago ka yona e ka dira gore ba bangwe ba ikwe bjang?

⁵ Batho ba bangwe bao e lego la mathomo ba e tla dibokeng, ba kgahlilwe ke go bona kamoo re ratanago ka gona. Seo se dirile gore ba kgodišege gore ba hweditše therešo. Jesu o rile: “Bohle ba tla tseba ka se gore le barutiwa ba ka, ge e ba le ratana.” (Joh. 13:35) Nagana ka mohlala wa Chaithra, yo a bego a le yunibesithi ebile a ithuta le Dihlatse tša Jehofa. O ile a amogela taletšo ya go ya kopanong ya selete. Ka letšatši la mathomo ge a boa kopanong, o ile a botša motho yo a ithutago le yena Beibele gore: “Batswadi ba ka ga sa ka ba nkgokarela. Eupša kopanong ya lena ba nkgokaretše ga 52 ka letšatši letee feela. Ke ile ka bona gore Jehofa o diriša batho ba gagwe go mpontšha gore o a nthata. Ke nyaka go ba karolo ya lapa le.” Chaithra o ile a tšwela pele a ithuta gomme ka 2024 a kolobetšwa. Ke nnete gore ge batho ba bona dilo tše dibotse tšeo re di dirago, go akaretša le tsela yeo re ratanago ka yona ba feleletša ba nyaka go hlankela Jehofa.—Mat. 5:16.

6. Go batamela kgauswi le bana babo rena le dikgaetšedi go tlo re thuša bjang?

⁶ Go ba kgauswi le bana babo rena le dikgaetšedi go ka re šireletša. Paulo o kgothaleditše Bakriste gotee le yena gore: “Tšwelang pele le kgothatšana letšatši le lengwe le le lengwe . . . gore go se be le o tee wa lena yo a thatafatšwago ke matla a forago a sebe.” (Baheb. 3:13) Ge eba re ka palelwa ke go dula re dira seo se lokilego gomme ra thoma go aroga, Jehofa a ka diriša Mokristegotee le rena gore a re thuše. (Ps. 73:​2, 17, 23) Go hwetša thušo e bjalo go tlo re hola.

7. Lerato le botee di tswalana bjang? (Bakolose 3:​13, 14)

⁷ Re karolo ya batho bao ba šomago ka thata gore ba bontšhe gore ba a ratana, ka gona re hwetša ditšhegofatšo tše dintšhi. (1 Joh. 4:11) Ka mohlala, lerato le dira gore ‘re tšwele pele re kgotlelelana’ gomme seo se re thuša gore re tšwele pele re na le botee le bana babo rena. (Bala Bakolose 3:​13, 14; Baef. 4:​2-6) Ge re le dibokeng re thabela lerato le botee gomme ga go na moo o ka hwetšago selo se se swanago le se lefaseng ka moka.

GODIŠANANG

8. Jehofa o re thuša bjang gore re be le botee?

⁸ Botee bjo re nago le bjona lefaseng ka moka bo a makatša. Jehofa ke yena a dirago gore seo se kgonege le ge re na le mafokodi. (1 Bakor. 12:25) Beibele e re, re “rutwa ke Modimo gore [re] ratane.” (1 Bathes. 4:9) Seo se ra gore Jehofa o diriša Mangwalo go re botša gore re swanetše go dira eng gore re batamele kgauswi le bana babo rena. Re “rutwa ke Modimo” ka go ithuta le go diriša dilo tšeo a re rutago tšona. (Baheb. 4:12; Jak. 1:25) Dihlatse tša Jehofa di šoma ka thata gore di dire seo.

9. Lengwalo la Baroma 12:​9-13 le re ruta’ng ka go bontšhana kgodišo?

⁹ Lentšu la Modimo le re ruta gore re dire eng e le gore re batamele kgauswi le bana babo rena? A re kweng gore Paulo o ile a reng ge a bolela ka taba yeo go Baroma 12:​9-13. (Bala.) O ile a re “go bontšhaneng kgodišo, etelelang pele.” Seo se ra gore’ng? Re swanetše go dula re ikemišeditše go bontšha ba bangwe “borutho” ka go ba lebalela, go ba amogela ka magaeng a rena, le go ba thuša ka dilo tšeo ba di hlokago. (Baef. 4:32) Ga se wa swanela gore o letele ngwanabo rena goba kgaetšedi gore a tle go wena. Wena o ka ‘etelela pele.’ O tlo kwešiša gabotse gore Jesu o be a e ra gore’ng ge a be a re: “Go na le lethabo le legolo go neeng go feta go amogeleng.”—Dit. 20:35.

10. Re ka dira eng go bontšha gore re sohle seo re ka se kgonago go thuša ba bangwe goba go ba godiša? (Bona le seswantšho.)

¹⁰ Ka morago ga gore Paulo a re botše gore re etelele pele go godišeng ba bangwe o ile a re kgothaletša le gore: “Fišegang, le se ke la tšwafa.” Motho yo a fišegago ke yo a nago le mafolofolo ebile a šoma ka thata. Motho yoo ge ba mo file mošomo, o ipha nako ya gore a o dire ka bokgwari. Lengwalo la Diema 3:27 le re kgothaletša gore: “Ge e ba go na le batho bao ba tlogago ba hloka thušo ya gago ba thuše ge e ba o kgona go dira bjalo.” Ka gona ge eba re bona motho yo mongwe a hloka thušo, re dira sohle seo re ka se kgonago gore re mo thuše. Ga re dikadike goba go ipotša gore motho yoo o tla thušwa ke batho ba bangwe.—1 Joh. 3:​17, 18.

11. Ke eng seo se ka re thušago gore re batamele kgauswi le bana babo rena?

¹¹ Tsela e nngwe yeo re ka bontšhago gore re godiša ba bangwe ke ka go se dikadike go ba lebalela ge ba re kgopišitše. Lengwalo la Baefeso 4:26 le re: “Letšatši le se ke la sobela le sa kwatile.” Ka baka la’ng? Temana 27 e re botša gore ge re ka dira bjalo re tla be re “nea Diabolo sebaka.” Jehofa o diriša Lentšu la gagwe go re gopotša gore re lebalelane. Lengwalo la Bakolose 3:13 le re eletša ka gore: “Tšwelang pele le . . . lebalelana ka pelo ka moka.” Go lebalela ba bangwe le go se šetše mafokodi a bona ke e nngwe ya dilo tšeo di tlo re thušago gore re batamele kgauswi le bona. Ge re dira bjalo re tla be re bontšha gore re ‘šoma ka thata gore re dule re le batee le go phedišana ka khutšo.’ (Baef. 4:3) Ge e le gabotse re ka re go lebalelana go dira gore re be le botee le khutšo.

12. Jehofa a ka re thuša bjang gore re kgone go lebalela ba bangwe?

¹² Ke nnete gore ka dinako tše dingwe re ka thatafalelwa ke go lebalela bao ba re kwešitšego bohloko, eupša moya o mokgethwa o ka re thuša gore re kgone go ba lebalela. Beibele e re kgothaletša gore re ‘bontšhane borutho seng sa rena,’ re ‘fišege’ le go ba le “mafolofolo moyeng.” Motho yo a nago le “mafolofolo moyeng” o thušwa ke moya o mokgethwa. (Bona ntlha ya go ithuta go Baroma 12:11 ka Beibeleng ya seisemane.) Moya o mokgethwa o ka re thuša go bontšha borutho le go lebalelana ka pelo ka moka. Ke ka baka leo re kgopelago Jehofa gore a re thuše.—Luka 11:13.

“GO SE BE LE DIKAROGANO GARE GA LENA”

13. Ke’ng seo se ka bakago dikarogano magareng ga rena?

¹³ Ka phuthegong go na le “mehuta yohle ya batho” bao ba tšwago mafelong a go se swane. (1 Tim. 2:​3, 4) Ge eba re ka se hlokomele, go se swane ga rena go ka baka dikarogano ge go tliwa tseleng yeo re aparago ka yona le go itokiša, tseleng yeo re ithabišago ka yona goba ditabeng tša kalafo. (Baroma 14:4; 1 Bakor. 1:10) Ka ge Modimo a re rutile gore re ratane, re swanetše go ba šedi gore re se ke ra nagana gore tsela yeo re dirago dilo ka yona e bohlokwa kudu go feta ya ba bangwe.—Bafil. 2:3

14. Re swanetše go dula re ikemišeditše go dira‘ng?

¹⁴ Re ka phema dikarogano ka phuthegong ka go dula re ikemišeditše go kgothatšana le go agana. (1 Bathes. 5:11) Matšatši a batho ba bantšhi bao ba bego ba fodile moyeng goba ba tlošitšwe ka phuthegong ba a boa gomme re ba amogela ka diatla tše pedi. (2 Bakor. 2:8) A re kweng gore go ile gwa direga’ng ka kgaetšedi yo mongwe yo a boilego ka phuthegong ka morago ga gore a fetše mengwaga e lesome a fodile moyeng. O re: “Batho ka moka ba be ba ntumediša ka letsogo ebile ba myemyela.” (Dit. 3:19) Tsela yeo ba mo amogetšego ka yona e dirile gore a ikwe bjang? O re: “Ke ile ka bona gore Jehofa o nyaka gore ke boele ke thabe gape.” Ge eba re kgothatšana, Kriste a ka re thuša go lapološa bao ‘ba lapilego le go imelwa.’—Mat. 11:​28, 29.

15. Ke’ng se sengwe seo re ka se dirago gore go be le botee ka phuthegong? (Bona le seswantšho.)

¹⁵ Selo se sengwe seo se ka dirago gore re be le botee ke dilo tšeo re di bolelago. Lengwalo la Jobo 12:11 le re: “Na tsebe ga e senkasenke mantšu, go no swana le ge leleme le ekwa tatso ya dijo?” Go no swana le ge moapei a ekwa tatso ya dijo pele a di fa batho ba bangwe, le rena re swanetše go nagana pele re bolela. (Ps. 141:3) Re nyaka gore ka mehla dilo tšeo re di bolelago e be tšeo di agago, tšeo di lapološago le go ‘kgothatša bao ba re theeditšego.’—Baef. 4:29.

16. Ke bomang bao ba swanetšego go šoma ka thata gore ba bolele dilo tšeo di kgothatšago?

¹⁶ Banna bao ba nyetšego le batswadi ba swanetše go kgonthišetša gore ba bolela dilo tšeo di agago. (Bakol. 3:​19, 21, 21; Tito 2:4) Bagolo le bona ba swanetše go bolela mantšu ao a lapološago le go kgothatša dinku, ka ge e le badiši ba mohlape wa Jehofa. (Jes. 32:​1, 2; Bagal. 6:1) Seema se sengwe sa Beibele se re gopotša gore: “Lentšu leo le bolelwago ka nako e swanetšego ke le lebotse kudu!”—Die. 15:23.

RATA BATHO KA PELO KA MOKA

17. Re ka bontšha bjang gore re rata bana babo rena le dikgaetšedi ka dipelo tša rena ka moka?

¹⁷ Moapostola Johane o re kgothaleditše gore “ga se ra swanela go no bolela gore re a ratana, eupša re swanetše re bontšhe ka mediro gore re ratana go tšwa pelong.” (1 Joh. 3:18) Re nyaka go rata bana babo rena le dikgaetšedi go tšwa pelong. Na re ka di seo bjang? Go fetša nako e ntšhi re na le bana babo rena le dikgaetšedi, go tlo re thuša gore re kgone go batamela kgauswi le bona ebile re tlo ba rata kudu. Mohlomongwe o ka fetša nako o na le bona dibokeng le tšhemong. Iphe nako ya go etela ba bangwe. Ge eba re dira bjalo re tla be re bontšha gore re “rutwa ke Modimo gore re ratane.” (1 Bathes. 4:9) Re tlo tšwela pele re bona gore “ke mo gobotse le mo go kgahlišago gakaakang ge bana ba motho ba dudišana ka botee!”—Ps. 133:1.