Nka Kgaotša Bjang go Phela Maphelo a Mabedi?

Anna o ipobola ka gore, “Ke be ke nyatša se sengwe le se sengwe seo batswadi ba-ka ba bego ba se bolela. Ke be ke le lerabele gomme ka thoma go ba botša maaka. Ke be ke ba botša gore ke ya mabenkeleng, eupja ge e le gabotse ke be ke e-⁠ya go gahlana le mošemane.”

ANN o be a phela maphelo a mabedi, gomme go se go ye kae o be a sa nyatše batswadi ba gagwe feela eupja le letswalo la gagwe leo le tlwaeditšwego ka Beibele. Wa bona, Ann o be a e-⁠ba le dikopano tša botona le botshadi le lesogana la gagwe ka sephiring. O gopola gore: “Ke ile ka leka go ntšha Jehofa ka mo go feletšego kgopolong ya-ka.” Lega go le bjalo, go se go ye kae o ile a gapeletšega go lebeletšana le therešo e bohloko ya gore ‘seo batho ba se bjalago, ke sona seo ba tlago go se buna.’ (Ba-Galatia 6:⁠7) Ann o ile a ima. O re, “Ke rata ngwan’aka ka pelo ya-ka ka moka, eupja ga go na motho yo a swanetšego go diragalelwa ke se. E sego ge a sa nyalwa. E sego ge a nnoši.”

Na o tantšwe ka tsela e itšego ke go phela maphelo a mabedi​—⁠o utela batswadi ba gago le Bakriste-gotee le wena seo o lego sona? Mohlomongwe o fo dula go fihlela bošego le ba bangwe ba bagwera ba gago ba sekolong bao o tsebago gore batswadi ba gago ba be ba ka se ba amogele. Goba mo gongwe o wetše boitshwarong bjo bo fošagetšego kudu, bjalo ka go kgoga, go diriša bjala gampe goba kopano ya botona le botshadi ya pele ga lenyalo. Boemong lege e le bofe, go etša ge go bile bjalo ka Ann, e fo ba taba ya go tšea nakwana pele go tšwelela mafelelo a bohloko kudu.b

Lega go le bjalo, bafsa ba bangwe ga ba dumelele therešo ye e ba thibela ka mo go feletšego tseleng ya bona ya borabele. Ba swana le motho yo a itebelelago seiponeng gomme “a lebala ka pelá lebopô le a lexo ka lôna.” (Jakobo 1:​23, 24) Re holofela gore o wa mohuta o fapanego. Mohlomongwe o šetše o thomile go itekola​—⁠gomme ga o rate seo o se bonago. O nyaka go fetoga. O bona go nyakega ga go fetoga. Potšišo ke gore, o fetoga bjang?

Go Itshola​—⁠Mogato wa Pele

Sa pele, o swanetše go dira phetho e naganišišitšwego ya go fetoga. Ditiro 3:​19, 20 e kgothatša ka gore: “Ké xôna ithsoleng-xê, Le sokoloxê, xore Le phomolwê dibe tša lena. Xore xo tlê mabaka a tapoloxô e tšwaxo xo Morêna.” Lega go le bjalo, go itshola ke selo se se fetišago tiro ya bohlale. Go sokologa go bolela go “swaba, go nyama goba go tshwenyega ka baka la seo motho a se dirilego.” Mongwadi wa Beibele Jakobo o eleditše ka gore: “Ipôneng bobôtlana, Le hlokofalê Le llê. Dithsêxô tša lena a di fetoxê nyamô; thabô ya lena e fetoxê thlokofalô. Ikokobetšeng pele xa Morêna.” (Jakobo 4:​9, 10) O ka nyamišwa bjang ke selo seo o se thabetšego go fihla mo nakong ye? Nagana kamoo e lego se se fošagetšego ka gona. Nagana kamoo se kwešitšego Modimo bohloko ka gona. Nagana ka mathata ao tsela ya gago e utilwego e go baketšego ona le maaka ao o ilego wa swanelwa ke go a bolela gore o e ute. Ikgopotše gore Modimo o hlaswa mokgwa wa boradia! (Psalme 5:⁠6) Go naganišiša ka ditherešo tše go ka go thuša go gana boitshwaro bjo bo fošagetšego bobedi monaganong le maikwelong.

Lega go le bjalo, go fo nyamišwa ke seo o se dirago ga se gwa lekana. Lesogana leo le bitšwago Robert leo le ilego la akaretšwa mokgweng wa ka sephiring wa go diriša dihlare-tagi gampe le dumela ka gore: “Ke be ke nyamile o šoro. Ke be ke tseba go kgethologanya se se lokilego le se fošagetšego. Lega go le bjalo, ke ile ka tšwela pele ke phela maphelo a mabedi.” Ka gona go nyakega go gata mogato ka sebete! Go 2 Koronika 7:​14, Modimo o boletše gore ge e ba badiradibe ba be ba ka “ikokobetša [ba] rapêla [ba] nyaka sefahloxô sa [gagwe], [ba] lahla ditsela tše mpe tša [bona], xôna [o] tlo ba kwa [a] le lexodimong, [a] ba lebalêla sebe.”

‘Go tsoma sefahlego sa Modimo’ go bolela go mmatamela ka thapelo, o utolle phošo ya gago gomme o kgopele tshwarelo. Go ka fo se be bonolo go dira se, eupja ga go pelaelo gore o tla ikwa o imologile kudu ge o dirile bjalo. Mopsalme o itše: “Mola kè homotše, mašapô a-⁠ka a bodile ka xo hlwa kè tsetsêla. Ka xo imêlwa ke ’atla sa xaxo mosexare le bošexo, . . . ka bá ka Xo bobolêla sebe sa-ka, ka se kê ka hlwa ké uta molato.”​—⁠Psalme 32:​3-⁠5.

Go Botša Batswadi ba Gago

Motho yo mongwe o swanetše go tseba ka mathata a gago. Eupja ke mang? Mofsa yo a lego mahlalagading yo a bitšwago Brian o ipobola ka gore: “E nngwe ya diphošo tša-ka tše kgolo kudu e bile go ya go bao go thwego ke bagwera ba-ka ka mathata a-⁠ka go e na le go ya go mma yo e lego Mokriste. Eupja ke be ke boifa go boledišana le yena ka baka la tsela yeo ke bego ke nagana gore o tla arabela ka yona, ka gona ke ile ka ya go bagwera ba-ka bao ba ilego ba nkiša kgole kudu le therešo.” O se ke wa dira phošo e swanago. Gafela batswadi ba gago bao ba boifago Modimo pelo ya gago. (Bapiša le Diema 23:​26.) Ba na le tshwanelo ya go tseba seo o bego o se dira. Kgaolo 2 ya puku ya Dipotšišo tša Bafsa le Dikarabo tše Šomago e na le ditšhišinyo tše dintši mabapi le kamoo o ka batamelago batswadi ba gago ka gona tabeng ye.c

Ka tlhago, ba ka se ke ba thabišwa ke gore o ba boditše maaka. Eupja batswadi ka mo go sa fetogego ba na le lerato le matla bakeng sa bana ba bona. Mongwadi Clayton Barbeau o re: “Ba ka se ke ba go lahla ka gobane o dirile phošo goba o tsene bothateng bjo itšego. Bana ba ile ba ima, ba swarwa ke bolwetši bjo bo fetetšwago ka kopano ya botona le botshadi, ba ba le bothata bja go nwa goba go diriša dihlare-tagi goba ba tsena bothateng bjo bongwe gomme ba nagana gore batswadi ba bona ba tla befelwa le go tenega, ba hlabe lešata gomme ba kgaogane le boemo. Eupja ge ba boditše batswadi ba bona, ba ile ba ikhwetša ba gokarelwa gomme ba botšwa gore, ‘Ruri, o bothateng bjo bogolo, gomme re tla fo swanelwa ke go bona seo re ka se dirago go go ntšha go bjona.’” Ee, ge letšhogo le pefelo tša mathomong di fela, batswadi ba bantši ba leka go ba bao ba thekgago. Se ke sa therešo kudu gakaakang ge batswadi e le bao ba boifago Modimo! Selo se segolo seo ba tshwenyegilego ka sona ga se ya swanela go ba go go leša dihlong goba go go kweša bohloko, eupja e swanetše go ba go lokiša ditaba. (Bapiša le Jesaya 1:​18.) Tabeng ye ba ka ba ba go rulaganyetša gore o bolele le bagolo ba phuthego.​—⁠Jakobo 5:​14, 15.

Ke therešo gore go tla ba le kotlo yeo e tlogago e nyakega e tšwago go batswadi ba gago yeo o tlago go swanelwa ke go e kgotlelela goba mohlomongwe dithibelo tše itšego tše thata kudu. Eupja ge e le gabotse se se ka go thuša gore o pheme go boela mekgweng ya gago ya kgale. Ka ntle le moo, go boledišana le batswadi ba gago ka ditaba le go bona go tshwenyega ga bona ka lerato go ka fetoša kudu kgopolo yeo o nago le yona ka bona. Go fihla mo nakong ye, mohlomongwe o be o hloile melao le dithibelo tša bona. Ngwanenyana yo mongwe yo a bitšwago Paulette o dumela ka gore: “Go thata go amogela keletšo le melao tšeo re di newago ke batswadi ba rena. Eupja ke thomile go lemoga gore tše di dirwa bakeng sa go re hola le bakeng sa lethabo la rena la ka mo go sa felego.”

Go Fetoša Bagwera ba Gago

Ke ka sewelo mofsa a phegelelago go phela maphelo a mabedi a nnoši. O ka ba o bile o ile wa tutuetšwa ke dithaka tša gago tše dintši borabeleng bja gago! Go phema go boela morago bophelong bja ka sephiring, o tla swanelwa ke go fetoša bagwera ba gago. Mopsalme o itše: “Xa k’a dula le batho ba maaká; xa nka ka ya le ba bomenetša.” (Psalme 26:⁠4) Go kgaotša segwera sa kgale ga go bonolo. Mo gongwe o ka swanelwa ke go rapela bjalo ka mopsalme gore: “Nnamolêlê diatleng tša ba maaká le ba lonya.” (Psalme 43:⁠1) Gata mogato ka go dumelelana le thapelo ye ka go botša bagwera ba gago ba kgale gore o fetogile gomme o ikemišeditše go dira se se nepagetšego. Go e na le go ba morutiwa wa Jesu wa ka sephiring, botša ba bangwe ka tumelo ya gago. (Bapiša le Johane 19:​38.) Gantši, bagwera ba babe ba tla akgofela go tsoma bagwera ba bangwe.

Se se latelago, o swanetše go tsenya bagwera ba babotse legatong la bagwera ba babe. Na go na le tlhaelelo ya bafsa bao ba boifago Modimo? Gona nagana ka moporofeta Jeremia yo a itšego: “Xa ke ešo ka ka ke dula le bakweri kè thabišana nabô’; ke dula kè nnoši ka ’baka la ’atla sa xaxo.” (Jeremia 15:​17) Go be go tla ba kaone ge o ka dula o nnoši go e na le go dula o e-⁠na le bafsa bao ba tlago go go fokodiša moyeng. Lega go le bjalo, gantši bagwera ba kgonthe ba ka hwetšwa ge e ba o dira boiteko. Ka mohlala, Tammy o ile a thoma go gwerana le motswala’gwe yo e bego e le moebangedi wa nako e tletšego. Tammy o gopola gore, “Re ile ra gwerana kgaufsi kudu. Matšatšing a ge ke be ke sa ya sekolong, ke be ke e-⁠ya le yena modirong wa boboledi. Se se ile sa nthuša go dira diphetogo bophelong bja-ka.”

Mofsa yo mongwe wa Mojeremane o re, eupja “tšhireletšo e kaone kudu ke letswalo le lebotse, leo le tlišwago ke tswalano ya kgaufsi le Jehofa Modimo.” Ngwanenyana yo mongwe yo monyenyane yo a ilego a thoma go phela maphelo a mabedi o dumela ka gore: “Le ka mohla ga se ka ka ka aga tswalano ya kgaufsi le Tate, Jehofa.” Ka thapelo le thuto ya motho ka noši o ile a thoma go fetoša dilo. O bolela ka boikgantšho gore, “Bjale ke na le tswalano le Jehofa, yeo go se nago motho yo a ka e fedišago le ka mohla.” Le wena o ka ba le segwera se bjalo sa kgaufsi le Modimo. O tla go hlahla le go go thekga, gaešita lege o hwetša go fetoša ditsela tša gago tša kgale go le thata. Psalme 37:​24 e bolela ka mohlanka yo a botegago wa Modimo gore: “Xe a ka wa, xa a wêle ruri, xobane Morêna ó swere seatla sa xaxwe.” Ee, ka thušo ya Jehofa o ka kgona go kgaotša go phela maphelo a mabedi.

“Ke ile ka leka go ntšha Jehofa ka mo go feletšego kgopolong ya-ka”

O swanetše go dira phetho e naganišišitšwego ya go fetoga

Hlalosetša bagwera ba gago ba kgale gore o fetogile gomme o ka se sa hlwa o ba tlatša go direng phošo

[Footnotes]