Na O Tla Botega Bjalo Ka Eliya?

“Nna ke tlo roma Eliya moporofeta, a tlo tla xo lena, xò sešo xwa fihla ’tšatši leo le lexolo le le šiišaxo la Morêna.” —MALEAKI 4:5.

1. Go tšwelela mathata afe ka morago ga ge Isiraele e feditše nywaga e ka bago 500 e le Nageng ya Kholofetšo?

‘NAGA e elago mafsi le dinose.’ (Ekisodo 3:7, 8) Ke seo Jehofa Modimo a se neilego ba-Isiraele ka morago ga ge a ba lokolotše bohlankeng bja Egipita lekgolong la bo-16 la nywaga B.C.E. Eupša hlokomela! Go fetile nywaga-kgolo e mehlano gomme bjale mmušo wa Isiraele wa meloko e lesome o wetšwe ke tlala e šoro. Go thata go hwetša bjang le ge e le bofe bjo botala. Diphoofolo di a hwa gomme ga se gwa ka gwa na pula nywageng e meraro le seripa. (1 Dikxoši 18:5; Luka 4:25) Ke eng seo se bakilego masetla-pelo a?

2. Sebaki sa mathata a setšhaba a Isiraele ke sefe?

² Bohlanogi bo bakile bothata bjo. Ka go roba Molao wa Modimo, Kgoši Ahaba o nyetše mohumagatšana Isebele wa mo-Kanana gomme o mo dumeletše go hloma borapedi bja Baali Isiraeleng. Se sebe le go feta, o agetše modimo yo wa maaka tempele kua Samaria, e lego motse-mošate. Ee, ba-Isiraele ba be ba fekeeleditšwe go dumela gore borapedi bja Baali bo tla ba tlišetša dibjalo tše dintši! Lega go le bjalo, bjale ba kotsing ya go ‘senyega ba le nageng ya bona e botse’ go etša ge Jehofa a lemošitše.—Doiteronomio 7:3, 4; 11:16, 17; 1 Dikxoši 16:30-33.

Go Lekwa mo go Kgahlišago ga Bomodimo

3. Moporofeta Eliya o lebiša bjang tlhokomelo bothateng bja kgonthe bja Isiraele?

³ Ge tlala e thoma, moporofeta yo a botegago wa Modimo e lego Eliya o botša Kgoši Ahaba gore: “Ka bophelô bya Morêna Modimo wa Isiraele yo nna ke mo hlankêlaxo, ka nywaxa yeno xo ka se kê xwa na phoka le xe e le pula, xe e se ka polêlô ya-ka.” (1 Dikxoši 17:1) Ka morago ga go bona go rereša mo go boifišago ga polelo ye, kgoši e bea Eliya molato wa go tlišetša Isiraele thogako. Eupša Eliya o araba ka gore Ahaba le ba ntlo ya gagwe ke bona ba nago le molato ka baka la bohlanogi bja bona bja go ba barapedi ba Baali. Gore a rarolle kgang ye, moporofeta wa Jehofa o kgothaletša Kgoši Ahaba gore a kgoboketše Isiraele ka moka Thabeng ya Karamele gotee le baporofeta ba 450 ba Baali le baporofeta ba 400 ba dikokwane tše kgethwa. Ahaba le balata ba gagwe ba bokana moo, mohlomongwe ba holofetše gore tiragalo e tla fediša komelelo. Eupša Eliya o lebiša tlhokomelo go kgang e bohlokwa le go feta. O botšiša gore: “Le tlo kxaotša neng xo hlotšetša ka dithokô tše pedi? Xe Modimo è le [Jehofa, PK], xôna latêlang Yêna; xe Modimo è le Baali, xôna o lateleng.” Ba-Isiraele ga ba tsebe seo ba ka se bolelago.—1 Dikxoši 18:18-21.

4. Eliya o šišinya eng gore a rarolle kgang ya Bomodimo?

⁴ Ba-Isiraele ba be ba ile ba leka go tswakanya borapedi bja Jehofa le bja Baali ka nywaga e mentši. Gore a rarolle kgang ya Bomodimo, Eliya bjale o tsoša phenkgišano. O tla lokiša powana bakeng sa sehlabelo gomme e nngwe e tla lokišwa ke baporofeta ba Baali. Eliya bjale o re: “Lena Le tlo bitša leina la modimo wa lena; xe e le nna ke tlo bitša Leina la Morêna. Xomme Modimo e tlo ba yeo a tl’o xo araba ka mollô.” (1 Dikxoši 18:23, 24) Akanya mollo o e-tšwa legodimong e le karabo ya thapelo!

5. Go hloka mohola ga borapedi bja Baali go pepentšhwa bjang?

⁵ Eliya o laletša baporofeta ba Baali gore ba thome. Ba lokiša poo ya sehlabelo gomme ba e bea godimo ga aletare. Ka morago ba fofa-fofa go dikologa aletare ba rapela ka gore: “Baali, re kwê!” Se se tšwela pele go tloga “e sa le ka moswana go fihla mosegare.” (PK) Eliya o kwera ka gore: “Hlabošang lentšu.” Baali o swanetše go ba a swaregile ka taba e akgofilego goba “mohlomong ó sa ile le borôkô, ó sa tlo phafoxa.” Go se go ye kae baporofeta ba Baali ba hlaka-hlakane. Bona! Ba itshega ka dithipa gomme madi a tšwa dinthong tša bona. Go kwala lešata le legolo gakaakang ge ba 450 ka moka ba hlaboša mantšu a bona! Eupša ga go na karabo.—1 Dikxoši 18:26-29.

6. Eliya o dira tokišetšo efe bakeng sa teko ya Bomodimo?

⁶ Bjale go tla sebaka sa Eliya. O aga aletare ya Jehofa lefsa, o epa mokero o mogolo go dikologa aletare gomme o lokiša sehlabelo. Bjale o dira gore go tšhelwe meetse dikgonyeng le sehlabelong. Metšega e 12 e megolo ya meetse e tšhelwa godimo ga aletare go fihlela mokero ka bowona o tlala. Akanya ka pelaelo ge Eliya a dutše a rapela ka gore: “Morêna Modimo wa Aborahama le Isaka le Isiraele! Lehono tsebatša xe Modimo mo xo Isiraele è le Wene, le xore tše nna mohlanka wa xaxo ke di diraxo, ke di dira ka moka kè laetšwe ke Wene. O k’O arabê, Morêna! Araba, xore sethšaba sé se tsebê xore Modimo ké Wene Morêna; xore O sokollê dipelo tša bôná.”—1 Dikxoši 18:30-37.

7, 8. (a) Jehofa o araba bjang thapelo ya Eliya? (b) Ke eng se se phethwago ke ditiragalo tša Thabeng ya Karamele?

⁷ Go araba thapelo ya Eliya, ‘mollo wa Jehofa o tla o e-tšwa legodimong gomme o latswa sehlabelo sa gagwe, dikgong, mafsika le lerole gotee le go nwa meetse a lego ka mokerong ka moka.’ Batho ba a khunama gomme ba re: “Jehofa ke Modimo! Jehofa ke Modimo!” (1 Dikxoši 18:38, 39, PK) Bjale Eliya o gata mogato ka boikemišetšo. O laela gore: “Swarang baporofeta ba Baali, xo se bê le e a phônyôkxaxo!” Ka morago ga ge ba bolaetšwe moeding wa Kisoni, maru a maso a aparela leratadima. Pula e fediša komelelo mafelelong!—1 Dikxoši 18:40-45; bapiša le Doiteronomio 13:1-5.

⁸ Ke letšatši le legolo gakaakang! Jehofa o fentše tekong ye e kgahlišago ya Bomodimo. Godimo ga moo, ditiragalo tše di sokollela dipelo tša ba-Isiraele ba bantši go Modimo. Ka tsela ye le tše dingwe, Eliya o ipontšha e le moporofeta yo a botegago gomme ka boyena o kgatha tema ya boporofeta.

Na “Eliya Moporofeta” o se tla?

9. Ke eng se se porofetilwego go Maleaki 4:5, 6?

⁹ Ka morago, Modimo o ile a bolela e sa le pele ka Maleaki gore: “Tsebang xore Nna ke tlo roma Eliya moporofeta, a tlo tla xo lena, xò sešo xwa fihla ’tšatši leo le lexolo le le šiišaxo la Morêna. Yêna ó tlo sokolla dipelo tša bô-tata-xo-bana xore ba boêle xo bana ba bôná, le ’pelo tša bana xore di boêlê xo bô-tat’abô, xore ke se tlo tla ka ôtla lefase ka le lahla moka.” (Maleaki 4:5, 6) Eliya o phetše nywageng e ka bago 500 pele ga ge mantšu ao a bolelwa. Ka ge se e be e le boporofeta, ba-Juda ba lekgolong la pele la nywaga C.E. ba be ba letetše go tla ga Eliya go bo phethagatša.—Mateo 17:10.

10. Eliya yo a boletšwego e sa le pele e be e le mang, gona re tseba bjang?

¹⁰ Ka gona, Eliya yo a tlago yo e be e le mang? Go hlaolwa ga gagwe go ile gwa utollwa ge Jesu Kriste a be a re: “Xo tloxa mehleng ya Johane Mokolobetši, le byale, mmušô wa maxodimo o tsênwa ka boxale; ’me baxale ké bôná ba o thopaxo. Xobane baporofeta ka moka, le wôna Molaô, ba be ba porofeta ba xôma ka Johane. Xomme, xe Le rata xo amoxêla lentšu lé, ké yêna Eliya, yo a bexo a thwe ó tlo tla.” Ee, Johane Mokolobetši o be a boletšwe pele e le yo a swanago le Eliya. (Mateo 11:12-14; Mareka 9:11-13) Morongwa o be a boditše Sakaria tatago Johane gore Johane o be a tla ba le “môya wa Eliya le ka matla a xaxwe” gomme o be a tla “lokišetša Morêna sethšaba se se ithlamilexo.” (Luka 1:17) Kolobetšo yeo Johane a e dirilego e be e le pontšho ya phatlalatša ya go sokologa ga motho dibeng tša gagwe tše di lego malebana le Molao, e lego yeo e bego e swanetše go lebiša ba-Juda go Kriste. (Luka 3:3-6; Ba-Galatia 3:24) Ka go rialo, modiro wa Johane ‘o ile wa lokišeletša Jehofa setšhaba se se itlhamilego.’

11. Petro o itše’ng ka Pentekoste mabapi le ‘letšatši la Jehofa,’ gona le ile la tla neng?

¹¹ Modiro wa Johane Mokolobetši e le “Eliya” o bontšhitše gore ‘letšatši la Jehofa’ le be le le kgaufsi. Go batamela ga letšatši leo ka lona Modimo a bego a tla gata mogato malebana le manaba a gagwe gomme a phološa batho ba gagwe go bontšhitšwe le ke moapostola Petro. O hlalositše gore ditiragalo tša mohlolo tšeo di diregilego ka Pentekoste ya 33 C.E. e be e le phethagalo ya boporofeta bja Joele bja go tšhollwa ga moya wa Modimo. Petro o bontšhitše gore se se be se swanetše go direga pele ga “’tšatši le lexolo le le šiišaxo la Morêna.” (Ditiro 2:16-21; Joele 2:28-32) E be e le ka 70 C.E. ge Jehofa a be a phethagatša Lentšu la gagwe ka go dira gore madira a Roma a phethe kahlolo ya Modimo setšhabeng seo se bego se ganne Morwa wa gagwe.—Daniele 9:24-27; Johane 19:15.

12. (a) Paulo le Petro ba itše’ng ka ‘letšatši [le le tlago] la Jehofa’? (b) Ke ka baka la’ng go kgonthišeditšwe gore go direge selo se sengwe e le se se emelwago ke modiro wa Eliya?

¹² Lega go le bjalo, mo gontši go be go tla direga ka morago ga 70 C.E. Moapostola Paulo o ile a tswalanya ‘letšatši [le le tlago] la Jehofa’ le go ba gona ga Jesu Kriste. Go oketša moo, moapostola Petro o boletše ka letšatši leo mabapi le “maxodimo a mafsa le lefase le lefsa” tšeo di bego di se tla. (2 Ba-Thesalonika 2:1, 2; 2 Petro 3:10-13) Gopola gore Johane Mokolobetši o dirile modiro o swanago le wa Eliya pele ga ge ‘letšatši la Jehofa’ le e-tla ka 70 C.E. Se ka moka ge se kopantšwe se ile sa bontšha gore selo se sengwe gape se be se tla direga e le se se bego se emelwa ke modiro woo Eliya a bego a o dirile. Selo seo ke eng?

Ba na le Moya wa Eliya

13, 14. (a) Go na le go swana gofe magareng ga mediro ya Eliya le ya Bakriste ba tloditšwego ba mehleng yeno? (b) Bahlanogi ba Bojakane ba dirile’ng?

¹³ Ga se feela gore modiro wa Eliya o be o swana le mediro ya Johane Mokolobetši, eupša gape o swana le ya Bakriste ba tloditšwego lebakeng le le le hlobaetšago le le išago ‘letšatšing [le le tlago] la Jehofa.’ (2 Timotheo 3:1-5) Ka moya wa Eliya le matla a gagwe, ke baboleledi ba ineetšego ba borapedi bja therešo. Le gona se e bile se se nyakegago gakaakang! Ka morago ga lehu la baapostola ba Kriste go ile gwa ba le bohlanogi Bokristeng bja therešo, go fo swana le ge borapedi bja Baali bo ile bja gola Isiraeleng ya mehleng ya Eliya. (2 Petro 2:1) Bao ba ipolelago gore ke Bakriste ba ile ba tswakanya Bokriste le dithuto le mekgwa ya bodumedi bja maaka. Ka mohlala, ba ile ba amogela thuto ya boheitene yeo e sego ya Mangwalo ya gore motho o na le moya o sa hwego. (Mmoledi 9:5, 10; Hesekiele 18:4, PK) Bahlanogi ba Bojakane ba tlogetše go diriša leina la Modimo a nnoši wa therešo e lego Jehofa. Go e na le moo, ba rapela Boraro botee. Ba bile ba amogetše mokgwa o swanago le wa Baali wa go khunamela diswantšho tša Jesu le Maria mmagwe. (Ba-Roma 1:23; 1 Johane 5:21) Eupša ga se gwa felela moo.

¹⁴ Go tloga lekgolong la bo-19 la nywaga go ya pele, baetapele ba dikereke tša Bojakane ba ile ba thoma go bontšha go belaela dikarolo tše dintši tša Beibele. Ka mohlala, ba ganne pego ya Genesi ya tlholo gomme ba khunamela thuto ya tlhagelelo, ba e bitša ya “tša thutamahlale.” Se se ganetšane ka go lebanya le dithuto tša Jesu Kriste le baapostola ba gagwe. (Mateo 19:4, 5; 1 Ba-Korinthe 15:47) Lega go le bjalo, Bakriste ba tloditšwego ka moya lehono ba amogela pego ya Beibele ya tlholo go swana le Jesu le balatedi ba gagwe ba pele.—Genesi 1:27.

15, 16. Go fapana le Bojakane, ke bomang bao ba ilego ba hwetša kabo ya ka mehla ya dijo tša moya, gona ka tsela efe?

¹⁵ Ge lefase le be le tsena ‘lebakeng la bofelo,’ tlala ya moya e ile ya wela Bojakane. (Daniele 12:4; Amosi 8:11, 12) Eupša sehlopha se senyenyane sa Bakriste se ile sa hwetša kabo ya ka mehla ya dijo tša moya tše di newago ke Modimo “ka lebaka la xôna,” go etša ge Jehofa a ile a kgonthišetša gore Eliya o a fepša nakong ya tlala ya mehleng ya gagwe. (Mateo 24:45; 1 Dikxoši 17:6, 13-16) Bahlanka ba bao ba botegago ba Modimo bao ba kilego ba tsebja e le Barutwana ba Beibele ba Ditšhaba-tšhaba ba ile ba amogela leina la Mangwalo la Dihlatse tša Jehofa ka morago.—Jesaya 43:10.

¹⁶ Eliya o ile a phelela leina la gagwe le le bolelago gore “Modimo Wa-ka ke Jehofa.” Morokami o dirišitše leina la Modimo ka go se kgaotše e le makasine wa semmušo wa bahlanka ba Jehofa ba lefaseng. Ge e le gabotse, tokollo ya wona ya bobedi (ya August 1879 [ya Seisemane]) e ile ya bontšha kgodišego ya gore makasine wo o be o thekgwa ke Jehofa. Makasine wo gotee le dipuku tše dingwe tša Mokgatlo wa Watch Tower di pepentšha dithuto tšeo e sego tša Mangwalo tša Bojakane le karolo ka moka e šetšego ya Babele o Mogolo, e lego mmušo wa lefase wa bodumedi bja maaka mola di thekga go rereša ga Lentšu la Modimo Beibele.—2 Timotheo 3:16, 17; Kutollo 18:1-5.

Ba Botega ka Tlase ga Moleko

17, 18. Isebele o ile a arabela bjang polaong ya baporofeta ba Baali, eupša Eliya o ile a thušwa bjang?

¹⁷ Karabelo ya baruti go pepentšhweng e bile e swanago le ya Isebele ge a be a lemoga gore Eliya o bolaile baporofeta ba Baali. O ile a romela moporofeta yo a botegago wa Jehofa molaetša, a ikana gore o tla dira gore a bolawe. Ye e be e se tšhošetšo ya lefeela ka gobane Isebele o be a šetše a bolaile baporofeta ba bantši ba Modimo. Ka baka la poifo, Eliya o ile a tšhabela ka thoko ya borwa-bodikela bja Bereseba. A tlogela mothuši wa gagwe moo, o ile a fetela pele lešokeng a rapelela go hwa. Eupša Jehofa o be a sa lahla moporofeta wa gagwe. Morongwa o ile a tla go Eliya go mo lokišeletša leeto le letelele la go ya Thabeng ya Horebe. Ka go rialo, o ile a hwetša dijo bakeng sa leeto la matšatši a 40 la dikhilomithara tše di fetago 300. Kua Horebe, Modimo o ile a boledišana le yena ka morago ga pontšho e boifišago ya matla ka moya o mogolo, tšhišinyego ya lefase le mollo. Jehofa o be a se gona dipontšhong tše. E be e le dipontšho tša moya wa gagwe o mokgethwa goba matla a šomago. Ka gona Jehofa o ile a bolela le moporofeta wa gagwe. Akanya kamoo phihlelo ye e ilego ya matlafatša Eliya ka gona. (1 Dikxoši 19:1-12) Go thwe’ng ge e ba re thoma go boifa ka tsela e itšego go swana le Eliya ge re tšhošetšwa ke manaba a borapedi bja therešo? Phihlelo ya gagwe e swanetše go re thuša go lemoga gore Jehofa ga a lahle batho ba gagwe.—1 Samuele 12:22.

¹⁸ Modimo o ile a hlalosa ka mo go kwalago gore Eliya o be a sa dutše a e-na le modiro wo a swanetšego go o dira e le moporofeta. Godimo ga moo, le ge Eliya a be a nagana gore e be e le morapedi a nnoši wa Modimo wa therešo Isiraeleng, Jehofa o ile a mmontšha gore ba 7000 ba be ba se ba ka ba khunamela Baali. Ka gona, Modimo o ile a gomišetša Eliya kabelong ya gagwe. (1 Dikxoši 19:13-18) Re ka tlaišwa ke manaba a borapedi bja therešo bjalo ka Eliya. Re ka ba bahlaselwa ba tlaišo e šoro go etša ge Jesu a boletše e sa le pele. (Johane 15:17-20) Ka dinako tše dingwe re ka tsenwa ke poifo. Lega go le bjalo, re ka swana le Eliya yo a ilego a amogela dikgonthišetšo tša Modimo ke moka a kgotlelela ka potego tirelong ya Jehofa.

19. Bakriste ba tloditšwego ba ile ba diragalelwa ke eng mehleng ya Ntwa ya I ya Lefase?

¹⁹ Ka baka la tlaišo e šoro nakong ya Ntwa ya I ya Lefase, Bakriste ba bangwe ba tloditšwego ba ile ba ineela poifong gomme ba kgaotša go bolela. Ba ile ba dira phošo ka go nagana gore modiro wa bona lefaseng o be o fedile. Eupša Modimo ga se a ka a ba lahla. Go e na le moo, o ile a ba thekga ka kgaugelo go fo swana le ge a ile a nea Eliya dijo. Batlotšwa ba botegago ba ile ba amogela phošollo ya Modimo bjalo ka Eliya gomme ba tšwa boemong bja bona bja go se dire selo. Mahlo a bona a ile a budullwa gore a bone tokelo e kgolo ya go bolela molaetša wa Mmušo.

20. Ke tokelo efe yeo e neilwego bao ba botegago bjalo ka Eliya lehono?

²⁰ Boporofeteng bja gagwe bjo bo lego mabapi le go ba gona ga gagwe, Jesu o hlalositše modiro o akaretšago lefase ka moka wo o bego o tla phethwa pele ga bofelo bja tshepedišo ye e kgopo ya dilo. (Mateo 24:14) Lehono modiro wo o tšwetšwa pele ke Bakriste ba tloditšwego gotee le badirišani ba bona ba dimilione bao ba fagahletšego go phela lefaseng la paradeise. Go dira modiro wa go bolela ka Mmušo go fihlela o phethwa ke tokelo e neilwego feela bao ba botegago bjalo ka Eliya.

Botegang Bjalo ka Eliya

21, 22. (a) Bakriste ba tloditšwego ba eteletše modiro ofe pele lehono? (b) Modiro wa boboledi o phethwa ka thušo efe, gona ke ka baka la’ng e nyakega?

²¹ Ka phišego e swanago le ya Eliya, mašaledi a sego kae a Bakriste ba kgonthe ba tloditšwego a phethile boikarabelo bja ona bja go hlokomela dikgahlego tša lefaseng tša Kgoši e beilwego sedulong sa bogoši, e lego Jesu Kriste. (Mateo 24:47) Modimo o be a dutše a diriša batlotšwa ba ka nywaga e fetago 60 bjale, go etelela pele modirong wa go dira batho bao a ba neilego kholofelo e kgahlišago ya bophelo bjo bo sa felego lefaseng la paradeise barutiwa. (Mateo 28:19, 20) Ba ba dimilione ba ka leboga gakaakang gore batlotšwa ba sego kae ba šetšego ba phetha boikarabelo bja bona ka phišego le ka potego!

²² Modiro wo wa go bolela ka Mmušo o be o dutše o phethwa ke batho ba sa phethagalago gomme ba o dira feela ka matla ao Jehofa a a neago bao ba ithekgago ka yena ka thapelo. Morutiwa Jakobo o boletše ge a be a šupa mohlala wa moporofeta wa go rapela e le gore a bontšhe matla a thapelo ya moloki ka gore: “Eliya e be e le motho e a fôkôlaxo bo-ka rena.” (Jakobo 5:16-18) Eliya o be a sa porofete goba go dira mehlolo ka mehla. O be a e-na le maikwelo a swanago a motho le mafokodi ao re nago le ona, eupša o hlanketše Modimo ka potego. Ka ge le rena re thušwa ke Modimo e bile a re matlafatša, re ka botega bjalo ka Eliya.

23. Ke ka baka la’ng re e-na le lebaka le le kwalago la go ba le potego le kholofelo?

²³ Re na le lebaka le le kwalago la go ba le potego le kholofelo. Gopola gore Johane Mokolobetši o dirile modiro o swanago le wa Eliya pele ga ge ‘letšatši la Jehofa’ le fihla ka 70 C.E. Ka moya wa Eliya le matla a gagwe, Bakriste ba tloditšwego ba dirile modiro o swanago wo ba o neilwego ke Modimo lefaseng ka moka. Se se hlatsela gabotse gore ‘letšatši la Jehofa’ le kgaufsi.

O be o tla Araba Bjang?

◻ Bomodimo bja Jehofa bo ile bja hlatselwa bjang Thabeng ya Karamele?

◻ ‘Eliya yo a bego a swanetše go tla’ e be e le mang, gona o ile a dira’ng?

◻ Bakriste ba tloditšwego ba mehleng yeno ba bontšhitše bjang gore ba na le moya wa Eliya?

◻ Ke ka baka la’ng go kgonega gore re botege bjalo ka Eliya?

[Lepokisi go letlakala 15]

Eliya O Ile A Rotogela Legodimong Lefe?

“BA RE bà [Eliya le Elisa] sa tšama bà boledišana, ba thšoxa xò e-tla koloi ya mollô le dipitsi tša mollô; tša ba aroxanya; Eliya a rotoxela lexodimong ka ledimo.”—2 Dikxoši 2:11.

Ke eng se se bolelwago ke lentšu “lexodimong” tabeng ye? Lentšu le ka nako e nngwe le šupa go lefelo la bodulo la moya la Modimo le barwa ba gagwe bao e lego barongwa. (Mateo 6:9; 18:10) ‘Legodimo’ le ka ba la šupa legohle la kgonthe. (Doiteronomio 4:19) Beibele e diriša lentšu le go šupa sebaka se se bonalago sa lefase seo dinonyana di fofago le diphefo di fokago go sona.—Psalme 78:26; Mateo 6:26.

Ke legodimo lefe go a leo moporofeta Eliya a rotogetšego go lona? Go molaleng gore o ile a fetišetšwa ka sebaka-baka sa lefase gomme a bewa karolong e fapanego ya lefase. Eliya o be a sa le lefaseng nywageng ya ka morago, ka gobane o ile a ngwalela Kgoši Jorama wa Juda lengwalo. (2 Koronika 21:1, 12-15) Gore Eliya ga se a rotogela lefelong la moya la Jehofa Modimo go ile gwa kgonthišetšwa ka morago ke Jesu Kriste yo a tsebišitšego gore: “Xa xo e a kilexo a rotoxêla lexodimong, xe e se e a foloxilexo à e-tšwa xôna,” ke gore Jesu ka boyena. (Johane 3:13) Tsela ya go ya bophelong bja legodimong e ile ya bulegela batho ba sa phethagalago la mathomo ka morago ga lehu, tsogo le thotogelo tša Jesu Kriste.—Johane 14:2, 3; Ba-Hebere 9:24; 10:19, 20.