Ekisodo

34 Jehofa a bolela le Moshe a re: “Ipetlele diphaphathi tše pedi tša maswika tšeo di swanago le tšela tša pele, gomme moo diphaphathing tšeo ke tla ngwala mantšu ao a bego a le diphaphathing tšela tša pele tšeo o di pšhatlagantšego. 2 Itokiše ka gobane gosasa mesong o tla rotogela Thabeng ya Sinai gomme wa ema kgauswi le nna moo godimo ga thaba. 3 Eupša go se be le motho yo a sepelago le wena, e bile go se be le motho yo a bonwago mo thabeng ka moka. Le gona, go se be le mehlape ya dikgomo le ya dinku yeo e fulago pele ga thaba yeo.”

4 Ka gona Moshe a betla diphaphathi tše pedi tša maswika tšeo di swanago le tšela tša pele, gomme a tsoga e sa le mesong a ya Thabeng ya Sinai a di swere, bjalo ka ge Jehofa a mo laetše. 5 Jehofa a theoga ka leru gomme a ema kgauswi le Moshe moo thabeng, ke moka a tsebatša leina la gagwe Jehofa.* 6 Jehofa a feta pele ga gagwe gomme a re: “Ke nna Jehofa, ke nna Jehofa, Modimo yo a gaugelago le yo a šokelago, yo a sa galefego kapela, yo a nago le lerato le legolo* gomme selo se sengwe le se sengwe seo a se bolelago e lego nnete, 7 yo a bontšhago meloko e dikete lerato la gagwe le legolo, le yo a lebalelago bao ba dirago diphošo le dibe. A ka se lese go otla yo a dirilego phošo, eupša o tla otla bana, ditlogolo le ditlogolokhukhu ka baka la diphošo tša botatago bona.”

8 Kapejana Moshe a inamela fase gomme a khunama. 9 Ke moka a re: “Hle Jehofa, ge e ba o nkamogela, anke wena Jehofa o sepele le rena ka gobane setšhaba se se na le dihlogo tše thata, gomme o re lebalele molato wa rena le sebe sa rena, o be o re amogele re le batho ba gago.” 10 Ge Modimo a mo araba a re: “Kgwerano yeo ke e dirago še: Pele ga Baisiraele ka moka ke tla dira dilo tše di makatšago tšeo di sa kago tša bonwa lefaseng ka moka goba ditšhabeng ka moka. Baisiraele ka moka ba tla bona gore ka nnete dilo tše ka moka di dirilwe ke nna Jehofa, ka gobane seo ke se dirago ka lena Baisiraele se a makatša.

11 “Lena theetšang seo ke le botšago sona lehono. Ke tla raka Baamore, Bakanana, Bahethe, Baperetse, Bahefe le Bajebusi le ntebeletše. 12 Le itlhokomele gore le se ke la dira kgwerano le badudi ba naga yeo le yago go yona, ka gobane dilo di ka se le sepelele gabotse. 13 Eupša le phušole dialetare tša bona, le pšhatlaganye maswika a bona ao ba a rapelago, gomme le reme dikota tša bona tše kgethwa.* 14 O se ke wa rapela modimo o mongwe ka gobane nna Jehofa ke nyaka gore go rapelwe nna ke nnoši. Ruri ke Modimo yo a nyakago gore go rapelwe nna ke nnoši. 15 Itlhokomele gore o se ke wa dira kgwerano le badudi ba naga yeo, ka gobane ge ba dira bootswa le medimo ya bona ka go e rapela le go e direla dihlabelo, ba tla go bitša gomme wa ja dijo tšeo ba dirilego dihlabelo ka tšona. 16 Ba tla tšeela barwa ba lena ba bangwe ba barwedi ba bona, gomme barwedi ba bona ba dira bootswa le medimo ya bona ka go e rapela, ke moka ba dira gore barwa ba lena le bona ba dire bootswa le medimo yeo ya bona.

17 “O se ke wa itirela medimo yeo e dirilwego ka tšhipi.

18 “O keteke Monyanya wa Dinkgwa tše di sa Omelwago. Bjalo ka ge ke go laetše, o je dinkgwa tše di sa omelwago ka matšatši a šupago ka nako e beilwego kgweding ya Abibi. Ka gobane o tšwile Egepeta ka kgwedi ya Abibi.

19 “Barwa ba lena ka moka ba mathomo ke ba ka, gotee le maitšibulo ka moka a diphoofolo tše tona, e ka ba e le leitšibulo la poo goba la nku. 20 Leitšibulo le lengwe le le lengwe la tonki o le rekolle ka nku. Eupša ge e ba o sa kgone go le rekolla, gona o le kgaole molala. O rekolle morwa yo mongwe le yo mongwe wa gago wa mathomo. Go se be le motho yo a tlago pele ga ka a se a swara selo.

21 “O šome ka matšatši a tshelelago, eupša ka letšatši la bošupa o khutše. O khutše le nakong ya go lema le ya go buna.

22 “O keteke Monyanya wa Dibeke o diriša korong ya mathomo yeo o e bunnego, gomme mafelelong a ngwaga o keteke Monyanya wa go Kgobela dilo tšeo o di bunnego.

23 “Yo mongwe le yo mongwe yo motona mo go lena a tšwelele gararo ka ngwaga pele ga Morena Jehofa, yena Modimo wa Isiraele. 24 Ke tla raka ditšhaba pele ga lena, gomme ka dira gore naga ya lena e be e kgolo. Ga go na motho yo a tlago go leka go tšea naga ya lena ge le ile go iponagatša go Jehofa Modimo wa lena gararo ka ngwaga.

25 “Madi a sehlabelo sa ka le se ke la a neela gotee le selo le ge e le sefe seo se nago le komelo. Sehlabelo sa monyanya wa Paseka seo se šetšego se se ke sa bewa bošego ka moka go fihla mesong.

26 “Dienywa tša mathomo tše dibotsebotse tšeo di tšweleditšwego ke mobu wa gago o di tliše ntlong ya Jehofa Modimo wa gago.

“O se ke wa fufutša putšanyana ka maswi a mmago yona.”

27 Jehofa a tšwela pele a re go Moshe: “Ngwala mantšu a ka gobane ke dira kgwerano le wena le Isiraele ka go dumelelana le mantšu ao.” 28 Moshe o ile a dula moo thabeng le Jehofa matšatši a 40 le mašego a 40. O ile a se je selo e bile a se nwe meetse. Modimo a ngwala diphaphathing tšela mantšu a kgwerano, e lego Melao e Lesome.*

29 Bjale ge Moshe a theoga Thabeng ya Sinai o be a swere maswika a mabedi ao a ngwadilwego melao ya Modimo. Ge a be a theoga moo thabeng o be a sa tsebe gore sefahlego sa gagwe se a phadima ka ge a be a bolela le Modimo. 30 Ge Arone le Baisiraele ka moka ba lebelela Moshe, ba bona gore sefahlego sa gagwe se a phadima gomme ba tšhaba go mmatamela.

31 Eupša Moshe a ba bitša. Ka gona Arone le matona ka moka setšhabeng ba ya go yena gomme a bolela le bona. 32 Ka morago ga moo, Baisiraele ka moka ba mmatamela gomme a ba botša dilo ka moka tšeo Jehofa a mmoditšego tšona Thabeng ya Sinai. 33 Ge Moshe a fetša go bolela le bona, o be a khupetša sefahlego sa gagwe ka lešela. 34 Eupša ge Moshe a be a tsena ka tenteng go yo iponagatša pele ga Jehofa gore a bolele le yena, o be a tloša lešela leo. Ke moka o be a etšwa gomme a botša Baisiraele ditaelo tšeo Modimo a mmoditšego tšona. 35 Ge Baisiraele ba be ba bona gore sefahlego sa Moshe se be se phadima, Moshe o be a ikhupetša gape ka lešela sefahlegong sa gagwe go fihlela a tsena ka tenteng go yo bolela le Modimo.