Lesogana le lekega go dira selo seo se sa lokago ge le bona baratani, bašemane ba babedi ba lebeletše founo mola lekgarebe le iphetela

BASWA BA A BOTŠIŠA

Nka Ganetša Diteko Bjang?

Moapostola Paulo o ngwadile gore: “Ge ke kganyoga go dira se se lokilego, se sebe se gona go nna.” (Baroma 7:21) Na le wena o ile wa ikwa ka tsela yeo? Gona sehlogo se se tlo go thuša go bona kamoo o ka ganetšanago le diteko tša go dira dilo tšeo di sa lokago.

Seo o swanetšego go se tseba

Kgateletšo ya dithaka e ka go dira gore o dire dilo tšeo di sa lokago. Ge e le gabotse Beibele e re “ditlwaelano tše mpe di senya mekgwa e holago.” (1 Bakorinthe 15:33) Kgateletšo yeo e tšwago go batho ba bangwe goba go inthanete e ka dira gore o be le dikganyogo tšeo di sa lokago gomme mafelelong wa dira sebe “feela ka gobane se dirwa ke batho ba bantšhi.”—Ekisodo 23:2.

“Go nyaka go ratwa ke batho ba bangwe go ka dira gore o dire dilo tšeo ba di dirago e le gore ba go amogele.”—Jeremy.

Seo o ka naganago ka sona: Ke ka baka la’ng go ka ba thata go ganetša diteko ge o nagana kudu ka seo batho ba bangwe ba se naganago ka wena?—Diema 29:25.

Therešo ke gore: O se ke wa dumelela kgateletšo ya dithaka e fetoša tsela yeo o phelago ka yona.

Seo o ka se dirago

Tseba seo o se dumelago. Ge o sa tsebe seo o se dumelago batho ba bangwe ba tlo raloka ka wena. Go kaone gore o theeletše keletšo ya Beibele yeo e rego: “Kgonthišetšang dilo tšohle; kgomarelang se sebotse.” (1 Bathesalonika 5:21) Ge e ba o kwešiša seo o se dumelago, go tlo ba bonolo gore o gane diteko ge di tšwelela.

Seo o ka naganago ka sona: Ke ka baka la’ng o dumela gore melao ya Modimo ya boitshwaro e a go hola?

“Ke lemogile gore ge ke kgomarela seo ke se dumelago ebile ke ganetša diteko, batho ba ntlhompha ka baka la seo.”—Kimberly.

Mohlala wa ka Beibeleng: Daniele. Ge Daniele e be e sa le moswa, “o ile a fetša le pelo ya gagwe” gore o tlo kwa melao ya Modimo.—Daniele 1:8.

Lesogana le bofilwe ka dithapo, gomme le ralokišwa go swana le mpopi — Ge eba o sa tsebe seo o se dumelago, batho ba bangwe ba tlo raloka ka wena.

Tseba mafokodi a gago. Beibele e bolela ka “dikganyogo tša bofsa” tšeo di golago kudu ge o le moswa. (2 Timotheo 2:22) Dikganyogo tšeo ga se tša thobalano feela, eupša gape ke tša go nyaka go amogelwa ke batho ba bangwe, go nyaka go dula o nnoši le go nyaka go itirela diphetho pele o ka lokelwa ke go dira bjalo.

Seo o ka naganago ka sona: Beibele e re “yo mongwe le yo mongwe o lekwa ka go gogwa le go goketšwa ke kganyogo ya gagwe.” (Jakobo 1:14) Wena o lekwa ke’ng kudu?

“O se ke wa iphora, tseba dilo tšeo di ka go lekago. Dira nyakišišo ya gore o ka lwantšhana bjang le diteko tšeo, ke moka o ngwale fase dintlha tšeo di tlago go go thuša nakong e tlago. Ge o tlo lebeletšana le teko yeo, o tlo kgona go e fenya.”—Sylvia.

Mohlala wa ka Beibeleng: Dafida. Ka dinako tše dingwe o ile a ineela go dikganyogo tšeo di sa lokago, mola ka dinako tše dingwe o ile a dumelela batho ba bangwe gore ba mo dire gore a dire dilo tšeo di sa lokago. Dafida o ile a ithuta diphošong tša gagwe. O ile a rapela Jehofa ka gore “ke kgopela o nthuše gore ke be le pelo e sekilego, gomme o nthuše gore ka mehla ke kganyoge go dira dilo tše di lokilego.”—Psalme 51:10.

Tšea kgato. Beibele e re: “O se ke wa itesa o fenywa ke bobe.” (Baroma 12:21) Seo se ra gore ga se wa swanelwa ke go dumelela diteko di go laola. O ka kgetha go dira selo seo se lokilego.

Seo o ka naganago ka sona: Ge o kopana le teko, o ka dira’ng gore o e ganetše?

“Ke nagana ka gore ke tlo ikwa bjang ge nka dira selo seo ke lekegago go se dira. Mohlomongwe nka ikwa ke thabile eupša lethabo leo ke la nakwana. Ka morago ga go nagana ka seo ke se dirilego ke tlo thoma go nyama le go kwa bohloko. Ka gona go bohlokwa gore ke ganetše teko yeo!”—Sophia.

Mohlala wa ka Beibeleng: Paulo. Le ge Paulo a be a fela a eba le dikganyogo tšeo di sa lokago, o be a di laola. O ngwadile gore: “ke tula mmele wa ka gomme ka o laola bjalo ka lekgoba.”—1 Bakorinthe 9:27.

Therešo ke gore: Ke wena o laolago gore o tla lebeletšana bjang le teko.

Gopola gore diteko di a fela. Elisa wa mengwaga e 20 o re: “Ge ke be ke le sekolong, diteko tšeo ke bego ke bona e le tše dikgolo gona bjale ke bona e le tše di nnyane. Go nagana ka seo go nthuša go bona gore diteko tšeo ke nago le tšona gona bjale le tšona di tlo feta. Letšatši le lengwe ge ke lebelela morago, ke tlo lemoga gore ke dirile gabotse ka go ganetša diteko tšeo.”

Seo dithaka tša gago di se bolelago

“Selo seo se nthušago go ganetša diteko ke go kgodišega ka seo ke se dumelago le go ba le sebete sa go se emelela. Ge nka phetha ka gore ga ke tlo dira selo se itšego ke kgomarela phetho yeo, ebile nka se sa nagana ka yona goba ka dumela motho yo mongwe go fetoša phetho ya ka.”—Olivia.

“Baswa ba lebeletšana le kgateletšo ya go ya menateng, go nwa bjala, go tsuba dihlaretagi le go ba le thobalano. Ke thušwa ke go bolela le batswadi ba ka ka dikgateletšo tšeo. Gape go dula ke swaregile ka dilo tše dingwe go nthuša gore ke se ke ka ba le nako ya go nagana ka dilo tšeo di ka dirago gore ke wele tekong.”—Jared.

“Go thata kudu go gana diteko tšeo batho ba bangwe ba bonago di lokile, mola nna ke di bona di se tša loka, go swana le go kgetha boithabišo. Go tseba seo o se dumelago go ka go thuša go ganetša diteko tše bjalo. Seo se tšea nako ebile se nyaka o na le phihlelo.”—Mayan.

“O swanetše go tseba gore ke diteko dife tšeo di lego bonolo gore o wele go tšona. O swanetše gore o lemoge dikarolo tša inthanete tšeo di ka dirago gore o feletše o wetše boitshwarong bjo bo sa kgahlišego. Ebile o swanetše go tseba seo o swanetšego go dira ge di tšwelela.”—Julian.