Beibele le Boitshwaro bja Bafsa

“Bafsa ba bonala ba hweditše lefa la lefase leo e lego le lebe kudu go a feta ka moka ge e le ka go lebana ga bona le melaetša ya mabapi le botona le botshadi: Dipaesekopo, mmino, radio le thelebišene di ba botša gore kopano ya botona le botshadi e thabiša maikwelong, e a kgahliša . . . Lega go le bjalo, ka nako e swanago, bafsa ba hwetša molaetša woo banenyana ba lokilego ba swanetšego go o gana.”—The Alan Guttmacher Institute.

BAFSA ba lehono ba gotše mehleng ya go se tiišege ka boitshwaro. Lega go le bjalo, Beibele e nea tlhahlo e kwalago mabapi le boitshwaro bja botona le botshadi. Mola mananeo a thuto ya botona le botshadi go bonala a sekamela tabeng ya go phema go ima, Beibele e bontšha gore kopano ya botona le botshadi ya pele ga lenyalo ka boyona ke selo se se swanetšego go phengwa. Beibele e re, “Le ka tloga le kgonthišega gore ga go motho yo ge e le gabotse a dirago bootswa [bjoo bo akaretšago kopano ya botona le botshadi ya pele ga lenyalo] goba wa ditšhila goba wa boitshwaro bjo bo gobogilego bja botona le botshadi . . . yo a kago hwetša kabelo lege e le efe ya mmušo wa Modimo.” (Ba-Efeso 5:5, The Jerusalem Bible) Go molaleng gore dikopano tša botona le botshadi di swanetše go lekanyetšwa feela lenyalong.

Ka gona tharollo ya bothata bja go ima ga bafsa ga se go ruta bafsa go thibela go ima, eupja ke go ba nea tlhahlo ya boitshwaro le moya. Beibele e dira gore go bonale gobotse yo boikarabelo bja go nea tlhahlo ye e lego bja gagwe: “Le lena Bô-tata-xo-bana! Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.”—Ba-Efeso 6:4.

Lega go le bjalo, nyakišišong e nngwe bafsa ba ile ba kgopelwa gore ba “lekanyetše batswadi ba bona seelong sa go tloga go ba sa kgotsofatšego go iša go ba kgotsofatšago ka mo go fetišišago e le methopo ya tšebišo ka botona le botshadi. Go leka-lekanetša ga bafsa bo-mmago bona kudu-kudu go be go le boemong bja go kgotsofatša ganyenyane. Go leka-lekanetšwa ga bo-tate go be go sa kgotsofatše ka mo go fetišišago.” Ka gona, na ke mo go kwalago go letela batswadi gore ba nee bana ba bona tlhahlo mabapi le ditaba tša botona le botshadi?

Go Nea Bafsa Tlhahlo ya Boitshwaro

Go Diema 4:1-4 Kgoši Salomo o opeletša bafsa ka gore: “Hee Ban’aka! Kwang tayô ya rra-weno! . . . Ke be ke le morwa wa tate, kè le ngwana-ngwakô wa mmê. Ka rutwa ke thwe: Pelo y’axo a e swarê mantšu a-ka.” Go molaleng gore Salomo o be a kgona go boledišana le tatagwe gaešita le ka dilo tša motho ka noši; Salomo ka noši o tšwela pele go bolela ka boitshwaro bjo bobe bja botona le botshadi ka tsela e lokologilego ka mo go fetišišago.—Diema 5:1-19.

Gare ga Dihlatse tša Jehofa, malapa a mantši a tšwetša pele poledišano e swanago ya bolokologi le bana ba bona, gomme ba ba le katlego e kgolo! Ba dira go gontši go feta go fo botša bana ba bona gore “Aowa!” ge e le ka dikopano tša botona le botshadi. Beibele e ba thuša gore ba nee bana ba bona mabaka a kwalago bakeng sa go phema boitshwaro bjo bo gobogilego bja botona le botshadi. Le gona, ela hloko mantšu a Salomo. Go Diema 5:3, 4, o kgothaletša masogana go phema dikopano tša botona le botshadi le seotswa. “Melomo ya mosadi e sexo wa xaxo [seotswa] e rothiša todi ya dinose; lexano la xaxwe le thêlêla wa makhura.” Ee, tebelelo-pele ya boitshwaro bjo bobe mo gongwe e ka bonala e tloga e goketša. Lega go le bjalo, Salomo o a lemoša: “Mafêlô a tša xaxwe, ôna a baba wa lengána; ó xalefa wa lerumô la maxale a mabedi.”

Go swana le Salomo, batswadi ba ka bontšhana mabaka le bana ba bona mabapi le mafelelo a dikopano tša botona le botshadi. Letswalo le le tšhwenyegilego, go ima mo go sa nyakegego, malwetši ao a fetetšwago ka dikopano tša botona le botshadi a swanago le AIDS, a ke mafelelo a bohloko bakeng sa metsotswana e sego kae ya boipshino bjo bo goketšago. Salomo o tšwela pele go kgothatša bafsa go se ‘nee bašele seriti sa [bona].’ (Diema 5:9, Phetolelo ya Kgale) Na ga go bontšhe go hloka go itlhompha ge mofsa a ineela go motho o mongwe yo a sa nyakego lenyalo? Na ga se mo go lešago dihlong go fo dira o le selo sa go kgotsofatša dikganyogo tša gago ka noši tša boithati goba tša motho o mongwe? Batswadi ba ka thuša bana ba bona go lemoga ditherešo tše.

Salomo o neile keletšo e nngwe gape ya kamoo go ka lebeletšanwago le motho yo a itshwarago gampe: “A tsela y’axo e mo ngalê; mojakô wa ngwakô wa xaxwe O se o batamêlê.” (Diema 5:8) Ka mo go swanago, batswadi ba ka nea bafsa keletšo e holago mabapi le go phema mabaka a go kwanantšha. Ba ka ba opeletša gore ba se beane mabaka le batho ba ba se nago boitshwaro bjo bobotse. Le gona ge ba fihla boemong bja go ba ba swanelegago go phegelela lefereyo, ba ka kgothaletšwa go gata megato e holago go phema boitshwaro bjo bobe. Ka mohlala, batho ba babedi ba ba lego lefereyong ba ka rulaganya gore ka mehla motho o mongwe a sepele le bona ge ba beane mabaka. Na ke mokgwa wa kgale? Mo gongwe go bjalo. Eupja go kaone go gata megato ya tšhireletšo e kwalago go e na le go “xôlôla, Ò tloxwa ke nama ya mmele wa xaxo. Wa tlo re: Ke be ke re’ng ké nyatša tayô? . . . Ke be ke re’ng kè sa kwe lentšu la baruti ba-ka?”—Diema 5:11-13.

Go Thuša Bafsa Gore ba Boife Jehofa

Go ya ka ditekanyetšo tše dingwe, go na le bafsa ba fetago dimilione tše 12 ba bago le dikopano tša botona le botshadi kua United States e nnoši. Gaešita le leuba la AIDS le dirile mo gonyenyane go fediša tshekamelo ye ya boitshwaro bjo bo gobogilego. Lega go le bjalo, Dihlatse tša Jehofa ba leka go tsenya menaganong ya bana ba bona se sengwe se se tutuetšago ka mo go oketšegilego go feta go boifa AIDS goba go boifa go ima: Poifo e swanetšego ya go boifa Jehofa Modimo. Salomo o gopotša bafsa go Diema 5:21: “Hleng ’tsela tša monna di bônwa ke Morêna! Ó hlatha dinaô tša xaxwe ka moka.” John, e lego o mongwe wa Dihlatse tša Jehofa yo e bilego e le tate wa bana ba bane, o nea keletšo ye: ‘Se se thušago ke gore bana ba be le poifo e lerato ya go boifa Jehofa. O se ke wa tšhaba go tsebiša ngwana wa gago gore Jehofa a ka nyamišwa ke ditiro tša rena tša boithati.’—Bapiša le Diema 27:11.

Ee, gore go boifa Modimo e be selo se atlegago tabeng ya go thibela boitshwaro bjo bobe, Modimo o swanetše go ba wa kgonthe ka mo go feletšego go mofsa. (Bapiša le Ba-Hebere 11:27.) Batswadi ba ka thuša bana ba bona go hlagolela kwano ya kgonthe le Modimo ka thuto ya ka mehla ya Beibele, thapelo ya letšatši le letšatši le ka phihlelo ya kgonthe ya bophelo. Ge mofsa a thoma go lemoga gore Modimo o a mo hlokomela, o tla tutuetšega go phema boitshwaro bjoo bo ka Mo nyamišago.—1 Petro 5:7, NW.

Ka mo go kgahlišago, kwano ya mofsa le Modimo le yona e ka thuša go kgotsofatša dinyakwa tše itšego tšeo gantši di sa kego di kgotsofatšwa go bafsa ba bangwe ba bantši. Ka mohlala, batsebi ba bolela gore boitshwaro bjo bo gobogilego bja botona le botshadi ka tlwaelo ke tsela ya mofsa ya go lwantšhana le maikwelo a go se be le matla goba go hlokega ga seriti. Lega go le bjalo, maikwelo a bjalo ga a swanela go tshwenya yo a nago le bogwera le Jehofa! Mofsa yo bjalo a ka bolela gore: “Nna Mohlakodiši wa-ka ké Modimo; Mong’a-ka ké Yêna Monthêkxa-pelo.”—Psalme 54:4.

Pono e Leka-lekanego ka Botona le Botshadi le Lenyalo

Ee, batswadi ga ba nyake gore bana ba bona ba hlagolele pono e feteletšego goba e mpe ka dikopano tša botona le botshadi. Gaešita lege Beibele e ganetša bootswa, fela e bontšha gape gore dikopano tša botona le botshadi di ka ba tše botse e le ruri, gomme se se tloga se le bjalo ka gare ga thulaganyo ya lenyalo. A diriša polelo ya mokgwa wa go reta, Salomo o a oketša: “Sediba sa xaxo a se šexofalê, O thabêlê moxatš’axo wa mehla yela Ò sa le yo mofsa . . . A nkê O fêlê O kxôlwa ke botse bya xaxwe; O fêlê o thabêla ’ratô la xaxwe.”—Diema 5:18, 19.

Ge go akanywa ka pono ye e phagamego ya ditswalano tša lenyalo, gona ga go na lebaka la gore batswadi ba ikwe ba sa lokologa ge ba bolela ka ditaba tšeo e lego tša ka thoko. John (yo go boletšwego ka yena pejana) o re: “Ka mehla re bolela le bona ka go botega, ka gona taba ya botona le botshadi ga se sephiri. Re gatelela gore ke mpho e tšwago go Mmopi, Jehofa, yeo e swanetšego go thabelwa ke monna le mosadi ka nako e swanetšego.” Tate o mongwe wa bašemane ba babedi ba nywageng ya bofsa o re: “Go tloga nywageng ya bona ya pele, re boledišane le bona ka botona le botshadi ka bolokologi. Re lekile go ba ruta pono ya go hlompha le e phagamego ka lerato le botona le botshadi. Re tšwetša pele poledišano e sa kgaotšego.” Ka mo go kwalago, bana ba bona ba dutše ba hlwekile.

Go Dira Bafsa Gore ba ‘Hlalefele Phologo’

Moapostola Paulo o boletše e sa le pele gore, “Batho ba babe le baaroši, bobe bja bôná bo tlo fêla bò xola bò e-ya.” (2 Timotheo 3:13) Ka gona melao ya boitshwaro e tla tšwela pele e senyega. Go itshwara gampe ga bafsa le go ima go tla tšwela pele go hlasela lekoko la batho.

Batswadi bao ba boifago Modimo ba tla retologela Beibeleng e le gore ba ka ‘hlalefišetša bana ba bona phologo.’ (2 Timotheo 3:15) Ge e ba wena ka noši o lemoga gore o nyaka tlhahlo ka Beibeleng, ikwe o lokilogile go ka ikopanya le Dihlatse tša Jehofa ka go ngwalela bagatiši ba makasine wo. Ba tla thabela go go rulaganyetša gore o hwetše tlhahlo e bjalo ka ntle le tefo. Dihlatse tša Jehofa le gona ba ka go nea dipuku tše swanago le puku ya Bofsa bja Gago—Go Holwa Kudu ke Bjona.a E na le tsebišo ya Mangwalo yeo e thušitšego dikete-kete tša bafsa go phonyokga mereo ya boitshwaro bjo bobe ya lefase.

Lega go le bjalo, go thwe’ng ka banenyana bao ba šetšego ba bile le phihlelo e bohloko ya go ima mo e sego ga molao? Maemo a bjalo ga se ao a sa holofetšego le gatee. Modimo o ‘lebalela ka tsela e kgolo’ yo a itsholago e le ka kgonthe bakeng sa tsela ya gagwe ya boitshwaro. (Jesaya 55:7, NW) Lege go ba motswadi yo a sa nyalwago go se bonolo, motho a ka atlega ka go diriša melao ya motheo ya Beibele. Mosadi yo e sa lego o mofsa yo a bilego le bana ba bararo a sa nyalwa pele e ka ba Mokriste o dirile sona seo. O katanela go diriša Lentšu la Modimo lapeng la gagwe. Ka go kopanela kgaufsi-ufsi le phuthego ya Dihlatse tša Jehofa, o hweditše khomotšo e kgolo le thekgo. O re: “Ka kgonthe go a kgahliša go direla Modimo yo a lebalelago ka mokgwa wo le go ba le banabešo le dikgaetšedi ba ba kwelago bohloko ka tsela yeo. Ka lekga la pele bophelong bja-ka ke ikwa ke hlwekile le gona ke phetše gabotse, moyeng le nameng.”

Ee, go tla ba kaone kudu go phema mathata a kopano ya botona le botshadi ya pele ga lenyalo di sa tloga fase. ka mo go thabišago, dikete-kete tša bafsa lehono ba dira bjalo ka gobane ba latela keletšo ya Beibele yeo e lego e bohlokwa ka mehla.

[Mongwalo wa tlase]

[Seswantšho go letlakala 6]

Dihlatse tša Jehofa ba leka go tsenya menaganong ya bana ba bona selo se sengwe se se tutuetšago ka mo go oketšegilego go feta poifo ya go boifa AIDS goba go boifa go ima: poifo e swanetšego ya go boifa Jehofa Modimo

[Seswantšho go letlakala 6]

Go ya ka ditekanyetšo tše dingwe, go na le bafsa ba fetago dimilione tše 12 bao ba bago le dikopano tša botona le botshadi kua United States e nnoši

[Seswantšho go letlakala 5]

Batswadi ba ka ba le poledišano e tšwelago pele le bana ba bona ge go tliwa ditabeng tša botona le botshadi

[Pictures on page 7]

Bafsa ba Bakriste ba tla phema boitshwaro bjo bo ka senyago kwano ya bona le Modimo