Tayo Yeo e ka Tšweletšago Seenywa sa Khutšo

“Xo laiwa xohle, xa xo thabiše xe motho à sa laiwa. xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”—BA-HEBERE 12:11.

1, 2. (a) Go ya ka Ba-Hebere 12:9-11, ke eng seo Modimo ka lerato a se neago? (b) Mohlala o mongwe wa tayo ke ofe, gomme mafelelo a se e ka ba afe?

NAGANA ka nako ya ge o be o sa le ngwana. Na o ka gopola ka batswadi ba gago ge ba be ba go laya? Ba bantši ba rena re ka gopola. Moapostola Paulo o ile a diriša seo e le seswantšho ge a be a bolela ka tayo e tšwago go Modimo, bjalo ka ge re bala go Ba-Hebere 12:9-11.

² Tayo ya Modimo bjalo ka tate, yeo e ka kgomago maphelo a rena a moya, e ka ba ka dibopego tše dintši. Se sengwe ke ka thulaganyo ya gagwe ya go tloša phuthegong ya Bokriste motho yo a se sa hlwago a rata go phela ka melao ya Modimo goba yo a ganago go phela ka yona. Motho yo a ilego a otlwa ka matla ka tsela ye goba a laiwa mo gongwe a ka itshola gomme a sokologa. Ka mokgwa o bjalo, phuthego ya babotegi le yona e a laiwa ka gore ba ithuta bohlokwa bja go dumelelana le melao e phagamego ya Modimo.—1 Timotheo 1:20.

3. Ba bangwe ba itshwara bjang malebana le kgopolo ya go kgaola?

³ O mongwe mo gongwe a ka botšiša gore, ‘Eupja, na ga se go ba sehlogo go raka motho gomme re gane go bolela le yena?’ Kgopolo e bjalo e ile ya tšwelela tshekong yeo e sa tšwago go ba gona ye e akaretšago mosadi yo a ilego a godišwa ke batswadi bao e bego e le Dihlatse tša Jehofa. Batswadi ba gagwe ba ile ba kgaolwa. Yena ga se a kgaolwa, eupja o ile a ikgaoganya ka go rata ka go ngwala lengwalo la gore o tlogela phuthego. Ka mo go swanetšego, phuthego e ile ya tsebišwa gore ga e sa hlwa e le o mongwe wa Dihlatse tša Jehofa. O ile a khuduga, eupja ka morago ga nywaga e mentši o ile a boa gomme a hwetša gore Dihlatse tša lefelong leo ga di mmolediše. Ka gona o ile a iša taba kgorong. Mafelelo e bile afe, gomme se mo gongwe se ka go kgoma bjang? Gore o kwešiše taba ka tshwanelo, anke re bone seo Beibele e se bolelago mabapi le taba yeo e tswalanago le ye ya go kgaola.

Ke ka Baka La’ng go Tšewa Boemo bjo bjo Tiilego Gakaakaa?

4. Ke’ng seo ka dinako tše dingwe se diregago go ba bangwe ba ka phuthegong? (Ba-Galatia 6:1; Juda 23)

⁴ Bakriste ba bantši ba therešo ba thekga Modimo le melao ya gagwe ya go loka ka go botega. (1 Ba-Thesalonika 1:2-7; Ba-Hebere 6:10) Lega go le bjalo, ka dinako tše dingwe motho o aroga tseleng ya therešo. Ka mohlala, go sa šetšwe thušo e tšwago go bagolo ba Bakriste, a ka roba melao ya Modimo ka go se itshole. Goba mo gongwe a ka latola tumelo ka go ruta dithuto tša maaka goba ka go ikgaoganya le phuthego. Ka gona ke’ng se se swanetšego go dirwa? Dilo tše bjalo di ile tša direga gaešita le nakong ya ge baapostola ba sa phela; ka gona, anke re boneng seo ba se ngwadilego mabapi le se.

5, 6. (a) Re na le keletšo efe e bohlale ge e le ka go dirišana le bao ba dirago dibe tše kgolo gomme e le bao ba sa itsholego? (Mateo 18:17) (b) Ke dipotšišo dife tšeo re lebeletšanego le tšona?

⁵ Ge motho kua Korinthe a be a e-na le boitshwaro bjo bobe gomme a sa itshole, Paulo o ile a botša phuthego gore: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru, a ba wa medimo e šele, a ba wa maroxa, a ba letaxwa, a ba mohlakodi. Motho wa mohuta woo, le xo ja Le se kê la ja le yêna.” (1 Ba-Korinthe 5:11-13) Go be go tla ba bjalo le ka bahlanogi, go swana le Himeneo: “Motho wa thutô ye e aroxilexo, xe a eleditšwe xa-tee le xa-bedi, O mo tloxêlê. Motho yo byale ó hlanoxile à tseba se a se diraxo; xomme ó senya a ipôna molato yêna mong.” (Tito 3:10, 11; 1 Timotheo 1:19, 20) Go široga mo go bjalo motho yoo le gona e be e tla ba mo go swanetšego, ka gobane mang le mang yo a lahlago phuthego: “Ba tšwile mo xo rena; fêla, e be e se ba rena. Xe e ka be e le ba rena, ba ka be ba dutše bà na le rêna. Fêla, ké xore ba bônaxala xe e se ba rena ka moka xa bôná.”—1 Johane 2:18, 19.

⁶ Ka mo go holofetšago, motho yo bjalo a ka itshola e le gore a amogelwe gape. (Ditiro 3:19) Eupja pele ga moo, na Bakriste ba ka ba le bogwera bjo bo lekanyeditšwego le yena, goba na go mo široga ka mo go feletšego ke mo go nyakegago? Ge e ba go le bjalo, ke ka baka la’ng?

Na re Swanetše go Kgaogana le Yena ka mo go Feletšego?

7. Boitshwaro bja rena e tla ba bjo bo fapanego bjang ge e le ka dihlopha tše pedi tša badira-dibe?

⁷ Bakriste ga ba itlhaole bathong ba bangwe. Ka mehla re kopana le baagišani, badiri-gotee, bao re tsenago sekolo le bona le ba bangwe, gotee le go ba nea bohlatse gaešita lege ba bangwe e le ‘diotswa, ba megabaru, bahlakodi le ba medimo e šele.’ Paulo o ngwadile gore re ka se ke ra ba phema ka mo go feletšego, ‘go sego bjalo re be re tla swanelwa ke gore re tloge lefaseng.’ Lega go le bjalo, o laetše gore e be e tla ba selo se se fapanego ka ‘ngwanabo rena’ yo a bego a phela ka tsela yeo: “Le se kê la hlakana le motho yo Le rexo ké ngwana weno, moka a [boela mekgweng e bjalo], motho wa mohuta woo, le xo ja Le se kê la ja le yêna.”—1 Ba-Korinthe 5:9-11; Mareka 2:13-17.

8. Moapostola Johane o neile keletšo efe mabapi le go široga motho?

⁸ Mangwalong a moapostola Johane, re hwetša keletšo e swanago yeo e gatelelago kamoo Bakriste ba swanetšego go phema ka mo go feletšego batho ba bjalo: “Motho e a rexo ke eketša thutô, ’me a se ême ka thutô ya Jesu Kriste, xa a na Modimo. . . . Motho e a kaxo tla xo lena, ’me a se tlišê thutô yé, se mo amoxeleng ka xaê, Le lesê le xo mo dumediša. Xobane e a kaxo re: Thabang! [Segerika, khaiʹro] à e-ra motho eo, ó ikôpanya le medirô e mebe ya xaxwe.”a—2 Johane 9-11.

9, 10. (a) Go ile gwa direga’ng ka barobi ba molao bao ba bego ba sa itshole Isiraelng, gomme ka baka la’ng? (b) Re swanetše go ikwa bjang lehono ka thulaganyo ya go dirišana le bao ba kgaoletšwego sebe sa go se itshole? (2 Petro 2:20-22)

⁹ Ke ka baka la’ng boemo bjo bo bjalo bja go tia e le bjo bo swanetšego gaešita le lehono? Ee, gopola ka go kgaolwa mo go šoro mo go bego go laetšwe Molaong wa Modimo go Isiraele. Ditabeng tše šoro tše fapa-fapanego, barobi ba ka boomo ba melao ba be ba bolawa. (Lefitiko 20:10; Numeri 15:30, 31) Ge seo se direga, ba bangwe, gaešita le ba moloko ba be ba ka se sa hlwa ba bolela le morobi wa molao yo a hwilego. (Lefitiko 19:1-4; Doiteronomio 13:1-5; 17:1-7) Gaešita lege ba-Isiraele ba botegago morago moo e be e le batho ba tlwaetšwego bao ba nago le maikwelo go swana le a rena, feela ba be ba tseba gore Modimo o dira ka toka gomme ke yo lerato le gore Molao wa gagwe o be o šireletša bohlweki bja bona bja boitshwaro le bja moya. Ka gona ba be ba ka amogela gore thulaganyo ya gagwe ya go kgaola bafoši e be e tloga e le selo se se lokilego le se se nepagetšego.—Jobo 34:10-12.

¹⁰ Le rena re ka kgonthišega ka tsela yeo gore thulaganyo ya Modimo ya gore Bakriste ba gane go gwerana le motho yo a rakilwego ka baka la sebe sa go se itshole ke tšhireletšo e bohlale go rena. “Fsiêlang komêlô ya kxalê, xore Le tlê Le bê boxôbê byo bofsa; etšwe Lè le ba ba sa omêlwaxo.” (1 Ba-Korinthe 5:7) Ka go phema le batho bao ba ikgaogantšego ka boomo, Bakriste ba šireletšwa dikgopolong tšeo di ka bago gona tša go ntšha diphošo, tša go se leboge goba gaešita le tša bohlanogi.—Ba-Hebere 12:15, 16.

Go Thwe’ng ka ba Moloko?

11, 12. (a) Bao e lego ba moloko ba ba-Isiraele ba be ba ikwa bjang ge mofoši a kgaolwa? (b) Bontšha mehola ya go kwa.

¹¹ Modimo o lemoga e le ka kgonthe gore go phetha melao ya gagwe ya go loka mabapi le go kgaola bafoši gantši go akaretša le go kgoma ba moloko. Bjalo ka ge go boletšwe ka mo godimo, ge mofoši wa mo-Isiraele a be a bolailwe, go be go se sa hlwa go e-ba le tswalano e itšego le lapa yeo e kgonegago. Ge e le gabotse, ge e ba morwa e be e le letagwa le sejato, batswadi ba gagwe ba be ba swanetše go mo tliša ka pele ga baahlodi, gomme ge e ba a be a sa itshole, gona batswadi ba be ba swanetše go ba le karolo tabeng ya go mmolaya ka toka, ‘e le gore go fedišwe bobe go Isiraele.’ (Doiteronomio 21:18-21) O ka lemoga gore se se swanetše go ba se sa ka sa ba bonolo go bona. Le gona, akanya kamoo banababo mofoši le dikgaetšedi goba bo-rakgolo le bo-makgolo ba ikwelego ka gona. Lega go le bjalo, go etiša ga bona pele go botegela Modimo wa bona yo a lokilego ka pele ga lerato la lapa e be e ka ba mo go phološago bophelo go bona.

¹² Gopola ka taba ya Kora, e lego moetapele borabeleng bjo bo bego bo le malebana le boetapele bja Modimo ka Moše. Jehofa ka toka ya gagwe yeo e phethagetšego o ile a kgonthiša gore Kora a hwe. Eupja bohle ba ba botegago ba ile ba eletšwa ka gore: “Tloxang fa mekutwaneng ya banna ba babe bá; Le se kê la bá la swara dilô tša bôná, xore Le se tlo kxoxolwa xotee le dibe tša bôná.” Ba moloko bao ba bego ba sa amogele temošo ya Modimo ba ile ba hwa gotee le marabele. Eupja ba bangwe ba moloko wa Kora ba ile ba kgetha ka bohlale gore ba botegele Jehofa, e lego seo se ilego sa phološa maphelo a bona gomme sa dira gore ba hwetše ditšhegofatšo tša nakong e tlago.—Numeri 16:16-33; 26:9-11; 2 Koronika 20:19.

13. Bakriste bao ba botegago ba tla itshwara bjang ge e ba setho sa kgaufsi sa lapa se kgaolwa goba se ikgaoganya?

¹³ Go kgaola phuthegong ya Bokriste ga go akaretše lehu la kapejana, ka gona ditswalano tša lapa di tšwela pele. Ka lebaka leo, monna yo a kgaolwago goba yo a ikgaoganyago mo gongwe a ka tšwela pele a dula gae le mosadi wa gagwe wa Mokriste le bana bao ba botegago. Go hlompha dikahlolo tša Modimo le mogato wa phuthego go tla tutueletša mosadi gotee le bana gore ba lemoge gore ka tsela ya gagwe, o fetošitše tswalano ya moya yeo e bego e le gona magareng ga bona. Lega go le bjalo, ka ge go kgaolwa ga gagwe go sa fediše tlemo ya bona ya madi goba tswalano ya bona ya lenyalo, go botšhwa ga lerato le ditirišano tše tlwaetšwego tša lapa di ka tšwela pele.

14. Ke keletšo efe ya Modimo yeo e swanetšego go laola go kopana ga rena le motswalo wa rena yo a kgaotšwego goba yo a ikgaogantšego yo a lego ka ntle ga tikologo ya rena ya lapa?

¹⁴ Boemo ke bjo bo fapanego ge e ba motho yo a kgaotšwego goba yo a ikgaogantšego e le wa moloko yo a dulago ka ntle ga tikologo ya lapa le legae. Mo gongwe e ka ba mo go kgonegago gore le gatee o se ke wa kopana le wa geno wa moloko. Gaešita lege go ka ba le ditaba tša lapa tšeo di nyakago gore le kopane, se ruri se swanetše go dirwa gore e be selo sa sewelo, ka go dumelelana le molao wa motheo wa Modimo o rego: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru [goba a ba le molato wa sebe se sengwe se segolo], . . . Motho wa mohuta woo, le xo ja Le se kê la ja le yêna.”—1 Ba-Korinthe 5:11.

15. Ba moloko ba ka laola bjang tutuetšo ya maikwelo mabakeng a bjalo? (Psalme 15:1-5; Mareka 10:29, 30)

¹⁵ Ka mo go kwešišegago, se mo gongwe e tla ba se thata ka baka la maikwelo le ditswalano tša lapa, go swana le lerato la rakgolo le makgolo ditlogolong tša bona. Eupja, se ke teko ya go botegela Modimo, bjalo ka ge go boletšwe ke kgaetšedi yo a tsopotšwego go letlakala 26. Motho lege e le ofe yo a kwago manyami le bohloko tšeo di bakilwego ka tsela yeo ke wa moloko yo a kgaotšwego a ka hwetša khomotšo gomme a kgothatšwa ke mohlala o beilwego ke ba bangwe ba metswalo ya Kora.—Psalme 84:10-12.b

Phetho ya Kgoro

16-18. Ke phetho efe yeo e ilego ya fihlelelwa tshekong yeo e boletšwego pejana, gomme ke kgopolo efe e nngwe yeo kgoro e ilego ya e nea?

¹⁶ Mo gongwe o tla rata go tseba mafelelo a tsheko yeo e akaretšago mosadi yo a ilego a befelwa ka gobane batho bao a bego a ba tlwaetše nakong e fetilego ba be ba sa boledišane le yena ka morago ga gore a kgethe go latola tumelo, gomme a ikgaoganye le phuthego.

¹⁷ Pele ga ge molato o ka sekwa, kgoro ya selete ya mmušo e ile ya nea kahlolo ya go mo tšwa semetseng. Kahlolo yeo e be e theilwe kgopolong ya gore dikgoro ga di akaretšwe ditabeng tša tayo tša kereke. Ka gona o ile a dira boipiletšo. Kahlolo e sa tsebjego ya kgoro ya mmušo ya boipiletšoc e be e theilwe mabakeng a nabilego a ditshwanelo tša Tokišo ya Pele (First Amendment) (ya Molao wa Motheo wa U.S.): “Ka gobane mokgwa wa go široga motho e le karolo ya tumelo ya Hlatse ya Jehofa, re hwetša gore thulaganyo ya ‘go dira ka go hunologa’ ya Molao wa Motheo wa United States . . . e [mo] thibela gore a se fenye. Basekišwa ba na le tokelo e šireleditšwego ka go ya ka molao wa motheo gore ba diriše mokgwa wa go široga motho yo. Ka mo go swanetšego, re kgonthišetša” kahlolo yeo e šetšego e dirilwe ya kgoro ya selete.

¹⁸ Kgopolo ya kgoro e ile ya tšwela pele ka gore: “Go široga motho ke mokgwa wo o dirwago ke Dihlatse tša Jehofa ka go latela kwešišo ya bona ya temana e amogetšwego ka molao ya Beibele, gomme ga se ra lokologa go hlalosa gape temana yeo . . . Basekišwa ba swanetše go diriša ka go hunologa ditumelo tša bona tša bodumedi . . . Dikgoro tša tsheko ka kakaretšo ga di sekaseke tswalano magareng ga ditho (goba bao e bego e le ditho) tša kereke. Dikereke di newa tekanyo e kgolo ge di diriša tayo go ditho goba go bao e bego e le ditho. Re dumelelana le kgopolo ya yo e bego e le Moahlodi wa [Kgoro e Phagamego ya U.S.] Jackson ya gore ‘mediro ya [b]odumedi yeo e kgomago ditho feela tša tumelo e hunologile gomme e swanetše go hunologa, e lego go hunologa ka mo go feletšego go feta selo lege e le sefe.’ . . . Ditho tša Kereke yeo [a] kgethilego go e tlogela di phethile ka gore ga di sa hlwa di nyaka go gwerana le yena. Re dumela gore ba hunologile go dira kgetho yeo.”

19, 20. Ke ka baka la’ng motho yo a kgaotšwego phuthegong a se boemong bja go hwetša tefo ya molao ya ditshenyagalelo tša go ntšhwa seriti kgorong?

¹⁹ Kgoro ya boipiletšo e ile ya dumela gore gaešita lege mosadi yo a ile a ikwa a nyamile ka gobane batho bao a bego a gwerane le bona pele ba ile ba kgetha go se sa hlwa ba boledišana le yena, feela “go mo dumelela a nyaka tefo ya ditshenyagalelo bakeng sa dikgobalo tše sa bonagalego goba tša maikwelo go be go tla thibela e sego ka go ya ka molao wa motheo Dihlatse tša Jehofa go diriša bodumedi ka go hunologa . . . Kgonthišetšo ya molao wa motheo ya go diriša bodumedi ka go hunologa e nyaka gore lekoko la batho le amogele mohuta wa dikgobalo tše di swanago le tšeo di bego di kwewa ke [mosadi] e le tefo yeo e tlogago e swanetšwe ke go lefša gore go šireletšwe ditshwanelo tša go se swane ga bodumedi tšeo baagi ka moka ba nago le tšona.” Ka tsela e itšego, phetho ye e hweditše matla a magolo ga e sa le go tloga nakong yeo e neilwego ka yona. Bjang? Mosadi yo ka morago o ile a kgopela kgoro e kgolo nageng gore e hlahlobe molato wo gomme e retolle phetho yeo e dirilwego malebana le yena. Eupja ka November 1987, Kgoro e Phagamego ya United States e ile ya gana go dira bjalo.

²⁰ Ka gona, molato wo o bohlokwa o phethilwe ka gore motho yo a kgaotšwego goba yo a ikgaogantšego a ka se ke a hwetša tefo ya ditshenyagalelo tša go ntšhwa seriti go Dihlatse tša Jehofa kgorong ya molao ka baka la go širogwa.d Ka ge phuthego e be e amogela ditaelo tše phethagetšego tšeo ka moka ga rena re ka di balago Lentšung la Modimo e bile e le diriša, motho yo o kwa go lahlegelwa mo go tlišitšwego ke ditiro tša gagwe ka noši.

Mehola e Mentši Yeo e Tlišwago ke Tayo

21. Ke ka baka la’ng go nyakega teka-tekano tabeng ya go lebelela go kgaola?

²¹ Batho ba bangwe ba ka ntle ge ba e-kwa ka go kgaolwa, e-ba bao ba sekamelago tabeng ya go kwela mofoši yo a ka se sa hlwago a boledišana le ditho tša phuthego ya Bokriste bohloko. Eupja na kwelobohloko e bjalo ga se ya dirwa lefelong le le fošagetšego? Ela hloko mohola woo mofoši le ba bangwe ba ka bago le wona.

22, 23. Bontšha bohlokwa le mohola wa go kwa Modimo ponong ya rena ka batho bao ba kgaotšwego.

²² Ka mohlala, go letlakala 26 re etše hloko mantšu a Lynette ao a lego mabapi le kgetho ya gagwe ‘ya go ikgaoganya ka mo go feletšego gore a se hlwe a gwerana’ le kgaetšedi ya gagwe yo a kgaotšwego Margaret. Yena le metswalo ya gagwe ya Bakriste ‘ba ile ba dumela gore tsela ya Jehofa ke e phalago tšohle.’ Go bjalo e le ka kgonthe!

²³ Ngwanabo Lynette ka morago o ile a mmotša gore: ‘Ge nkabe o ile wa tšeela go kgaolwa ga-ka tlase, ke a tseba gore ke be nka se ke ka gata megato ya gore ke bušetšwe kapejana ka mo ke dirilego ka gona. Go kgaolwa ka mo go feletšego go baratiwa le tabeng ya go kgokagana kgaufsi le phuthego go ile gwa tšweletša kganyogo e matla ya gore ke itshole. Ke ile ka lemoga kamoo tsela ya-ka e bego e fošagetše ka gona le kamoo go lego kotsi ka gona gore ke furalele Jehofa.’

24. Tsela yeo kgaetšedi o mongwe a ilego a itshwara ka yona tabeng ya go kgaola e ile ya mo kgoma bjang gotee le go kgoma ba bangwe?

²⁴ Tabeng ye nngwe, batswadi ba Laurie ba ile ba kgaolwa. Lega go le bjalo, o bolela gore: ‘Go gwerana ga-ka le bona ga se gwa ka gwa kgaotša eupja go ile gwa gola. Ge nako e dutše e e-ya, ke ile ka ba yo a tapilego kudu. Ke ile ka ba ka fihla boemong bja go se sa hlwa ke e-ya dibokeng.’ Ka gona o ile a bala tsebišo yeo e lego ka go Morokami wa February 1, le March 1, 1982 wo o bego o gatelela keletšo ya 1 Ba-Korinthe 5:11-13 le 2 Johane 9-11. O ngwala gore, “Go ile gwa ba bjalo ka ge eka seetša sa lebone se be se mponegela.” ‘Ke a tseba gore ke be ke swanetše go dira diphetogo tše itšego. Bjale ke kwešiša kaone seo se bolelwago ke Mateo 10:34-36. Phetho ya-ka e be e se bonolo gore lapa lešo le ka e amogela, ka gobane morwa wa-ka, yo a nago le nywaga e mehlano ke yena mošemane a nnoši, gomme ba mo rata kudu.’ Go holofelwa gore go lahlegelwa ke bogwera bjo bo bjalo go tla kgoma dipelo tša batswadi, bjalo ka ge go ile gwa kgoma pelo ya Margaret. Lega go le bjalo, tayo yeo go bolelwago ka yona e ile ya thuša Laurie: ‘Ke boetše bodireding bja tšhemo. Lenyalo la-ka le lapa la-ka ke tše matla ka baka la phetogo ya-ka, gomme go bjalo le ka nna.’

25. Ke kgopolo efe yeo motho yo a bušeditšwego a ilego a ba le yona ka tayo ya Modimo?

²⁵ Goba ela hloko maikwelo a yo a ilego a kgaolwa gomme ka morago a bušetšwa. Sandi o ngwadile gore: ‘Ke rata go le leboga ka dihlogo tšeo di thušago kudu le tše di rutago [tše di boletšwego ka mo godimo] tše di lego mabapi le go sola le go kgaola. Ke thabišwa ke gore Jehofa o rata batho ba gagwe kudu go ka kgonthišetša gore phuthego ya gagwe e dule e hlwekile. Seo mo gongwe se ka bonalago e le se se šoro go batho ba ka ntle ke seo se nyakegago gomme e bile ke seo e tlogago e le selo sa lerato go se dira. Ke leboga gore Tatago rena wa legodimong ke Modimo yo lerato le yo a lebalelago.’

26. Ke seenywa sefe sa toko se se ka tlišwago ke go amogela tayo? (Psalme 94:10, 12)

²⁶ Ka gona Modimo wa rena yo a nyakago gore mofoši yo a sa itsholego a rakwe ka phuthegong le gona ka lerato o bontšha gore modira-dibe a ka bušetšwa ka phuthegong ge e ba a itshola gomme a sokologa. (Motho yo a ikgaogantšego le yena ka mo go swanago a ka kgopela go ba karolo ya phuthego gape.) Ka morago ga moo a ka homotšwa ke Bakriste bao ba tlago go kgonthišetša lerato la bona go yena. (2 Ba-Korinthe 2:5-11; 7:8-13) Ruri go bjalo ka ge Paulo a ngwadile gore: “Xo laiwa xohle, xa xo thabiše xe motho à sa laiwa, xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”—Ba-Hebere 12:11.

[Mengwalo ya tlase]

Dintlha tša go Gopolwa

◻ Ke ka ditsela dife go kgaola go ka bago ka sebopego sa tayo?

◻ Ke ka baka la’ng boitshwaro bja Mokriste go batho bao ba kgaotšwego bo sa swane le boitshwaro bja gagwe go badira-dibe lefaseng?

◻ Ke tlhahlo efe ya Mangwalo yeo e swanetšego go gopolwa gaešita lege wa moloko a kgaotšwe?

◻ Kgoro ya boipiletšo e ile ya fihlelela phetho efe molatong wo o bego o tlišitšwe ke motho yo a ikgaogantšego?

◻ Re ka ithuta’ng dipolelong tše dingwe tša motho ka noši mabapi le go kgaola?

[Seswantšho go letlakala 26]

“Go ikgaoganya ka mo go feletšego tabeng ya go gwerana le [ngwanešo yo a kgaotšwego] Margaret go ile gwa bea go botegela ga rena thulaganyo ya Jehofa tekong. Go ile gwa nea lapa lešo sebaka sa go bontšha gore re tloga re dumela gore tsela ya Jehofa ke e phalago tšohle.”—Lynette.

[Lepokisi go letlakala 30]

Go Kgaola go na le Mafelelo Afe?

Ra-dihistori wa Leisemane Edward Gibbon o ngwadile ka seo e tlogago e le go kgaola gotee le mafelelo a gona kgaufsi le mehla ya baapostola ka gore:

“E tloga e le tshwanelo ya lekoko le lengwe le le lengwe la batho go tloša bathong ba lona le meholeng ya lona bao gare ga ditho tša bona ba lahlago goba go roba ditaelo tšeo tše di hlamilwego ka go kwana ka kakaretšo. . . . Mafelelo a go kgaola e be e le a mohuta wa lefase gotee le a mohuta wa moya. Mokriste yo a bego a kgaolwa o be a hlokišwa karolo lege e le efe ditirong tša borapedi tša bao ba botegago. Ditswalano bobedi tša bodumedi le tša bogwera di be di fedišwa.”

Na o a Gopola?

Na o ile wa thabela go bala ditokollo tša morago bjale tša Morokami? Anke o bone ge e ba o ka araba dipotšišo tše latelago:

◻ Sehlogo sa boebangedi bja therešo sa Beibele sa Mehleng yeno ke sefe?

Karolo ya motheo ya molaetša wa moebangedi lehono ke ditaba tše di lokilego tša Mmušo wa Modimo diatleng tša Molaodi wa gagwe yo a kgethilwego, e lego Jesu Kriste. O akaretša ditherešo ka moka tšeo Jesu a di boletšego le tšeo barutiwa ba gagwe ba di ngwadilego. (Mateo 24:14; 28:19, 20)—1/1, letlakala 4.

◻ Ke ka baka la’ng e le gabohlokwa go tšwela pele re bolela ditaba tše di lokilego mafelong ao go wona go nago le dienywa tše nyenyane goba di se gona?

Jehofa ka Jesu Kriste o laetše gore ‘ditaba tše di lokilego di bolelwe lefaseng ka moka le le agilwego.’ (Mateo 24:14, NW) Ge batho ba gana go theetša, se se re nea sebaka sa go bontšha bogolo bja lerato la rena gotee le boineelo go Jehofa ka go phegelela go dira se se lokilego. Le gona lerato la rena le re tutueletša go lemoša magagabo rena mabapi le seo bokamoso bo se huparetšego batho. (1 Johane 5:3; 2 Timotheo 4:2)—1/1, letlakala 26.

◻ Ke mehola efe yeo bodiredi bja nako e tletšego bo e tlišago go bagoeledi ba bantši ba Mmušo?

Bo ba thuša go hlagolela dienywa tša moya ka botlalo, go bontšha lerato ka mo go oketšegilego go batho, go ba ba atlegilego kudu bodireding, le go bota Jehofa ka tekanyo e kgolo. Le gona ba thabela kwano ya kgaufsi le Jehofa.—1/15, letlakala 26.

◻ Ke go tlhahlo efe le morero wa Modimo tšeo bangwadi ba Beibele ba ilego ba šupa go tšona go sa šetšwe go fapana ga bona ka go tšweletša taba?

Ka moka ga bona ba bontšhitše batho seo Jehofa Modimo a tlago go se dira go dira gore batho ba thabe le seo batho ka noši ba swanetšego go se dira gore ba amogelwe ke Modimo.—2/1, letlakala 7.

◻ Meputso e mengwe le mehola ya go botega ke efe?

Go tšwelela boemo bja go bota le go holofela, bjo išago dikgopolong tše botse le ditswalanong. Potego le gona e tlaleletša tabeng ya go ba le letswalo le lebotse, gomme e nea khutšo ya monagano, e le gore motho a ka lebana le ba bangwe ka ntle ga go boifa go gakanega. (Ba-Hebere 9:14; 1 Timotheo 1:19)—2/15, letlakala 7.

◻ Ke dithapelo tša bomang tšeo Modimo ra-matla-ohle a di kwago le go di araba?

Jehofa o kwa dithapelo tšeo di išwago go yena ka mokero o nepagetšego, Jesu Kriste; ka mokgwa o nepagetšego; le ka kgopolo e nepagetšego ya monagano le pelo. Modimo o araba dithapelo tše bjalo ka go ya ka thato ya gagwe e le Modimo le ka nako ya gagwe ye a e kgethilego.—3/15, letlakala 7.

◻ Ke tiragalo efe e bohlokwa yeo e ilego ya direga ngwageng wa bo-20 wa pušo ya Kgoši Arithasasitha (455 Pele ga Mehla ya Rena)?

Nehemia o ile a newa tumelelo gore a boele morago a yo tsošološa Jerusalema le merako ya yona. Taelo ye e be e le go thoma ga “dibeke tše masome-šupa” tša nywaga tša boporofeta bja Daniele, bjo bo bego bo šupa pele nakong ya go ba gona ga Jesu e le ‘Mesia Moetepele’ ka nako e swanetšego ya ngwaga wa 29 Mehleng ya Rena. (Daniele 9:24, 25; Nehemia 1:1; 2:1-9)—3/15, letlakala 28, 29.

◻ Ke bjang mathata a lapa a rarollwago gabotse?

Ka lerato, ka gobane Beibele e a eletša, “Tšohle tša lena di dirwê ka leratô.” Le gona, “leratô le bipa dikaroxô tšohle.” (1 Ba-Korinthe 16:14; 1 Petro 4:8) Le e swanetše go ba lerato leo le lego ka gare-gare leo le ikemišeditšego go hlokomologa go se phethagale ga ditho tše dingwe tša lapa tšeo mo gongwe di ka galefišago motho.—4/1, letlakala 6, 7.