Kamoo o ka Kaonefatšago Dithapelo tša Gago

1-2. (a) Ke eng seo se ka dirago gore re palelwe ke go botša Jehofa kamoo re ikwago ka gona? (b) Re tseba bjang gore Jehofa o tloga a theetša dithapelo tša rena?

NA KA dinako tše dingwe ge o rapela o boaboeletša mantšu goba o palelwa ke go botša Jehofa ka tsela yeo o tlogago o ikwa ka yona? Ga o noši ge e ba o ikwa bjalo. Ka ge re dula re swaregile, re ka rapela ka lebelo go e na le go tšea nako re boledišana le Jehofa. Goba re ka hwetša go le thata go botša Jehofa kamoo re tlogago re ikwa ka gona ka gobane re bona okare ga re swanelege go boledišana le yena.

² Beibele e re kgonthišetša gore Jehofa o a re theetša ge re mo rapela go tšwa pelong, e sego ka gobane re kgona go hlalosa dilo tše dintši. O kwa ‘dithapelo tša batho ba boleta.’ (Ps. 10:17) O theetša dilo ka moka tšeo re mmotšago tšona ka gobane o tloga a na le taba le rena.—Ps. 139:​1-3.

3. Sehlogong se, re tlo boledišana ka dipotšišo dife?

³ Sehlogong se, re tlo boledišana ka dipotšišo tše di latelago: Ke ka baka la eng re swanetše go lokologa ge re rapela Jehofa? Re ka dira eng gore ge re rapela re ikwe re le kgauswi le Jehofa? Go ithuta ka tsela yeo bahlanka ba Jehofa ba bego ba rapela ka yona ka Beibeleng, go tlo re thuša bjang gore re kaonefatše tsela yeo re rapelago ka yona? Le gona re ka dira eng ge re palelwa ke go botša Jehofa kamoo re ikwago ka gona?

DULA O RAPELA JEHOFA

4. Ke eng seo se ka re thušago gore re dule rapela Jehofa re lokologile? (Psalme 119:145)

⁴ Ge re ka dula re gopola gore Jehofa ke mogwera wa rena yo a nyakago go re bona re atlega, re tlo lokologa go mmotša ka tsela yeo re ikwago ka yona le dilo tšeo re di naganago. Mongwadi wa Psalme ya 119 o ile a bona Jehofa e le mogwera wa gagwe ge a dutše a mo rapela. Bophelo ba gagwe bo be bo tletše ka mathata. Batho ba bangwe ba ile ba bolela maaka a matala ka yena. (Ps. 119:​23, 69, 78) Ebile ka dinako tše dingwe o be a fela a nyama ka ge a dira diphošo. (Ps. 119:5) Lege go le bjalo, o be a kgona go botša Jehofa kamoo a ikwago ka gona.—Bala Psalme 119:145.

5. Ke ka baka la eng re sa swanela go dumelela go nyama go re thibela go rapela? Nea mohlala.

⁵ Jehofa o nyaka gore le batho bao ba dirilego dibe tše dikgolo ba mo rapele. (Jes. 55:​6, 7) Ka gona ga se ra swanela go dumelela go nyama go re thibela go rapela. Ka mohlala, motho yo a fofišago sefofane o a tseba gore a ka boledišana le batho bao ba šomago go hlahla bao ba fofišago sefofane nako e nngwe le e nngwe ge a hloka thušo. Na o nagana gore motho yo a fofišago sefofane a ka tšhaba go kgopela thušo go batho bao, ka gobane a timetše goba a dirile phošo? Aowa! Ka mo go swanago, le rena ge re sa tsebe gore re dire eng goba re dirile sebe, re ka kgona go kgopela Jehofa gore a re thuše.—Ps. 119:​25, 176.

RE KA DIRA ENG GORE GE RE RAPELA RE IKWE RE LE KGAUSWI LE JEHOFA?

6-7. Ke eng seo se ka re thušago gore ge re rapela re kgone go botša Jehofa kamoo re ikwago ka gona? (Bona le mongwalo wa tlase.)

⁶ Ge re botša Jehofa ka tsela yeo re ikwago ka yona le dilo tšeo re di naganago, re tlo batamela kgauswi le yena. Ke eng seo se ka re thušago gore re kgone go botša Jehofa dilo ka moka?

⁷ Nagana ka dika tšeo Jehofa a nago le tšona.a Ge re tseba gore Jehofa ke Modimo wa mohuta mang, re tlo lokologa go mmotša dilo ka moka. (Ps. 145:​8, 9, 18) A re kweng ka mohlala wa kgaetšedi Kristine, yoo tatago bona a bego a ba tlaiša. O re: “Go be go se bonolo go bolela le Jehofa le go mmona bjalo ka tate. Ke be ke ipona ke se motho wa selo ebile ke nagana gore Jehofa o tlo tlogela go nthata ka baka la diphošo tšeo ke di dirago.” O thušitšwe ke go gopola eng ka Jehofa? O re: “Go nagana ka lerato leo Jehofa a nago le lona go nthušitše go bona gore o na le taba le nna. Ke a tseba gore Jehofa a ka se tsoge a ntahla. Lege nka wa o tlo ntsoša. Ke ka baka leo ke kgonago go mmotša dilo tšeo di nthabišago kudu le tšeo di nnyamišago kudu.”

8-9. Go naganišiša ka dilo tšeo re nyakago go di bolela pele re rapela go ka re hola bjang? Nea mohlala.

⁸ Nagana ka seo o nyakago go se bolela. Pele o rapela o ka ipotšiša dipotšišo tše mmalwanyana. O ka ipotšiša gore: ‘Ke na le bothata bofe gona bjale? Go na le motho yo ke swanetšego go mo lebalela? Na ke lebeletšane le bothata bjo ke nyakago gore Jehofa a nthuše ka bjona?’ (2 Dikg. 19:​15-19) Re ka ekiša mohlala wo Jesu a re beetšego wona ge a be a rapelela gore leina la Jehofa le kgethagatšwe, Mmušo wa Gagwe o tle le gore thato ya Gagwe e direge mo lefaseng.—Mat. 6:​9, 10.

⁹ Ge kgaetšedi yo a bitšwago Aliska a tseba gore monna wa gagwe o na le kankere mo bjokong, o ile a thoma go thatafalelwa ke go rapela. O re: “Ke be ke nyamile kudu mo e bilego ke thatafalelwa ke go nagana seo nka rapelago ka sona.” O thušitšwe ke eng? O re: “Pele ke rapela ke a emanyana gomme ka nagana ka dilo tšeo nka di botšago Modimo. Go dira bjalo go nthušitše gore ke se ke ka no botša Jehofa ka nna fela. Go nagana pele ke rapela go nthuša gore ke iše maswafo fase le go botša Jehofa ka dilo tše di fapafapanego.”

10. Ke ka baka la eng re swanetše go tšea nako e teletšana re rapela? (Bona le diswantšho.)

¹⁰ Rapela nako e teletšana. Lege dithapelo tše dikopana di opa kgomo le naka, go rapela nako e teletšana go dira gore re kgone go botša Jehofa dilo ka moka. b Monna wa Aliska e lego Elijah, o re: “Ke leka go rapela gantši mo letšatšing eupša go fetša nako e teletšana ke rapela go dirile gore ke be le segwera se se tiilego le Jehofa. Jehofa ga a mphelele pelo ge ke rapela, ke ka baka leo ke fetšago nako e teletšana ge ke bolela le yena.” Leka go hwetša nako le lefelo leo o ka kgonago go fetša nako e teletšana o rapela ntle le gore batho ba bangwe ba go šitiše. Leka le go bolelela godimo ge o rapela. Itlwaetše go rapela ka tsela yeo gantšinyana.

ITHUTE KAMOO BAHLANKA BA JEHOFA BA BEGO BA RAPELA KA GONA KA BEIBELENG

11. Re holega bjang ge re ithuta kamoo bahlanka ba Jehofa ba bego ba rapela ka gona? (Bona le lepokisi leo le rego “Na o Ikwa go Swana le Bona?”)

¹¹ Go ithuta kamoo bahlanka ba Jehofa ba bego ba rapela ka gona le dikoša tšeo ba bego ba di opelela Jehofa go ka go thuša kudu. Ge o dutše o bona gore bahlanka ba Jehofa ba nakong e fetilego ba be ba kgona go mmotša dilo ka moka, le wena o tlo nyaka go mmotša dilo ka moka. Dithapelo tša bona di ka go thuša gore le wena o kgone go hwetša mantšu ao o ka a dirišago ge o rapela. O tlo hwetša gore bahlanka ba bangwe ba Jehofa ba be ba na le mathata a go swana le a gago ebile ba be ba mo kgopela dilo tšeo le wena o nyakago go mo kgopela tšona.

12. Ke dipotšišo dife tšeo re ka ipotšišago tšona ge re ithuta ka thapelo e itšego ya ka Beibeleng?

¹² Ge o dutše o ithuta thapelo e itšego ya ka Beibeleng o ka ipotšiša gore: ‘Ke mang a bego a rapela thapelo ye, gona o be a lebeletšane le eng? Na ke kwešiša maemo a gagwe? Ke ithuta eng thapelong ya gagwe?’ Go ka hlokega gore o dire nyakišišo e tseneletšego gore o hwetše dikarabo tša dipotšišo tše, eupša o ka se itshole. A re ithuteng mehlaleng e mene ya dithapelo tša bahlanka ba Modimo ba ka Beibeleng.

13. Ke eng seo re ka ithutago sona thapelong ya Hanna? (1 Samuele 1:​10, 11) (Bona le seswantšho .)

¹³ Bala 1 Samuele 1:​10, 11. Ge Hanna a be a rapela thapelo ye, o be a lebeletšane le mathata a mabedi a magolo. E be e le moopa ebile mosadi yo mongwe wa monna wa gagwe o be a mo tlaiša. (1 Sam. 1:​4-7) Ge e ba le wena o na le bothata bjo bogolo, o ka ithuta eng thapelong ya Hanna? O ile a imologa ka ge a be a fetša nako e ntšinyana a botša Modimo ka dilo tšeo di mo tshwenyago. (1 Sam. 1:​12, 18) Le rena re ka imologa ge re “lahlela maima a [rena] go Jehofa” ka go mmotša dilo ka moka tšeo di re tshwenyago.—Ps. 55:22.

14. (a) Ke eng se sengwe gape seo re ithutago sona mohlaleng wa Hanna? (b) Go naganišiša ka dilo tšeo re ithutago tšona ka Beibeleng go ka re thuša bjang gore re kaonefatše dithapelo tša rena? (Bona mongwalo wa tlase.)

¹⁴ Hanna o ile a ba le ngwana wa mošemane yo a bitšwago Samuele, ke moka ka morago ga mengwaga e se go kae a mo iša go Moperisita yo a Phagamego Eli. (1 Sam. 1:​24-28) Hanna o ile a rapela Jehofa, a mo leboga gore o dula a hlokomela bahlanka ba gagwe le go ba šireletša.c (1 Sam. 2:​1, 8, 9) Lege mathata a Hanna a ka gae a se a fela, yena o ile a nagana kudu ka dilo tšeo Jehofa a mo diretšego tšona. Re ithuta eng go se? Re tlo kgona go kgotlelela mathata ao re lebeletšanego le ona ge e ba re nagana ka tsela yeo Jehofa a dulago a re thekga ka yona.

15. Re ka ithuta eng thapelong ya moporofeta Jeremia ge re swarwa ka go hloka toka? (Jeremia 12:1)

¹⁵ Bala Jeremia 12:1. Go ile gwa ba le nako e nngwe moo moporofeta Jeremia a ilego a nyama ka ge a be a bona batho ba go dira dilo tše mpe ba atlega. O ile a ba a nyamišwa le ke tsela yeo Baisiraele ba bangwe ba bego ba mo swara ka yona. (Jer. 20:​7, 8) Le rena re ka ikwa go swana le yena ge re bona batho ba go se botege ba atlega goba ge re kwerwa. Lege Jeremia a ile a hlalosa ka tsela yeo a ikwago ka yona, ga se a ka a latofatša Jehofa ka gore o hloka toka. Ge a be a bona Jehofa a phošolla batho ba go se kwe, o ile a tshepa le go feta gore Jehofa ke Modimo wa go ba le toka. (Jer. 32:19) Le rena ge re rapela re ka botša Jehofa ka dilo ka moka tšeo di re tshwenyago, ka gobane re kgodišegile gore o tlo lokiša dilo ka nako e swanetšego le go fediša go hloka toka.

16. Re ka ithuta eng thapelong ya Molefi yo a bego a le bothopša ge maemo a rena a re palediša go dira dilo tše itšego? (Psalme 42:​1-4) (Bona le diswantšho.)

¹⁶ Bala Psalme 42:​1-4. Psalme ye e ngwadile ke Molefi yo a bego a le bothopša yo a bego a sa kgone go kopana le Bakristegotee le yena. Psalme yeo a e ngwadilego e re bontšha kamoo a bego a ikwa ka gona. Re ka ikwago go swana le yena ge e ba re palelwa ke go tšwa ka gae goba re le kgolegong ka baka la ditumelo tša rena. Tsela yeo re ikwago ka yona e ka no fetofetoga eupša re tlo imologa ge re ka botša Jehofa kamoo re ikwago ka gona. Go rapela moo go tlo re thuša gore re kgone go kwešiša maikwelo a rena ga kaone le go kgona go bona gore ge e le gabotse ke eng seo se lego bohlokwa. Ka mohlala, Molefi yoo o ile a lemoga gore o tlo ba le dibaka tše dintši tša go hlankela Jehofa. (Ps. 42:5) O ile a naganišiša le kamoo Jehofa a bego a mo hlokomela ka gona. (Ps. 42:8) Go rapela Jehofa go tšwa pelong go ka re thuša gore re kwešiše maikwelo a rena, re be le khutšo le go kgona go kgotlelela.

17. (a) Re ka ithuta eng thapelong yeo moporofeta Jona a ilego a e rapela? (Jona 2:​1, 2) (b) Go gopola dipolelwana tše dingwe tšeo di lego go Dipsalme go tlo re thuša bjang ge re na le mathata? (Bona mongwalo wa tlase.)

¹⁷ Bala Jona 2:​1, 2. Ge moporofeta Jona a be a rapela thapelo ye, o be a le ka gare ga mpa ya hlapi e kgolo. Lege Jona a ile a se theetše Jehofa, o be a kgodišegile gore o tlo mo kwa. Ge a be a rapela, o ile a diriša dipolelwana tše dintšinyana tšeo di bego di le ka gare ga Dipsalme.d O be a tlwaelane le mantšu a Dipsalme. Go naganišiša le go gopola mantšu ao, go ile gwa mo kgodiša gore Jehofa o tlo mo thuša. Le rena ge re ka swara mangwalo a mangwe ka hlogo, ge re na le mathata re tlo kgona go a gopola gomme a tlo re homotša.

DULA O BATAMELA KGAUSWI LE JEHOFA KA GO RAPELA

18-19. Ge e ba ka dinako tše dingwe ge re rapela ga re tsebe gore re botše Jehofa eng, mantšu ao a lego go Baroma 8:​26, 27 a ka re thuša bjang? Nea mohlala.

¹⁸ Bala Baroma 8:​26, 27. Ka dinako tše dingwe re ka ikwa re tshwenyegile kudu gomme ra palelwa ke go hlalosa tsela yeo re ikwago ka yona ge re rapela. Eupša ga se ra swanela go fela matla. Ka gobane ka dinako tše dingwe moya o mokgethwa wa Modimo o a re “phophothela.” Moya o mokgethwa o re phophothela bjang? Jehofa o ile a diriša moya wa gagwe o mo mokgethwa gore dithapelo tša bahlanka ba gagwe di kgone go ngwalwa ka mo Beibeleng. Ge e ba re sa kgone go hlalosa tsela yeo re ikwago ka yona, re ka kgona go diriša mantšu a mangwe a dithapelo tšeo di lego ka Beibeleng gomme Jehofa o tlo araba dithapelo tšeo.

¹⁹ Kgaetšedi Yelena yo a tšwago Russia le yena o ile a thušwa ke go rapela a diriša mantšu ao a lego ka Beibeleng. O ile a swarwa ka gobane o be a rapela le go bala Beibele. Yelena o be a imetšwe kudu moo e lego gore o be a palelwa le ke go rapela. O re: “Ke ile ka gopola gore ge ke ikwa ke imetšwe ebile ke palela ke go rapela, Jehofa o tlo amogela thapelo ya ka le ge ke diriša mantšu ao bahlanka ba gagwe ba nako e fetilego . . . ba bego ba a diriša ge ba rapela . . . Go tseba gore Jehofa o kwa dithapelo tša rena lege re sa tsebe gore re mmotše eng ge re rapela, go ile gwa nkgothatša kudu.”

20. Ke eng seo se ka go thušago gore o kgone go rapela ge o tshwenyegile kudu?

²⁰ Ge re gateletšegile kudu go ka ba thata go rapela ka gobane re ka thoma go nagana ka dilo tše dingwe. Re ka thušwa ke eng? Re ka thušwa ke go theetša Psalme e rekhotilwego pele re rapela. Re ka thušwa le ke go ngwala ka tsela yeo re ikwago ka yona go swana le kgoši Dafida. (Ps. 18, 34, 142; mongwalo wa ka godimo.) Ga gona molao wa tšhipi wo o lego gona wa gore re swanetše go lokišetša bjang go rapela. (Ps. 141:2) Diriša dilo tšeo wena di go šomelago.

21. Ke ka baka la eng re swanetše go rapela ka pelo ka moka?

²¹ Go kgothatša kudu go tseba gore Jehofa o kwešiša kamoo re ikwago ka gona le pele re ka mmotša. (Ps. 139:4) Lege go le bjalo, o thabišwa ke go kwa ge re mmotša gore re ikwa bjang le gore re a mo tshepa. Ka gona o se ke wa tšhaba go rapela. Ithute go dithapelo tšeo di le go ka Beibeleng. Rapela ka pelo ka moka. Mmotše ka dilo tšeo di go nyamišago le tšeo di go thabišago. Ka ge Jehofa e le Mogwera wa gago wa hlogo ya kgomo, o tlo dula a go thuša.