Ekisodo

28 “Mo go Baisiraele o kgethe Arone ngwaneno le barwa ba gagwe e lego Nadaba, Abihu, Eleasara le Ithamara gore e be baperisita ba ka. 2 O direle Arone ngwaneno diaparo tše kgethwa tše dibotse gore a hlomphege. 3 Wena bolela le batho ka moka bao ba nago le bokgoni, bao ke ba filego bohlale gore ba direle Arone diaparo tša go bontšha gore o kgethagaditšwe e le gore e be moperisita wa ka.

4 “Tše ke diaparo tšeo ba tlago go di dira: Phaphathiana ya sehubeng yeo e nago le maswikana, efoda, seaparo seo se se nago matsogo, seaparo sa sekotšho, tuku le lepanta. Ba direle Arone ngwaneno diaparo tše tše kgethwa e le gore e be moperisita wa ka. Ba di direle le barwa ba gagwe. 5 Batho bao ba diriše gauta, garane e talalerata, wulu ya mmala o mophepholo, garane e khwibidukhwibidu le linene e boletiana.

6 “Ba dire efoda ka garane ya gauta, garane e talalerata, wulu ya mmala o mophepholo, garane e khwibidukhwibidu le linene e boletiana, gomme ba e kgabiše. 7 Efoda yeo e be le mašelana a mabedi ao a rokeletšwego mo magetleng ao a kopanyago karolo ya ka pele le ya ka morago gore e be selo setee. 8 Lepanta la go e tlema gore e dule gabotse le lona le swanetše go dirwa ka gauta, garane e talalerata, wulu ya mmala o mophepholo, garane e khwibidukhwibidu le linene e boletiana.

9 “O tšee maswika a mabedi ao a bitšwago onikisi, gomme o ngwale maina a barwa ba Isiraele go ona. 10 Maina a bona a tshelelago o a ngwale leswikeng letee gomme a mangwe a tshelelago o a ngwale leswikeng le lengwe, o a ngwale ka go latelana ga bona. 11 O ngwale maina a barwa ba Isiraele maswikeng ao a mabedi, o ngwale ka mokgwa woo motho yo a tsebago go dira setempe godimo ga palamonwana a dirago ka gona. Dilo tšeo di tlago go swara maswika ao e be tša gauta. 12 O tsenye maswika ao a mabedi mašelaneng ao a rokeletšwego magetleng a efoda gore maswika ao a gopotše Modimo ka barwa ba Isiraele. Le gona ge Arone a eya pele ga Jehofa a rwale maina a bona mašelaneng ao a rokeletšwego magetleng a gagwe a mabedi gore Modimo a gopole Baisiraele. 13 O dire mašobana a go swara maswikana ka gauta. 14 O dire le ditšhaene tše pedi ka gauta yeo e hlwekilego tšeo di logagantšwego bjalo ka thapo, gomme o kgokelele dithapo tšeo dilong tšeo tša go swara maswikana.

15 “Motho yo a kgabišago dilo a dire phaphathiana ya sehubeng ya go ba le maswikana yeo e dirišetšwago go ahlola. E dirwe go swana le efoda, e dirwe ka garane ya gauta, garane e talalerata, wulu ya mmala o mophepholo, garane e khwibidukhwibidu le linene e boletiana. 16 E be le mahlakore a mane a lekanago ge e hlatlagantšwe gabedi, botelele bja yona e be disenthimithara tše e ka bago tše 20* le bophara bja yona e be disenthimithara tše e ka bago tše 20. 17 O e tsenye methaladi e mene ya maswikana. Mothaladi wa pele o be le leswika le le bitšwago rubi le la topase le la emeralede. 18 Mothaladi wa bobedi o be le leswikana la thekoise le la safire le la jasepere. 19 Mothaladi wa boraro o be le leswikana la lesheme le la agate le la amethisete. 20 Mothaladi wa bone o be le leswikana la kirisolite le la onikisi le la jade. Mašobana ao maswikana ao a tsenago go ona e be a gauta. 21 Maswikana ao a latelane go ya ka maina a barwa ba Isiraele ba 12. A ngwalwe ka mokgwa woo selo sa go dira setempe se ngwalwago ka gona. Leswikana le lengwe le le lengwe le ngwalwe leina la yo mongwe le yo mongwe wa ba meloko e 12.

22 “Mo phaphathianeng ya sehubeng ya go tsenya maswikana, o dire ditšhaene tšeo di swanago le thapo yeo e dirilwego ka gauta yeo e hlwekilego. 23 Mo phaphathianeng yeo o dire mašobana a mabedi a gauta dikhoneng tša yona tše pedi tša ka godimo. 24 O tsenye dithapo tše pedi tša mmala wa gauta mašobaneng ao a lego dikhoneng tša phaphathiana yeo ya sehubeng. 25 O tsenye dithapo tše pedi mašobaneng a mabedi ao a lego mašelaneng ao a lego magetleng a efoda karolong ya yona ya ka pele. 26 O dire le mašobana a mangwe a mabedi a gauta mo dikhoneng tše pedi tša lešela la ka gare la phaphathiana ya sehubeng leo le lebanego le efoda. 27 O dire mašobana a mangwe gape a mabedi a gauta karolong ya ka pele ya efoda, ka tlasana ga mašelana a mabedi ao a lego magetleng, kgauswi le mo e kgomagantšwego gona ka godingwana ga lepanta leo le logilwego la efoda. 28 Phaphathiana yeo ya sehubeng e tlemelelwe mašobaneng a efoda ka thapo e talalerata, seo se tla dira gore phaphathiana yeo e se ke ya šutha gomme e dule e le ka godingwana ga lepanta la efoda.

29 “Ge Arone a tsena ka Sekgethweng a rwale phaphathiana ya sehubeng ya go ahlola mo sefegeng sa gagwe yeo e nago le maina a barwa ba Isiraele, gore Jehofa a dule a gopola Baisiraele. 30 O tsenye Urime le Thumime* phaphathianeng yeo ya sehubeng ya go ahlola gomme Arone a di apare sefegeng sa gagwe ge a etla pele ga Jehofa. Arone a apare dilo tše gore di dirišwe go ahlola Baisiraele ka mehla ge a etla pele ga Jehofa.

31 “O dire seaparo sa go hloka matsogo seo se aparwago ka tlase ga efoda, o se dire ka garane e talalerata. 32 Se bulege moo moperisita a tlago go tsenya hlogo mo bogareng bja sona. Motho yo a logago a se direle morumo go se dikologa mo se bulegilego gona. Morumo wa sona o swanetše go tia go swana le seaparo sa ntwa se se bulegilego gore se se ke sa gagoga. 33 Mo se mennwego gona o se kgabiše ka diswantšho tša digarenate ka garane e talalerata, wulu ya mmala o mophepolo le garane e khwibidukhwibidu. Diswantšho tšeo di rokelelwe mo seaparo se mennwego gona ka moka gomme mo gare ga tšona go be le ditloloko tša gauta. 34 Tloloko e nngwe le e nngwe ya gauta o e latelanye le seswantšho sa garenate go dikologa mo seaparo sa go hloka matsogo se mennwego gona. 35 Arone a se apare ge a hlankela e le moperisita, gomme modumo wa ditloloko tšeo o kwagale ge a tsena ka Sekgethweng pele ga Jehofa le ge a etšwa, e le gore a se ke a hwa.

36 “O dire tšhipi ya go phadima ka gauta yeo e hlwekilego, gomme o e ngwale ka mokgwa woo selo sa go dira setempe se ngwalwago ka gona, ka mantšu ao a rego: ‘Bokgethwa ke bja Jehofa.’ 37 O e bofelele godimo ga tuku ka thapo e talalerata gomme e be karolong ya ka pele ya tuku yeo. 38 E be phatleng ya Arone gomme Arone o tla ikarabela ge motho a sa sware dilo tše kgethwa ka tsela ya maleba. Baisiraele ba tla neela Modimo dilo tše e le dimpho tše kgethwa. Tšhipi yeo e dule e le phatleng ya gagwe ka mehla e le gore Jehofa a ba amogele.

39 “O loge lešela la sekotšho gomme o dire seaparo sa linene e boletiana le tuku ya linene e boletiana, o dire le lepanta.

40 “O direle le barwa ba Arone diaparo, mapanta, le dituku tše botse gore ba hlomphege. 41 O di apeše Arone ngwaneno le barwa ba gagwe ba na le yena, o ba tlotše ka makhura, o ba kgethe o be o ba kgethagatše gore e be baperisita ba ka. 42 Le gona o ba direle marokgwana a linene gore ba khupetše bofeela bja bona. Marokgwana ao a tloge lethekeng a fihle diropeng. 43 Arone le barwa ba gagwe ba a apare ge ba tsena taberenakeleng* goba ge ba batamela aletare go yo hlankela lefelong le lekgethwa, e le gore ba se dire sebe gomme ba hwa. Wo ke molao wa go ya go ile go Arone le go ditlogolo tša gagwe.