Basadi

Tlhaloso: Batho ba bagolo ba batshadi. Lentšu la Sehebere la mosadi ke ’ish·shahʹ, leo gabotse-botse le bolelago “motho e motshadi.”

Na Beibele e nyatša basadi goba e ba swara go etša ge ekare ke batho ba nyatšegago?

Gen. 2:18: “[Jehofa] Modimo a re: Xa xo botse xe motho a le nnoši; ke tlo mo dirêla modiriši e a mo lebanexo.” (Monna mo ga a hlaloswe ke Modimo e le motho yo kaone go phala mosadi. Go e na le moo, Modimo o bontšha gore mosadi o be a tla ba le dika tšeo di bego di tla tlatšiša tšeo tša monna thulaganyong ya Modimo. Tlaleletšo ke e nngwe ya diripa tše pedi tšeo gantši di tlaleletšago. Ka gona, basadi ka sehlopha sa bona ke bao ba dirago gabotse dikeng tše dingwe le dibopegong tše dingwe le tše dingwe; banna ba dira gabotse go tše dingwe. Bapiša le 1 Ba-Korinthe 11:11, 12.)

Gen. 3:16: “Mosadi, Modimo ó boletše le yêna a re: . . . O tlo fêla O hloloxêlwa monna wa xaxo; ’me yêna ó tlo Xo buša.” (Polelo ye e boletšwego ka morago ga ge Adama le Efa ba dirile sebe, e be e se go bolela seo banna ba swanetšego go se dira, eupja e be e le go bolela seo Jehofa a bego a se tsebile e sa le pele gore ba be ba tla se dira mo nakong ye ge boithati bo fetogile karolo ya bophelo bja batho. Ditaba tše dintši tša Beibele tša ka morago ga moo di bolela ka ona maemo a a sa thabišego ao a tšweletšego ka baka la go buša mo go bjalo ga boithati ga banna. Eupja Beibele ga e bolele gore Modimo o amogela boitshwaro bjo bo bjalo, goba gore ke bjona bjo bo beelago ba bangwe mohlala wo ba ka o latelago.)

Na go newa ga bohlogo go banna ke go nyatša basadi?

Go ba tlase ga bohlogo ga se mo e lego mo go nyatšago. Bohlogo bo thuša tabeng ya go swara ditaba ka thulaganyo ya bothakga, gomme Jehofa “xa se Modimo wa thlakathlakanô; ké Modimo wa moláô.” (1 Ba-Kor. 14:33) Jesu Kriste o tlase ga bohlogo bja Jehofa Modimo, gomme o kgotsofetše e le ka kgonthe tswalanong e bjalo.—Joh. 5:19, 20; 8:29; 1 Ba-Kor. 15:27, 28.

Bohlogo bjoo bo tšeago sebaka sa bobedi le bjona bo abetšwe monna, kudu lapeng le ka phuthegong ya Bokriste. Modimo ga se a nea monna taolo yeo e feleletšego godimo ga mosadi; monna o swanetše go ikarabela go hlogo ya gagwe, e lego Jesu Kriste, gaešita le go ikarabela go Modimo ka baka la tsela yeo a dirišago bohlogo bjo bo bjalo ka yona. (1 Ba-Kor. 11:3) Le gona, banna ba laelwa go “rata basadi ba bôná ka mokxwa wo ba rataxo mebele ya bôná ka wôna” le go ‘godiša’ basadi ba bona. (Ba-Ef. 5:28; 1 Pet. 3:7) Dikganyogo tša botona tša monna ga se tšona tšeo di lego ka godimo ga tšeo tša mosadi wa gagwe thulaganyong ya Modimo ya banyalani. (1 Ba-Kor. 7:3, 4) Karolo ya mosadi wa sethakga ka ge e bolelwa ka Beibeleng, e gatelela mohola wa gagwe lapeng le setšhabeng. E dumelela sebaka se segolo seo a ka ipontšhago ka sona, ge a dutše a bontšha go lemoga ga gagwe bohlogo bja monna wa gagwe. (Die. 31:10-31) Beibele e laela bana gore ba hlomphe e sego feela tatago bona, eupja gotee le mmago bona. (Ba-Ef. 6:1-3) Le gona e lemoša ka mo go kgethegilego gore go hlokomelwe tšeo bahlologadi ba di nyakago. (Jak. 1:27) Ka gona gare ga Bakriste ba therešo ruri basadi ba ka hwetša ba šireletšegile e le ka kgonthe, ba iteboga ka mo go wišago pelo le go kgotsofala modirong wa bona.

Seriti sa boemo bja mosadi thulaganyong ya Modimo se bontšhwa gape ke taba ya gore Jehofa o bolela ka phuthego ya gagwe ya dibopiwa tše di botegago tša moya e le mosadi, yena mosadi wa gagwe yo e lego mmago barwa ba gagwe. (Kut. 12:1; Ba-Gal. 4:26) Le gona, phuthego e tloditšwego ka moya ya Jesu Kriste e bolelwa e le monyadiwa wa gagwe. (Kut. 19:7; 21:2, 9) Go tšwa ponong ya moya, ruri ga go na kgethologanyo magareng ga banna le basadi bao ba bileditšwego go ba le karolo Mmušong wa legodimo gotee le Kriste.—Ba-Gal. 3:26-28.

Na basadi e swanetše go ba badiredi?

Bao ba neilwego go okamela phuthego ba bolelwa ka Beibeleng e le ba batona. Baapostola ba 12 ba Jesu Kriste e be e le ba batona ka moka ga bona, gomme bao ka morago ba ilego ba kgethwa go ba balebeledi le bahlanka ba bodiredi ka diphuthegong tša Bokriste, e be e le ba batona. (Mat. 10:1-4; 1 Tim. 3:2, 12) Basadi ba eletšwa gore ba ‘ithute ba ikhomoletše e le ba go ikokobetša gohle’ dibokeng tša phuthego, gomme ka tsela ye ga ba botšiše dipotšišo tša go ngangišana le banna ka phuthegong. Basadi ga ba “dumelelwe xo bolêla” dibokeng tše bjalo, ge e ba seo ba ka se bolelago se tla bontšha go se ikokobetše. (1 Tim. 2:11, 12; 1 Ba-Kor. 14:33, 34) Ka gona, gaešita lege basadi ba dira meneelo e holago modirong wa phuthego, fela ga go na tokišetšo yeo ba e diretšwego ya go okamela goba go eta pele ka go ruta phuthego, ge banna ba swanelegago ba le gona.

Eupja na basadi e ka ba baboledi, bagoeledi le badiredi ba ditaba tše di lokilego, ge ba se dibokeng tša phuthego? Moya o mokgethwa ka Pentekoste ya 33 Mehleng ya Rena o ile wa tšhollelwa banneng gotee le basading. Moapostola Petro ge a hlalosa se o ile a tsopola Joele 2:28, 29 ka gore: “Tše di tl’o xo dirêxa mehleng yeo ya bofêlô ši-di: Ó r’yalo Modimo, ó re: Nama yohle ke tlo e thšela Môya wa-ka; ’me barwa ba lena le barwedi ba lena ba tlo porofeta, ba baxolo ba lena ba lôra dilôrô, masoxana a lena a bôna dipônô. Le balata ba lena ba banna le ba basadi ke tlo ba thšêla Môya wa-ka mehleng yeo, ba tlo porofeta.” (Dit. 2:17, 18) Ka mokgwa o swanago lehono, basadi ba na le karolo e swanetšego bodireding bja Bokriste, ba bolela ka ntlo le ntlo gomme ba swara dithuto tša magae tša Beibele.—Bona gape le Psalme 68:12, PK; Ba-Filipi 4:2, 3.

Ke ka baka la’ng basadi ba Bakriste ba rwala hlogong ka dinako tše dingwe?

1 Ba-Kor. 11:3-10: “Hlôxô ya monna mang le mang ké Kriste; ’me hlôxô ya mosadi ké monna; hlôxô ya Kriste ké Modimo. . . . Mosadi mang le mang xe a rapêla, xoba xe a porofeta à apotše hlôxô ó nyatšiša hlôxô ya xaxwe; . . . Monna yêna a a lesê xo apeša hlôxô, xobane ke yêna seswanthšô sa Modimo, le bokwala bya Modimo. ’Me bokwala bya monna ké mosadi. Xobane monna xe a bopya, xa a’ tšwa mosading; ké mosadi e a tšwilexo monneng. Le xôna monna xa a’ bopêlwa mosadi; ké mosadi e a bopetšwexo monna. Ka ’baka leo mosadi a a rwalê seká sa xo bušwa, ka ’baka la Barongwa.” (Ge mosadi wa Mokriste a rwala hlogong dinakong tše di swanetšego, ruri se ke bohlatse bja go hlompha ga gagwe thulaganyo ya bohlogo yeo e ilego ya rulaganywa ke Modimo. Kriste o hlompha bohlogo bja pušo ya legodimo; monna le mosadi le bona ba tlamegile go dira bjalo. Monna wa pele Adama, o be a se a tšweletšwa ka go belegwa ke mosadi, eupja o be a bopilwe ke Modimo. Ge Modimo a be a bopa Efa o ile a diriša e nngwe ya dikgopo tša Adama e le motheo, gomme Modimo a bolela gore mosadi e be e tla ba mothuši wa Adama. Ka gona, monna yo a bego a bopilwe pele o ile a newa boemo bja go ba hlogo. Monna ga a rwale hlogong ge a “rapêla xoba a porofeta” ka gobane monna ge e le mabapi le bohlogo, ke ‘seswantšho sa Modimo’ ka go se be le hlogo ya lefase ditabeng tšeo di lego mabapi le lapa la gagwe. Lega go le bjalo, ge mosadi a ‘rapela goba a porofeta’ a se a rwala hlogong o be a tla ba a bontšha go se hlomphe boemo bja monna wa gagwe bjo a bo neilwego ke Modimo, gomme go be go tla hlabiša monna wa gagwe dihlong. Gaešita le barongwa bao e lego ditho tša phuthego ya Jehofa yeo e swanago le mosadi ya legodimo ba hlokomela “seka sa xo bušwa” seo se rwalwago ke basadi ba botegago ba Bakriste, gomme ba gopotšwa ka boikokobetšo bja bona go Jehofa.)

Ke neng moo go swanetšego gore mosadi a rwale hlogong?

Ge a ‘rapela goba a porofeta’ go etša ge go boletšwe go 1 Ba-Korinthe 11:5. Se ga se bolele gore go rwala hlogong go nyakega ge a rapela a nnoši goba ge a boledišana le batho ba bangwe ka boporofeta bja Beibele. Lega go le bjalo, o swanetše go ba le seo a se rwelego hlogong e le seka se se bonwago sa go hlompha ga gagwe bohlogo bja monna, ge a hlokomela ditaba tšeo di lego mabapi le borapedi tšeo ge e le gabotse di bego di tla hlokomelwa ke monna wa gagwe goba ke monna o mongwe. Ge e ba a rapela ka go hlaboša lentšu bakeng sa gagwe le bakeng sa ba bangwe, goba a swara thuto ya ka mehla ya Beibele gomme e le go ruta moo monna wa gagwe a lego gona, gona o swanetše go rwala hlogong gaešita lege e ba monna wa gagwe a sa dumele go etša yena. Eupja ka ge a dumeletšwe ke Modimo gore a rute bana ba gagwe, gona ga go nyakege gore a rwale hlogong ge a rapela goba a ithuta le bana ba gagwe bao ba se ba ineelago dinakong tša ge monna wa gagwe a se gona. Ge e ba ka lebaka le e lego la sewelo, setho se se ineetšego se setona sa phuthego se le gona goba ge a sepetše le molebeledi wa mosepedi yo a etetšego, gona ge a swara thuto yeo e lokišeditšwego e sa le pele ya Beibele o swanetše go rwala hlogong. Eupja monna o swanetše go rapela.

Na ke mo go swanetšego gore basadi ba itlotše ka ditlolo goba ba apare mabje a bohlokwa?

1 Pet. 3:3, 4: “Bothšepi bya lena xa se byoo bya ntlê bya xo loxa meriri le xo apara tša xauta le bothakxa bya mašela. Bothšepi e le motho wa xo ikuta wa pelong, bothšepi byo bo sa ônalexo bya môya wa bolêta le leaxô. Ké tšôna tše Modimo a bônaxo è le tše bohlôkwa.” (Na se se bolela gore basadi ga se ba swanela go ikgabiša? Ruri ga go bjalo; go etša ge go sa bolelwe gore ga se ba swanela go apara diaparo. Eupja mo ba kgothatšwa gore e be bao ba leka-lekanago kgopolong ya bona mabapi le go itokiša ka bothakga gotee le go apara, gomme ba gatelele kudu bothakga bja moya.)

1 Tim. 2:9, 10: “Basadi ke rata xore ba aparê xabotse, ba ithlôphê la xo šia thsôlô le boikxanthšô, bà se na mafôrô le dipheta le mašela a thekô e thata. A ba aparê ka mo xo loketšexo basadi ba ba rexo ke ba borapedi, ba bônalê ka medirô e mebotse.” (Ke’ng seo ruri Modimo a se lebeletšego, na ke ponagalo ya ka ntle ya motho goba ke pelo ya gagwe? Na Modimo o be a tla thaba ge e ba mosadi a be a ka se ke a tlola ditlolo goba a ikapeša ka mabje a bohlokwa, eupja a phela ka go hloka boitshwaro? Goba na o be a tla thabela basadi bao e lego ba bothakga le bao ba elago hloko ge ba diriša ditlolo goba mabje a bohlokwa, le bao ba ikapešago kudu ka dika tša Modimo le boitshwaro bja Bokriste? Jehofa o re: “Tsela yeo motho a bonago ka yona ga se tsela yeo Modimo a bonago ka yona, ka gobane motho o bona feela seo se tšwelelago mahlong a gagwe; eupja Jehofa yena o bona seo se lego pelong.”—1 Sam. 16:7, NW.)

Die. 31:30: “Botsôrô bo a fora, le botse ké lefêla; mosadi xo rêtwa mo-šia-[Jehofa].”