Kgaolo 15

Go Aga Lapa Le Le Godišago Modimo

ANKE re re o rulaganyetša go ikagela ntlo. O reka lefelo. Ka go fagahla mo gogolo, o bona ntlo ya gago e mpsha ka leihlo la gago la monagano. Eupša go thwe’ng ge e ba o se na ditlabakelo le bokgoni bja go aga? Maiteko a gago e be e tla ba a ferekanyago gakaakang!

² Banyalani ba bantši ba tsena lenyalong ba akanya ka lapa le le thabilego, fela ba se na ditlabakelo le bokgoni bjo bo nyakegago bja go le aga. Nako e kopana ka morago ga letšatši la monyanya go thoma mekgwa e fošagetšego. Go lwa le go omana di fetoga bophelo bja letšatši le letšatši. Ge bana ba belegwa, tate le mma ba bafsa ba ikhwetša ba se na bokgoni bja go ba batswadi go etša ge ba se na bjona lenyalong.

³ Lega go le bjalo, go a thabiša gore Beibele e ka thuša. Melao ya yona ya motheo e swana le ditlabakelo tše di go dirago gore o kgone go aga lapa le le thabilego. (Diema 24:⁠3) Anke re bone kamoo e go thušago ka gona.

DITLABAKELO TŠA GO AGA LENYALO LE LE THABILEGO

⁴ Go sa šetšwe kamoo banyalani ba ka bonalago ba swanelana ka gona, ba fapana ka popego ya maikwelo, diphihlelo tša bjaneng le setlogo sa ka lapeng. Ka gona, mathata a itšego a swanetše go letelwa ka morago ga lenyalo. A tla rarollwa bjang? Ee, ge baagi ba aga ntlo ba lebelela dipolane. Tše ke ditlhahlo tše di swanetšego go latelwa. Beibele e nea ditekanyetšo tša Modimo bakeng sa go aga lapa le le thabilego. Bjale anke re hlahlobe tše sego kae tša tše.

⁵ Potego. Jesu o itše: “Se Modimo a se tlêmaxantšexo, motho a se kê a se aroxanya.”a (Mateo 19:⁠6) Moapostola Paulo o ngwadile gore: “Xo tšeana a xo xodišwê mo xohle, ’me maláô a a se bê le dithšila. Diotswa le ba ba xobošaxo tšeanô, Modimo ó tlo ba sekiša.” (Ba-Hebere 13:⁠4) Ka gona batho ba ba lego lenyalong ba swanetše go ikwa ba e-⁠na le boikarabelo go Jehofa bja go dula ba botegela balekane ba bona.​—⁠Genesi 39:​7-⁠9.

⁶ Potego e nea lenyalo seriti le tšhireletšego. Balekane ba ba botegago ba a tseba gore ba tla thekgana go sa šetšwe se se diregago. (Mmoledi 4:​9-12) Ba fapane gakaakang le ba ba tlogelago lenyalo la bona ge bothata bo rotoga la mathomo! Batho ba bjalo ba akgofela go phetha ka gore ba ‘kgethile motho yo a fošagetšego,’ gore ga ‘ba sa ratana’ le gore molekane yo mofsa ke tharollo. Eupša se ga se nee molekane le o tee sebaka sa go gola. Go e na le moo, ba bjalo ba ba sa botegego ba ka fetela le mathata a swanago go balekane ba bafsa. Ge motho a e-⁠na le legae le lebotse gomme a lemoga gore tlhaka e a na, ruri o leka go e lokiša. Ga a fo hudugela ntlong e nngwe. Ka mo go swanago, go fetoša molekane ga se tsela ya go rarolla dikgang tšeo e lego modu wa thulano lenyalong. Ge mathata a rotoga, o se ke wa leka go tšwa lenyalong eupša katanela go le šireletša. Potego e bjalo e swara tlemo e le selo se se swanelwago ke go dišwa, go kgomarelwa le go swarwa e le sa bohlokwa.

⁷ Poledišano. Seema sa Beibele se re: “Maanô a padile, xò se keletšanô.” (Diema 15:​22) Lega go le bjalo, poledišano e thata go banyalani ba bangwe. Ke ka baka la’ng go le bjalo? Ka gobane batho ba na le mekgwa e fapanego ya poledišano. Ye ke therešo yeo gantši e lebišago go se kwešišaneng mo gogolo le pherekanong. Kgodišo e ka kgatha tema go se. Ka mohlala, ba bangwe ba ka ba ba godišitšwe tikologong yeo go yona batswadi ba omanago. Bjale e le batho ba bagolo ba ba lego lenyalong, ba ka ba ba sa tsebe kamoo ba ka boledišanago le balekane ba bona ka gona ka tsela e botho le ya lerato. Lega go le bjalo, legae la lena ga se la swanela go fetoga “ngwako o tletšego . . . dikgang.” (Diema 17:⁠1, PK) Beibele e gatelela go apara “motho e mofsa” gomme ga e amogele bogale bjo šoro, go hlaba mašata le polelo ya maroga.​—⁠Ba-Efeso 4:​22-24, 31.

⁸ O ka dira’ng ge go e-⁠na le go se dumelelane? Ge e ba kgalefo e thoma go gola, o ka dira gabotse ge o ka latela keletšo ya Diema 17:​14 e rego: “Thšaba, ntwa è sešo ya befa.” Ee, mo gongwe o ka fega poledišano go fihlela ka morago ge wena le molekane wa gago ka bobedi le potlišitše dipelo. (Mmoledi 3:​1, 7) Boemong le ge e le bofe, katanela go ‘akgofela go kwa, o diege go bolela, o diege go galefa.’ (Jakobo 1:​19) Pakane ya gago e swanetše go ba ya go lokiša boemo, e sego go fenya ngangišanong. (Genesi 13:​8, 9) Kgetha mantšu le mokgwa wa go bolela o tlago go go kokobetša pelo gotee le molekane wa gago. (Diema 12:​18; 15:​1, 4; 29:​11) Go feta tšohle, le se ke la dula le befetšwe, eupša tsomang thušo ka go boledišana le Modimo ka thapelo ya boikokobetšo le le gotee.​—⁠Ba-Efeso 4:​26, 27; 6:⁠18.

⁹ Seema sa Beibele se re: “Pelo ya mohlale e ruta leleme la xaxwe; e atiša thutô molomong wa xaxwe.” (Diema 16:​23) Ka gona, ke therešo gore senotlelo se se išago poledišanong e atlegago se ka pelong e sego ka ganong. Kgopolo ya gago ka molekane wa gago ke efe? Beibele e kgothaletša Bakriste gore ba “kwêlanê bohloko.” (1 Petro 3:⁠8) Na o ka dira se ge molekane wa gago wa lenyalo a e-⁠na le pelaelo e hlobaetšago? Ge e ba go le bjalo, go tla go thuša go tseba kamoo o ka arabago ka gona.​—⁠Jesaya 50:⁠4.

¹⁰ Kgodišo le tlhompho. Banna ba Bakriste ba botšwa gore ba dule le basadi ba bona ‘go ya ka tsebo, ba ba nee kgodišo bjalo ka sebjana se se fokolago, se se thubegago feela.’ (1 Petro 3:⁠7, NW) Go godiša mosadi wa motho go akaretša go lemoga bohlokwa bja gagwe. Monna yo a dulago le mosadi wa gagwe “go ya ka tsebo” o hlompha kudu maikwelo a gagwe, matla, bohlale le seriti. Gape o swanetše go rata go ithuta kamoo Jehofa a lebelelago basadi ka gona le kamoo a nyakago gore ba swarwe ka gona.

¹¹ Anke re re o na le sebjana se se holago kudu se se thubegago feela ka mo go kgethegilego ka ntlong ya gago. Na o be o ka se se sware ka tlhokomelo e kgolo? Ee, Petro o dirišitše polelo “sebjana se se fokolago” ka kgopolo e swanago gomme se se swanetše go tutuetša monna wa Mokriste gore a bontšhe maikwelo a lerato bakeng sa mosadi wa gagwe yo a rategago.

¹² Eupša Beibele e nea mosadi keletšo efe? Paulo o ngwadile gore: “Mosadi yêna a boifê monna.” (Ba-Efeso 5:​33) Go swana le ge mosadi a swanetše go kwa gore o godišwa le go ratwa kudu ke molekane wa gagwe, monna o swanetše go kwa gore o hlompšha ke mosadi wa gagwe. Mosadi yo a nago le tlhompho a ka se ke a gaša diphošo tša monna wa gagwe ka go se nagane, go sa šetšwe ge e ba monna e le Mokriste goba e se yena. A ka se ke a mo amoga seriti sa gagwe ka go mo swaya diphošo le go mo nyenyefatša ka sephiring goba phatlalatša.​—⁠1 Timotheo 3:​11; 5:⁠13.

¹³ Se ga se bolele gore mosadi a ka se ke a bolela dikgopolo tša gagwe. Ge e ba selo se itšego se mo tshwenya, a ka se bolela ka tlhompho. (Genesi 21:​9-12) Go fetišetša kgopolo ya gagwe go monna wa gagwe go ka swantšhwa le go mo fošetša kgwele. A ka e foša ka bonolo e le gore a kgone go e kaba gabonolo, goba a ka e foša ka matla a magolo mo e lego gore e a mo gobatša. Go kaone gakaakang ge balekane ka bobedi ba phema go latofatša, eupša go e na le moo ba bolele ka mokgwa wa botho le o bonolo!​—⁠Mateo 7:​12; Ba-Kolose 4:⁠6; 1 Petro 3:​3, 4.

¹⁴ Go etša ge re bone, melao ya motheo ya Beibele e ka go thuša go aga lenyalo le le thabilego. Eupša go thwe’ng ge e ba molekane wa gago a bontšha kgahlego e nyenyane go seo Beibele e se bolelago? Go sa dutše go ka fihlelelwa mo gontši ge e ba o diriša tsebo ya go tseba Modimo karolong ya gago. Petro o ngwadile gore: “Le lena Basadi, bušwang ke banna ba lena, xore xe xo na le ba ba xanaxo xo kwa Lentšu, ba tlê ba ruiwê ka xo bôna tsela ye e swerwexo ke basadi, xò se lentšu le le bolêlwaxo, xe ba lemoxile tsela ya lena è le ya xo boifa [“tlhompho e tseneletšego,” NW] le xo ila thšila.” (1 Petro 3:​1, 2) Ee, se se swanago se tla šoma go monna yo mosadi wa gagwe a sa kgahlegelego Beibele. Go sa šetšwe seo molekane wa gago a kgethago go se dira, dumelela melao ya motheo ya Beibele gore e go dire molekane yo kaone. Go tseba Modimo go ka ba gwa go dira motswadi yo kaone.

GO GODIŠA BANA GO YA KA TSEBO YA GO TSEBA MODIMO

¹⁵ Go fo ba le saga goba hamola ga go dire motho gore e be mmetli yo a nago le bokgoni. Ka mo go swanago, go fo ba le bana ga go dire motho gore e be motswadi yo a nago le bokgoni. Ba tseba goba ba sa tsebe, batswadi gantši ba godiša bana ba bona ka tsela yeo bona ka noši ba godišitšwego ka yona. Ka gona, mekgwa e fošagetšego ya go ba motswadi ka dinako tše dingwe e fetišwa go tloga molokong o mongwe go ya go o mongwe. Seema sa kgale sa Sehebere se re: “Bô-tate ba lle matata, mênô xwa šia a bana.” Lega go le bjalo, Mangwalo a bontšha gore motho ga a gapeletšege go latela tsela yeo e beilwego ke batswadi ba gagwe. A ka kgetha tsela e fapanego e tutuetšwago ke melao ya Jehofa.​—⁠Hesekiele 18:​2, 14, 17.

¹⁶ Jehofa o letetše gore batswadi ba Bakriste ba nee bana ba bona tlhahlo le tlhokomelo tše di swanetšego. Paulo o ngwadile gore: “Xe motho a sa babalele b’abô, xaxolo ba lapeng la xabô, ó latola tumêlô; ó phalwa ke e a sa dumelexo.” (1 Timotheo 5:⁠8) Ke mantšu a matla gakaakang! Go kgatha tema ya gago o le mofepi, yeo e akaretšago go hlokomela dinyakwa tša nama, tša moya le tša maikwelo tša bana ba gago ke tokelo le boikarabelo tša motho yo a boifago Modimo. Beibele e nea melao ya motheo yeo e ka thušago batswadi go aga tikologo ya lethabo bakeng sa bana ba bona. Anke o ele hloko e mengwe ya ye.

¹⁷ Beang mohlala o mobotse. Batswadi ba ba-Isiraele ba be ba laetšwe gore: “O a [mantšu a Modimo] tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.” Batswadi ba be ba swanetše go ruta bana ba bona ditekanyetšo tša Modimo. Eupša keletšo ye e ile ya etwa pele ke polelo e rego: “Mantšu a ke Xo laetšaxo lehono a a dulê a le pelong ya xaxo.” (Doiteronomio 6:​6, 7, mongwalo o sekamego ke wa rena.) Ee, batswadi ba ka se kgone go nea seo ba se nago sona. Melao ya Modimo e swanetše go ngwalwa pele ka dipelong tša lena ge e ba le rata gore e ngwalwe ka dipelong tša bana ba lena.​—⁠Diema 20:⁠7; bapiša le Luka 6:⁠40.

¹⁸ Neang kgonthišetšo ya lerato la lena. Nakong ya kolobetšo ya Jesu, Jehofa o ile a tsebatša gore: “O Morwa moratwa wa-ka; ke kxahlwa ke Wene!” (Luka 3:​22) Ka go rialo Jehofa o ile a amogela Morwa wa gagwe, a hlalosa go mo amogela ga gagwe ka bolokologi gomme a nea kgonthišetšo ya lerato la Gagwe. Jesu ka morago o ile a botša Tatagwe gore: “Ò nthatile lefase lè sešo la thêwa.” (Johane 17:​24) Ka gona le le batswadi ba ba boifago Modimo, neang bana ba lena dipontšho tša molomo le tša mmele tša lerato la lena go bona​—⁠gomme le dire se gantši. Gopolang ka mehla gore “se se axišaxo ké leratô.”​—⁠1 Ba-Korinthe 8:⁠1.

¹⁹ Tayo. Beibele e gatelela bohlokwa bja tayo e lerato. (Diema 1:⁠8) Batswadi ba ba phaelago ka thoko boikarabelo bja bona bja go hlahla bana ba bona lehono e nyakile e le mo go kgonthišeditšwego gore ba tla lebeletšana le mafelelo a setlago pelo gosasa. Lega go le bjalo, batswadi ba bile ba lemošwa malebana le go feteletša. Paulo o ngwadile gore: “Lena Bô-tata-xo-bana! Le se kê la befediša bana ba lena, xore ba se tširoxê.” (Ba-Kolose 3:​21) Batswadi ba swanetše go phema go phošolla bana ba bona ka mo go feteletšego goba go dula godimo ga mafokodi a bona le go swaya maiteko a bona diphošo.

²⁰ Jehofa Modimo, Tatago rena wa legodimong o bea mohlala tabeng ya go nea tayo. Go phošolla ga gagwe ga go fetelele le ka mohla. Modimo o boditše batho ba gagwe gore: “Ke tlo Xo ôtla ka mo xo Xo swanetšexo.” (Jeremia 46:​28) Batswadi ba swanetše go ekiša Jehofa tabeng ye. Tayo e fetago mellwane e swanetšego goba e fetišago morero o rerilwego wa go phošolla le go ruta ruri e a befediša.

²¹ Batswadi ba ka lekanya bjang ge e ba tayo ya bona e le e atlegago? Ba ka ipotšiša gore, ‘Tayo ya-ka e phetha’ng?’ E swanetše go ruta. Ngwana wa gago o swanetše go kwešiša lebaka leo tayo e newago ka lona. Gape, batswadi ba swanetše go kgomega ka ditla-morago tša go phošolla ga bona. Ke therešo gore mo e nyakilego go ba bana ka moka ba tla thoma ka go befedišwa ke tayo. (Ba-Hebere 12:​11) Eupša le ka mohla tayo ga se ya swanela go dira ngwana gore a ikwe a tšhogile goba a lahlilwe, goba ya mo tlogelela kgopolo ya gore ke yo kgopo ka tlhago. Jehofa pele ga ge a phošolla batho ba gagwe o itše: “O se boifê, . . . ka xobane e a naxo le wene ké Nna!” (Jeremia 46:​28) Ee, go phošolla go swanetše go dirwa ka tsela yeo ngwana wa lena a tlago go kwa gore le ema le yena le le batswadi ba lerato le ba ba thekgago.

GO HWETŠA “TLHAHLO E BOHLALE”

²² Re ka leboga gore Jehofa o lokišeditše ditlabakelo tšeo re di nyakago bakeng sa go aga lapa le le thabilego. Eupša go fo ba le ditlabakelo ga se gwa lekana. Re swanetše go ithuta go di diriša ka mo go swanetšego. Ka mohlala, moagi a ka ba le mekgwa e mebe ka tsela yeo a swarago ditlabakelo tša gagwe ka yona. A ka diriša tše dingwe tša tšona morerong o fošagetšego ka mo go feletšego. Ka tlase ga maemo a, go bonala mekgwa ya gagwe e tla tšweletša setšweletšwa sa maemo a tlase. Ka mo go swanago, bjale o ka ba o lemoga mekgwa e sa agišego yeo e tsenego ka lapeng la gago. E mengwe e ka ba e tsemile medu ka go tia gomme go le thata go e fetoša. Lega go le bjalo, latela keletšo ya Beibele e rego: “Yo bohlale ó tlo di kwa, a atêlwa ke mahlale; le wa maitse a huma [tlhahlo e bohlale, NW].”​—⁠Diema 1:⁠5.

²³ O ka hwetša tlhahlo e bohlale ka go tšwela pele o amogela tsebo ya go tseba Modimo. Phafogela melao ya motheo ya Beibele yeo e šomago bophelong bja lapa gomme o dire dipeakanyo mo go nyakegago. Lebelela Bakriste ba ba gotšego ka tsebo ba ba beago mohlala o mobotse e le balekane ba lenyalo le batswadi. Boledišana le bona. Go feta tšohle, botša Jehofa dilo tšeo o tshwenyegilego ka tšona ka thapelo. (Psalme 55:​22; Ba-Filipi 4:​6, 7) A ka go thuša go ba le bophelo bja lethabo bja lapa bjo bo mo godišago.

[Mengwalo ya tlase]

HLAHLOBA TSEBO YA GAGO

Potego, poledišano, kgodišo le tlhompho di tlaleletša bjang lenyalong le le thabilego?

Batswadi ba ka kgonthišetša bana ba bona ka lerato la bona ka ditsela dife?

Ke dintlha dife tše di akaretšwago tayong e swanetšego?

[Study Questions]

1-⁠3. Ke ka baka la’ng ba bangwe ba sa kgone go rarolla mathata a tlwaelegilego lenyalong le boemong bja go ba batswadi, eupša ke ka baka la’ng Beibele e ka thuša?

4. Ke ka baka la’ng mathata a lenyalong a swanetše go letelwa, gona ke ditekanyetšo dife tše di neilwego ka Beibeleng?

5. Beibele e gatelela bjang bohlokwa bja potego lenyalong?

6. Potego e ka thuša bjang go šireletša lenyalo?

7. Ke ka baka la’ng gantši poledišano e le thata go batho ba ba lego lenyalong, eupša go apara “motho e mofsa” go ka thuša bjang?

8. Ke eng se se ka thušago ge o sa dumelelane le molekane wa gago?

9. Ke ka baka la’ng go ka thwe poledišano e thoma ka pelong?

10, 11. Monna a ka diriša bjang keletšo ya 1 Petro 3:⁠7?

12. Mosadi a ka bontšha bjang gore o hlompha monna wa gagwe ka mo go tseneletšego?

13. Dikgopolo di ka hlaloswa bjang ka mokgwa wa khutšo?

14. O swanetše go dira’ng ge e ba molekane wa gago a bontšha kgahlego e nyenyane ya go diriša melao ya motheo ya Beibele lenyalong?

15. Mekgwa e fošagetšego ya botswadi e ka fetišwa bjang ka dinako tše dingwe, eupša modikologo wo o ka kgaotšwa bjang?

16. Ke ka baka la’ng go le bohlokwa go fepa lapa la gago, gona se se akaretša’ng?

17. Go nyakega’ng ge e ba bana ba lena ba swanetše go ba le molao wa Modimo ka dipelong tša bona?

18. Ka go bontšha lerato, Jehofa o beetše batswadi mohlala o mobotse kudu bjang?

19, 20. Ke eng se se akaretšwago go layeng bana ka mo go swanetšego, gona batswadi ba ka holwa bjang ke mohlala wa Jehofa?

21. Batswadi ba ka lekanya bjang ge e ba tayo ya bona e le e atlegago?

22, 23. O ka hwetša bjang tlhahlo e nyakegago bakeng sa go aga lapa le le thabilego?