Kgaolo ya Bobedi

Mantšu a Homotšago a Boporofeta ao a go Akaretšago

Jesaya 41:1-29

1. Ke ka baka la’ng re swanetše go kgahlišwa ke boporofeta bja Jesaya?

JESAYA o ngwadile puku yeo e nago le leina la gagwe mo e nyakilego go ba nywaga e 3 000 e fetilego, eupša e na le mohola wa kgonthe go rena lehono. Re ka ithuta melao ya motheo e bohlokwa go tšwa ditiragalong tša histori tšeo a di begilego. Le gona re ka aga tumelo ya rena ka go ithuta ka diporofeto tšeo a di ngwadilego ka leina la Jehofa. Ee, Jesaya e be e le moporofeta wa Modimo yo a phelago. Jehofa o ile a mmudulela gore a ngwale histori e sa le pele​—gore a hlalose ditiragalo pele ga ge di ka direga. Ka go rialo Jehofa o bontšhitše gore a ka kgona go bolelela bokamoso pele gotee le go bo tutuetša. Ka morago ga go ithuta puku ya Jesaya, Bakriste ba therešo ba a kgodišega gore Jehofa o tla phethagatša tšohle tšeo a di holofeditšego.

2. Boemo e be e le bofe Jerusalema ge Jesaya a be a ngwala puku ya gagwe ya boporofeta, gomme go be go tla direga phetogo efe?

² Nakong ya ge Jesaya a feditše go ngwala boporofeta bja gagwe, Jerusalema e be e phologile tšhošetšo ya Asiria. Tempele e be e sa le gona gomme batho ba tšwela pele go phetha mešomo ya bona ya letšatši le letšatši go etša ge ba be ba dira ka nywaga e mentši. Lega go le bjalo, boemo bjoo bo be bo tla fetoga. Go be go tla tla nako ya ge lehumo la dikgoši tša Juda le be le tla išwa Babele gomme ba-Juda bao e sa lego bafsa e be e tla ba bahlankedi ba kgoro motseng woo.a (Jesaya 39:6, 7) Se se be se tla direga nywaga e fetago e 100 ka morago.​—2 Dikxoši 24:12-17; Daniele 1:19.

3. Ke molaetša ofe o hwetšwago go Jesaya kgaolo 41?

³ Lega go le bjalo, molaetša wa Modimo ka Jesaya ga se feela molaetša wa kahlolo. Kgaolo 40 ya puku ya gagwe e thoma ka lentšu “Homotšang.”b Ba-Juda ba be ba tla homotšwa ke kgonthišetšo ya gore bona goba bana ba bona ba be ba tla kgona go boela nageng ya gabo bona. Kgaolo 41 e tšwetša pele molaetša woo o homotšago le go bolela e sa le pele gore Jehofa o be a tla tsoša kgoši e matla bakeng sa go phethagatša thato ya Modimo. E hupere dikgonthišetšo gomme e nea kgothatšo bakeng sa go bota Modimo. E bile e pepentšha go hloka matla ga medimo ya maaka yeo batho ba ditšhaba ba e botilego. Go se ka moka, go na le go gontši bakeng sa go matlafatša tumelo, bobedi mehleng ya Jesaya le mehleng ya rena.

Jehofa o Hlohla Ditšhaba

4. Jehofa o hlohla ditšhaba ka mantšu afe?

⁴ Jehofa ka moporofeta wa gagwe o re: “Lena dihlakehlake, homolang fá pele xa-ka! Dithšaba a di fiwê matla a mafsa, di batamêlê di bolêlê, re sekišanê rè le mmôxô.” (Jesaya 41:1) Jehofa ka mantšu a o hlohla ditšhaba tšeo di ganetšago batho ba gagwe. Anke di eme pele ga gagwe gomme di itokišetše go bolela! Ka ge re tla bona ka morago, Jehofa bjalo ka ge eka ke moahlodi kgorong ya tsheko, o tloga a nyaka gore ditšhaba tše di nee bohlatse bja gore medimo ya tšona ya diswantšho ke medimo e le ka kgonthe. Na medimo ye e ka kgona go bolelela pele ditiro tša phološo bakeng sa barapedi ba yona goba dikahlolo malebana le manaba a bona? Ge e ba go le bjalo, na e ka phethagatša diporofeto tše bjalo? Karabo ke aowa. Ke Jehofa a nnoši yo a ka dirago dilo tše.

5. Hlalosa kamoo diporofeto tša Jesaya di nago le phethagalo ya go feta e tee.

⁵ Ge re dutše re ahla-ahla boporofeta bja Jesaya, anke re gopoleng gore go etša ge go diregile ka diporofeto tše dintši tša Beibele, mantšu a gagwe a na le phethagalo ya go feta e tee. Ka 607 B.C.E., Juda e tla ya bothopša Babele. Lega go le bjalo, boporofeta bja Jesaya bo utolla gore Jehofa o tla lokolla ba-Isiraele ba ba thopilwego moo. Se se direga ka 537 B.C.E. Go lokollwa moo go ile gwa swana le ga mehleng ya pele ya lekgolong la bo-20 la nywaga. Nakong ya ntwa ya pele ya lefase, bahlanka ba tloditšwego ba Jehofa lefaseng ba ile ba feta nakong ya masetla-pelo. Ka 1918 kgateletšo e tšwago lefaseng la Sathane​—yeo e ilego ya hlohleletšwa ke Bojakane e le karolo e eteletšego pele ya Babele o Mogolo​—e ile ya nyaka e thibela ka mo go feletšego boboledi bjo bo rulagantšwego bja ditaba tše dibotse. (Kutollo 11:5-10) Bahlankedi ba bangwe ba etelelago pele ba Mokgatlo wa Watch Tower ba ile ba romelwa kgolegong ka ditatofatšo tša maaka. Ka mo go bonalago ka gona, lefase le ile la fenya ntweng ya lona malebana le bahlanka ba Modimo. Ke moka, go etša ge go diragetše morago kua ka 537 B.C.E., Jehofa o ile a ba lokolla ka mo go sa letelwago. Ka 1919 bahlankedi bao ba bego ba golegilwe ba ile ba lokollwa gomme ka morago ditatofatšo malebana le bona di ile tša fedišwa. Kopano yeo e bego e le Cedar Point, Ohio, ka September 1919, e ile ya matlafatša bahlanka ba Jehofa lefsa bakeng sa go tšwetša pele modiro wa go bolela ditaba tše dibotse tša Mmušo. (Kutollo 11:11, 12) Go tloga ka nako yeo go fihla gona bjale, tekanyo ya modiro wa boboledi e oketšegile ka mo go makatšago. Go feta moo, bontši bja mantšu a Jesaya bo tla ba le phethagalo e kgahlišago lefaseng la Paradeise le le tlago. Ka baka leo, mantšu a Jesaya ao a boletšwego kgale a akaretša ditšhaba ka moka le batho ka moka lehono.

Molopolodi o a Bitšwa

6. Moporofeta o hlalosa bjang mofenyi wa nakong e tlago?

⁶ Jehofa ka Jesaya o bolelela pele mofenyi yoo bobedi a tlago go phološa batho ba Modimo go tšwa Babele le go tliša kahlolo godimo ga manaba a bona. Jehofa o botšiša gore: “Ke mang e a tsošitšego e a lokilego bohlabatšatši, e a mmiditšego [“ka toko,” NW] a mo sepediša mohlaleng wa gagwe? Ke mang e a mo gafetšego ditšhaba, e a kokobeditšego dikgoši, e a dirago marumo a bona lerole le dikgapa tša bona moko o fefolwago. O di phalalela a feta ka khutšo, a tla ka tsela e a sešogo a ka a e sepela? Ke mang e a tšweleditšego tšeo a di dira? Ke mang e a biditšego meloko ya batho e sa le go thomeng? Ke Nna Jehofa ke lego wa pele, gape le go ba mafelelo ke sa le Yena.”​—Jesaya 41:2-4, PK.

7. Mofenyi yo a tlago ke mang, gomme ke eng seo a se phethago?

⁷ Ke mang yo a tlago go tsošwa a e-tšwa bohlabatšatši, go tšwa dikarolong tša ka bohlabela? Dinaga tša Meda le Peresia le Elama di ka bohlabela bja Babele. Korese wa mo-Peresia o tšwa moo a gwanta, a e-na le madira a gagwe a matla. (Jesaya 41:25; 44:28; 45:1-4, 13; 46:11) Gaešita le ge Korese e se morapedi wa Jehofa, o gata mogato ka go dumelelana le thato ya Jehofa, Modimo yo a lokilego. Korese o fenya dikgoši gomme tša gašanywa bjalo ka lerole pele ga gagwe. Ka go phegelela phenyo, o feta “ka khutšo” goba ka mo go šireletšegilego ditseleng tšeo go sa tlwaelwago go sepelwa go tšona, a fenya mapheko ka moka. Ka ngwaga wa 539 B.C.E., Korese o fihla motseng o mogolo wa Babele gomme a o thopa. Ka baka leo, batho ba Modimo ba a lokollwa e le gore ba ka boela Jerusalema bakeng sa go yo tsošološa borapedi bjo bo sekilego.​—Esera 1:1-7.c

8. Ke eng seo Jehofa a nnoši a ka se dirago?

⁸ Ka go rialo, Jehofa ka Jesaya o bolelela pele go tšwelela ga Korese lebaka le letelele pele ga ge kgoši yeo e ka belegwa. Ke Modimo wa therešo a nnoši yo a ka porofetago selo se se bjalo ka mo go nepagetšego. Jehofa ga a lekane le medimo ya maaka ya ditšhaba. Jehofa o bolela ka lebaka le le kwagalago gore: “Nka se ke ka neela e mongwe kgodišo ya-ka.” Ke Jehofa feela yo a ka bolelago ka mo go nepagetšego gore: “Ké Nna wa mathômô, ké Nna wa mafêlô; xa xo Modimo xe e se Nna.”​—Jesaya 42:8, PK; 44:6, 7.

Batho ba Tšhogilego ba Bota Medimo ya Diswantšho

9-11. Ditšhaba di arabela bjang ge Korese a tšwelela?

⁹ Jesaya bjale o hlalosa karabelo ya ditšhaba go mofenyi yo wa nakong e tlago ka gore: “Dihlakehlake di di bone tša boifa; maxomô a lefase a tlo šišinyêxa; ’me ba tlo batamêla ba tla kxaufsi. Ba thušana seng sa bôná, ba botšana ba re: Kxôtlêlêla! Mmetli ó thuša morudi, mokxatli ó thuša mmatodi, ba bolêla se ba se rutšexo ba re: Ké se botse! Ba se kôkôtêla ka dimapô xore se se kê sa kxwêhla.”​—Jesaya 41:5-7.

¹⁰ A lebelela nywageng e ka bago 200 kua pele , Jehofa o lekola boemo bja lefase. Madira a matla ka tlase ga Korese a sepela ka lebelo, a fenya bohle bao ba ganetšago. Batho​—gaešita le badudi ba dihlakahlakeng, bao ba lego mafelong a kgole-kgole​—ba tšhošwa ke ge a batamela. Ka baka la poifo ba ipopa ngatana gore ba lwantšhe yo Jehofa a mmiditšego go tšwa bohlabela bakeng sa go phetha kahlolo. Ba leka go kgothatšana, ba re: “Kxôtlêlêla!”

¹¹ Ditsebi tša mešomo ya diatla di šoma gotee gore di betle medimo ya diswantšho bakeng sa go phološa batho. Mmetli o dira sebopego sa kota, yoo ka morago a kgothatšago morudi wa gauta gore a se manege ka tšhipi, mohlomongwe le ge e le gauta. Mmetla-diswantšho o kokotela tšhipi gabosele gomme a laela gore e fišeletšwe ka morodi. Mohlomongwe ke ka tsela ya kodutlo ge go bolelwa gore e tiišetšwe ka dipikiri e le gore e se ke ya kgwehla goba ya bontšha bofokodi, bjalo ka ge go ile gwa ba bjalo ka modimo wa seswantšho wa Dagoni wo o ilego wa wela pele ga areka ya Jehofa.​—1 Samuele 5:4.

Le se ke la Boifa!

12. Ke kgonthišetšo efe yeo Jehofa a e neago Isiraele?

¹² Bjale Jehofa o lebiša tlhokomelo ya gagwe bathong ba gagwe. Ka go se swane le ditšhaba tšeo di botago medimo ya diswantšho yeo e sa phelego, bao ba botago Modimo wa therešo ga se ba swanela go boifa le ka mohla. Kgonthišetšo ya Jehofa e thoma ka kgopotšo ya gore Isiraele ke bana ba mogwera wa gagwe Aborahama. Ka mantšu ao a bontšhago maikwelo a borutho, Jesaya o bega mantšu a Jehofa a rego: “Xe e le wene Isiraele, Jakobo, O mohlanka wa-ka yo ke mo hlaotšexo, peu ya Aborahama, yo ke mo ratilexo. Ké wene yo ke Xo tšerexo, Ò le kua pheletšong ya lefase, Ò le dikhutlong tša lôna, ka re: O mohlanka wa-ka; ke hlaola wêna; xa ke Xo lahle. O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša; ke Xo hlêka ka letsôxô la-ka le letona le-ya-ka-tokô.”​—Jesaya 41:8-10.

13. Ke ka baka la’ng mantšu a Jehofa e tla ba a homotšago go ba-Juda ba thopilwego?

¹³ Mantšu a e tla ba a homotšago gakaakang go ba-Juda ba botegago ba ba thopilwego nageng e šele! E tla ba mo go kgothatšago gakaakang go kwa Jehofa a ba bitša “mohlanka wa-ka” nakong ya ge e le mathopša, bahlanka ba kgoši ya Babele! (2 Koronika 36:20) Gaešita le ge Jehofa a tla ba otla ka baka la go se botege ga bona, a ka se ke a ba lahla. Isiraele ke ya Jehofa, ga se ya Babele. Go ka se be le lebaka la gore bahlanka ba Modimo ba tšhoge ge Korese yo a fenyago a batamela. Jehofa o tla ba le batho ba gagwe bakeng sa go ba thuša.

14. Mantšu a Jehofa go Isiraele a homotša bahlanka ba Modimo bjang lehono?

¹⁴ Mantšu ao a kgothaditše le go matlafatša bahlanka ba Modimo gaešita le go fihla mehleng ya rena. Morago kua ka 1918 ba ile ba hlologela go tseba thato ya Jehofa ka bona. Ba be ba hlologetše go lokollwa boemong bja bona bja bothopša bja moya. Lehono re hlologetše go imollwa dikgateletšong tšeo re di tlišetšwago ke Sathane, lefase le go se phethagale ga rena. Eupša re lemoga gore Jehofa o tseba gabotse nako le tsela yeo a swanetšego go gata mogato ka yona bakeng sa batho ba gagwe. Go swana le bana ba banyenyane, re swere letsogo la gagwe le matla, re kgodišegile gore o tla re thuša go katana ka katlego. (Psalme 63:7, 8) Jehofa o lebelela bao ba mo hlankelago e le ba bohlokwa. O a re thekga lehono go fo swana le ge a ile a thekga batho ba gagwe nakong ka moka e thata ya 1918-19 le go fo swana le ge a ile a thekga ba-Isiraele ba botegago kgale-kgale nakong e fetilego.

15, 16. (a) Go tla direga eng ka manaba a Isiraele, gomme ke ka ditsela dife Isiraele e swanago le seboko? (b) Ke ka baka la tlhaselo efe e tlago moo mantšu a Jehofa e lego a kgothatšago kudu-kudu lehono?

¹⁵ Ela hloko seo se latelago seo Jehofa a se bolelago ka Jesaya: “Ruri, bohle ba ba Xo bêkaxo, ke tlo ba leša hlong, ba nyatšêxa ya ba ba lefêla; ba ba lwaxo naxô ba tlo lôba. O tla re Ò ba nyaka, wa se sa ba bôna; ba ba Xo lakanaxo e tlo ba ba lefêla; ba ba Xo tšwêlaxo dirá ba tlo fêla ba se hlwê ba e-ba xôna. Xobane Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo! Se boifê, Jakobo, mo-ka-sebokwana, lena bathwana ba Isiraele! Ké Nna ke Le phološaxo! Ó r’yalo Morêna, Molopolodi w’axo, Mokxêthwa wa Isiraele.”​—Jesaya 41:11-14.

¹⁶ Manaba a Isiraele a ka se ke a fenya. Bao ba galefelago Isiraele ba tla hlabišwa dihlong. Bao ba lwago le yona ba tla fedišwa. Gaešita le ge ba-Isiraele ba thopilwego ba bonala e le ba fokolago le ba sa kgonego go itwela go swana le seboko se se runya-runyago mmung, Jehofa o tla ba thuša. Se e bile kgothatšo gakaakang “mehleng ya bofêlô” ka moka ga yona ge Bakriste ba therešo ba dutše ba lebeletšane le lehloyo le matla la ba bantši gakaakaa lefaseng! (2 Timotheo 3:1) Le gona kholofetšo ya Jehofa ke e matlafatšago gakaakang ka baka la tlhaselo e tlago ya Sathane, yo a bolelwago boporofeteng e le “Gogo wa naxa ya Magogo”! Ka tlase ga tlhaselo e sehlogo ya Gogo, batho ba Jehofa ba tla bonala eka ga se ba šireletšega go etša seboko​—batho ‘ba dutšego ba se na merako’ e bile ba se na “ditswalelo le mefsiko.” (PK) Lega go le bjalo, bao ba holofelago Jehofa ba ka se ke ba swanelwa ke go thothomela ka poifo. Ra-matla-ohle ka boyena o tla lwa e le gore a ba phološe.​—Hesekiele 38:2, 11, 14-16, 21-23; 2 Ba-Korinthe 1:3.

Khomotšo go Isiraele

17, 18. Jesaya o hlalosa bjang go matlafatšwa ga Isiraele, gomme ke go phethagala gofe moo re ka go holofelago?

¹⁷ Jehofa o tšwela pele go homotša batho ba gagwe ka gore: “O tsebê, ke Xo dira sefolô se boxale se sefsa, sa sehlare se se tiilexo; O tlo fola dithaba, wa buduša meboto bo-ka moko. O tlo di fêfêra, phefô ya di tšea, ’dimo la di phepheula. Xe e le wene O tlo hlalala ka Morêna, O tlo fadiša Mokxêthwa wa Isiraele.”​—Jesaya 41:15, 16.

¹⁸ Isiraele e tla newa matla bakeng sa go hlasela, gomme ka kgopolo ya moya, e fenye manaba a yona a etšago dithaba. Ge Isiraele e boa bothopša, e tla fenya manaba a yona ao a lekago go thibela go agwa ga tempele le merako ya Jerusalema lefsa. (Esera 6:12; Nehemia 6:16) Lega go le bjalo, mantšu a Jehofa a tla phethagatšwa ka tekanyo e kgolo go “Ba-Isiraele ba Modimo.” (Ba-Galatia 6:16) Jesu o holofetša Bakriste ba tloditšwego gore: “E a fenyaxo a lôta medirô ya-ka xo fihla bofelong, ke tlo mo fa matla a xo buša dithšaba, Ó tlo di diša ka molamo wa thsipi, ó tlo di phuma wa ’pitša tša letsopa, byalo ka xe Nna ke filwe tšeo ke Tate.” (Kutollo 2:26, 27) Ruri go tla tla nako yeo ka yona banababo Kriste ba tsošeditšwego letagong la legodimong ba tlago go ba le karolo phedišong ya manaba a Jehofa Modimo.​—2 Ba-Thesalonika 1:7, 8; Kutollo 20:4, 6.

19, 20. Ke eng seo Jesaya a se ngwalago mabapi le go bušetšwa ga Isiraele lefelong le lebotse, gomme se se phethagala bjang?

¹⁹ Ka polelo ya seswantšhetšo, Jehofa bjale o tiiša kholofetšo ya gagwe ya go tlišetša batho ba gagwe kimollo. Jesaya o ngwala gore: “Bahlaki le bahloki ba nyakaxo meetse ba a hlôka, ’me maleme a bôná a xaxalala [“a oma,” NW] ka lenyôra, Nna Morêna ke tlo ba kwa, Nna Modimo wa Isiraele nka se ba tloxêle. Ke tlo thula dinoka dirwaolong le methôpô meeding. Lešôka ke tlo le dira lethša, naxa ye e omilexo ya ba ya metšwedi ya meetse. Šokeng ke tlo mediša merôkwana, meduhlare le mehlware; mexôbôxôbô ka e šema mo lehanateng, le meumô, le mehlakolane. Xo tlo ba byalo xore ba bônê, ba tsebê, ba lemoxê, ba hlaloxanyê bohle xore ké seatla sa Modimo se se dirilexo tšeo; di hlodilwe ké Yêna Mokxêthwa wa Isiraele.”​—Jesaya 41:17-20.

²⁰ Gaešita le ge ba-Isiraele bao ba thopilwego ba dula motseng-mošate wa mmušo wa lefase o humilego, go bona o swana le leganata leo le se nago meetse. Ba ikwa bjalo ka Dafida ge a be a khutetše Kgoši Saulo. Ka 537 B.C.E., Jehofa o ba bulela tsela ya go boela Juda le go aga tempele ya gagwe lefsa Jerusalema, ka go rialo ba tsošološa borapedi bjo bo sekilego. Ke moka Jehofa o a ba šegofatša. Boporofeteng bja ka morago, Jesaya o bolela e sa le pele gore: “Morêna ó homotša Tsione; ó homotša le marope a xôna ka moka. Mašôka a xôna ó tlo a dira Edene, lehanata la xôna ó tlo le dira thšemo ya Morêna.” (Jesaya 51:3) Se se direga e le ka kgonthe ka morago ga gore ba-Juda ba boele nageng ya gabo bona.

21. Ke go tsošološwa gofe mo go diragetšego mehleng yeno, gomme go tla direga eng nakong e tlago?

²¹ Selo se se swanago se diragetše mehleng ya rena ge Korese yo Mogolo, Kriste Jesu a be a lokolla balatedi ba gagwe ba tloditšwego bothopšeng bja moya e le gore ba kgone go šomela go tsošološa borapedi bjo bo sekilego. Batho bao ba botegago ba ile ba šegofatšwa ka paradeise e humilego ya moya, tšhemo ya seswantšhetšo ya Edene. (Jesaya 11:6-9; 35:1-7) Go se go ye kae ge Modimo a fediša manaba a gagwe, lefase ka moka le tla fetošwa paradeise ya kgonthe, go fo etša ge Jesu a ile a holofetša modiradibe koteng ya tlhokofatšo.​—Luka 23:43.

Tlhohlo go Manaba a Isiraele

22. Jehofa o hlohla ditšhaba gape ka mantšu afe?

²² Jehofa bjale o boela phenkgišanong ya gagwe le ditšhaba le medimo ya tšona ya diswantšho ka gore: “Tlišang dikxang tša lena! Ó r’yalo Morêna. Le bitšê dihlatse tša lena! Ó r’yalo Yêna Kxoši ya Isiraele. A ba re botšeng ba re hlalosetšê tše di tl’o xo dirêxa, ba re hlathollêlê le modirêxêlô wa tša kxalê, re di hlaloxanyê mo di feletšexo, xoba re kwê tše di tl’o xo tla. Re botšeng ma-tla-ka-mosô, re tsebê xe Le le medimo; dirang se botse, xoba Le dirê se sebe, re di bônê bohle re tlabêxê. Ka kxonthe, xa Le selô, le medirô ya lena e fo ba lefêla; Le ratwa ke dilaloxi.” (Jesaya 41:21-24) Na medimo ya ditšhaba e kgona go porofeta ka mo go nepagetšego gomme ka go rialo ya hlatsela gore e na le tsebo e phagametšego ya batho? Ge e ba e dira bjalo, ruri go swanetše go ba le mafelelo a itšego, e ka ba a mabotse goba a mabe bakeng sa go thekga dipolelo tša yona. Lega go le bjalo, ge e le gabotse medimo ya diswantšho ga e kgone go dira selo le ge e le sefe gomme e swana feela le ge e se gona.

23. Ke ka baka la’ng Jehofa ka baporofeta ba gagwe a ile a sola medimo ya diswantšho ka tsela e phegelelago gakaakaa?

²³ Ba bangwe mehleng ya rena mo gongwe ba ipotšiša lebaka leo ka lona Jehofa ka Jesaya le baporofeta-gotee le yena a dirišago nako e ntši gakaakaa a sola bošilo bja borapedi bja medimo ya diswantšho. Go hloka mohola ga medimo ya diswantšho yeo e dirilwego ke motho go ka bonala go le molaleng go ba bantši lehono. Lega go le bjalo, ge feela tshepedišo ya maaka ya tumelo e hlomilwe gomme e amogetšwe ka gohle, gona go thata go e tumola menaganong ya bao ba e dumelago. Ditumelo tše dintši tša mehleng yeno ke tšeo di se nago tlhaologanyo go etša go dumela gore diswantšho tšeo di sa phelego ke medimo e le ka kgonthe. Lega go le bjalo, batho ba kgomarela ditumelo tše bjalo go sa šetšwe dipolelo tše di kgodišago malebana le tšona. Ke feela ka go kwa therešo leboelela moo ba bangwe ba tutueletšegago go bona bohlale bja go bota Jehofa.

24, 25. Jehofa o šupa Korese gape bjang, gomme se se re gopotša boporofeta bofe bjo bongwe?

²⁴ Jehofa o šupa Korese gape ka gore: “Ke tsošitše Mo-tšwa-Leboa; ó tlo tla à e-tšwa Bohlabatšatši; ó rapêla ’ina la-ka. Babuši ó tlo ba xataka byalo ka leraxa, bo-ka mmopi xe a kxabaxanya letsopa.” (Jesaya 41:25)d Go fapana le medimo ya ditšhaba, Jehofa a ka phethagatša dilo. Ge a tliša Korese go tšwa bohlabela, a e-tšwa “bohlabatšatši,” Modimo o tla bontšha bokgoni bja gagwe bja go bolelela bokamoso pele le go bo tutuetša e le gore a phethagatše polelelo-pele ya gagwe.

²⁵ Mantšu a a re gopotša tlhaloso ya boporofeta ya moapostola Johane mabapi le dikgoši tšeo di bego di tla hlohleletšwa go gata mogato mehleng ya rena. Go Kutollo 16:12, re bala gore “dikxoši tša Bohlabêla” di tla lokišetšwa tsela. Dikgoši tše ga se tše dingwe ge e se Jehofa Modimo le Jesu Kriste. Go fo etša ge Korese a ile a phološa batho ba Modimo nakong e fetilego, dikgoši tše tše matla ka go fetišiša di tla fediša manaba a Jehofa gomme tša diša batho ba gagwe go feta masetla-pelong a magolo go tsena lefaseng le lefsa la go loka.​—Psalme 2:8, 9; 2 Petro 3:13; Kutollo 7:14-17.

Jehofa ke yo a Phagamego!

26. Jehofa ga bjale o rotoša potšišo efe, gomme na e a arabja?

²⁶ Gape, Jehofa o tsebatša therešo ya gore ke yena a nnoši e lego Modimo wa therešo. O botšiša ka gore: “Ké mang e a di kwaditšexo mathomong, ra di tseba di s’e-tla? Ra tlo re ó rerešitše? Fêla, xo be xo se sexoeledi, xò se mo-tliša-fokô; le a kwilexo Lè bolêla xa a xôna.” (Jesaya 41:26) Ga go na modimo wa seswantšho wo o tsebišitšego go tla ga mofenyi wa go lokolla bao ba o botago. Medimo e bjalo ka moka ga e phele, ga e bolele. Ga se medimo le gatee.

27, 28. Ke therešo efe e bohlokwa yeo e gatelelwago ditemaneng tša mafelelo tša Jesaya 41, gomme ke bomang feela bao ba tsebatšago se?

²⁷ Ka morago ga go bega mantšu a a tutuetšago a boporofeta a Jehofa, Jesaya o gatelela therešo ya bohlokwa ka gore: “Ké Nna ke thomilexo xo bolela fá Tsione ka re: Bônang, ši-dio! Motse wa Jerusalêma ka o nea sexoeledi sa tše botse. Ke be ke lebeletše, xwa se bê le motho; mo xo bôná xwa se bê le moeletši yo nkaxo mmotšiša ’me a mpotša taba. Ka kxonthe, ka moka xa bôná ké mafêla, le medirô ya bôná xa se ya selô, le diswanthšô tša bôná ké môya fêla, xa se selô.”​—Jesaya 41:27-29.

²⁸ Jehofa ke wa pele. O phagame! Ke Modimo wa therešo, yo a tsebišago phološo ya batho ba gagwe le yo a ba tlišetšago ditaba tše dibotse. Le gona ke Dihlatse tša gagwe di nnoši tšeo di tsebatšago bogolo bja gagwe ditšhabeng. Ka tsela e kwerago, Jehofa o sola bao ba botago borapedi bja medimo ya diswantšho, e bile o phaela diswantšho tša bona ka thoko e le ‘moya feela, e se selo.’ A lebaka le matla gakaakang la go kgomarela go Modimo wa therešo! Ke Jehofa a nnoši yo re swanetšego go mmota ka mo go kgodišegilego.

[Mengwalo ya ka tlase]

[Caption on page 19]

Korese, gaešita le ge e be e le moheitene, o kgethetšwe go dira modiro wa Modimo

[Caption on page 21]

Ditšhaba di bota medimo ya diswantšho yeo e sa phelego

[Caption on page 27]

Isiraele, go swana le “sefolô,” e tla ‘pšhatlaganya dithaba’