Na ke Swanetše go Rapela Bakgethwa?

Karabo ya Beibele

Aowa. Beibele e bontšha gore re swanetše go rapela Modimo a nnoši, re diriša leina la Jesu. Jesu o boditše barutiwa ba gagwe gore: “Le swanetše go rapela ka tsela ye: Tatago rena wa magodimong, leina la gago a le kgethagatšwe.” (Mateo 6:9) Ga se a ka a laela barutiwa ba gagwe gore ba rapele bakgethwa, barongwa goba motho yo mongwe ka ntle le Modimo.

Jesu gape o boditše balatedi ba gagwe gore: “Ke nna tsela le therešo le bophelo. Ga go yo a tlago go Tate ge e se ka nna.” (Johane 14:6) Ke Modimo yo a neilego Jesu feela matla a go re boelanya le Modimo.—Baheberu 7:25.

Go thwe’ng ge e ba ke rapela Modimo e bile ke rapela le bakgethwa?

E le karolo ya Melao e Lesome, Modimo o itše: “Nna MORENA, Modimo wa gago, ke Modimo yo a nago le lehufa.” (Ekisodo 20:5, NAB) Modimo o na le “lehufa” ka tsela efe? Mongwalo wa tlase wa New American Bible o re, “o nyaka gore re rapele yena a nnoši.” Modimo o nyaka gore borapedi ka moka—go akaretša thapelo—bo lebišwe go yena a nnoši.—Jesaya 48:19.

Re kgopiša Modimo ge re rapela motho le ge e le ofe, go akaretša le bakgethwa goba barongwa ba bakgethwa. Ge moapostola Johane a be a leka go rapela morongwa, morongwa yoo o ile a mo thibela ka gore: “O se ke wa dira bjalo. Nna ke upša ke le feela mohlankagotee le wena le bana beno bao ba nago le modiro wa go nea bohlatse ka Jesu. Rapela Modimo.”—Kutollo 19:10.