Bjalo ka bahlanka ba Jehofa ba botegago, re welwa ke mathata e bile re a babja go swana le batho ka moka. Re ka swanelwa le ke go kgotlelela go ganetšwa goba go tlaišwa ke batho bao ba hloilego bahlanka ba Modimo. Le ge Jehofa a ka se thibele mathata ao gore a se ke a direga, eupša o tshepiša gore o tlo re thuša. (Jes. 41:10) Ge Jehofa a re thuša re tlo kgona go thaba, go kgotlelela le go dula re mmotegela le ge re kopana le mathata. Jehofa o tshepiša go re nea seo Beibele e se bitšago “Khutšo ya Modimo.” (Bafil. 4:​6, 7) Khutšo ye e dira gore re kgone go dula re išitše maswafo fase, le gona seo se direga ka baka la segwera se sebotse seo re nago le sona le Jehofa. Khutšo ye “e feta kwešišo yohle ya batho,” e bile ke ye e kgahlišago kudu go feta kamoo re ka naganago ka gona. Na o kile wa ikwa o išitše maswafo fase ka morago ga gore o rapele Jehofa go tšwa pelong? Seo se kgonega ka gobane Jehofa a go neile “Khutšo ya Modimo.” w24.01 20 ¶2; 21 ¶4

Go rata Modimo go tlo dira gore batho bao ba mmotegelago ba nyake go tumiša leina la gagwe ka dipelo tša bona ka moka. Kgoši Dafida o ngwadile gore: “Anke ke rete Jehofa, anke ke rete leina la gagwe le lekgethwa ka pelo ya ka ka moka.” (Ps. 103:1) Dafida o be a kwešiša gore go tumiša leina la Jehofa go bolela go tumiša Jehofa ka boyena. Leina la Jehofa le akaretša botumo bja gagwe, ka gona, se se dira gore re nagane ka dika tša gagwe tše dibotse le ditiro tša gagwe tše di makatšago. Dafida o be a nyaka go swara leina la Tatagwe e le le lekgethwa le go le tumiša. O be a nyaka go dira seo ka pelo ya gagwe ka moka. Ka mo go swanago, Balefi ba be ba etelela pele go tumišeng Jehofa. Ka boikokobetšo ba ile ba bolela gore mantšu a bona ga se a lekanego go tumiša leina la Jehofa le lekgethwa. (Neh. 9:5) Ga go pelaelo gore Jehofa o ile a thabišwa ke go bona bahlanka ba gagwe ba botegago ba mo tumiša go tšwa pelong. w24.02 9 ¶6

Jehofa a ka se go lebelele o le motho yo a paletšwego. (2 Bakor. 8:12) Ithute go diphošo tšeo o di dirilego gomme o dule o nagana ka dilo tšeo o di fihleletšego. Beibele e re “Modimo ga se yo a sa lokago moo a ka lebalago modiro wa lena.” (Baheb. 6:10) Ka gona le wena ga se wa swanela go lebala dilo tšeo o di dirilego. Nagana ka dilo tšeo o šetšego o di fihleletše, e ka ba go ba le segwera se sebotse le Jehofa, go botša batho ba bangwe ka yena goba go kolobetšwa. Ka ge nakong e fetilego o kgonne go dira tšwelopele le go fihlelela dilo tšeo o bego o nyaka go di dira ka mokgatlong wa Jehofa, o ka tšwela pele o šoma ka thata gore o fihlelele dilo tšeo o nyakago go di dira gona bjale. Jehofa o tla go thuša gore o kgone go fihlelela pakane yeo o ipeetšego yona. Eupša gopola gore batho ba bantši bao ba sepedišago dikepe ba thabela leeto la bona. Ge o dutše o šoma ka thata go fihlelela pakane ya gago ka mokgatlong wa Jehofa, o se ke wa lebala go thabela go bona kamoo Jehofa a go thušago ka gona le go go šegofatša. (2 Bakor. 4:7) Ge o sa fele matla o tla go šegofatša kudu.—Bagal. 6:9. w23.05 31 ¶16-18