Jehofa o re Tseba Gabotse!

JEHOFA ka kgonthe o a re tseba, kudu-kudu ge e ba re le bahlanka ba gagwe ba botegago. Bagwera ba kgaufsi, metswalo, gaešita le batswadi, ga ba re tsebe gabotse go etša kamoo a re tsebago ka gona. Ee, Jehofa o re tseba go feta kamoo re itsebago ka gona!

Tsebo e phethegilego ya Jehofa ya go tseba bahlanka ba gagwe e ile ya bontšhwa gabotse go Psalme 139. Dafida o boletše’ng Psalmeng yeo? Le gona ke bjang go re tseba ga Modimo go swanetšego go kgoma mantšu le ditiro tša rena?

Kamoo Jehofa a Tsebago ka Gona!

Ka ge Modimo e le Mmopi wa rena, re swanetše go letela gore a be le tsebo e tletšego ka rena. (Ditiro 17:​24-28) Ka gona, Dafida o be a ka re: “Morêna, O a nthlaoloxanya, O a ntseba.” (Psalme 139:1) Go tseba ga Modimo Dafida go be go swana le tsebo yeo e hweditšwego ka go nyakišiša go go tseneletšego. Mopsalme, a thabela go hlahlobišišwa ke Jehofa, o ile a ineela ka mo go feletšego taolong le tlhahlong ya Modimo. Ka mo go swanago Dihlatse tša Jehofa ka thapelo di ‘gafela ditsela tša tšona go Jehofa, le go mmota’ ka mehla gomme di kgodišegile gore o tla dira seo se lokilego. (Psalme 37:5) Go na le maikwelo a go bolokega moyeng dipelong tša rena gobane re tsoma go hlahlwa ke bohlale bja Modimo, gomme re ipea ka tlase ga tlhahlo ya Modimo ka go rata. (Diema 3:​19-26) Go swana le Dafida, re ka homotšwa ke go tseba gore Modimo o re ela hloko, o kwešiša mathata a rena, gomme ka mehla o ikemišeditše go re thuša.

Mopsalme o ile a lemoga gore: “O ntseba xe ke dula, le xe ke tsoxa.” (Psalme 139:2a) Modimo o be a tseba se sengwe le se sengwe ka ditiro tša Dafida, go swana le go dula mafelelong a letšatši la modiro le go tsoga ga gagwe ka morago ga boroko bja bošego. Ge e ba re le Dihlatse tša Jehofa, a re kgodišegeng gore le rena Modimo o re tseba gabotse.

Dafida o ile a dumela: “O ntemoxa tša pelong, xe di sa le kxolê.” (Psalme 139:2b) Le ge Modimo a dula magodimong kgole-kgole le tikologo ya lefase, o be a tseba seo Dafida a bego a se nagana. (1 Dikxoši 8:​43) Temogo e bjalo ga se ya swanela go re makatša, gobane Jehofa o “bôná pelo.” (1 Samuele 16:7; Diema 21:2) Therešo ya gore Jehofa o ela hloko dikgopolo tša rena e swanetše go re tutueletša gore re nagane ka dilo tšeo di sekilego, tše kgahlišago le tše tumišegago. Ke mo go swanetšego gakaakang gore ka mehla re tšweletše dikgopolo tša rena ka thapelo e tšwago pelong e le gore re ka hwetša tlhahlo ya Modimo le “khutšô ya Modimo”!​—Ba-Filipi 4:​6-9.

Mopsalme o ile a oketša ka gore: “Xe ke sepela, le xe ke y’o lala, O a nthšetša; ditsela tša-ka tšohle O di êla thlôkô.” (Psalme 139:3) Go molaleng gore go ela hloko ga Jehofa Dafida ge a sepela go tloga lefelong le lengwe go ya go le lengwe le ge a robetše mola a khuditše go be go bolela gore o be a lekodišiša dilo tšohle tšeo mopsalme a bego a di dira. Yo a Phagamego o be a ela ditiro ka moka tša Dafida e le gore a hwetše sebopego sa kgonthe sa boitshwaro bja gagwe. Modimo o be a e-na le tsebo e tletšego ya ditsela tša Dafida, e lego ditsela tšeo a di latetšego bophelong. Ge Tate wa rena wa legodimong a re hlahloba ka mo go swanago, eka a ka hwetša re mo direla ka potego gomme re dutše re le “mmileng wa tokô” woo o išago bophelong bjo bo sa felego.​—Diema 12:28.

Ka ge go be go se selo seo Dafida a bego a ka se bolela se bego se ka fihlega go Modimo, o itše: “Polêlô, le xe e sešo ya tšwa ’lemeng la-ka, Morêna, ké xe O šetše O e tseba yohle.” (Psalme 139:4) Ge e ba re tloga re nolwa moko ke go se tsebe se re ka se bolelago thapelong, moya wa Jehofa ‘o re rapediša ka diphegelo tše šitago molomo.’ (Ba-Roma 8:​26) Dipoledišanong tša rena, Modimo o lemoga dilo tšeo di lego ntlheng ya leleme eupja di tlogelwago di sa bolelwa, ka gobane o tseba maikwelo a rena a kgonthe. Le gona ge e ba re e-na le lerato le le theilwego “tumelong e se naxo boikaketši,” le ka mohla re ka se leke go foretša ba bangwe ka “dipolelo tše boreledi 1 Timotheo 1:5; Ba-Roma 16:​17, 18.”

Mopsalme o ile a oketša ka gore: “O ntika ka pele le ka moraxo, le ka xodimo xa-ka O bea seatla sa xaxo.” (Psalme 139:5) Ge e le gabotse, Jehofa o ile a šireletša Dafida ka gohle go etša motse o rakeletšwego tlhabanong. Go bonala mopsalme a be a tseba gore go be go e-na le mellwane go seo a bego a ka se dira nakong ya bophelo bja gagwe. Le gona o be a tseba gore go be go sa kgonege go tšhabela mahlo a phafogilego a Jehofa le letsogo la gagwe goba taolo ya gagwe. Ee, Dafida ga se a leka go tšhaba go go bjalo, gomme le rena re ka se go dire. Eupja anke ka mehla re itshware ka tsela e bontšhago go lemoga gore letsogo la Jehofa le godimo ga rena bjalo ka Dihlatse tša gagwe.

Go tseba ga Modimo Dafida go ile gwa mo tlatša ka poifo. Ka gona, o itše: “Tsebo yeo ke matete a [a] mpalelago, ke e mphetago, ga ke e kgone.” (Psalme 139:​6, Phetolelo ya Kgale.) Tsebo ya Modimo ya go re tseba ka o tee ka o tee ke e tlogago e le ya kgonthe mo re ka se kego ra e fihlelela, go sa šetšwe phihlelo goba tlwaetšo. Ka ge e feta tlhaologanyo ya motho, re ka kgodišega gore Jehofa o tseba seo se lego kaone kudu bakeng sa rena. Ka gona ge e ba re rapelela se sengwe gomme karabo ya gagwe e le aowa, anke re ipee ka tlase ga tlhahlo ya Modimo. Go etša ge moapostola Johane a ngwadile: “Ó a re kwa xe re kxopêla se amanaxo le thatô ya xaxwe.”​—1 Johane 5:14.

Moya wa Modimo o ka se Tšhabelwe

Jehofa ga a arabe feela dithapelo tša bahlanka ba gagwe ba botegago, eupja le gona moya wa gagwe o dira go bona gomme o ba thuša go dira thato ya gagwe. Ge e le gabotse, Dafida o ile a botšiša: “Môya wa xaxo nka o efoxa kae? ’Fahloxô sa xaxo nka se thšaba ka ya kae?” (Psalme 139:7) Mopsalme o be a tseba gore a ka se tšhabele moya wa Jehofa goba matla a dirago, ao a ka fihlago gaešita le dikarolong tša kgole tša legohle. Ga go yo a ka tšhabelago sefahlego sa Modimo, ke gore, go tšhabela mahlo a gagwe. Ka kgonthe, “Jona a tsoxa a thšaba a leba Tarasisi à thšaba Morêna,” eupja moporofeta yoo ga se a ka kgona go efoga hlapi e kgolo yeo Modimo a bego a e beile gore e mo metše goba go ikarabelela bakeng sa kabelo ya gagwe e tšwago go Modimo. (Jona 1:​3, 17; 2:​10–3:4) Ka gona anke re ithekge ka moya wa Jehofa gore a re kgontšhe go phethagatša dikabelo tše re di neilwego ke Modimo.​—Sakaria 4:6.

Ka ge Dafida a be a tseba gore go be go se bonolo go tšhabela Modimo, o itše: “Xe nka rotoxêla xodimong, ke y’o hwetša Ò le xôna. Xe nka y’O ikalêla kwa [Sheol, NW] O tla ba Ò le xôna moo.” (Psalme 139:8) Mehleng ya mopsalme, ‘go rotogela legodimong’ go be go bolela go tšhabela dithabeng tše kgolo, tšeo gantši di bego di aparetšwa ke maru. Lega go le bjalo, lege nkabe re le tlhoreng ya godimo-dimo ya thaba, re be re ka se be ba sa fihlelelwego ke moya wa Modimo. Le gona, re be re ka se khutele mahlo a gagwe ka go ikalela kua Sheol e swantšhetšago dikarolo tša ka tlase-tlase tša lefase.​—Bapiša le Doiteronomio 30:​11-14; Amosi 9:​2, 3.

Dafida o itše: “Xe nka phurolla diphêxo tša mahuba, ka y’o dula kwa maxódimong a lewatlê, Le xôna-kua ke tlo hlahlwa ke seatla s’axo; letsôxô l’axo le letona le tlo nthswara.” (Psalme 139:​9, 10) Ke’ng se se bolelwa’ng ka “diphêxo tša mahuba”? Mantšu a ka tsela ya sereto a hlalosa kamoo seetša sa mahuba, go etša eka se na le maphego, kapejana se phatlalalago go tloga bohlabela go ya bodikela. Eupja go be go ka direga’ng ge nkabe Dafida a tšee maphego a mahuba gomme a fihle lewatleng la kgole-kgole goba dihlakahlakeng ka bodikela? O be a tla dula a le ka tlase ga letsogo la Modimo goba taolo le tlhahlo ya gagwe. Jehofa, ka moya wa Gagwe o be a tla ba moo go hlahla mopsalme ka go mo hlomogela pelo.​—Psalme 51:11.

Lefsifsi ga se Bothata go Modimo

Bokgole goba lefsifsi di ka se bee motho mo a ka se fihlelelwego ke Modimo. Ka gona Dafida o oketša ka gore: “Le xe nka re: Lefsifsi a le nkutê ruri! Ka re: Seetša se bê bošexo ka ’baka la-ka, Xo Wene lefsifsi le ka se fifatše, bošexo bo bônêxa byalo ka mosexare; lefsifsi le seetša e fo ba setee.” (Psalme 139:​11, 12) Motho a ka pipetšwa ke lefsifsi ka mo go feletšego, go etša ka ge ekare o swerwe ke lona. Eupja go Jehofa a ka bonala go etša ge ekare o eme seetšeng sa mosegare. Ga go yo a ka fihlelago Modimo dibe lege e le dife tšeo di dirwago lefsifsing.​—Jesaya 29:​15, 16.

Go fihla ga go šitiši go ela hloko ga Mmopi wa rena. Tabeng ye, Dafida o itše: “Xobane ké Wene mmopi wa letswalô [dipshio, NW] la-ka; ke loxilwe ke Wene mmeleng wa mmê. Ke a Xo leboxa x’O mpopile wa matete-tete; medirô y’axo ké mehlôlô; le môya wa-ka o hlatha tše kxolo. Dithô tša-ka, mola di bopêxa kutamong xo Wene di be di sa utaxale, mola kè sa loxêxa botenyeng bya lefase. Mahlô a xaxo a mpone kè sešo ka bopêxa; pukung ya xaxo ké xe [dikarolo tša mmele] di šetše di ngwadilwe tšohle, matšatši à beilwe, xò sešo xwa tšwêlêla le [“setho se tee sa mmele,” NW]”​—Psalme 139:​13-16.

Jehofa Modimo, yo a tsebago maikwelo a rena a ka gare-gare, o dirile dipshio tša Dafida. Ka go ba ga tšona ka gare ga mmele, dipshio di gare ga ditho tše fihlegilego le tše di ka se fihlelelwego, eupja Modimo o a di bona. Le gona a ka lebelela ka mpeng ya mma goba ka popelong. Ee, Jehofa a ka lebelela ka gare ga sebopiwa se senyenyane seo se golago! Go nagana fela ka tsela e makatšago yeo a bopilwego ka yona popelong, go ile gwa tutueletša Dafida go reta Mmopi wa gagwe. Go molaleng gore mopsalme o be a šupa popelong ya mma ge a re “botenyeng bja lefase.” Marapo, ditšhika, mešifa, megalatšhika le methapo ya madi tša ngwana, di logwa moo go fihlagetšego mahlong a motho eupja mo go bonagalago go Modimo.

Pele ga ge ditho tša mmele wa Dafida di ka hlaolega popelong ya mmagwe, ponagalo ya gagwe e be e tsebja ke Modimo. Ka baka la’ng? Ka gobane go gola ga sebopiwa se senyenyane go ile gwa latela tsela e itšego, bjalo ka ge e ka se kwa ditaelo tše di ngwadilwego ka pukung. Se se bontšha bohlale bja Jehofa le go kgona ga gagwe go bona dilo tše di fihlilwego gakaakang! Le gona se se swanetše go re dira gore re leboge gore Modimo o bopile moloko wa batho gomme o dirile tshepedišo ya go belega yeo e feleleditšego ka go ba gona ga o mongwe le o mongwe wa rena.

Dikgopolo tša Modimo di Bohlokwa Gakaakang!

Go nagana kamoo ngwana a golago ka gona popelong go ile gwa dira gore Dafida a bolele ka bohlale bja Modimo. Ka gona, mopsalme o itše: “Xomme nna, tše di lexo mo pelong ya xaxo, Wene Modimo, di mpaletše ruri; ké tše ntši-ntši tše di sa balwexo.” (Psalme 139:​17) Dafida o ile a boloka dikgopolo tša Jehofa pelong ya gagwe, gomme ke tše ntši kudu moo a ilego a makatšwa ke ‘bontši bja tšona.’ Ge e ba dikgopolo tša Modimo e le tše bohlokwa go rena re tla ba baithuti ba mafolofolo ba Mangwalo. (1 Timotheo 4:​15, 16) Dikgopolo tša gagwe tšeo di ngwadilwego di “hola ka go ruta, ka go kgalemela, ka go lokiša dilo, ka go iša tokong, gore motho wa Modimo a swanelege go dira mediro e mebotse ka mo go feletšego, e be yo a hlametšwego mediro e mebotse.”​—2 Timotheo 3:​16, 17, NW.

Mabapi le dikgopolo tša Jehofa, Dafida o itše: “Xe nka re ke a di bala, di feta mohlaba xo ata. Xe ke re ke feditše, ke hwetša kè sa na le Wene.” (Psalme 139:​18) Ka ge dikgopolo tša Modimo e le tše di atilego gaešita le go feta dithorwana tša mohlaba, ge e ba Dafida a be a ka thoma go di bala go tloga mesong, o be a tla fihla nakong ya go robala a sešo a fetša. Ge a tsoga mesong, o be a tla ba a dutše a e-na le Jehofa. Ke gore, o be a tla be a dutše a bala dikgopolo tša Modimo. Ge e le gabotse, ka ge re nyaka tlhahlo ya Jehofa, go naganišiša ka thapelo ka dikgopolo le merero tša gagwe e be e ka ba dilo tša mafelelo megopolong ya rena bošego gomme ya ba dilo tša pele mesong.​—Psalme 125:​8-10.

Tefetšo Bakeng sa Bakgopo

Ka ge Modimo a nea tlhahlo e bohlale, Dafida o ile a ikwa bjang ka bao ba ganago tlhahlo ya Modimo? O ile a rapela: “Modimo, O kabe O bolaya bakxôpô! Lena batho ba madi, ntloxêleng! Ké bôna-bao ba Xo bolêlaxo ka tše mpe; ba ikxodiša ka tša lefêla, è le manaba a xaxo.” (Psalme 139:​19, 20) Dafida ga se a leka go bolaya ba kgopo eupja o ile a rapela gore ba ke ba hwetše tefetšo letsogong la Jehofa. Re swanetše go ba le kgopolo e swanago. Ka mohlala, re ka rapelela gore re bolele lentšu la Modimo ka sebete ge manaba a re tlaiša. (Ditiro 4:​18-31) Eupja ga re tsome go fediša manaba a rena, gobane re a tseba gore Jehofa o itše: “Tefetšo ké ya-ka, le kôtlô ké ya-ka!”​—Ba-Hebere 10:​30; Doiteronomio 32:35.

Ge e ba Modimo a be a ka bolaya bakgopo, batho ba bjalo ba nago le molato wa madi ba ka be ba ile ba tlogela Dafida. Ba be ba na le pego ya go tšholla madi a a se nago molato gomme ba ile ba bolela dilo tše itšego ka Jehofa go ya ka dikgopolo tša bona, e sego go dumelelana le dikgopolo tša gagwe. Go feta moo, ka baka la go tliša kgobošo leineng la Modimo le go le diriša ka lefela, mo gongwe ba le dirišetša go godiša merero ya bona e mebe, ba be ba swanetšwe ke lehu. (Ekisodo 20:7) Anke le ka mohla re se ke ra ba le molato wa dibe tše bjalo!

Ka gobane ba kgopo ba be ba e-na le molato wa go tšholla madi le wa go tliša kgobošo leineng la Modimo, Dafida o itše: “Morêna, a nka se hlôye ba ba Xo hlôyaxo? A nka se hlaswe ba Xo tsoxêlaxo? Ke ba hloile kè xaketše, ké manaba a-ka.” (Psalme 139:​21, 22) Dafida o ile a ikwa a hlaswa banna ba ka gobane ba be ba hloile Jehofa ka kudu gomme ba rabela malebana le Yena. Ba be ba le manaba a mopsalme ka gobane o be a hloile bokgopo bja bona, le bobe bja bona le borabele bja bona malebana le Yo a Phagamego kudu.

Dumela Gore Modimo a go Fetleke

Dafida ga se a rata go swana le banna ba kgopo, eupja o be a tseba gore ga se a swanela go ba hloya kudu. Ka gona o ile a kgopela: “Modimo, mphêtlêkê, O tsebê pelo ya-ka; O ntekê O tsebê dikgopolô tša-ka. O mpônê xe nka ba wa tsela e mpe, O nkišê tseleng e sa felexo.” (Psalme 139:​23, 24) Go swana le mopsalme, re swanetše go rata gore Jehofa a fetleke dipelo tša rena le go bona ge e ba re e-na le ditutuetšo tše sa swanelago. (1 Koronika 28:9) Re swanetše go kgopela Jehofa gore a re fenyeke, a tsebe dikgopolo tšeo di re hlokišago khutšo, gomme a bone ge e ba go e-na le tsela e mpe go rena. Ge e ba re e-na le pelaelo ka baka la melato ya rena goba go e-na le selo se sengwe se sebe go rena goba diphošo tše di bakwago ke tutuetšo ya rena, anke ka boikokobetšo re rapele gomme re ipee ka mo go feletšego ka tlase ga tlhahlo ya moya wa Modimo le keletšo ya Lentšu la gagwe. (Psalme 40:​11-13) Ka ditsela tše bjalo, Jehofa, mogwera wa rena yo mogolo, a ka re iša tseleng e išago mehleng ya neng le neng, a re thuša go phegelela tsela e lokilego e išago bophelong bjo bo sa felego.

Ka gona Psalme 139 e nea kgothatšo ya kgonthe. E bontšha gore, ka ge go se seo se ka širelago mahlong a Tate wa rena wa legodimong, a ka re thuša nakong e nngwe le e nngwe ya tlalelo. (Ba-Hebere 4:​16) Go feta moo, ka ge Jehofa a re tseba go feta kamoo re itsebago ka gona, re bolokegile ge re le tlhokomelong ya gagwe e lerato. (Doiteronomio 33:​27) Ge e ba ka boikokobetšo re kgopela gore a re fetleke gomme a re bontšhe mefokolo ya rena ka noši, re ka lokiša ditaba ka thušo ya gagwe. Ruri go tseba ga Modimo o mongwe le o mongwe wa rena go swanetše go kgoma maphelo a rena ka tsela e botse. Go swanetše go re tutueletša gore re be baemedi ba botegago ba borapedi bja therešo le go sepela ka boikokobetšo pele ga Jehofa, yo a re tsebago gabotse gakaakaa.