Lerato le Matla go Fetiša la Mma

DITEIŠENENG tša tseleng ya ka tlase ga mmu, dintlwaneng tša ka thoko tša batho bohle goba ditarateng tša leema-ema, bo-mma ba lahla masea a bona a sa tšwago go belegwa. Ka dinako tše dingwe, barwadi ba matlakala ba hwetša bana ba banyenyane gaešita le ka gare ga maleke a matlakala, ba lapišitšwe ke go llela bo-mmago bona. Go ya ka O Estado de S. Paulo “ditiragalo tša bana bao ba lahlilwego ditarateng di a oketšega.” Ee, mma yo mofsa a ka itshola ka phetho ya gagwe ka morago. Lega go le bjalo, o tšwela pele gaešita le ge seo se ka lobiša ngwana bophelo bja gagwe.

Mo gongwe o ka ipotšiša gore, ‘Go tla bjang gore mma a be a nagane ka go lahla ngwana wa gagwe a mo lahlela bokamosong bjo bo sa kgonthišetšwago?’ Beibele e šomiša boemo bjo bjalo bjo bo nyamišago bja ditaba e le tshwantšhišo bakeng sa go nea phapano e kgolo ya maikwelo a Mmopi wa rena ka bao e lego ba gagwe: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?—Le xe yêna a ka lebala, Nna nka se Xo lebale.”—Jesaya 49:15.

Ka kgonthe, go feta mma le ge e le ofe wa motho, Modimo o na le lerato le tseneletšego ka rena e bile o bontšha go kgomega ka dinyakwa tša rena. Go sa šetšwe gore o motho yo mofsa goba yo a godilego, ga o noši bothateng le ge e le bofe bjo o ka lebeletšanago le bjona. Mmopi wa gago o nyaka go go thuša e bile o kgomega ka katlego ya gago. Go ya ka mantšu a mopsalme, “xobane tate le mmê bôná ba ntloxetše; ’me Wêna Morêna O a nkamoxela.”—Psalme 27:10.

Lefaseng ka bophara dimakasine tša Morokami le Phafoga! di gatišwa bakeng sa go nea tsebo ka “Modimo a nnoši wa therešo,” Jehofa le Morwa wa gagwe Jesu Kriste, e lego yeo e ka bolelago bophelo bjo bo sa felego go bao ba e monyago ka tebogo.—Johane 17:3.