Na Maria ke Mmago Modimo?

Karabo ya Beibele

Aowa, Beibele ga e re rute gore Maria ke mmago Modimo, goba gore Bakriste ba swanetše go rapela Mariaa goba go mo hlompha kudu. Naganišiša ka dintlha tše di lego ka mo tlase:

Maria ga se a ka a re ke yena mmago Modimo. Beibele e re o ile a belega ‘Morwa wa Modimo,’ e sego Modimo ka boyena.—Mareka 1:1; Luka 1:32.
Jesu Kriste ga se a ka a re Maria e be e le mmago Modimo goba gore o swanetše go rapelwa ka tsela e itšego. Ge e le gabotse, Jesu o ile a phošolla mosadi yo a ilego a re Maria o a thaba ka ge e le mmago Jesu. Jesu o ile a mo phošolla ka gore: “Aowa, go e na le moo, go thaba bao ba kwago lentšu la Modimo gomme ba le boloka!”—Luka 11:27, 28.
Polelwana yeo e rego “Mmago Modimo” le yeo e rego “Theotokos” (motswadi wa Modimo) ga di gona ka Beibeleng.
Ka Beibeleng polelwana yeo e rego “mohumagadi wa magodimo” ga e šupe go Maria, eupša e šupa go modimogadi wa maaka yo a bego a rapelwa ke Baisiraele ba bahlanogi. (Jeremia 44:15-19) Go ka direga gore “mohumagadi wa magodimo” e be e le Ishtar (Astarte), e lego modimogadi wa Bababilona.
Bakriste ba lekgolong la pele la mengwaga ba be ba sa rapele Maria, le gona ga se ba ka ba mo hlompha ka tsela le ge e le efe e kgethegilego. Radihistori yo mongwe o re Bakriste ba lekgolong la pele la mengwaga “ba be ba sa kwane le dihlotswana le gona ba be ba tšhaba gore ge ba ka hlompha Maria ka tsela e feteletšego, se se ka dira gore batho ba bangwe ba nagane gore ba rapela modimogadi.”—In Quest of the Jewish Mary.
Beibele e re Modimo o be a dutše a le gona. (Psalme 90:1, 2; Jesaya 40:28) Ka ge a se na mathomo, a ka se be le mmagwe. Go oketša moo, Maria o be a ka se kgone go rwala Modimo ka popelong ya gagwe ka gobane Beibele e bontšha gabotse gore le legodimo ke le lenyenyane gore le ka mo lekana.—1 Dikgoši 8:27.

Maria ke Mmago Jesu e sego Mmago Modimo

Maria e be e le Mojuda, ka gona ke setlogolwana sa Kgoši Dafida. (Luka 3:23-31) Modimo o be a rata Maria kudu ka ge a be a na le tumelo e bile a ineetše go yena. (Luka 1:28) Modimo o ile a mo kgetha gore e tle e be mmago Jesu. (Luka 1:31, 35) Maria le monna wa gagwe Josefa ba ile ba ba le bana ba bangwe.—Mareka 6:3.

Le ge Beibele e re botša gore Maria o ile a ba morutiwa wa Jesu, ga e re botše dilo tše dintši ka yena.—Ditiro 1:14.

Ke ka baka la’ng ba bangwe ba re Maria ke mmago Modimo?

Go na le bohlatse bjo bo bontšhago gore batho ba thomile go rapela Maria go tloga mafelelong a lekgolo la bone la mengwaga C.E. Ka nako yeo, Kereke ya Katholika e be e le bodumedi bja Naga Mmušong wa Roma. Ka baka leo, batho ba bantši bao ba bego ba sa tsene kereke ba ile ba thoma go no ipitša Bakriste. Le gona kereke yeo e be e amogetše thuto yeo e sego ya mangwalo ya Borarobotee.

Thuto ye ya Borarobotee e ile ya dira gore batho ba bantši bao ba tsenago kereke yeo ba phethe ka gore ge e ba Jesu e le Modimo, gona Maria ke mmago Modimo. Ka 431 C.E., lekgotla la kereke ya kua Efeso le ile la tsebiša semolao gore Maria ke Mmago Modimo. Ka morago ga gore Lekgotla le la Efeso le tsebiše taba ye, batho ba bantši ba ile ba thoma go rapela Maria. Le gona ge batho bao ba bego ba sa tsene kereke ba thoma go tsena kereke, ganyenyane-ganyenyane diswantšho tša Kgarebe Maria di ile tša thoma go tšeela tša medimogadi ya moo legato, e bjalo ka Aratemise (yoo Baroma ba mmitšago Diana) le Isis.

Ka 432 C.E., Mopapa Sixtus wa Boraro o ile a laela gore kereke e agiwe kua Roma e le go hlompha Maria yo go bego go thwe ke Mmago Modimo. E ile ya agwa kgauswi le tempele yeo e bego e agetšwe go hlompha Lucina, e lego modimogadi wa go belegiša wa Baroma. Mongwadi yo mongwe o ile a hlalosa gore moago wo ke “leswao la sa ruri la go amogela Mma yo Mogolo wa dihlotswana tša batho bao ba sa tsenego kereke sehlotswaneng sa Maria ka morago ga gore Katholika e be bodumedi bja naga ya Roma.”—Mary—The Complete Resource.

a Dikereke tše dintši di ruta gore Maria ke mmago Modimo. Ka dinako tše dingwe di mmitša “mohumagadi wa magodimo” goba di re ke Theotokos, e lego lentšu la Segerika leo le bolelago gore “motswadi wa Modimo.”