21. Ke dipotšišo dife tšeo di rotošwago ke go hlohla ga Jehofa medimo ya ditšhaba?

²¹ Ka gona, Jehofa o bolela eka o bolela le kgoro ya tsheko gomme o re: “Ba-ntlê bohle a ba kxobokanê, xo bothwê ba merafô. . . . ba nthše dihlatse tša bôná, ba rerešê re ba kwê; ba kxônê xo thwe ba boletše taba-taba.” (Jesaya 43:9) Ye ke tlhohlo e lebanyago go medimo ya ditšhaba. Na go na lege e le ofe wa yona wo o ka bolelago seo bokamoso bo se huperego? Na e be e kgona go dira se nakong e fetilego? Na e ka hwetša lege e le mang yo a ka neago bohlatse ka mabaka a tiilego gore medimo e bjalo e ipontšhitše e le ya therešo, yeo e swanelwago ke gore re e bote? Ke pego efe yeo medimo ya ditšhaba le balatedi ba yona ba e tšweleditšego mehleng ya rena? Na e bile e kaone go feta seo se tšweleditšwego ke medimo ya ba-Egipita ba mehleng ya kgale, ba-Asiria le ya ba-Babele? Ka lehlakoreng le lengwe, na bao ba hlatselago Jehofa ba tšweleditše bohlatse bjo tiilego bja gore Jehofa ke Modimo wa therešo, yo a swanelwago ke go rapelwa a Nnoši? Sehlogo se latelago se tla bolela ka ditaba tše.

Go Hlohlwa ga Medimo e Mengwe

3. Ke go hlohla gofe moo Jehofa a go tšweletšago go medimo e mengwe ka moka ga yona?

³ Jehofa o buduletše Jesaya gore a ngwale go hlohlwa mo ga medimo e mengwe ka moka: “Ke mang gare ga bona [medimo ya ditšhaba le batho] yo a ka bolelago tše [boporofeta bjo nepilego]? Goba na ba ka re kweša dilo tša pele [tšeo di tlago go direga nakong e tlago]? Anke ba [e le medimo] tšweletše dihlatse tša bona, e le gore ba [e le medimo] ka bolelwa gore ba lokile, goba anke ba [batho ba ditšhaba] kwe gomme ba re, ‘Ke therešo!’” (Jesaya 43:9, NW) Ka gona Jehofa o hlohla medimo ka moka yeo batho ba e rapelago gore e ipontšhe gore ke yona medimo. Dihlatse tša yona di swanetše go tšweletša bohlatse bja gore medimo ya bona e a botega le gore e swanelwa ke go rapelwa.