Diriša Tokologo ya Gago ya Bokriste ka Bohlale

“Le xe Le le bahunoloxi, . . . Le bônalê xore Le bahlanka ba Modimo.”​—1 PETRO 2:16.

1. Ke tokologo efe yeo Adama a ilego a lahlegelwa ke yona, gomme Jehofa o tla bušetša batho tokologong efe?

NAKONG ya ge batswadi ba rena ba pele ba be ba dira sebe kua tšhemong ya Edene, ba ile ba timeletša bana ba bona lefa la legolo kudu​—tokologo sebeng le tshenyegong. Ka baka leo, ka moka ga rena re belegwe re le makgoba a tshenyego le lehu. Lega go le bjalo, ka mo go thabišago, Jehofa o rerile go bušetša batho ba botegago tokologong e kgahlišago. Lehono, batho ba dipelo tše botse ba letetše ka go fagahla “kutollô . . . ya bana [“barwa,” NW] ba Modimo,” yeo ka yona ba tlago go “hunollwa bohlankeng bya thsenyêxô, [ba] bê le tokoloxô ya xe bana ba Modimo bà e-ya letaxong.”​—Ba-Roma 8:​19-21.

‘Go Tlotšwa Bakeng sa Boboledi’

2, 3. (a) ‘Barwa ba Modimo’ ke bomang? (b) Ba na le boemo bofe bjo bo kgahlišago, gomme bo tliša boikarabelo bofe?

² ‘Barwa ba ba Modimo’ ke bomang? Ke banababo Jesu bao ba tloditšwego ka moya bao e tlago go ba babuši-gotee le yena Mmušong wa legodimo. Ba pele ba ba ba tšweletše lekgolong la pele la nywaga C.E. Ba ile ba amogela therešo e hunollago yeo Jesu a bego a e ruta, gomme ka Pentekoste ya 33 C.E., ba ile ba ba le karolo ditokelong tša lethabo tšeo Petro a boletšego ka tšona ge a be a ba ngwalela gore: “Le moloko wo o hlaotšwexo, Le boperisita bya boxoši, Le sethšaba se sekxêthwa, Le selete se Yêna e lexo Mong wa sôna.”​—1 Petro 2:9a; Johane 8:32.

³ Go ba setšhaba sa Modimo se se kgethegilego ke tšhegofatšo e kgahlišago gakaakang! Le gona mašaledi a mehleng ya lehono a ­barwa ba ba tloditšwego ba Modimo a na le boemo bjo bo swanago bjo bo šegofetšego pele ga Modimo. Eupja tokelo e bjalo e phagamego e sepedišana le boikarabelo. Petro o lebiša tlhokomelo go bjo bongwe bja maikarabelo a, ge a tšwela pele ka gore: “Le tsebatšê mabothakxa a Eo a Le biditšexo Lé le lefsifsing, a Le biletša seetšeng sa xaxwe se se tlabaxo.”​—1 Petro 2:9b.

4. Bakriste ba tloditšwego ba phethagaditše bjang boikarabelo bja bona bjo bo tlišwago ke tokologo ya bona ya Bokriste?

⁴ Na Bakriste ba tloditšwego ba phethagaditše boikarabelo bjo bja go bolela mabothakga a Modimo ka gohle? Ee. Ge a bolela ka tsela ya boporofeta ka batlotšwa ga e sa le go tloga ka 1919, Jesaya o itše: “Môya wa Morêna Mong’a bohle o mo xo nna, xobane Morêna ó mpeetše [“o ntloleditše,” NW] xo bexêla babôtlana ’taba tše di botse; O nthometše xo alafa ba dipelo tše robexilexo, xore ba ba thopilwexo ke ba xoêlêlê khunoloxô, ke xoêlêlê ba ba tlemilwexo xo xololwa, ke xoêlêlê ngwaxa wa kxahlêxô wa Morêna, le ’tšatši la tefetšô ya Modimo wa rena.” (Jesaya 61:​1, 2) Lehono, mašaledi a tloditšwego ka go latela mohlala wa Jesu yoo lengwalo le le šomago go yena ka mo go kgethegilego, ba tsebatša ditaba tše di botse tša tokologo go ba bangwe ka phišego.​—Mateo 4:​23-25; Luka 4:​14-21.

5, 6. (a) Ke’ng seo se tšweleditšwego ke boboledi bjo mafolofolo bja Bakriste ba tloditšwego? (b) Ke ditokelo dife le maikarabelo tšeo ba lešaba le legolo ba nago le tšona?

⁵ Ka baka la boboledi bja bona bja phišego, lešaba le legolo la dinku tše dingwe le tšweletše ponagalong ya lefase mehleng ye ya bofelo. Ba tšwile ditšhabeng ka moka gore ba tle ba tlatše batlotšwa go hlankeleng Jehofa, gomme le bona therešo e ba lokolotše. (Sakaria 8:​23; Johane 10:​16) Go swana le Aborahama ba bolelwa e le ba ba lokilego motheong wa tumelo gomme ba tsena tswalanong ya kgaufsi le Jehofa Modimo. Gape ka go swana le Rahaba go bolelwa ga bona e le ba lokilego go ba bea boemong bja go tlo phologa​—tabeng ya bona e le go phologa Haramagedone. (Jakobo 2:​23-25; Kutollo 16:​14, 16) Eupja tokelo e bjalo e phagamego e akaretša boikarabelo bja go botša ba bangwe ka letago la Modimo. Ke ka baka leo Johane a ba bonego ba tumiša Jehofa phatlalatša, “ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, [le] xa Kwana.”​—Kutollo 7:​9, 10, 14.

⁶ Ngwagola lešaba le legolo leo ga bjale le lego ka godimo ga dimilione tše nne, gotee le sehlotswana se senyenyane se se šetšego sa Bakriste ba tloditšwego, ba dirišitše mo e nyakilego e ka ba diiri tše dimilione tše sekete ba bolela mabothakga a Jehofa ka gohle. Ye e bile tsela e botse kudu ya go diriša tokologo ya bona ya moya.

“Neang Kgoši Kgodišo”

7, 8. Tokologo ya Bokriste e akaretša boikarabelo bofe malebana le babuši ba lefase, gomme ke kgopolo efe e fošagetšego yeo re swanetšego go e phema go se?

⁷ Tokologo ya rena ya Bokriste e akaretša maikarabelo a mangwe. Petro o ile a bolela ka a mangwe ge a be a ngwala gore: “Godišang batho ka moka, ratang banababo lena, boifang Modimo, neang kgoši kgodišo.” (1 Petro 2:​17, PK) Ke’ng seo se bolelwago ke polelwana “neang kgoši kgodišo”?

⁸ “Kgoši” e emela babuši ba lefase. Lehono, moya wa go se hlomphe taolo o tšweletše lefaseng, gomme moya wo o ka kgoma Bakriste gabonolo. Mokriste mo gongwe a ka ipotšiša gore ke ka baka la’ng a swanetše go godiša “kgoši,” ka ge “lefase ka moka le rapaletše bobeng.” (1 Johane 5:​19) Ka baka la mantšu a, mo gongwe a ka ikwa a lokologile go se kwe melao yeo e sa mo neego boiketlo le go se ntšhe motšhelo ge e ba a ka kgona go atlega go seo. Eupja se se tla thulana le taelo e kwagalago ya Jesu ya go ‘ntšhetša Kesara tše e lego tša Kesara.’ Ge e le gabotse e tla be e le ‘go dira bohunologi bja gagwe seapešo sa bobe.’​—Mateo 22:​21; 1 Petro 2:16.

9. Ke mabaka afe a mabotse a mabedi ao a lego gona a go kwa babuši ba lefase?

⁹ Bakriste ba tlamega go godiša babuši le go ikokobeletša bona​—gaešita lege e le ka tsela e lekanyeditšwego. (Ditiro 5:​29) Ka baka la’ng? Go 1 Petro 2:​14, 15 (NW), Petro o bontšha mabaka a mararo ge a bolela gore babuši ke “ba ba romilwego ke [Modimo] go otla basenyi eupja ba rete bao ba dirago botse.” Go boifa kotlo ke lebaka le le kwagalago la go kwa babuši. E be e tla ba kgobogo e kaakang gore o mongwe wa Dihlatse tša Jehofa a otlwe goba a golegwe ka baka la tlhaselo, bohodu goba bosenyi bjo bongwe! Akanya kamoo ba bangwe ba bego ba tla thabela ka gona go phatlalatša selo se se bjalo! Ka lehlakoreng le lengwe, ge re dutše re aga botumo bjo bobotse bja go kwa melao ya selegae, re hwetša tumišo go balaodi bao ba nago le kgopolo e bulegilego. Mo gongwe re ka newa tokologo e oketšegilego ya go tšwela pele ka modiro wa rena wa boboledi bja ditaba tše di lokilego. Le gona, ‘ka go dira botse re thiba melomo ya batho ba mašilo, ba go se tsebe.’ (1 Petro 2:​15b) Le ke lebaka la bobedi la go kwa babuši.​—Ba-Roma 13:3.

10. Lebaka le matla kudu la go kwa babuši ba lefase ke lefe?

¹⁰ Eupja go na le lebaka le matla kudu. Babuši ba gona ka tumelelo ya Jehofa. Go etša ge Petro a bolela, babuši ba bopolitiki ba ‘romilwe ke’ Jehofa gomme ke “se Modimo a se rataxo” gore Bakriste ba dule ba ikokobeletša bona. (1 Petro 2:​15a) Ka mo go swanago, moapo-​stola Paulo o re: “Mmušô wo o lexo xôna o beilwe ke Modimo.” Ka gona, letswalo la rena leo le tlwaeditšwego ka Beibele le re tutuetša gore re kwe babuši. Ge e ba re gana go ikokobeletša bona, gona re “lwa le molaô wa Modimo.” (Ba-Roma 13:​1, 2, 5) Ke mang mo gare ga rena yo a ka ratago go ganetšana le thulaganyo ya Modimo ka boomo? Seo e be e tla ba go dirišwa gampe gakaakang ga tokologo ya Bokriste!

‘Ratang Banababo Lena’

11, 12. (a) Ke boikarabelo bofe mabapi le badumedi-gotee le rena bjo bo tlišwago ke tokologo ya rena ya Bokriste? (b) Ke bomang bao ka mo go kgethegilego ba swanelwago ke tlhokomelo ya rena e lerato, gomme ka baka la’ng?

¹¹ Petro gape o boletše gore Bakriste ba swanetše go ‘rata mokgatlo ka moka wa barwarre.’ (1 Petro 2:​17, NW) Bjo ke boikarabelo bjo bongwe bjo bo tlišwago ke tokologo ya Bokriste. Bontši bja rena re ditho tša phuthego. Ka kgonthe, ka moka ga rena re karolo ya mokgatlo wa ditšhaba-tšhaba goba thulaganyo ya ­barwarre. Go bontšha lerato go bona ke go dirišwa ga tokologo ya rena ka bohlale.​—Johane 15:​12, 13.

¹² Moapostola Paulo o ile a hlaola sehlopha sa Bakriste bao ka mo go kgethegilego re swanetšego go ba rata. O itše: “Kwang baruti [“bao ba etelelago pele,” NW] ba lena, Le laiwê ke bôná, xobane ba diša meôya ya lena; xobane ba tlo sekišwa se ba Le dirilexo sôna. Ba kweng, xore ba dirê bà thabile, e sexo ka diphêxêlô; xobane xo ba diriša ka mokxwa woo xo ka se Le hole selô.” (Ba-Hebere 13:​17) Bao ba etelelago pele ka phuthegong ke bagolo. Ke therešo gore banna ba ga se ba phethega. Lega go le bjalo, ba kgethilwe ka tlase ga tlhahlo ya Sehlopha se Bušago. Ba etelela pele ka mohlala le ka go bontšha go naganela, gomme ba abetšwe go hlapetša meoya ya rena. A kabelo e boima gakaakang! (Ba-Hebere 13:7) Ka mo go thabišago, diphuthego tše dintši di na le moya o mobotse wa tirišano, gomme ke lethabo go bagolo go šoma le tšona. Go thata kudu ge batho ba sa rate go ba le tirišano. Mogolo o sa dutše a dira modiro wa gagwe, eupja go etša ge Paulo a bolela, o o dira ka “diphêxêlô.” Ka ntle le pelaelo, ga re nyake go dira gore bagolo ba fegelwe! Re nyaka gore ba hwetše lethabo modirong wa bona e le gore ba ka re aga.

13. Ditsela tše dingwe tšeo ka tšona re ka dirišanago le bagolo ke dife?

¹³ Ke ditsela dife tše dingwe tšeo ka tšona re ka dirišanago le bagolo? E nngwe ke go thuša ka go hlokomela le go hlwekiša Holo ya Mmušo. E nngwe ke ka go ba le tirišano modirong wa go etela ba babjago le go thuša ba golofetšego. Go oketša moo, re ka katanela go dula re tiile moyeng, e le gore re se ke ra ba morwalo. Karolo ya bohlokwa ya tirišano ya rena ke go kgomarela bohlweki bja boitshwaro le bja moya bja phuthego, bobedi ka boitshwaro bja rena ka noši le ka go bega ditaba lege e le dife tša sebe se segolo tšeo re tsebilego ka tšona.

14. Re swanetše go swarišana bjang le mogato wa kgalemelo wo o tšewago ke bagolo?

¹⁴ E le gore ba boloke phuthego e hlwekile, bagolo ka dinako tše dingwe ba swanelwa ke go kgaola bafoši bao ba sa itsholego. (1 Ba-Korinthe 5:​1-5) Se se šireletša phuthego. Se ka ba sa thuša mofoši. Gantši, tayo e bjalo e thušitše mosenyi gore a boelwe ke tlhaloganyo ya gagwe. Lega go le bjalo, go thwe’ng ge e ba motho yo a kgaotšwego e le mogwera wa kgaufsi goba e le wa leloko? A re re mohlomongwe motho yoo ke tate goba mma goba morwa goba morwedi wa rena. Na re hlompha mogato o tšewago ke bagolo go sa šetšwe seo? Ke therešo gore go ka ba thata. Eupja e be e tla ba go dirišwa gampe gakaakang ga tokologo ya rena go belaela phetho ya bagolo le go tšwela pele re gwerana ka tsela ya moya le motho yo a ipontšhitšego gore ke tutuetšo e senyago ka phuthegong! (2 Johane 10, 11) Batho ba Jehofa ka kakaretšo ba swanetše go retwa ka baka la tsela yeo ka yona ba bago le tirišano ditabeng tše bjalo. Ka baka leo, phuthego ya Jehofa e dula e sa šilafatšwa lefaseng le leo le sa hlwekago.​—Jakobo 1:27.

15. Ge e ba motho a dira sebe se segolo, ke’ng seo a swanetšego go se dira gatee-tee?

¹⁵ Go thwe’ng ge e ba rena re dira sebe se segolo? Kgoši Dafida o hlalositše bao Jehofa a ba amogelago ge a be a re: “Thabeng ya Morêna xo tlo namêla mang? Ké mang wa xo tlo êma felô xokxêthwa? Ké wa diatla tše di se naxo bosodi, wa pelo-thsekexi, wa pelo e sa dumexo tša lefêla, a sa enexo maaká.” (Psalme 24:​3, 4) Ge e ba ka lebaka le itšego re se sa hlwa ‘re e-na le diatla tše se nago bosodi le pelo e sekilego,’ gona re swanetše go gata mogato ka go akgofa. Bophelo bja rena bjo bo sa felego bo kotsing.

16, 17. Ke ka baka la’ng motho yo a nago le molato wa go dira dibe tše dikgolo a se a swanela go leka go rarolla taba ka boyena?

¹⁶ Ba bangwe ba ile ba lekwa gore ba ute dibe tše šoro mohlomongwe ba nagana gore: ‘Ke ipobotše go Jehofa gomme ke sokologile. Ka gona ke ka baka la’ng ke swanetše go tsenya bagolo?’ Mofoši mo gongwe a ka lewa ke dihlong goba a tšhoga seo bagolo mo gongwe ba ka se dirago. Lega go le bjalo, gaešita lege e le Jehofa a nnoši yo a ka re hlwekišago sebe, O dirile gore bagolo e be ba ikarabelago kudu ka tshekego ya phuthego. (Psalme 51:2) Ba gona bakeng sa go fodiša, bakeng sa ‘gore bakgethwa ba lokišwe.’ (Ba-Efeso 4:​12, PK) Go se ye go bona ge re nyaka thušo ya moya go swana le go se ye ngakeng nakong ya ge re babja.

¹⁷ Ba bangwe bao ba lekago go rarolla ditaba ba le noši ba hwetša gore dikgwedi goba nywaga ka morago, letswalo la bona le sa dutše le ba tshwenya o šoro. Se sebe le go feta, ba bangwe bao ba utago phošo e kgolo ba wela sebeng ka lekga la bobedi gaešita le ka lekga la boraro. Nakong ya ge taba mafelelong e kwagala go bagolo, e ba e šetše e le taba ya phošo e boeleditšwego. Go kaone kudu gakaakang go latela keletšo ya Jakobo! O ngwadile gore: “Xe e mongwê wa lena a babya, a bitšê baxolo ba phuthêxô, ba tlê ba mo rapêlêlê bà mo tlodišê makhura Leineng la Morêna.” (Jakobo 5:​14) E-ya go bagolo ge e sa dutše e le nako ya go ka fola. Ge e ba re diega kudu, mo gongwe re ka retela tseleng ya sebe.​—Mmoledi 3:3; Jesaya 32:​1, 2.

Ponagalo le Boitapološo

18, 19. Ke ka baka la’ng moperisita a ile a bolela ka mo go kgahlišago ka Dihlatse tša Jehofa?

¹⁸ Nywaga e mehlano e fetilego, moperisita wa Katholika o ile a bolela gabotse ka Dihlatse tša Jehofa ka makasineng wa kereke.a O itše: “Nna ka bonna ke rata Dihlatse tša Jehofa; Ke dumela seo ka go se dika-dike. . . . Bao ke ba tsebago ke ba mekgwa e se nago bosodi, ba boleta . . . [le] ba tutuetšago kudu. Re tla kwešiša neng gore therešo e nyaka go neelwa ka tsela e amogelegago? Gore bao ba tsebatšago therešo ga ba swanela go ba ba pelo e sa felelago, ba nkgago ditšhila, ba hlakahlakanego, le ba aperego bošaedi?”

¹⁹ Go ya ka mantšu a, gare ga dilo tše dingwe moperisita o be a kgahlilwe ke tsela yeo Dihlatse di bego di apara ka yona le go itšweletša. Go molaleng gore bao a gahlanego le bona ba be ba theeditše keletšo yeo e neilwego ke “molaki e a bôtêxaxo yo bohlale” mo nywageng. (Mateo 24:​45) Beibele e bolela gore seaparo sa basadi e swanetše go ba ‘sa bothakga gomme ba itlhophe.’ (1 Timotheo 2:9, NW) Mehleng ye ya kgobogo ya boitshwaro, keletšo yeo ke ya bohlokwa le go banna. Na ga se mo go nago le tlhaloganyo gore baemedi ba Mmušo wa Modimo ba swanetše go itšweletša e le ba bothakga go batho ba ka ntle?

20. Ke ka baka la’ng Mokriste a swanetše go tshwenyega ka moaparo wa gagwe ka dinako ka moka?

²⁰ Ba bangwe ba ka dumela gore dibokeng le tirelong ya tšhemo ba swanetše go ela hlo-​ko tsela yeo ba aparago ka yona, eupja mo gongwe ba ka ikwa gore melao ya motheo ya Beibele ga e šome dinakong tše dingwe. Lega go le bjalo, na re tle re kgaotše go ba baemedi ba Mmušo wa Modimo? Ke therešo gore maemo a a fapa-fapana. Ge e ba re thuša go aga Holo ya Mmušo, re tla apara ka mo go fapanego le ge re e-ya sebokeng Holong yona yeo ya Mmušo. Ge re iketlile, go bonala re tla apara ka tsela ya go lokologa. Eupja neng le neng ge re bonwa ke ba bangwe, diaparo tša rena di swanetše go ba tše hlophilwego gabotse le tša bothakga.

21, 22. Re šireleditšwe bjang malebana le boitapološo bjo gobatšago, gomme re swanetše go lebelela bjang keletšo yeo e lego mabapi le ditaba tše bjalo?

²¹ Taba e nngwe yeo e ilego ya hlokomelwa kudu ke boitapološo. Batho​—kudu-kudu bafsa—​ba nyaka boitapološo. Ga se phošo goba go senya nako go rulaganya boitapološo bakeng sa lapa. Gaešita le Jesu o ile a laletša barutiwa ba gagwe gore ‘ba yo khutša ganyenyane.’ (Mareka 6:​31) Eupja hlokomela gore boitapološo bo se ke bja bula sekgoba sa tšhilafalo ya moya. Re phela lefaseng leo go lona boitapološo bo gatelelago boitshwaro bjo bo gobogilego bja botona le botshadi, bošoro bjo bo šiišago, bosehlogo le bonoge. (2 Timotheo 3:3; Kutollo 22:​15) Molaki yo a botegago le yo bohlale o phafogetše dikotsi tše bjalo gomme o re lemoša ka mehla malebana le tšona. Na o ikwa gore dikgopotšo tše ke go šitišana le tokologo ya gago? Goba na o leboga gore phuthego ya Jehofa ke e tshwenyegago kudu ka wena go ka go gopotša ka mehla ka dikotsi tše bjalo?​—Psalme 19:7; 119:95.

²² Le ka mohla o se ke wa lebala gore gaešita lege tokologo ya rena e e-tšwa go Jehofa, fela re ikarabela mabapi le kamoo re e dirišago ka gona. Ge e ba re hlokomologa keletšo e botse gomme re dira diphetho tše fošagetšego, re ka se ke ra bea motho o mongwe molato. Moapostola Paulo o re: “Motho mang le mang wa rena ó tlo iphetolêla pele xa Modimo.”​—Ba-Roma 14:​12; Ba-Hebere 4:13.

Letela Tokologo ya Bana ba Modimo ka Tetelo-kgolo

23. (a) Ge e le mabapi le tokologo, ke ditšhegofatšo dife tšeo mo nakong ye re nago le tšona? (b) Ke ditšhegofatšo dife tšeo re di letetšego ka phišego?

²³ Ka kgonthe re batho bao ba šegofetšego. Re lokolotšwe bodumeding bja maaka le tumela-khweleng. Ka baka la sehlabelo sa topollo, re ka kgona go batamela Jehofa ka letswalo le le hlwekilego, re lokologile ka tsela ya moya bohlankeng bja sebe le lehu. Le gona kapejana go tla tla “kutollô . . . ya bana [“barwa,” NW] ba Modimo.” Ka Haramagedone, banababo Jesu ba tla utollwa go batho e le bafediši ba manaba a Jehofa ba le letagong la bona la legodimong. (Ba-Roma 8:​19; 2 Ba-Thesalonika 1:​6-8; Kutollo 2:​26, 27) Ka morago ga moo, barwa ba ba Modimo ba tla utollwa e le mekero ya ditšhegofatšo tšeo di elago di e-tšwa sedulong sa bogoši sa Modimo di e-ya bathong. (Kutollo 22:​1-5) Mafelelong, go utollwa mo ga barwa ba Modimo go tla feleletša ka go šegofatšwa ga batho ba botegago ka tokologo ya letago ya bana ba Modimo. Na o hlologetšwe nako yeo? Gona diriša tokologo ya Bokriste ka bohlale. Hlankela Modimo mo nakong ye, gomme o tla thabela tokologo yeo e makatšago ya ka mo go sa felego!

[Mongwalo wa tlase]

Lepokisi la Tlhahlobo

◻ Batlotšwa le dinku tše dingwe ba tagafaditše Jehofa bjang?

◻ Ke ka baka la’ng Bakriste ba swane-​tše go godiša babuši ba lefase?

◻ Ke ka ditsela dife Bakriste ba ka dirišanago le bagolo?

◻ Ge e le mabapi le moaparo, ke ka baka la’ng Dihlatse tša Jehofa e le tše di fapanego le ba bantši lefaseng?

◻ Ke’ng seo re swanetšego go se phema ge go tliwa boitapološong?

[Seswantšho go letlakala 17]

Bagolo kudu-kudu ba swanetšwe ke lerato la rena le tirišano ya rena

[Seswantšho go letlakala 18]

Seaparo sa Mokriste se swanetše go ba se se hlophilwego gabotse le se se swanetšego maemo