Mohlomongwe ga bjale o ka rata go bala Genesi 8:​5-17. Dintlha tša dithaba di ile tša bonala mo e nyakilego go ba dikgwedi tše pedi le seripa (matšatši a 73) ka morago, “ka yôna kxwedi ya lesome [June], ka ’tšatši la pele la yôna.” (Genesi 8:⁠5)b Dikgwedi tše tharo (matšatši a 90) ka morago​—“ka ’tšatši la pele la kxwedi ya pele ya ngwaxa wa makxolo a selêlaxo le motšô o tee” wa bophelo bja Noage goba bogareng bja September 2369 B.C.E.​—Noage o ile a rutla marulelo a areka. Ke moka o ile a kgona go bona “xe lefase lè ôma.” (Genesi 8:​13) Kgwedi le matšatši a 27 (matšatši a 57) ka morago, “ka ’tšatši la masome a mabedi le metšô e šupaxo la kxwedi ya bobedi [bogareng bja November, 2369 B.C.E.], lefase la ba le omile.” Noage le ba lapa la gagwe ba ile ba tšwa ka arekeng go ya nageng e omilego. Ka go rialo, Noage le ba bangwe ba ile ba fetša ngwaga wa go dula ga kgwedi le matšatši a lesome (matšatši a 370) ka arekeng.​—Genesi 8:⁠14.

BEIBELE e re: “Mehla ka moka ya Noaxe ya tseb’o ba nywaxa e makxolo a senyane le masome a fetšaxo seatla, ya ba xôna a hwaxo.” (Genesi 9:​29) Rakgolo’a Noage e lego Methusala o phetše nywaga e 969​—e lego nako e telele kudu yeo motho a kilego a e phela. Tekanyo ya nywaga ya go phela ya melokong e lesome go tloga ka Adama go fihla ka Noage e be e le ka godimo ga nywaga e 850. (Genesi 5:​5-31) Ke ka baka la’ng mehleng yeo batho ba be ba phela nako e telele gakaakaa?