Letšatši La Modimo La Tefetšo

BJALO ka ge re bone sehlogong se se fetilego, go na le mabaka a mantšinyana ao ka ona e lego mo go fošagetšego go rena go tsoma go itefeletša. Ke mo go fošagetšego ka gobane mafelelong ga go lokiše selo. Ke mo go fošagetšego ka gobane go tiiša bonaba go e na le go aga kgokagano ya bogwera. Le gona ke mo go fošagetšego ka gobane go gobatša motho yo a bolokago dikgopolo tša go itefeletša.

Lega go le bjalo, lebaka la bohlokwa kudu leo ka lona tefetšo ya motho e lego e fošagetšego le bonwa mantšung a Moše go Isiraele: “Morêna Modimo wa xaxo ké Modimo yo kxauxêlô.” (Doiteronomio 4:​31) Ka ge Modimo e le yo a gaugelago, le rena re swanetše go ba ba gaugelago go swana le yena. Jesu o boditše balatedi ba gagwe gore: “Bang baxauxedi bo-ka Tata-weno xe e le moxauxedi.”​—Luka 6:36.

Lega go le bjalo, Beibele gape e hlalosa Jehofa e le “Modimo-molefetši.” (Psalme 94:1) Moporofeta Jesaya o bolela ka “ngwaxa wa kxahlêxô wa Morêna” gape le “ ’tšatši la tefetšô ya Modimo wa rena.” (Jesaya 61:2) Modimo e ka ba bjang yo a gaugelago le yo a lefetšago? Le gona ge e ba re swanetše go ekiša kgaugelo a Modimo, ke ka baka la’ng re ka se ke ra mo ekiša ka go itefeletša?

Go araba potšišo ya pele, Modimo ke yo a gaugelago ka gobane a rata batho, gomme o lebalela kudu le ka nako e telele kamoo a ka kgonago ka gona e le gore a nee batho sebaka sa go lokiša ditsela tša bona. Ba bantši ka go swana le moapostola Paulo, ba ile ba diriša ka mo go holago kgaugelo ye. Eupja Modimo gape ke yo a lefeletšago​—ka kgopolo ya go nyaka toka—​ka gobane kgaugelo e bjalo e ka tšwela pele feela ka tekanyo e itšego ya nako. Ge ba bangwe ba bontšhitše gore ba ka se ke ba fetoša ditsela tša bona le ka mohla, Modimo o tla tliša kahlolo nakong ya seo se bitšwago letšatši la gagwe la tefetšo.

Go araba potšišo ya bobedi, aowa, ga re lokafatšwe ka go ba ba itefeletšago ka gobane Modimo a lefeletša. Jehofa ke yo a phethagetšego tokeng. Batho ga ba bjalo. Modimo o bona mahlakore ka moka a taba gomme ka mehla o dira diphetho tša toko. Re ka se ke ra botwa gore re tla dira se se swanago. Ke ka baka leo Paulo a eleditšego ka gore: “Baratwa ba-ka! Le se kê la itefeletša; šuthêlang boxale bya Modimo; xobane xo ngwadilwe xwa thwe: Tefetšô ké ya-ka, le kôtlô ké ya-ka, O r’yalo Morêna.” (Ba-Roma 12:​19) Ge e le rena re swanetše go tlogela tefetšo diatleng tša Jehofa.

Ke ka Baka La’ng go E-na le Letšatši la Tefetšo?

Lega go le bjalo, Beibele mafelong a mantši e dumela go nyakega ga go otla bafoši bao ba sa itsholego. Ka mohlala, moapostola Paulo o boletše e sa le pele gore Modimo “ba ba sa [mo] tsebexo, le ba ba sa kwexo Ebangedi ya Mong wa rena Jesu Kriste, ó tlo ba lefetša” ka Jesu. (2 Ba-Thesalonika 1:8) Re na le mabaka a mabotse a go tšeela mantšu ao godimo. Ka baka la’ng?

Lebaka le lengwe ke gore bontši lehono bo phegelela go nyatša bogoši bja Mmopi, ba hlokomologa melao ya gagwe ya go loka. Go sa šetšwe ge e ba ba bolela gore ba dumela Modimo goba go se bjalo, boitshwaro bja bona bo bontšha gabotse gore ga ba ikwe ba ikarebela pele ga Modimo. Mantšu a mopsalme a šoma go batho ba bjalo: “A yo mobe ó tlo fêla a Xo nyatša, Wene Modimo, a re: Xa O latišiše?” (Psalme 10:​13) Ka kgonthe, Jehofa a ka se ke a itumelela ka mo go sa felego a nyatšwa ka tsela ye. Gaešita lege e le Modimo wa lerato, gape ke Modimo wa toka. O tla kwa dillo tša bao ba tlogago ba kgomegile ka toka: “Morêna, nanoxa, O emišê letsôxô; se lebalê sešuana.”​—Psalme 10:12.

Go feta moo, batho bao ba nyatšago molao ba senya lefase lona le leo re phelago go lona. Ba šilafatša moya, naga le meetse; ba tlatša lefase ka go hloka toka le sehlogo. Gape ba kgobela dibetša tše lekanego tša khemikhale, tša nuclear le dibetša tše dingwe tšeo di beago go phologa ga motho kotsing. Go tsena ditaba gare ga Modimo go tloga go nyakega e le gore go kgonthišetšwe bokamoso bjo bo šireletšegilego bja batho bao ba kwago. (Kutollo 11:​18) Go tsena ditaba gare moo ke seo Jesaya a boletšego ka sona e le letšatši la tefetšo.

Ke’ng Seo Letšatši la Modimo la Tefetšo le Tlago go se Phetha?

Go ya ka Vine’s Expository Dictionary of Old and New Testament Words, Mangwalong a Segerika, lentšu tefetšo ge le dirišwa mabapi le Modimo, gabotse-botse le bolela “ ‘yeo e tšwago tokeng,’ e sego yeo e tšwago maikwelong a go kwa bohloko goba e tšwago feela maikwelong a go galefa bjalo ka ge gantši go le bjalo ka tefetšo ya motho.” Ka gona, tefetšo ya Modimo malebana le manaba a gagwe e ka se ke ya ba nako ya tšhollo ya madi yeo e sa laolegego, go swana le ntwa ya bonaba ya tšhollo ya madi ye motho a itwelago go yona. Beibele e re botša gore, “Jehofa o kgona go phološa batho ba boineelo go Modimo molekong, le go bolokela batho ba sa lokago letšatši la kahlolo gore ba fedišwe.”​—2 Petro 2:9, NW.

Bahlanka ba Modimo ba lebeletše pele letšatšing la Modimo la tefetšo e le nako yeo ka yona boitshwaro bjo bo nepagetšego bo tlago go godišwa gomme baloki ba phološwa kgatelelong ya ba kgopo. Se ga se bolele gore ke ba sehlogo goba ke bao ba nago le moya wa go itefeletša. Beibele e lemoša ka gore, “Mo-thabêla-kotsi a ka se hlôke kôtlô.” (Diema 17:5) Ka mo go fapanego, ba hlagolela kgaugelo le kwelobohloko, ba tlogelela Modimo diphetho lege e le dife mabapi le tefetšo.

Ke therešo gore ga go bonolo go batho ba ba galefilego go itshwara ka tsela ye. Eupja go a kgonega, gomme ba bantši ba dirile bjalo. Ka mohlala, Pedro o bile le nako e sa kgahlišego ya bjana gomme gantši o be a bethwa ke mogolo’agwe. Ka gona o ile a gola e le yo a nago le bošoro, gantši a e-ba le mathata le maphodisa gomme a phohlišetša bogale bja gagwe bja go galefela mogolo’agwe go mosadi wa gagwe le bana. Mafelelong, o ile a theetša o mongwe wa Dihlatse tša Jehofa gomme ka morago a ithuta Beibele. O a laodiša, “Ka thušo ya Jehofa, ke ile ka fetoga gomme ga bjale go e na le go lwa le batho, ke a ba thuša ke le mogolo wa Mokriste.” Ka thušo ya Beibele le moya o mokgethwa, ba bangwe ba bantši kudu ba fetogile ka mo go swanago go tloga boemong bja go ba bao nyatšago goba go itefeletša gomme ya ba bao ba bontšhago lerato le go se felele ba bangwe pelo.

O tla Dira’ng?

Go dula re gopola ka go tla ga letšatši la Modimo la tefetšo go tla re thuša gore re diriše ka mo go holago kgotlelelo ya Jehofa. Eupja sebaka sa go dira bjalo ga se seo se sa lekanyetšwago. Kapejana letšatši le tla fihla. Moapostola Petro o bontšhitše lebaka leo ka lona letšatši leo le sa hlwago le e-tla: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.”​—2 Petro 3:9.

Ka gona, ke mo go akgofilego go itokišetša gona bjale bakeng sa letšatši la Modimo la tefetšo ka go ithuta Mangwalo le go diriša keletšo ya ona. Se se tla re thuša go latela mantšu a mopsalme: “Lesa xo xalefa, O ilê lehlôyô; xe O ka selekêxa O tlo bá wa senya. Xobane ba babe ba tlo lôba; ba-leta-Morêna e tlo ba beng ba naxa.”​—Psalme 37:​8, 9.

[Seswantšho go letlakala 7]

Ka morago ga letšatši la tefetšo la Modimo, ‘bao ba botago Jehofa e tlo ba beng ba lefase’