Kgaolo 43

Motse o Phadimago

Pono 16—Kutollo 21:9–22:5

Taba: Go hlaloswa ga Jerusalema o Mofsa

Nako ya phethagatšo: Ka morago ga masetlapelo a magolo le go lahlelwa ga Sathane sekoting

1, 2. (a) Morongwa o iša Johane kae gore a bone Jerusalema o Mofsa, gomme re hlokomela selo sefe se se fapanego mo? (b) Ke ka baka la’ng se e le seremo se segolo sa Kutollo?

MORONGWA o be a išitše Johane lešokeng gore a mmontšhe Babilona o Mogolo. Bjale yo mongwe go tšwa sehlopheng sona seo sa barongwa o iša Johane thabeng e telele. A selo se se fapanego gakaakang seo a se bonago! Mo ga se motse o šilafetšego wa boitshwaro bjo bobe go swana le Babilona ya mogweba-ka-mmele, eupša ke Jerusalema o Mofsa yeo e sekilego, ya moya le e kgethwa, gomme e fologa legodimong.—Kutollo 17:1, 5.

² Gaešita le Jerusalema ya lefaseng ga se ya ka ya ba le letago le bjalo ka le. Johane o re botša gore: “Gwa tla yo mongwe wa barongwa ba šupago bao ba bego ba swere merufsi e šupago yeo e bego e tletše dikotlo tše šupago tša mafelelo, a bolela le nna a re: ‘E-tla mo, ke tla go bontšha monyadiwa, mosadi wa Kwana.’ Ka gona, a nthwala ka matla a moya a nkiša thabeng e kgolo e telele, a mpontšha motse o mokgethwa wa Jerusalema o theoga o e-tšwa legodimong go Modimo o e-na le letago la Modimo.” (Kutollo 21:9-11a) Johane a le ntlheng ya thaba yeo e telele, o bona motse wo o mobotse le dilo tša wona ka moka tše di kgahlišago. Banna ba tumelo ba ile ba lebelela go tla ga wona ka phišego ga e sa le go tloga ge batho ba wela sebeng le lehung. Mafelelong ke wo o fihlile! (Baroma 8:19; 1 Bakorinthe 15:22, 23; Baheberu 11:39, 40) Ke motse o mobotse kudu wa moya o bopilwego ka babotegi ba 144 000, ke o phadimago ka letago la wona gomme o bonagatša lona letago la Jehofa. Se ke seremo se segolo sa Kutollo!

3. Johane o hlalosa bjang botse bja Jerusalema o Mofsa?

³ Jerusalema o Mofsa ke e makatšago kudu ka botse bja yona: “Go phadima ga wona go be go swana le lefsika le bohlokwa kudu, bjalo ka lefsika la jasepere le le phadimago ka mo go sekilego bjalo ka legakabje. O be o e-na le morako o mogolo o motelele le dikgoro tše lesome-pedi, gomme dikgorong go e-na le barongwa ba lesome-pedi, go tšona go ngwadilwe maina a ba meloko e lesome-pedi ya barwa ba Isiraele. Ka bohlabela go be go e-na le dikgoro tše tharo, ka leboa e le dikgoro tše tharo, ka borwa e le dikgoro tše tharo gomme ka bodikela e le dikgoro tše tharo. Morako wa motse le wona o be o e-na le mafsika a lesome-pedi a motheo, gomme go ona go e-na le maina a lesome-pedi a baapostola ba lesome-pedi ba Kwana.” (Kutollo 21:11b-14) Ke mo go swanelago gakaakang gore selo sa pele seo Johane a se bonego seo a se ngwalago ke letago le le phadimago! Jerusalema o Mofsa ka go thaba kudu bjalo ka monyadiwa o mofsa, e ba molekane yo a swanetšego go Kriste. E taga e le ka kgonthe ka ge e le seo se swanetšego bakeng sa tlholo ya “Tate wa dietša.”—Jakobo 1:17.

4. Ke’ng seo se bontšhago gore Jerusalema o Mofsa ga se setšhaba sa Isiraele sa nama?

⁴ Go ngwadilwe maina a meloko e 12 ya Isiraele dikgorong tša yona tše 12. Ka gona, motse wo wa seswantšhetšo o bopilwe ka ba 144 000 bao ba swailwego ba e-tšwa “molokong o mongwe le o mongwe wa barwa ba Isiraele.” (Kutollo 7:4-8) Ka go dumelelana le se, mafsika a motheo a motse wo a ngwadilwe maina a baapostola ba 12 ba Kwana. Ee, Jerusalema o Mofsa ga se setšhaba sa nama sa Isiraele seo se bego se theilwe ka barwa ba 12 ba Jakobo. Ke Isiraele ya moya yeo e theilwego godimo ga “baapostola le baporofeta.”—Baefeso 2:20.

5. Ke’ng seo se swantšhetšwago ke “morako o mogolo o motelele” wa Jerusalema o Mofsa le ke taba ya gore barongwa ba beilwe kgorong e nngwe le e nngwe?

⁵ Motse wo wa seswantšhetšo o na le morako o mogolo. Merako ya metse ya mehleng ya bogologolo e be e agelwa go e šireletša go manaba a yona. “Morako o mogolo o motelele” wa Jerusalema o Mofsa o bontšha gore e šireletšegile moyeng. Ga go na lenaba la toka le motho yo a šilafetšego goba yo a sa botegego, yo le ka mohla a tlago go kgona go tsena go yona. (Kutollo 21:27) Eupša go bao ba dumeletšwego go tsena motseng wo o mobotse, go bona go swana le go tsena Paradeiseng. (Kutollo 2:7) Ka morago ga go rakwa ga Adama, bakerubi ba ile ba bewa ka pele ga Paradeise ya mathomong gore ba thibele batho bao ba sego ba hlweka. (Genesi 3:24) Ka mo go swanago, barongwa ba beilwe kgorong e nngwe le e nngwe ya motse o mokgethwa wa Jerusalema go tiiša gore motse o šireletšegile moyeng. Ee, barongwa mehleng ye ya bofelo ba dutše ba dišitše phuthego ya Bakriste ba tloditšwego yeo e fetogago Jerusalema o Mofsa, gore e se ke ya šilafatšwa ke Babilona.—Mateo 13:41.

Go Ela Motse

6. (a) Johane o hlalosa bjang go elwa ga motse, gomme go elwa mo go bontšha’ng? (b) Ke’ng seo mo gongwe se ka hlalosago gore moelo o dirišitšwego e be e le “go ya ka kelo ya motho le ya morongwa ka nako e swanago”? (Bona mongwalo wa ka tlase.)

⁶ Johane o tšwetša pele taba ya gagwe ka gore: “Bjale yo a bego a bolela le nna o be a swere lehlaka la gauta la go ela, gore a ele motse le dikgoro tša wona le morako wa wona. Motse o na le mahlakore a mane a lekanago, botelele bja wona bo lekana le bophara bja wona. A ela motse ka lehlaka, wa ba diferelone tše dikete tše lesome-pedi; botelele bja wona le bophara bja wona le bophagamo bja wona di a lekana. Gape, a ela morako wa wona ya ba dikubiti tše lekgolo-masome-nne-nne, go ya ka kelo ya motho le ya morongwa ka nako e swanago.” (Kutollo 21:15-17) Ge sekgethwa sa tempele se be se elwa, se se ile sa tiiša go phethagala ga merero ya Jehofa mabapi le sona. (Kutollo 11:1) Bjale go ela ga morongwa Jerusalema o Mofsa go bontšha kamoo merero ya Jehofa e sa fetogego ka gona mabapi le motse wo wa letago.a

7. Ke’ng seo se makatšago ka meelo ya motse wo?

⁷ Wo ke motse o makatšago gakaakang! Ke cube (sebopego sa taese) e feletšego ya diferelone tše 12 000 (mo e ka bago dikhilomithara tše 2 220) ka perimeta, yeo e dikologilwego ke morako wa bophagamo bja dikubiti tše 144 goba dimithara tše 64. Ga go na motse wa kgonthe wo o ka bago le meelo e bjalo. O be o ka akaretša naga e kgolo go feta Isiraele ya mehleng yeno ga-14, gomme wa golela sebakeng-bakeng ka dikhilomithara tše di ka bago 560! Kutollo e neilwe ka dipontšho. Ka gona, meelo ye e re botša’ng ka Jerusalema o Mofsa wa legodimong?

8. Ke’ng seo se swantšhetšwago ke (a) merako ya motse ya bophagamo bja dikubiti tše 144? (b) moelo wa motse wa diferelone tše 12 000? (c) go ba ga motse ka sebopego sa cube e feletšego?

⁸ Merako ya bophagamo bja dikubiti tše 144 e re gopotša gore motse wo o dirilwe ka barwa ba Modimo ba tswetšwego ka moya ba 144 000. Palo 12 yeo e tšwelelago moelong wa diferelone tše 12 000 tša motse woo botelele bja wona, bophara le bophagamo bja wona di lekanago, e dirišitšwe ka mokgwa wa seswantšhetšo dithulaganyong tša mokgatlo boporofeteng bja Beibele. Ka gona, Jerusalema o Mofsa e rulagantšwe gabotse ka thulaganyo ya mokgatlo bakeng sa go phetha morero wa Modimo wa ka mo go sa felego. Jerusalema o Mofsa gotee le Kgoši Jesu Kriste, ke thulaganyo ya Mmušo ya Jehofa. Sebopego sa motse le sona se gona: ke cube e feletšego. Tempeleng ya Salomo, Sekgethwa-kgethwa seo se bego se e-na le selo seo se se swantšhetšago go ba gona ga Jehofa, e be e le cube e feletšego. (1 Dikxoši 6:19, 20) Ka gona, ke mo go swanelago gakaakang gore Jerusalema o Mofsa yeo e bonegelwago ke letago la Jehofa ka noši, e bonwa e le cube e feletšego e kgolo! Meelo ya yona ka moka e leka-lekane ka mo go phethagetšego. Ke motse wo o se nago bosodi goba diphošo.—Kutollo 21:22.

Dikago tše Bohlokwa

9. Johane o hlalosa bjang dikago tša motse?

⁹ Johane o iša tlhaloso ya gagwe pele ka gore: “Bjale moago wa morako e be e le jasepere, gomme wa motse e le gauta e sekilego go swana le galase e bonatšago. Metheo ya morako wa motse e be e kgabišitšwe ka mohuta o mongwe le o mongwe wa mafsika a bohlokwa: motheo wa pele e be e le jasepere, wa bobedi e le safire, wa boraro e le khalesedone, wa bone e le emeralede, wa bohlano e le saredonikisi, wa botshelela e le sarediase, wa bošupa e le kirisolite, wa seswai e le berile, wa senyane e le topase, wa lesome e le kirisoporase, wa lesome-tee e le haisinthe gomme wa lesome-pedi e le amethisete. Gape, dikgoro tše lesome-pedi e be e le diperela tše lesome-pedi; kgoro e nngwe le e nngwe e be e dirilwe ka perela e tee. Tsela e kgolo ya motse e be e le gauta e sekilego bjalo ka galase e bonatšago.”—Kutollo 21:18-21.

10. Ke’ng seo se swantšhetšwago ke taba ya gore motse wo o agilwe ka jasepere, gauta le ka “mohuta o mongwe le o mongwe wa mafsika a bohlokwa”?

¹⁰ Moago wa motse ke o phadimago e le ruri. Go e na le go bala ka dikago tše tlwaetšwego tša lefaseng tšeo di swanago le letsopa goba mafsika, re bala ka jasepere, gauta e sekišitšwego le “mohuta o mongwe le o mongwe wa mafsika a bohlokwa.” Dilo tše di tloga di swantšha gabotse dikago tša legodimong! Ga go na seo e bego e tla ba se sebotse kudu go di feta. Areka ya bogologolo ya kgwerano e be e manegilwe ka gauta e sekilego, gomme gauta gantši ka Beibeleng e emela dilo tše dibotse le tše bohlokwa. (Ekisodo 25:11; Diema 25:11; Jesaya 60:6, 17) Eupša Jerusalema o Mofsa ka moka gaešita le tsela ya yona e kgolo e agilwe ka “gauta e sekilego go swana le galase e bonatšago,” e lego go swantšha botse le bothakga bjo bo kgotsišago kudu.

11. Ke’ng seo se kgonthišago gore bao ba bopago Jerusalema o Mofsa ba tla phadima ka ge ba sekile e le ka kgonthe moyeng?

¹¹ Ga go na motološi wa gauta yo a ka kgonago go tšweletša gauta e sekilego bjalo. Eupša Jehofa ke Mohlwekiši o Mogolo. O dutše bjalo ka ‘moubedi wa go tološa thsipi-tshehla gore e tšwe ditšhila,’ gomme o hlwekiša ditho tše botegago tša Isiraele ya moya “bo-ka thsipi e khubedu le e thsêhla,” gomme o tloša ditšhila ka moka go bona. Ke feela batho bao ba hlwekišitšwego e le ka kgonthe bao mafelelong ba tlago go bopa Jerusalema o Mofsa, gomme Jehofa ka tsela ye o aga motse ka dikago tše di phelago tšeo di phadimago ka ge di sekile e le ka kgonthe moyeng.—Maleaki 3:3, 4.

12. Ke’ng seo se swantšhetšwago ke taba ya gore (a) metheo ya motse e thakgilwe ka mabje a bohlokwa a 12? (b) dikgoro tša motse ke diperela?

¹² Gaešita le metheo ya motse wo ke e mebotse yeo e thakgilwego ka mabje a bohlokwa a 12. Se se re gopotša ka moperisita yo mogolo wa bogologolo wa Mojuda, yo matšatšing a ge a be a le tirelong a bego a apara seaparo sa moperisita seo se kgomareditšwego mafsika a bohlokwa a sa swanego a 12, ao ka tsela e nngwe a bego a swana le ao a hlaloswago mo. (Ekisodo 28:15-21) Se e tloga e se go fo swana ga dilo ka mo go sa letelwago! Go e na le moo, se gatelela modiro wa boperisita wa Jerusalema o Mofsa yeo go yona Jesu, yena Moperisita yo Mogolo e lego “lebone.” (Kutollo 20:6; 21:23; Baheberu 8:1) Le gona ke ka Jerusalema o Mofsa moo mehola ya bodiredi bja Jesu e le Moperisita yo Mogolo e fetišetšwago bathong. (Kutollo 22:1, 2) Dikgoro tša motse tše 12 tšeo e nngwe le e nngwe e lego perela e botse kudu, di re gopotša ka seswantšho sa Jesu seo se swantšhitšego Mmušo le perela ya theko e kgolo. Ka moka bao ba tsenago ka dikgoro tšeo ba tla be ba bontšhitše tebogo ya kgonthe ya go leboga mehola ya moya.—Mateo 13:45, 46; bapiša le Jobo 28:12, 17, 18.

Motse wa Seetša

13. Johane o tšwela pele go bolela’ng mabapi le Jerusalema o Mofsa, gomme ke ka baka la’ng motse wo o sa nyake tempele le ge e le efe ya kgonthe?

¹³ Jerusalema mehleng ya Salomo e be e bušwa ke tempele e agilwego lefelong le le phagamego kudu la motse Thabeng ya Moria yeo e bego e le ka leboa. Eupša go thwe’ng ka Jerusalema o Mofsa? Johane o re: “Ga se ka bona tempele go wona gobane Jehofa Modimo Ra-matla-ohle ke tempele ya wona, le Kwana ke yona. Motse ga o nyake letšatši goba kgwedi go o bonegela, gobane letago la Modimo le be le o edišetša, gomme lebone la wona e be e le Kwana.” (Kutollo 21:22, 23) Ge e le gabotse, ga go nyakege gore go agiwe tempele ya kgonthe moo. Tempele ya bogologolo ya Bajuda e be e le fela seswantšhetšo, gomme selo sa kgonthe sa seswantšhetšo seo, e lego tempele e kgolo ya moya e bile gona go tloga ge Jehofa a be a tlotša Jesu gore e be Moperisita yo Mogolo ka 29 C.E. (Mateo 3:16, 17; Baheberu 9:11, 12, 23, 24) Le gona ka tempeleng go be go nyakega sehlopha sa baperisita seo se neago Jehofa dihlabelo legatong la batho. Eupša ka moka bao e lego karolo ya Jerusalema o Mofsa, ke baperisita. (Kutollo 20:6) Le gona sehlabelo se segolo seo e lego bophelo bjo bo phethagetšego bja Jesu e le motho, se neilwe gatee ya ba moka. (Baheberu 9:27, 28) Go feta moo, bohle bao ba dulago motseng wo ba kgona go bona Jehofa.

14. (a) Ke ka baka la’ng Jerusalema o Mofsa e sa nyake gore letšatši le kgwedi di e edišetše? (b) Boporofeta bja Jesaya bo ile bja bolela’ng e sa le pele mabapi le mokgatlo wa Jehofa wa legohle, gomme Jerusalema o Mofsa e akaretšwa bjang go se?

¹⁴ Ge letago la Jehofa le be le feta pele ga Moše Thabeng ya Sinai, le ile la dira gore sefahlego sa Moše se phadime kudu mo a ilego a ba a swanelwa ke go se fihlela Baisiraele-gotee le yena. (Ekisodo 34:4-7, 29, 30, 33) Ka gona, na o ka akanya ka go phadima ga motse woo o edišeditšwego sa ruri ke letago la Jehofa? Motse o bjalo o be o ka se ke wa ba le bošego. O be o ka se ke wa nyaka letšatši la kgonthe goba kgwedi ya kgonthe. O be o tla dula o le seetšeng. (Bapiša le 1 Timotheo 6:16.) Jerusalema o Mofsa e apareditšwe ke go phadima ga mohuta woo. Ee, monyadiwa yo gotee le Monyadi wa gagwe yo e lego Kgoši ba fetoga mošate wa mokgatlo wa Jehofa wa legohle, e lego “mosadi” wa gagwe, “Jerusalema wa godimo,” yeo Jesaya a ilego a porofeta mabapi le yona gore: “Letšatši le ka se hlwê lè e-ba sôna seetša sa xaxo mosexare, le kxwedi e ka se hlwê e e-ba xôna xo bônêxa. E a tl’o xo ba seedi sa xaxo sa neng le neng ké Yêna Morêna; Yêna Modimo wa xaxo e tlo ba Yêna letaxô la xaxo. Letšatši la xaxo le ka se sa dikêla; ngwedi wa xaxo xa o sa tlo hwa; xobane seetša sa xaxo sa neng le neng e tlo ba Yêna Morêna; xobane matšatši a dillô tša xaxo a tlo ba a fetile.”—Jesaya 60:1, 19, 20; Bagalatia 4:26.

Seetša sa Ditšhaba

15. Ke mantšu afe a Kutollo ka Jerusalema o Mofsa ao a swanago le boporofeta bja Jesaya?

¹⁵ Boporofeta bjona bjo bo bile bo boletše e sa le pele gore: “Ba-ntlê ba tlo tla seetšeng sa xaxo, le dikxoši di tlo tlêla ’etša sa masa a xaxo.” (Jesaya 60:3) Kutollo e bontšha gore mantšu a a tla akaretša Jerusalema o Mofsa ge e re: “Ditšhaba di tla sepela ka seetša sa wona, gomme dikgoši tša lefase di tla tliša letago la tšona go wona. Dikgoro tša wona di ka se ke tša tswalelwa le gatee mosegare, gobane bošego bo ka se ke bja ba gona moo. Di tla tliša letago le kgodišo ya ditšhaba go wona.”—Kutollo 21:24-26.

16. “Ditšhaba” tšeo di tlago go sepela seetšeng sa Jerusalema o Mofsa ke bomang?

¹⁶ “Ditšhaba” tše tšeo di sepelago seetšeng sa Jerusalema o Mofsa ke bomang? Ke batho bao e kilego ya ba karolo ya ditšhaba tša lefase le le lebe, bao ba amogelago seetša se se hlabišwago ke motse wo wa letago wa legodimong. Ba pele bao ba lego gare ga bona, ke lešaba le legolo leo le šetšego le tšwile “ditšhabeng tšohle le melokong yohle le merafong yohle le malemeng ohle,” gomme e le bao ba hlankelago Modimo mosegare le bošego ba le gotee le sehlopha sa Johane. (Kutollo 7:9, 15) Ka morago ga ge Jerusalema o Mofsa e fologetše lefaseng e e-tšwa legodimong gomme Jesu a diriša dinotlelo tša lehu le Hadese go tsoša bahu, gona ba tla tlatšwa ke ba dimilione tše dintši bao ba tšwago “ditšhabeng,” bao ba thomago go rata Jehofa le Morwa wa gagwe, yena Monna wa Jerusalema o Mofsa yo a swanago le Kwana.—Kutollo 1:18.

17. “Dikgoši tša lefase” tšeo di ‘tlišago letago la tšona’ go Jerusalema o Mofsa ke bomang?

¹⁷ Ka gona, “dikgoši tša lefase” tšeo di ‘o tlišetšago letago la tšona’ ke bomang? Ga se dikgoši tša kgonthe tša lefase e le sehlopha, ka gobane tšona di tla fedišwa ka Haramagedone ka ge di e-lwa le Mmušo wa Modimo. (Kutollo 16:14, 16; 19:17, 18) Na dikgoši e ka ba ba bangwe ba batho ba phagamego ba ditšhaba bao e bago karolo ya lešaba le legolo, goba na ke dikgoši tše di tsošitšwego bahung tšeo di ikokobeletšago Mmušo wa Modimo lefaseng le lefsa? (Mateo 12:42) Ga go bjalo, ka gobane letago la dikgoši tše bjalo e be e le la nakwana gomme ke kgale le hweletše. Ka gona, “dikgoši tša lefase” tšeo di tlišago letago la tšona go Jerusalema o Mofsa e swanetše go ba ba 144 000 bao ba ‘rekilwego go tšwa molokong o mongwe le o mongwe le lelemeng le lengwe le le lengwe le bathong ba bangwe le ba bangwe le setšhabeng se sengwe le se sengwe’ gore ba buše e le dikgoši gotee le Kwana, Jesu Kriste. (Kutollo 5:9, 10; 22:5) Ba tliša letago la bona leo ba le neilwego ke Modimo motseng wo e le gore ba oketše go phadima ga wona.

18. (a) Ke bomang bao ba tlago go thibelwa go tsena Jerusalema o Mofsa? (b) Ke bomang feela bao ba tlago go dumelelwa go tsena motseng wo?

¹⁸ Johane o tšwela pele gore: “Eupša selo le ge e le sefe seo e sego se sekgethwa le motho yo a tšwelago pele a dira selo sa makgapha le go bolela maaka, a ka se ke a tsena go wona le gatee; go tla tsena feela bao ba ngwadilwego lengwalong la go phuthwa la Kwana la bophelo.” (Kutollo 21:27) Ga go na selo seo se šilafaditšwego ke tshepedišo ya dilo ya Sathane seo e ka bago karolo ya Jerusalema o Mofsa. Le ge dikgoro tša wona di dula di butšwe, ga go na motho yo a “tšwelago pele a dira selo sa makgapha le go bolela maaka” yo a tlago go dumelelwa go tsena go wona. Go ka se be le bahlanogi motseng woo goba ditho le ge e le dife tša Babilona o Mogolo. Ge e ba ba bangwe ba leka go goboša motse ka go senya ditho tša wona tša nakong e tlago ge di sa dutše di le lefaseng, gona maiteko a bona a fetolwa lefeela. (Mateo 13:41-43) Ke feela ba “ngwadilwego lengwalong la go phuthwa la Kwana la bophelo,” e lego ba 144 000, bao ba tlago go feleletša ba tsene Jerusalema o Mofsa.b—Kutollo 13:8; Daniele 12:3.

Noka ya Meetse a Bophelo

19. (a) Johane o hlalosa bjang motse wa Jerusalema o Mofsa e le o fetišetšago ditšhegofatšo bathong? (b) “Noka ya meetse a bophelo” e ela neng, gomme re tseba bjang?

¹⁹ Motse wa Jerusalema o Mofsa o phadimago, o tla fetišetša ditšhegofatšo tše dikgolo bathong mo lefaseng. Johane o tšwela pele go bona se se latelago: “A mpontšha noka ya meetse a bophelo e sekilego bjalo ka legakabje, e elago e e-tšwa sedulong sa bogoši sa Modimo le sa Kwana e fologa bogareng bja tsela e kgolo ya wona.” (Kutollo 22:1, 2a) “Noka” ye e ela neng? Ka ge e ela “e e-tšwa sedulong sa bogoši sa Modimo le sa Kwana,” gona e be e ka ela feela ka morago ga ge letšatši la Morena le thomile ka 1914. Yeo e be e le nako ya tiragalo yeo e ilego ya tsebagatšwa ka go letšwa ga phalafala ya bošupa, le ka tsebišo e kgolo e rego: “Bjale go tlile phološo le matla le mmušo wa Modimo wa rena le matla a Kriste wa gagwe.” (Kutollo 11:15; 12:10) Mehleng ye ya bofelo, moya le monyadiwa ba be ba dutše ba laletša bao ba nago le tshekamelo e swanetšego gore ba tšee meetse a bophelo ka ntle le tefo. Meetse a tšwago nokeng yeo a tla tšwela pele a le gona gore bona batho bao ba ikhweletše wona go ba go fihla bofelong bja tshepedišo ye ya dilo, gomme ka morago a tla hwetšagala le lefaseng le lefsa, ge motse wa Jerusalema o Mofsa o “theoga o e-tšwa legodimong go Modimo.”—Kutollo 21:2.

20. Ke’ng seo se bontšhago gore tekanyo e itšego ya meetse a bophelo e šetše e hwetšagala?

²⁰ Le ga se lekga la mathomo meetse a neago bophelo a newa batho. Jesu nakong ya ge a be a le lefaseng, o ile a bolela ka meetse ao a neago bophelo bjo bo sa felego. (Johane 4:10-14; 7:37, 38) Go oketša go se, Johane o tla tloga a e-kwa taletšo e lerato e rego: “Moya le monyadiwa ba tšwela pele ba re: ‘Tlaa!’ Mang le mang yo a kwago a re: ‘Tlaa!’ Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.” (Kutollo 22:17) Taletšo ye e kwatšwa gaešita le mo nakong ye, e lego go bontšha gore meetse a mantši a bophelo a šetše a hwetšagala. Eupša meetse ao lefaseng le lefsa a tla ela a e-tšwa sedulong sa bogoši sa Modimo, gomme a tla tla ka Jerusalema o Mofsa e le noka ya kgonthe.

21. Ke’ng seo se emelwago ke “noka ya meetse a bophelo,” gomme pono ya Hesekiele ya noka ye e re thuša bjang go tseba se?

²¹ ‘Noka ye ya meetse a bophelo’ ke’ng? Meetse ke selo se bohlokwa-hlokwa bophelong. Motho a ka phela ka dibeke tše itšego ka ntle le dijo, eupša ka ntle le meetse o tla hwa ka beke feela. Meetse le gona a hola ka go hlwekiša gomme a bohlokwa bakeng sa bophelo bjo bobotse. Ka gona, meetse a bophelo a swanetše go emela selo se sengwe seo se nyakegago kudu bakeng sa bophelo le go phela gabotse ga batho. Moporofeta Hesekiele le yena o ile a newa pono ya ‘noka ye ya meetse a bophelo,’ gomme ponong ya gagwe noka e be e ela e e-tšwa tempeleng gomme e elela Lewatleng le le Hwilego. Ke moka gwa direga mohlolo wa mehlolo! Meetse ao go bego go se na seo se ka phelago go ona ao a bego a tletše metswako a ile a fetolwa meetse a lapološago ao a nyeumago ka dihlapi! (Hesekiele 47:1-12) Ee, noka e bonwego ponong e bušetša selo seo pele se bego se hwile bophelong, go tiiša gore noka ya meetse a bophelo e swantšha tokišetšo ya Modimo ka Jesu Kriste ya go bušetša bophelo bja batho bjo bo phethagetšego molokong woo go swanago le ge o hwile wa batho. Noka ye ‘e sekile bjalo ka legakabje,’ go bontšha go hlweka le bokgethwa bja ditokišetšo tša Modimo. Ga e swane le “meetse” a a šilafaditšwego ke madi ao a bolayago a Bojakane.—Kutollo 8:10, 11.

22. (a) Noka ye e tšwa kae, gomme ke ka baka la’ng se se swanetše? (b) Go akaretšwa’ng meetseng a bophelo, gomme noka ye ya seswantšhetšo e akaretša’ng?

²² Noka ye e tšwa “sedulong sa bogoši sa Modimo le sa Kwana.” Se se swanetše ka ge motheo wa ditokišetšo tše di neago bophelo tša Jehofa e le sehlabelo sa topollo, gomme se se ile sa newa ka lebaka la ge Jehofa a “ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Meetse a bophelo le gona a akaretša Lentšu la Modimo, leo le bolelwago e le meetse ka Beibeleng. (Baefeso 5:26) Lega go le bjalo, noka ya meetse a bophelo ga e akaretše feela therešo, eupša e akaretša le ditokišetšo tše dingwe tša Jehofa tšeo di theilwego sehlabelong sa Jesu bakeng sa go phološa batho ba kwago sebeng le lehung, gotee le go ba nea bophelo bjo bo sa felego.—Johane 1:29; 1 Johane 2:1, 2.

23. (a) Ke ka baka la’ng e le mo go swanetšego gore noka ya meetse a bophelo e ela gare ga tsela e kgolo ya Jerusalema o Mofsa? (b) Ke kholofetšo efe ya Modimo go Aborahama yeo e tlago go phethagatšwa nakong ya ge meetse a bophelo a ela ka bontši?

²³ Mehola ya sehlabelo e dirišwa ka botlalo ka boperisita bja Jesu le baperisita ba ka tlase ba gagwe ba 144 000, nakong ya Pušo ya Nywaga e Sekete. Ka gona, noka ya meetse a bophelo ka mo go swanetšego e ela gare ga tsela e kgolo ya Jerusalema o Mofsa. Yona e bopilwe ka Isiraele ya moya yeo yona gotee le Jesu ba bopago peu ya therešo ya Aborahama. (Bagalatia 3:16, 29) Ka gona, nakong ya ge meetse a bophelo a ela ka bontši gare ga tsela e kgolo ya motse wa seswantšhetšo, “dithšaba ka moka tša lefase” di tla ba le sebaka se se tletšego sa go itšhegofatša ka peu ya Aborahama. Kholofetšo ya Jehofa go Aborahama e tla ba e phethagaditšwe e le ka kgonthe.—Genesi 22:17, 18.

Dihlare tša Bophelo

24. Johane bjale o bona’ng ka mathokong a mabedi a noka ya meetse a bophelo, gomme seo a se bonago se swantšhetša’ng?

²⁴ Noka ya ponong ya Hesekiele e ile ya ba ya fetoga lefula, gomme moporofeta o ile a bona go mela dihlare tša mehuta ka moka tšeo di enywago dienywa ka mahlakoreng a mabedi a yona. (Hesekiele 47:12) Eupša Johane o bona’ng? O bona se: “Ka mošono wa noka le ka mošola wa yona go be go e-na le dihlare tša bophelo tše di enywago dienywa tše lesome-pedi, tše di enywago dienywa tša tšona ka kgwedi e nngwe le e nngwe. Matlakala a dihlare e be e le a go fodiša ditšhaba.” (Kutollo 22:2b) ‘Dihlare tše tša bophelo’ gape di swanetše go swantšhetša karolo ya tokišetšo ya Jehofa ya go nea batho ba kwago bophelo bjo bo sa felego.

25. Ke tokišetšo efe e kgolo yeo Jehofa a e direlago batho ba kwago Paradeiseng ya lefase ka moka?

²⁵ A tokišetšo e kgolo gakaakang yeo Jehofa a e direlago batho bao ba kwago! Ga se feela gore ba tla nwa meetse ao a lapološago, eupša ba tla ba ba fula dienywa dihlareng tšeo tša mehuta-huta tšeo di sa kgobego tše di phedišago. Ruri, e be e tla ba mo gobotse gakaakang ge nkabe batswadi ba rena ba pele ba be ba ile ba kgotsofatšwa ke tokišetšo e swanago e “kxahlišaxo” Paradeiseng ya Edene! (Genesi 2:9) Eupša bjale Paradeise ya lefase ka moka še, gomme Jehofa o bile o dira tokišetšo ka matlakala a dihlare tšeo tša seswantšhetšo bakeng sa “go fodiša ditšhaba.”c Ka go phala sehlare le ge e le sefe seo e lego sa mošunkwane goba sa mohuta o mongwe seo se dirišwago lehono, go dirišwa mo go thobago ga matlakala ao a seswantšhetšo go tla dira gore batho ba dumelago ba phethagale moyeng le mmeleng.

26. Dihlare tša bophelo mo gongwe di ka ba di akaretša’ng, gomme ka baka la’ng?

²⁶ Dihlare tšeo tše di nošetšwago gabotse tše di lego ka mathoko a noka, mo gongwe di ka akaretša ditho tše 144 000 tša mosadi wa Kwana. Ditho tše le tšona ge di sa le mo lefaseng di nwa tokišetšong ya Modimo ya bophelo ka Jesu Kriste. Se se kgahlišago ke gore bana ba babo Jesu ba tloditšwego ka moya ba bitšwa ka tsela ya boporofeta gore ke ‘mere e megolo ya toko.’ (Jesaya 61:1-3; Kutollo 21:6) Le gona di šetše di tšweleditše dienywa tše dintši tša moya, gore Jehofa a retwe. (Mateo 21:43) Nakong ya Pušo ya Nywaga e Sekete, di tla ba le karolo ya go aba ditokišetšo tša topollo tšeo di tlago “go fodiša ditšhaba” sebeng le lehung.—Bapiša le 1 Johane 1:7.

Bošego ga bo sa le Gona

27. Ke ditšhegofatšo dife tše dingwe tšeo Johane a di bolelago bakeng sa bao ba dumeletšwego go tsena Jerusalema o Mofsa, gomme ke ka baka la’ng go bolelwa gore “go ka se sa ba le madimabe le ge e le afe”?

²⁷ Ruri, go ka se ke gwa ba le tokelo e nngwe e botse kudu go feta go tsena Jerusalema o Mofsa! Anke o nagane, batho bao e kilego ya ba ba nyatšegago le bao ba sa phethegago ba tla latela Jesu go fihla legodimong e le gore ba tle ba be karolo ya thulaganyo e bjalo ya letago! (Johane 14:2) Johane o bolela ka ditšhegofatšo tšeo ba ba tlago go di thabela, ka gore: “Go ka se sa ba le madimabe le ge e le afe. Eupša sedulo sa bogoši sa Modimo le sa Kwana di tla ba motseng, gomme bahlanka ba gagwe ba tla mo direla tirelo e kgethwa; ba tla bona sefahlego sa gagwe, gomme leina la gagwe le tla ba diphatleng tša bona.” (Kutollo 22:3, 4) Nakong ya ge baperisita ba Baisiraele ba fetoga ba babe, ba ile ba welwa ke thogako ya Jehofa. (Maleaki 2:2) Jesu o ile a bolela gore “ntlo” ya Jerusalema yeo e bego e se na tumelo e lahlilwe. (Mateo 23:37-39) Eupša “go ka se sa ba le madimabe le ge e le afe” go Jerusalema o Mofsa. (Bapiša le Sakaria 14:11.) Baagi ba yona ka moka ba lekilwe mollong wa ditlaišo mo lefaseng gomme ka ge ba fentše, ba tla ‘apara go se senyege le go se hwe.’ Jehofa o a tseba gore le ka mohla ba ka se ke ba fapoga, go swana le ge a be a tseba gore Jesu a ka se fapoge. (1 Bakorinthe 15:53, 57) Le gona “sedulo sa bogoši sa Modimo le sa Kwana” di tla ba moo, go dira gore motse o šireletšege ka mehla le ka mehla.

28. Ke ka baka la’ng ditho tša Jerusalema o Mofsa di ngwadilwe leina la Modimo diphatleng tša tšona, gomme ke kholofetšo efe e thabišago yeo e lego ka pele ga tšona?

²⁸ Ka go swana le Johane, ditho ka moka tša nakong e tlago tša motse woo wa legodimo ke “bahlanka” ba Modimo. Ka ge ba le bjalo, ba ngwadilwe leina la Modimo wa bona ka mo go bonagalago diphatleng tša bona, go bontšha gore ke Mong wa bona. (Kutollo 1:1; 3:12) Go mo direla tirelo e kgethwa e le karolo ya Jerusalema o Mofsa, ba tla go tšea e le tokelo e sa lekanywego ka selo. Jesu nakong ya ge a be a le mo lefaseng o ile a dira kholofetšo e kgahlišago go babuši ba bjalo ba nakong e tlago gore: “Go thaba bao ba sekilego pelong, ka ge ba tla bona Modimo.” (Mateo 5:8) Bahlanka ba e tla ba ba thabilego gakaakang ge ba bona Jehofa e le ka kgonthe le go mo direla!

29. Ke ka baka la’ng Johane a bolela ka Jerusalema o Mofsa wa legodimong gore “go ka se sa hlwa go e ba le bošego”?

²⁹ Johane o tšwela pele ka gore: “Le gona, go ka se sa hlwa go e ba le bošego, gomme ga ba sa nyaka seetša sa lebone e bile ga ba na seetša sa letšatši, gobane Jehofa Modimo o tla ba hlabišetša seetša.” (Kutollo 22:5a) Jerusalema ya bogologolo ka go swana le motse le ge e le ofe lefaseng, e be e ithekgile ka letšatši bakeng sa seetša mosegare le seetša sa kgwedi gotee le dietša tša maitirelo bošego. Eupša dietša tša mohuta woo e tla ba tšeo di sa nyakegego go Jerusalema o Mofsa ya legodimong. Motse wo o tla edišetšwa ke Jehofa ka noši. “Bošego” mo gongwe bo ka ba bo dirišwa ka tsela ya seswantšhetšo, bo šupa tlalelo goba go ikarola go Jehofa. (Mika 3:6; Johane 9:4; Baroma 13:11, 12) Le ka mohla go be go ka se ke gwa ba le bošego bja mohuta woo pele ga sefahlego sa letago se se phadimago sa Modimo ramatlaohle.

30. Johane o phetha bjang pono ye e makatšago, gomme Kutollo e re kgonthišetša’ng?

³⁰ Johane o phetha pono ye e makatšago ka go bolela ka bahlanka ba ba Modimo, gore: “Ba tla buša e le dikgoši go iša mehleng ya neng le neng.” (Kutollo 22:5b) Ke therešo gore mehola ya topollo e tla ba e dirišitšwe ka botlalo bofelong bja nywaga e sekete, le gore Jesu o tla ba a bušeditše moloko o phethagetšego wa batho go Tatagwe. (1 Bakorinthe 15:25-28) Ga re tsebe seo Jehofa a se nagannego ka Jesu le ba 144 000 ka morago ga moo. Eupša Kutollo e re kgonthišetša gore tirelo ya bona e kgethwa go Jehofa e tla tšwela pele ka mo go sa felego.

Seremo se se Thabišago sa Kutollo

31. (a) Ke seremo sefe seo se swawago ke pono ya Jerusalema o Mofsa? (b) Ke’ng seo Jerusalema o Mofsa e se direlago batho ba bangwe ba ba botegago?

³¹ Go phethagatšwa ga pono ye ya Jerusalema o Mofsa, e lego monyadiwa wa Kwana ke seremo se se thabišago seo Kutollo e se šupago, gomme seo se a swanela. Bakriste-gotee le Johane ka moka ba lekgolong la pele la nywaga bao mathomong puku ye e bego e ngwaletšwe bona, ba be ba lebeletše pele go tsena motseng woo e le babuši-gotee le Jesu Kriste ba ba sa hwego ba moya. Mašaledi a Bakriste ba tloditšwego ao a sa dutšego a phela lefaseng lehono, a na le kholofelo e swanago. Ka gona, Kutollo e tšwela pele go ya seremong sa yona se segolo ge monyadiwa yo a feleletšego a kopanywa le Kwana. Se se latelago ke gore mehola ya sehlabelo sa topollo sa Jesu e tla dirišwa ka botlalo bathong ka go diriša Jerusalema o Mofsa, e le gore babotegi ka moka mafelelong ba tle ba tsene bophelong bjo bo sa felego. Ka tsela ye monyadiwa, e lego Jerusalema o Mofsa ka ge e le mothuši yo a botegago wa Kgoši yeo e lego Monyadi wa gagwe, o tla ba le karolo tabeng ya go aga lefase le lefsa la go loka ka morero wa gore le be gona ka mo go sa felego, e le gore go tle go retwe Morena Mmuši Jehofa wa rena.—Mateo 20:28; Johane 10:10, 16; Baroma 16:27.

32, 33. Re ithutile’ng go Kutollo, gomme karabelo e tšwago dipelong tša rena e swanetše go ba efe?

³² A lethabo le lekaakang leo re bago le lona ge re dutše re batamela mafelelong a go hlahloba ga rena puku ya Kutollo! Re bone go palelwa o šoro ga maiteko a mafelelo a Sathane le peu ya gagwe, gotee le go bona ge dikahlolo tše di lokilego tša Jehofa di phethwa. Babilona o Mogolo e swanetše go fedišetšwa sa ruri, gomme e tla latelwa ke go fedišwa ga mebušo e mengwe ka moka yeo e gobogilego yeo e sa holego ka selo ya lefase la Sathane. Sathane ka noši le batemona ba gagwe ba tla lahlelwa sekoting gomme ka morago ba tla fedišwa. Jerusalema o Mofsa e tla buša gotee le Kriste magodimong ge tsogo le kahlolo di tšwela pele, gomme batho ba phethagetšego ba tla feleletša ka go thabela bophelo bjo bo sa felego lefaseng la Paradeise. Kutollo e hlalosa ka mo go kwalago gakaakang dilo tše ka moka! E tloga e matlafatša boikemišetšo bja rena bja gore re ‘bolele ditaba tše tše dibotse tša ka mo go sa felego e le ditaba tše di thabišago go ditšhaba tšohle le meloko yohle le maleme ohle le batho bohle’ ba lego lefaseng lehono! (Kutollo 14:6, 7) Na o ikgafa e le ka kgonthe modirong wo o mogolo?

³³ Hle ka dipelo tša rena tše di tletšego wa go falala ka tebogo, anke re eleng hloko mantšu a phethago a Kutollo.

[Mengwalo ya ka tlase]