Dipotšišo tše Tšwago go Babadi

Go ya ka Jobo 1:8, na re swanetše go kwešiša gore nakong yeo a bego a phela ka yona e be e le yena feela motho yo a bego a botegela Jehofa?

Aowa. Phetho yeo ga e hlatselwe ke Jobo 1:8, yeo e rego:

“Morêna a mmotšiša a re: Jobo mohlanka wa-ka a O mo šeditše? Ka xobane lefaseng ka moka xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.” Modimo o ile a nea tekanyetšo e swanago le yeo go Jobo 2:3, a botšiša Sathane ka gore: “Jobo mohlanka wa-ka O mo šeditše? Ka xobane lefaseng ka moka xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.”

Puku ya Jobo ka boyona e bontšha gore Jobo e be e se motho a nnoši yo a phelago yoo a bego a amogelwa ke Modimo e le yo botegago. Go thoma kgaolong ya 32, re bala ka Elihu. Gaešita lege e be e le lesogana, Elihu o ile a phošolla pono e fošagetšego ya Jobo le go phagamiša Modimo wa go rereša.​—Jobo 32:6–33:​6, 31-33; 35:1–36:2.

Ka gona, tlhaloso ya Modimo ya gore ‘lefaseng ga go na motho wa go swana le Jobo’ e swanetše go ba e bolela gore Jobo e be e le motho yo a kgethegilego ka go ba monna wa go loka. Go bonala Jobo a phetše nakong ya magareng ga lehu la Josefa kua Egipita le mathomong a tirelo ya Moše e le moporofeta wa Modimo. Nakong yeo palo e kgolo ya ba-Isiraele e be e dula Egipita. Ga go na lebaka la go nagana gore ka moka ga bona e be e le bao ba sa botegego le ba sa amogelwego ke Modimo; go bonala go bile le bao ba bego ba bota Jehofa. (Ekisodo 2:​1-10; Ba-Hebere 11:23) Lega go le bjalo, ga go le o tee wa bona yo a kgathilego tema e kgolo go etša ge Josefa a dirile, le gona barapedi bao e be e se ba tumilego kudu ka barapedi ba therešo go etša kamoo Moše a bego a tla ba ka gona go eteleleng pele setšhaba sa Isiraele go tšwa Egipita.

Lega go le bjalo, go be go e-na le motho yo tumilego ka go botega yo a bego a dula lefelong le lengwe. “Xo kile xwa ba le motho e mongwê naxeng ya Utsi, yo leina la xaxwe e bexo e le Jobo. E be e le monna e a se naxo bosodi, wa xo loka le xo boifa Modimo, mo-ila-bobe.”​—Jobo 1:1.

Ka gona, Jehofa o be a ka bolela Jobo e le mohlala wo o lemogegago goba o tumilego wa tumelo le boineelo. Ka mo go swanago, bangwadi ba Beibele e lego Hesekiele le Jakobo ka go gopola morago ba ile ba kgetholla Jobo e le mohlala wa go loka le kgotlelelo.​—Hesekiele 14:14; Jakobo 5:11.