Hlompha Batho ba Bangwe

1. Ke ka baka la eng batho ba thaba ge batho ba bangwe ba ba hlompha? (Diema 22:1)

NA O a thaba ge batho ba bangwe ba go hlompha? Ga go pelaelo gore o a thaba. Motho yo mongwe le yo mongwe o nyaka go hlomphiwa. Ka moka ga rena re a thaba ge re hlomphiwa. Ke ka baka leo Beibele e rego “go hlomphiwa go kaone go phala go ba le silifera le gauta.”—Bala Diema 22:1.

2-3. Ke ka baka la eng ka dinako tše dingwe go ka se be bonolo gore re hlomphe ba bangwe, gona re tlo ithuta eng sehlogong se?

² Ka dinako tše dingwe go ka no se be bonolo gore re hlomphe batho ba bangwe ka gobane re phela re bona mafokodi a bona. Se sengwe ke gore mehleng ye re phelago go yona, batho ga ba hlomphe. Eupša rena ga se ra swanela go swana le bona. Ka baka la’ng? Ka gobane Jehofa o nyaka re godiša “batho ba mehuta ka moka” goba go ba hlompha.—1 Pet. 2:17.

³ Sehlogong se, re tlo kwa gore go hlompha ba bangwe go bolela eng le gore re ka bontšha bjang gore re hlompha (1) ba gabo rena, (2) Bakristegotee le rena, le (3) batho ba bangwe. Le gona re tlo kwa gore re ka dira eng gore re hlomphe ba bangwe le ge go se bonolo.

GO HLOMPHA BA BANGWE GO BOLELA ENG?

4. Go hlompha batho ba bangwe go bolela eng?

⁴ Go hlompha go bolela eng? Malemeng a mangwe, lentšu go “hlompha” le lentšu go “godiša” a hlaloswa go swana. Ke ka baka la eng re realo? Lentšu go “hlompha” le bolela tsela yeo re lebelelago motho ka yona. Ge re hlompha batho ba bangwe, re ba lebelela ba le bohlokwa ebile re na le taba le bona. Mohlomongwe ka baka la dika tšeo ba nago le tšona, dilo tšeo ba di fihleletšego goba maemo a bona. Lentšu go “godiša” le bolela tsela yeo re swarago motho ka yona. Ge re godiša batho ba bangwe, re ba swara ka tsela yeo e dirago gore ba ikwe ba le bohlokwa, ba ratwa ebile ba na le seriti. Eupša go godiša batho ba bangwe go swanetše go tšwa pelong.—Mat. 15:8

5. Ke eng seo se dirago gore re hlomphe batho ba bangwe?

⁵ Jehofa o nyaka gore re hlomphe batho ba bangwe. Ka mohlala, o re botša gore re hlomphe “balaodi ba bagolo.” (Baroma 13:​1, 7) Eupša ba bangwe ba ka re: “Ke ikemišeditše go hlompha feela batho bao ba itshwarago gabotse goba bao ba dirago dilo tše dibotse.” Na seo se a kwagala? Ka ge re le bahlanka ba Modimo, re a tseba gore ge re hlompha batho ba bangwe, ga re ba hlomphe ka baka la dilo tšeo ba di dirago. Re dira seo ka gobane re rata Jehofa kudu ebile re nyaka go mo thabiša.—Josh. 4:14; 1 Pet. 3:15.

6. Na go a kgonega go hlompha motho yo a sa go hlomphego? Hlalosa. (Bona le seswantšho.)

⁶ Batho ba bangwe ba ka ipotšiša gore, ‘Na go a kgonega gore re hlomphe motho yoo a sa re hlomphego?’ Ee go a kgonega. A re kweng ka mehlala ye e latelago. Kgoši Saulo o ile a bontšha gore ga a hlomphe morwa wa gagwe Jonathane ka go mo tlontlolla pele ga batho. (1 Sam. 20:​30-34) Le ge go le bjalo, Jonathane o ile a tšwela pele a hlompha tatagwe le go mo thekga dintweng, go ba go fihla letšatši leo Saulo a hwago ka lona. (Ek. 20:12; 2 Sam. 1:23) Moperisita yo mogolo Eli o ile a bontšha gore ga a hlomphe Hanna ka go mo latofatša gore o tagilwe. (1 Sam. 1:​12-14) Eupša Hanna o ile a bolela le Eli ka tlhompho. O ile a dira seo le ge batho ba Isiraele ka moka ba be ba tseba gore o be a palelwa ke go phošolla barwa ba gagwe. Le gona, o be a swanetše go ba phošolla ka ge e be e le motswadi le moperisita yo mogolo. (1 Sam. 1:​15-18; 2:​22-24) Banna bao ba tšwago Athene ba ile ba bontšha gore ga ba hlomphe moapostola Paulo ka go mo tlontlolla, ba mmitša gore ke “moratharathi.” (Dit. 17:18) Le ge ba dirile se, Paulo o ile a bolela le bona ka tlhompho. (Dit. 17:22) Se se bontšha gore ge e ba re tloga re rata Jehofa ebile re nyaka go dula re mo thabiša, seo se ka dira gore re hlomphe ba bangwe le ge ka dinako tše dingwe go se bonolo go dira bjalo. A re kweng gore ke mang yoo re swanetšego go mo hlompha le gore ke ka baka la eng re swanetše go dira bjalo.

HLOMPHA BATHO BA GENO

7. Ke eng seo se ka dirago gore re thatafalelwe ke go hlompha batho ba gabo rena?

⁷ Seo se ka dirago gore re se ke ra ba hlompha. Re fetša nako e ntši re na le batho ba gabo rena. Seo se dira gore re tsebe dilo tšeo ba kgonago go di dira le mafokodi a bona. Ba bangwe ba ka ba le bolwetši bjo bo dirago gore go se ke gwa ba bonolo gore re ba hlokomele, goba ba ka ba ba na le bolwetši bja go tshwenyega kudu. Ba bangwe ba ka re kweša bohloko ka tsela yeo ba bolelago le rena le ka tsela yeo ba dirago dilo ka yona. Ba bangwe bona go e na le gore ba leke ka thata gore ka malapeng a bona go dule go ena le khutšo, ba baka mpherefere gomme ba nyatša batho bao ba dulago le bona ka gae. Seo sa dira gore batho ba se sa kwana kamoo gae. Go no swana le ge bolwetši bja marapo bo dira gore ditho tša mmele di se sa šomišana gabotse, motho yoo a nyatšago batho bao a dulago le bona ka gae o dira gore ba se sa kwana. Eupša le ge re ka se kgone go alafa bolwetši bja marapo ka mo go feletšego, rena re ka kgona go ithuta go hlompha batho ba gabo rena gore ba dule ba na le kwano.

8. Ke ka baka la eng go le bohlokwa gore re hlomphe batho ba gabo rena? (1 Timotheo 5:​4, 8)

⁸ Ke ka baka la eng re swanetše go hlompha ba gabo rena? (Bala 1 Timotheo 5:​4, 8.) Lengwalong la mathomo leo Paulo a le ngwaletšego Timotheo, o ile a bontšha kamoo ditho tša malapa di swanetšego go hlokomelana ka gona. O ile a bolela gore lebaka le legolo leo le dirago gore re godiše batho ba gabo rena, ke ka gobane re ‘ineetše go Modimo’ e sego ka gobane re gapeletšega. Se se bolela gore re hlokomela batho ba gabo rena ka gobane re rata Modimo le go lebelela seo e le karolo ya go mo rapela. Jehofa ke yena a dirilego gore go be le lapa. (Baef. 3:​14, 15) Ka gona, ge re hlompha batho ba gabo rena re bontšha gore re hlompha Jehofa yo a hlodilego lapa. Le ke lebaka le legolo leo le dirago gore re hlomphe batho ba gabo rena.

9. Monna le mosadi ba ka bontšhana bjang gore ba a hlomphana? (Bona le diswantšho.)

⁹ O ka bontšha bjang gore o hlompha molekane wa gago? Monna yo a godišago mosadi wa gagwe o mmontšha gore o bohlokwa ge a na le yena a nnoši le ge ba le gare ga batho. (Die. 31:28; 1 Pet. 3:7) A ka se tsoge a mmethile, goba a mo tlontlolla goba a mo dira gore a ikwe a se na mohola. Ariela yo a tšwago Argentina o re: “Ka ge mosadi wa ka a babja, ka dinako tše dingwe o fela a bolela dilo tšeo di nkwešago bohloko. Ge seo se direga, ke ikgopotša gore ga a bolele dilo tšeo ka gobane a itiriša. Ke moka ka leka go gopola lengwalo la 1 Bakorinthe 13:​5, leo le nthušago gore ke boledišane le yena ka tlhompho go e na le go boledišana le yena ke galefile.” (Die. 19:11) Mosadi o godiša monna wa gagwe ka go bolela ka yena gabotse ge a e na le batho ba bangwe. (Baef. 5:33) Ga a dire metlae ka yena, go mo kwera le go mmitša ka maina. O a kwešiša gore ge a ka dira dilo tša go swana le tšeo di ka mo thubela lapa. (Die. 14:1) Kgaetšedi yo mongwe yo a tšwago Italy, yoo monna wa gagwe a nago le bolwetši bja go tshwenyega kudu, o re: “Ka dinako tše dingwe ke fela ke bona okare monna wa ka o no tshwenyega kudu le ge go sa hlokagale. Nakong e fetilego, o be o tlo no bona ka sefahlego sa ka gore ga ke mo hlomphe gaešita le ka dilo tšeo ke di bolelago. Eupša ke ile ka bona gore ge ke fetša nako e ntši ke na le batho bao ba bolelago gabotse ka ba bangwe, seo se dira gore le nna ke kgone go hlompha monna wa ka.”

10. Baswa ba ka bontšha bjang gore ba hlompha batswadi ba bona?

¹⁰ Lena baswa, ekwang melao yeo batswadi ba lena ba le beetšego yona. (Baef. 6:​1-3) Bolelang le batswadi ba lena ka tlhompho. (Ek. 21:17) Ge batswadi ba lena ba dutše ba gola, ba tlo nyaka gore le ba hlomphe le go ba thuša ka dilo tše dingwe. Dirang seo le ka se kgonago gore le ba hlokomele. A re kweng ka mohlala wa María yoo tatagwe e sego Hlatse ya Jehofa. Ge tatago María a babja, o ile a dira gore go se be bonolo gore a mo hlokomele. María o re: “Ke ile ka rapela Modimo gore a nthuše gore dilo tšeo ke di dirago di bontšhe gore ke hlompha tate. Ge nako e dutše e eya, ke ile ka bona gore ke ga bohlokwa gore ke hlomphe tate, ga go hlokagale gore ke mo emele gore a fetoše tsela yeo a itshwerego ka yona.” Ge re hlompha batho ba gabo rena le ge re tseba gore ba na le mafokodi, re bontšha gore re hlompha Jehofa ka ge e le yena a thomilego lapa.

HLOMPHA BAKRISTEGOTEE LE WENA

11. Ke eng seo se ka dirago gore go se ke gwa ba bonolo go hlompha Bakristegotee le rena?

¹¹ Seo se ka dirago gore re se ke ra ba hlompha. Le ge Bakristegotee le rena ba phela ka melao ya motheo ya Beibele, ka dinako tše dingwe ba ka no se re sware gabotse, ba re naganela dilo tšeo re sa di dirego goba ba re tena. Ge e ba re na ‘le lebaka le le kwagalago gore re kgopišege’, go ka no se be bonolo gore re tšwele pele re hlompha Mokristegotee le rena yoo a re kgopišitšego. (Bakol. 3:13) Ke eng seo se ka re thušago gore re tšwele pele re mo hlompha?

12. Ke ka baka la eng go le bohlokwa gore re hlomphe Bakristegotee le rena? (2 Petro 2:​9-12)

¹² Ke ka baka la eng re swanetše go hlompha Bakristegotee le rena? (Bala 2 Petro 2:​9-12.) Lengwalong la bobedi leo Petro a le ngwadilego, ba be ba bolela gampe ka “ba letago,” e lego bagolo ba phuthego. Barongwa ba ba botegago bao ba ilego ba bona seo se direga ba ile ba dira eng? “Ka baka la go hlompha Jehofa,” ga se ba ka ba bolela gampe ka batho bao ba bego ba dira dilo tše mpe. Ruri se se a kgahliša! Barongwa ba ba phethagetšego ba ile ba kgonthišetša gore ga ba bolele gampe ka banna bao ba ikgogomošago. Eupša ba ile ba tlogela Jehofa gore e be yena a ba ahlolago le go ba kgalemela. (Baroma 14:​10-12; bapiša le Juda 9.) Re ka ithuta go barongwa bao. Ge e ba re hlompha batho bao ba re ganetšago, gona re swanetše go hlompha Bakristegotee le rena le go feta. Re swanetše go leka ka thata gore re ba hlomphe. (Baroma 12:10) Go dira bjalo go bontšha gore re hlompha Jehofa.

13-14. Re ka bontšha bjang gore re hlompha ba bangwe ka phuthegong? Nea mehlala. (Bona le diswantšho.)

¹³ Re ka hlompha bjang Bakristegotee le rena? Lena bagolo, nako le nako ge le ruta ba bangwe le ba rute ka tsela e lerato. (Fil. 8, 9) Ge le eletša ba bangwe, le ba eletše ka botho e sego le tenegile. Lena dikgaetšedi, le ka thuša ba bangwe gore ba hlomphe ba bangwe ka phuthegong ka gore le se ke la seba goba go thomeletša ba bangwe. (Tito 2:​3-5) Ka moka ga rena re ka bontšha bagolo ba phuthego gore re a ba hlompha ka gore re dirišane le bona le go leboga mošomo o mobotse woo ba o dirago wa gore ba re rute ka dibokeng, wa go re hlahla ge re le tšhemong le wa go thuša bao ba gatilego “kgato e fošagetšego.”—Bagal. 6:1; 1 Tim. 5:17.

¹⁴ Kgaetšedi Rocío o ile a thatafalelwa ke go hlompha mogolo yo a ilego a mo eletša. O re. “Ke be ke ekwa eka ga se a bolela le nna gabotse. Ge ke be ke le gae ke be ke bolela gampe ka yena. Le ge ke be ke sa bontšhe, ke be ke bona eka ga se gore o nkeletša ka gobane o nyaka go nthuša gomme ka se mo theetše.” Rocío o ile a thušwa ke eng? O re: “Ge ke be ke dira mmalo wa ka wa Beibele, ke ile ka kopana le lengwalo la 1 Bathesalonika 5:​12, 13. Ge ke be ke lemoga gore ga ke bontšhe ngwanabo rena yoo gore ke a mo hlompha, ke ile ka thoma go bethwa ke letswalo. Ka rapela Jehofa, ka ba ka dira le nyakišišo ka dikgatišong tša rena gore ke hwetše dilo tšeo di ka nthušago gore ke fetoše tsela yeo ke ikwago ka yona. Ganyenyane-ganyenyane, ke ile ka bona gore ngwanabo rena yoo ga se yena a nago le bothata, eupša bothata bo be bo na le nna ka ge ke be ke ikgogomoša. Bjale ke a kwešiša gore ke swanetše go ba le boikokobetšo e le gore ke kgone go hlompha ba bangwe. Go sa na le mo ke swanetšego go kaonefatša gona. Eupša ge ke leka ka thata gore ke hlomphe ba bangwe, ke a tseba gore Jehofa o tšeela maiteko a ka godimo.”

HLOMPHA BATHO BA BANGWE BAO E SEGO BAKRISTE

15. Ke ka baka la eng re ka thatafalelwa ke go hlompha batho ba bangwe?

¹⁵ Ke eng seo se ka dirago gore re se ke ra ba hlompha? Gantši ge re le tšhemong re kopana le batho bao ba bonagalago eka ga ba rate dilo tšeo Beibele e di rutago. (Baef. 4:18) Batho ba bangwe ba kgetha go se re theetše ka ge ba godišitšwe ka tsela e itšego. Ka dinako tše dingwe bahiri ba rena le barutiši ba rena ga ba kgotsofalele mošomo wa rena le ge re leka ka thata go ba thabiša. Ebile batho bao re šomago le bona goba bao re tsenago le bona sekolo ga ba re sware gabotse. Ge nako e dutše e eya, re ka thatafalelwa ke go hlompha batho bao gomme ra thoma go ba swara ka tsela yeo re sa nyakego go swarwa ka yona.

16. Ke ka baka la eng go le bohlokwa gore re hlomphe batho bao ba sego ba tšwa ba hlankela Jehofa? (1 Petro 2:12; 3:15)

¹⁶ Ke ka baka la eng re swanetše go hlompha batho ba bangwe? O se ke wa lebala gore Jehofa o kgona go bona tsela yeo re kgonago go swara batho ba bangwe ka yona. Moapostola Petro o ile a gopotša Bakriste ba bangwe gore tsela yeo ba itshwarago ka yona e ka dira gore batho ba bangwe ba “tagafatše Modimo.” Ka baka leo o ile a ba botša gore ge ba emela tumelo ya bona ba dire bjalo “ka boleta le ka tlhompho e tseneletšego.” (Bala 1 Petro 2:12; 3:15.) Go sa šetšwe gore Bakriste ba emela ditumelo tša bona pele ga baetapele ba mmušo goba batho ba bangwe, ba swanetše go dula ba ba hlompha bjalo ka ge eka ba eme pela ga Modimo. Go sa šetšwe dilo tše ka moka, Jehofa o re lebeletše ebile o theeditše dilo tšeo re di bolelago le gore re di bolela bjang. Le ke lebaka le legolo leo le dirago gore re sware batho ba bangwe ka tlhompho!

17. Re ka bontšha bjang gore re hlompha batho ba bangwe?

¹⁷ Re ka bontšha bjang gore re hlompha ba bangwe? Ge re le tšhemong, ga re nyake go bontšha batho ba bangwe gore re a ba nyatša le gore ga ba tsebe Beibele. Go e na le moo, re nyaka go ba bontšha gore ba bohlokwa go Modimo le gore ba re feta ka bogolo. (Hag. 2:7; Bafil. 2:3) Ge e ba motho yo mongwe a ka bolela le wena gampe ka baka la seo o se dumelago, o se ke wa mo galefela. Ka mohlala, re se ke ra bolela dilo tšeo di ka ba dirago gore ba galefe goba ba ikwe eka ga se ba hlalefa gabotse. (1 Pet. 2:23) Ge e ba o ka bolela selo seo se go dirago gore o šale o ikwa molato, kgopela tshwarelo ka pelapela. O ka bontšha bjang gore o hlompha batho bao o šomago le bona? Bontšha gore o šoma ka thata gomme o leke go lebelela dilo tše dibotse go batho bao o šomago le bona le go bahiri ba gago. (Tito 2:​9, 10) Ge o tshepega, o šoma ka mafolofolo ebile o šoma ka pelo ka moka, o ka no thabiša batho goba wa se ba thabiše eupša o tla ba o thabiša Jehofa.—Bakol. 3:​22, 23.

18. Ke ka baka la eng go le bohlokwa gore re ithute go ba le hlompho le go hlompha batho ba bangwe?

¹⁸ Re na le mabaka a mantši ao a dirago gore re ithute go ba le tlhompho le go bontšha batho ba bangwe gore re a ba hlompha. Lebaka le lengwe ke gore ge re bontšha batho ba gabo rena gore re a ba hlompha, re hlompha hlogo ya rena ya lapa e lego Jehofa. Le gona ge re hlompha bana babo rena le dikgaetšedi re bontšha gore re hlompha Tatago rena wa magodimong. Bjale ge re hlompha batho ba bangwe, re ba thuša gore ka letšatši le lengwe ba tle ba tagafatše Modimo wa rena o mogolo, le go mo hlompha. Le ge batho ba bangwe ba ka se tsoge ba re hlomphile, go bohlokwa gore re ithute go ba le tlhompho le go ba hlompha. Ka gobane Jehofa o tlo re šegofatša. O re tshepiša gore: “Bao ba nkgodišago ke tla ba godiša.”—1 Sam. 2:30.