Ekisodo

9 Ke moka Jehofa a re go Moshe: “Eya go Farao gomme o mmotše o re: ‘Jehofa Modimo wa Baheberu o re: “Lokolla batho ba ka gore ba tle ba ntlhankele. 2 Eupša ge e ba o gana go ba lokolla, 3 gona tseba gore nna Jehofa ke tlo bolaya diruiwa tša gago, dipere, ditonki, dikamela, mehlape ya dikgomo, dinku le dipudi di tlo welwa ke bolwetši bjo bošoro kudu. 4 Nna Jehofa ke tla hlokomela diruiwa tša Baisiraele gomme ga go le setee sa tšona seo se tlago go hwa go swana le tša Baegepeta.”’” 5 Le gona, Jehofa a bea nako ya gore bolwetši bjo bo tlo thoma neng, a re: “Gosasa nna Jehofa ke tla dira seo ke boletšego gore ke tla se dira mo nageng.”

6 Ka gona letšatšing le le latelago Jehofa a dira bjalo ka ge a boletše, ke moka diruiwa tša mehuta ka moka tša Baegepeta tša hwa, eupša gwa se be le seruiwa le setee sa Baisiraele seo se ilego sa hwa. 7 Ke moka Farao a romela bahlanka ba gagwe gore ba yo bona seo se diragetšego gomme ba hwetša gore ga go le setee sa diruiwa tša Baisiraele seo se hwilego. Eupša Farao a no dula a thatafaditše hlogo, a se lokolle setšhaba gore se sepele.

8 Ke moka Jehofa a re go Moshe le Arone: “Tlatšang matsogo a lena ka moka ka molora wo o tšwago sebešong, gomme Moshe a o gašetše godimo Farao a lebeletše. 9 Molora woo o tla tlala naga ya Egepeta ka moka, gomme wa ntšha batho le diphoofolo dišo tše šoro.”

10 Ka gona ba tšea molora o tšwago sebešong ba ema pele ga Farao gomme Moshe a o gašetša godimo, ke moka wa dira gore batho le diphoofolo ba tšwe dišo tše šoro. 11 Baperisita ba Egepeta bao ba dirago dilo tša botemona ba ile ba se kgone go tlo ema pele ga Moshe, ka gobane bona le Baegepeta ka moka ba be ba tšwele dišo. 12 Eupša Jehofa o ile a lesa Farao a thatafiša hlogo, gomme a se theetše Moshe le Arone, feela bjalo ka ge Jehofa a boditše Moshe.

13 Ke moka Jehofa a re go Moshe: “Tsoga e sa le mesong o ye go Farao gomme o mmotše gore: ‘Jehofa Modimo wa Baheberu o re: “Lokolla setšhaba sa ka gore se yo ntlhankela. 14 Ge e ba o sa se lokolle ke tlo tliša dikotlo tša ka go wena, go bahlanka ba gago le go setšhaba sa gago, e le gore o tsebe gore ga go na yo a swanago le nna lefaseng ka moka. 15 Ge nkabe ke nyaka nkabe ke šetše ke dirišitše matla a ka go otla wena le setšhaba sa gago ka leuba la bolwetši gore le fedišwe mo lefaseng. 16 Eupša ke go tlogetše gore o phele e le gore ke go bontšhe matla a ka le gore leina la ka le bolelwe lefaseng ka moka. 17 Na o sa ikgogomoša e bile o gana go tlogela batho ba ka ba sepela? 18 Bjale gosasa ka yona nako ye ke tlo neša sefako se segolo kudu, e lego sefako seo se sa kago sa ba gona ga e sa le go tloga ge Egepeta e eba gona. 19 Bjale roma bahlanka ba gago gore ba tliše diruiwa tša gago, batho ba gago le dilo tša gago ka moka tšeo di lego nageng, ka gobane motho le ge e le ofe goba selo le ge e le sefe seo se hwetšwago nageng se se sa šireletšega se tla rothothwa ke sefako gomme sa hwa.”’”

20 Bahlanka ba Farao bao ba bego ba hlompha Jehofa ba ile ba dira gore diruiwa tša bona le bahlanka ba bona ba tšhabele mo go šireletšegilego. 21 Eupša batho bao ba bego ba sa hlomphe Jehofa ba ile ba tlogela bahlanka ba bona le diruiwa tša bona nageng.

22 Bjale Jehofa a re go Moshe: “Emišetša lepara la gago godimo gore sefako se ne nageng ka moka ya Egepeta se rothothe batho, diphoofolo le dimela ka moka mo nageng ya Egepeta.” 23 Ka gona Moshe a emišetša lepara la gagwe godimo, ke moka Jehofa a dira gore nageng ka moka ya Egepeta go be le magadima, sefako le mollo gomme Jehofa a tšwela pele a neša sefako nageng ka moka ya Egepeta. 24 Ka gona gwa na sefako seo se tswakanego le mollo. E be e le se segolo kudu e bile ga se gwa ka gwa ba le sefako sa go swana le sona ga e sa le Egepeta e eba gona. 25 Sefako seo sa rothotha selo se sengwe le se sengwe seo se bego se le nageng ya Egepeta, go tloga ka motho go fihla ka phoofolo. Sa rothotha le mehuta ka moka ya dimela gomme sa roba mehuta ka moka ya mehlare nageng. 26 Eupša nageng ya Goshene, moo go bego go dula Baisiraele, ga se gwa ka gwa na sefako.

27 Ka gona Farao a romela molaetša wa gore go bitšwe Moshe le Arone gomme a re go bona: “Bjale gona ke a dumela gore ke dirile sebe. Jehofa o lokile gomme nna le setšhaba sa ka re fošitše. 28 Kgopelang Jehofa gore a emiše magadima le sefako gomme ke tla le lesa la tloga, gore le se hlwe le sa dula mo.” 29 Ka gona Moshe a re go Farao: “Gateetee ge ke etšwa mo motseng ke tla emišetša diatla tša ka go Jehofa. Go ka se sa ba le medumo ya magadima le sefako se ka se sa na, e le gore o tle o tsebe gore lefase ke la Jehofa. 30 Eupša ge e le wena le bahlanka ba gago, ke šetše ke tseba gore le ka se hlomphe* Jehofa Modimo.”

31 Folakese* le mabele* di be di rothothilwe ke sefako, ka gobane e be e le nako ya gore mabele a ka bunwa, gomme folakese e thuntše matšoba. 32 Eupša korong le leotša ga se tša ka tša rothothwa ke sefako ka gobane e be e se nako ya tšona ya gore di bunwe. 33 Bjale Moshe a tšwa moo motseng go Farao a emišetša matsogo a gagwe godimo go Jehofa, ke moka gwa se sa ba le medumo ya magadima le sefako gomme pula le yona ya se sa tšhologa lefaseng. 34 Ge Farao a bona gore pula, sefako le medumo ya magadima di kgaoditše, a no dira sebe gape gomme a thatafiša hlogo ya gagwe, yena gotee le bahlanka ba gagwe. 35 Farao a no tšwela pele a thatafišitše hlogo gomme a se lese Baisiraele gore ba tloge, feela bjalo ka ge Jehofa a boletše a diriša Moshe.