Tlhakahlakano ya Dipolotiki e Phethagatša Boporofeta bja Beibele

Batho lehono ba aroganywa ke dipolotiki. Ba ganetšana le melao yeo e kgomago maphelo a bona a letšatši le letšatši, gomme ka bogale ba ntšha maikwelo a bona ao a fapafapanego ka dipolotiki. Ba mmušo bao ba dirago diphetho ga ba nyake go kwa dikgopolo tša batho ba bangwe le go di amogela. Diphapano tše di dira gore ba mmušo ba palelwe ke go phethagatša mošomo wa bona.

Tlhakahlakano yeo e lego gona ya dipolotiki ya magareng ga Amerika le Brithania ya ditšhaba tšeo di kopanego, e be e swanetše go direga. Ka baka la eng? Ka gobane Beibele e boletše e sa le pele gore tlhakahlakano e tlo ba gona magareng ga mebušo ye e mebedi, ka nako yeo mmušo wa Modimo o tlo tsena ditaba gare gomme wa tliša diphetogo mo lefaseng.

Tlhakahlakano ya dipolotiki yeo e “tlago go direga mehleng ya bofelo”

Beibele e na le boporofeta bjo bo ngwadilwego ka pukung ya Daniele. Ka gare ga boporofeta bjoo, Modimo o utollotše “seo se tlago go direga mehleng ya bofelo,” e le go nakong yeo Daniele a bego a bolela ka diphetogo tšeo di tla go go ba gona bathong.—Daniele 2:28

Modimo o neile kgoši ya Babilona boporofeta bjoo ka toro. Torong ya gagwe kgoši e bone seswantšho se segolo sa go dirwa ka di tšhipi tše di fapafapanego. Ka morago moporofeta Daniele o ile a hlalosa ka seswantšho seo gore go thoma hlogong ya sona go fihla maotong, se emela mebušo e matla yeo e tlago go buša gomme mafelelong ya wa.a Mafelelong seswantšho se, se tlo fedišetšwa sa ruri ka morago ga go kgatlwa ke leswika leo le emelago Mmušo wa Modimo.—Daniele 2:36-45.

Go ya ka boporofeta bjo, Mmušo wa Modimo o tlo tšeela mebušo ya batho ka moka legato. Mmušo wo ke wo Jesu Kriste a rutilego balatedi ba gagwe gore ba o rapelele ge a be a re: “Mmušo wa gago a o tle.”—Mateo 6:10.

Ke boporofeta bofe bja Beibele bjo bo bolelago ka tlhakahlakano ye ya dipolotiki? Hlokomela gore ‘karolo e nngwe ya dinao tša sona ke tšhipi gomme e nngwe ke letsopa.’ (Daniele 2:33) Ditšhipi tšeo di dirišitšwego go dira dinao di be di fapana le tšhipi e tee yeo e dirišitšwego go dira mmele, seo se bontšhago gore go tlo ba le mmušo o tee fela woo o nago le matla, wo o tlago go fapana le e mengwe. Bjang? Boporofeta bja Daniele bo a hlalosa:

Go ya ka boporofeta bjo, Mmušo wo o nago le matla wo o emelago ke dinao tša seswantšho se o tlo emeletšana le tlhakahlakano ya dipolotiki. Batho bao ba dulago ka tlase ga Mmušo wo, ba tlo dira dilo tšeo di tlago go dira gore o se ke wa dula o tiile.

Boporofeta bja Daniele bo a phethagala lehono

Maoto a seswantšho se a emela mmušo o matla wa mehleng ya rena, elego Mmušo wa Amerika le Brithania ka ge e dirišana. Dilo tšeo di diregago lehono di bontšha seo bjang?

Ka ge maoto a seswantšho seo “karolo e nngwe ya dinao tša sona e le tšhipi gomme e nngwe e le letsopa,” seo se dira gore maoto ao a se ke a tia. (Daniele 2:42) Lehono mebušo ye e mebedi ga e sa na matla ka gobane ga go na kwano. Ka mohlala dinaga tše tše pedi di na le mathata ka ge badudi ba tšona ba se ba kgotsofala. Batho ba toyi toya ba galefile ba lwela ditokelo tša bona. Baetapele bao ba ba kgethilego ba palelwa ke go kgotsofatša dinyakwa tša bona. Mebušo ye e mebedi e palelwa ke go phethagatša ditshepišo tša wona ka ge batho ba nyaka dilo tša go se swane.

A re kweng gore boporofeta bjo bongwe bja Daniele bo be bo e ra go reng le gore bo phethagala bjang lehono:

Boporofeta: “Mmušo woo o tla arogana. Eupša karolo e nngwe ya mmušo woo, e tla tia go swana le tšhipi.”—Daniele 2:41.

Tlhaloso: Le ge Amerika le Brithania di na le mathata a tša dipolitiki, mebušo yeo ka bobedi e na le mašole le dibetša tše matla. Ka baka la seo ba ka kgona go dira dilo tšeo di ka amago lefase ka moka.

Go phethagala ga boporofeta

Ka 2023, naga ya United States le ya United Kingdom di ile tša diriša tšhelete kudu bošoleng go feta tšhelete yeo e ilego ya diriša ke dinaga tše12 tše dikgolo ge di kopane.—Stockholm International Peace Research Institute.

“Tirišano yeo e lego gona magareng ga UK le US ke ye matla kudu go feta ya dinaga tše dingwe ebile dinaga tše di diriša thekinolotši ya maemo a godimo. Re ngatana e tee, re a thekgana. .”—Strategic Command, U.K. Ministry of Defence, April 2024

Boporofeta: “Ka ge karolo e nngwe ya menwana ya maoto e dirilwe ka tšhipi mola e nngwe e dirilwe ka letsopa, le karolo e nngwe ya mmušo woo e tla ba e tiilego gomme e nngwe ya ba e fokolago.”—Daniele 2:42.

Tlhaloso: Le ge dinaga tše di na le mašole le didirišwa tše matla, ga di kgone go dira selo se sengwe le se sengwe seo di se nyakago ka lebaka la tsela yeo mmušo o dirago dilo ka yona. Ge batho ba bantši ba ka se thekge phetho yeo mmušo o e dirilego, ba thatafalelwa ke go tšwela pele ka phetho yeo.

Go phethagala ga boporofeta

“Ditsebi tša dipolotiki di bolela gore go se kwane ga mebušo yeo e lego gona kua Amerika go dirile gore go be thata gore ba mmušo ba palelwe ke go direla batho dilo tšeo ba ba tshepišitšego tšona ge go tliwa ditabeng tša polokego le dikgwebo.”—“The Wall Street Journal.”

“Mathata a dipolotiki ao a sa kago a ba gona peleng kua Brithania a dirile gore babuši ba dipolotiki ba palelwe ke go dira diphetogo tšeo di nyakegagob e le gore ba thuše badudi ba naga yeo.”—Institute for Government.

Boporofeta: “Karolo e tee ya mmušo e tla tswakana le batho, eupša di ka se kgomarelane.”—Daniele 2:43.

Tlhaloso: Batho ba na le mo gontši mo ba go bolelago ka mebušo eupša dilo tšeo ba di bolelago di ka no se thabiše babuši le batho bao ba thekgago mmušo woo.

Go phethagala ga boporofeta

“Lehono badudi ba bantši ba Amerika ga ba sa na pono e botse ka dipolitiki le babuši.”—Pew Research Center.

“Lehono batho ba bantši ga ba sa tshepa mmušo le boradipolotiki ebile ga ba sa tshepa le tsela yeo ba dirago dilo ka yona go fapana le mengwaga e masome hlano e fetilego.”—“National Centre for Social Research.”

Kamoo boporofeta bja Daniele bo tlago go phethagala ka gona nakong e tlago

Go ya ka boporofeta bja Daniele, mmušo wa Amerika le wa Brithania e tla be e le wona mmušo o matla ge Mmušo wa Modimo o tla be o tšeela mebušo ya batho ka moka legato.—Daniele 2:44.

Nakong ya ge go be go ngwalwa boporofeta bja puku ya Kutollo, Beibele e bontšha gore “dikgoši tša lefase ka moka” di tla be di ipopile ngatana e tee gore di lwe le Jehofac Modimo nakong ya ntwa ya Haramagedone, elego ‘ntwa ya letšatši le legolo la Modimo Ramatlaohle.’ (Kutollo 16:14, 16; 19:19-21) Ntweng yeo, Jehofa o tlo fediša mebušo ka moka ya batho le mebušo yeo e emelago ke seswantšho sa boporofeta bja Daniele.

Go ithuta kamoo go oketšegilego bona sehlogo seo se rego “Ntwa ya Haramagedone ke Eng?”

O holwa bjang ke go phethagala ga boporofeta bja Daniele ka go hlakahlakana ga dipolotiki?

Beibele e boletše e sa le pele ka tlhakahlakano yeo e bego e tla ba gona ya dipolotiki mmušong wa Amerika le Brithania, gomme go ithuta ka boporofeta bjo go tlo go thuša go tseba gore go direga eng lehono.

• O tlo kwešiša gore ke ka lebaka la eng Jesu a be a sa nyake balatedi ba gagwe gore ba tsenatsene ditaba tša dipolotiki tša lefase le. (Johane 17:16) Le gona o tlo kwešiša le gore ke ka lebaka la eng Jesu yo Modimo a mo kgethilego gore e be kgoši ya Mmušo wa gagwe a boletšego gore: “Mmušo wa ka ga se karolo ya lefase le.”Johane 18:36.

• O tlo kgothatšwa ke go tseba gore Mmušo wa Modimo o kgauswi le go lokiša dilo ka moka gomme Modimo o tlo dira dilo ka moka tšeo a tshepišitšego batho gore o tlo ba direla tšona.—Kutollo 21:3, 4.

• O tlo thabišwa ke go tseba gore re tlo ba le bokamoso bjo bo botse le gona dinaga di ka se sa lwa le go senya lefase la rena.—Psalme 37:11, 29.

Boporofeta bja Daniele bo bontšha gore mmušo wa Amerika le wa Brithania wo o ipopilego ngatana e tee, yeo e emelago ke dinao tša seswantšho sa boporofeta bja Daniele, e tlo ba mmušo wa mafelelo o matla wo o tlago go buša batho.Ka morago ga gore o fedišwe, go tlo buša Mmušo wa Modimo wo o lego legodimong.

Gore o tsebe ka mo go oketšegilego gore Mmušo wa Modimo o tlo direla batho eng, bona bidio yeo e rego Mmušo wa Modimo ke Eng