Na Ragele o tla ba le Bana?

Morago kua ka nako yeo, boopa bo be bo lebelelwa e le tlaišego. Modimo o be a holofeditše Aborahama, Isaka le Jakobo gore malapa a bona a be a tla tšweletša “peu” yeo malapa ka moka a tlago go šegofatšwa ka yona. (Genesi 26:4, PK; 28:14, PK) Lega go le bjalo, Ragele o be a se na ngwana. Jakobo o ile a bolela gore ke Modimo feela yo a ka neago Ragele barwa, a mo thuša gore a be le karolo ditšhegofatšong tšeo. Lega go le bjalo, Ragele o be a fela pelo. O itše: “Biliha šó, ké molata wa-ka. Tsêna xo yêna xore a mpêlêxêlê wa xo tlo dula difarong tša-ka, ke bônê bana ka yêna.”—Genesi 30:2, 3.

Go ka ba thata gore re kwešiše tsela yeo Ragele a bego a nagana ka yona. Lega go le bjalo, ditumelelano tša manyalo tša bogologolo kua Bohlabela bja Kgaufsi ka moka di bontšha gore e be e le motlwae o amogelegago gore mosadi wa moopa a nee monna wa gagwe ngwanenyana wa mohlanka gore a mmelegele mojabohwa.a (Genesi 16:1-3) Maemong a mangwe, bana ba ngwanenyana wa mohlanka ba be ba ka lebelelwa e le bana ba mosadi yo a hlankelwago.

Ge Biliha a be a e-ba le morwa, Ragele yo a bego a thabile o ile a bolela gore: “Modimo ó nkahloletše, ó bile ó kwile le lentšu la-ka, a mpha morwa.” O ile a mo rea leina la Dani, yeo e rago gore “Moahloledi.” Le yena o be a rapetše mabapi le mathata a gagwe. Ge go be go belegwa morwa wa bobedi wa Biliha, e lego Nafutali, yeo e bolelago gore “Katanô ya-ka,” Ragele o itše: “Ke katane le moxol’wake ka bá ka fenya.” Maina a a šupa phenkgišanong yeo e bego e le gona magareng ga baphenkgišani.—Genesi 30:5-8.

Mohlomongwe Ragele o be a nagana gore o dira dilo ka go dumelelana le dithapelo tša gagwe ge a be a re Jakobo a tšee Biliha, eupša ye e be e se tsela ya Modimo ya go mo nea bana. Go na le seo re ithutago sona tabeng ye. Ga se ra swanela go fela pelo ge re lopa Jehofa. A ka araba dithapelo ka ditsela tše re sa di letelago le nakong ya ge re se ra nagana gore a ka dira bjalo.