Tšwelang Pele le Bolela ka Mmušo
“Ditaba tše tše di lokilego tša Mmušo di tla bolelwa lefaseng ka moka le le agilwego gore e be bohlatse go ditšhaba ka moka; gomme e tla ba gona bofelo bo fihlago.”—MATEO 24:14, NW.
1, 2. (a) Modiro wa bohlokwa kudu wa lekgolong le la nywaga ke ofe, gomme o dirilwe go fihla bokgoleng bofe? (b) Ke bohlatse bofe bjo bo lego gona bja tšhegofatšo ya Jehofa modirong wo?
GO BOLELA ditaba tše di lokilego tša Mmušo ke modiro wa bohlokwa kudu wa lekgolong le la nywaga. Se ke seo Modimo Ra-matla-ohle a ratago gore se dirwe mo nakong ye, gomme se dirwa ka go phethagatša Lentšu la gagwe la boporofeta. Go arabela ga gago go wona go tla kgoma bokamoso bja gago bja ka mo go sa felego.—1 Ba-Korinthe 9:16, 23.
2 Ke mo go kgahlišago go bona gore palo ya bao ba bago le karolo modirong wo wa boboledi e tšwela pele e gola, gomme mo nakong ye go na le ba fetago dimilione tše tharo bao ba bago le karolo. Dipalo tše dikgolo di tsenela bodiredi bja nako e tletšego go feta lege e le neng pele. Batho ba bangwe ba bantši ba ba thabelago ba amogela thuto ya Beibele gomme ba katanela go ithuta go dira thato ya Modimo.
3. Ba bangwe ba ka re’ng mabapi le go nyakega ga go tšwela pele ka boboledi bja ditaba tše di lokilego?
3 Lega go le bjalo, ka dinako tše dingwe ba bangwe ba ka “lapa xo dira botse” gomme ba ‘lapa’ ge e le mabapi le modiro wa boboledi. (Ba-Galatia 6:9; Ba-Hebere 12:3) Mo gongwe ba ka bolela gore ditaba tše di lokilego di šetše di boletšwe ka gohle tšhemong ya bona gomme batho ba tšere lehlakore la bona gomme bjale ba a selekega ge re etela magaeng a bona. Bao ba dirago modiro wa boboledi moo ba hwetša mafelelo a manyenyane kudu goba ba se hwetše selo le gatee. Ka gona, ba nagana gore mohlomongwe modiro o šetše o akareditšwe gabotse, gomme ga go sa nyakega gore ba tšwele pele. Phošo ke eng ka go nagana ka tsela ye?
Ke ka Baka La’ng re Phegelela?
4. Ke eng seo se swanetšego go re tutuetša go tšwela pele re bolela gaešita le tšhemong yeo go yona go arabela go fokolago?
4 Sa pele, go kgotlelela ga rena ka go botega modirong wa boboledi ga se gwa swanela go ithekga ka go theetša ga batho goba go se theetše ga bona. Jeremia o ile a bolela ka nywaga e 40 Jerusalema gaešita lege batho ba sego kae ba be ba theetša gomme ba bantši ba mo ganetša o šoro. Ke ka baka la’ng a ile a phegelela? Ka gobane o be a dira modiro woo Jehofa a o laetšego le ka gobane tsebo ya gagwe ya boporofeta ya seo se bego se tla diragalela Jerusalema e be e mo gapeletša gore a tšwele pele a bolela. (Jeremia 1:17-19) O itše: “Ke kwa mo pelong xo mphiša bo-ka mollô o tukaxo, ó ntsene mašapong. Ka ipolaiša kxôtlêlêlô ka palêlwa.” (Jeremia 20:7-10) Boemo bja rena ke bjo bo swanago. Ke Jehofa ka Jesu Kriste yo a laetšego gore “ditaba tše di lokilego” di swanetše go bolelwa lefaseng ka moka le le agilwego. (Mateo 24:14, NW) Ge batho ba gana go theetša, se se re nea sebaka sa go bontšha bogolo bja lerato la rena le boineelo go Jehofa ka go phegelela go dira seo se lokilego. (1 Johane 5:3) Ka ntle le moo, ge re naganišiša ka seo bokamoso bjo bo lego kgaufsi bo se swaretšego batho, re ka ithibela bjang gore re se leke go lemoša baagišane ba rena?—2 Timotheo 4:2.
5. (a) Ke ka baka la lebaka lefe le lengwe moo re swanetšego go kgotlelela modirong wa boboledi? (b) Modiro wa boboledi ke motheo wa kahlolo bjang?
5 Go feta moo, boboledi bja Jeremia ruri e be e le modiro wa kahlolo. Ka 607 Pele ga Mehla ya Rena ga go le o tee wa bao ba ilego ba hwa goba ba dirwa bahlanka nakong ya ge Jerusalema e e-wa yo a bego a ka bolela gore ga a tsebe lebaka leo ka lona se se bego se direga. Ka nywaga e 40 e fetilego, Jeremia o be a dutše a ba lemoša ka mafelelo ona a bjalo ge e ba ba be ba tšwela pele ba rabela malebana le Modimo. (Bapiša le Hesekiele 2:5.) Ka mo go swanago lehono, boboledi bja ditaba tše di lokilego e le “bohlatse go ditšhaba ka moka” ke motheo wa kahlolo. Moapostola Paulo o dira gore se se kwagale ge a bolela gore Kriste Jesu o tla tliša tefeletšo go “ba ba sa tsebexo Modimo, le ba ba sa kwexo Ebangedi ya Mong wa rena Jesu Kriste.” (2 Ba-Thesalonika 1:8, 9) Batho ba tla ahlolwa ka go arabela ga bona ditabeng tše di lokilego. Ka gona, modiro wa boboledi o swanetše go tšwela pele ka go hlaboša le ka go kwagala go ba go fihla bofelong. (Kutollo 14:6, 7) Ga go selo seo se swanetšego go thibela molaetša wo wa bohlokwa gore o tlišwe go batho ka lebelo ka mo go kgonegago. Se se bea boikarabelo bjo bogolo go bahlanka ba ineetšego ka moka ba Jehofa.
6. Gaešita lege molaetša wa rena o ka tsebja ka gohle, ke ka baka la’ng re swanetše go tšwela pele re bolela?
6 Ke therešo gore mo gongwe re ka ba re šetše re ile ra bolela ditaba tše di lokilego ka go aparetša e le ka kgonthe lefelong la rena. Eupja go na le dilo tše dintši tšeo di diregago lefaseng mo e lego gore gaešita lege batho ba bantši ba kwele molaetša wa rena, ba ka o lebala ka pela ge e ba re kgaotša go bolela. Anke o nagane ka meferefere, ditiro tša botšhošetši, dikgaruru, ditiro tša go leša dihlong le ditiragalo tše dingwe tšeo di apareditšego ka gohle. Le gona go na le dibopego tše dintši tša boithabišo bjo bo tlwaetšwego le ditšhitišo tše dingwe. Re swanetše go tšwela pele re bolela go dira gore molaetša wa rena o dule o le pele ga batho go sa šetšwe ditiragalo tše dingwe ka moka tšeo di gogago tlhokomelo ya bona.
7. Go itshwara ga batho ba bantši lehono go swana bjang le moo ga ba-Isiraele boporofeteng bja Jesaya, eupja ke ka baka la’ng se se sa swanela go re thibela go bolela?
7 Ge ba bantši ba leka go re hlokomologa, re swanetše go gopola mohuta wa batho bao moporofeta Jesaya a bego a swanetše go bolela le bona. Jehofa o ile a mmotša: “Gobane ke setšhaba sa dinganga, ke bana ba maaka, ke bana ba ba ganago go kwa melao ya Jehofa. Ba ba rego go ba ba bonago dipono ba re: Le se ke la bona dipono, le go baporofeta ba re: Le se ke la re porofetela tša go loka, re ruteng tša boleta, le re porofeteleng tša bofora; fapogang tsela, tšwang mmileng, lesetšang go hlwa le bolela tša e mokgethwa wa Isiraele go rena!” Lega go le bjalo, Jesaya o ile a botša batho ka go botega gore: “Jehofa ke Modimo wa kahlolo; go šego bohle ba ba mo letetšego.” (Jesaya 30:9-11, 18, Phetolelo ya Kgale) Re swanetše go dira se se swanago. Ge re dutše re phegelela, ruri molaetša wa rena o tla tsenelela go fihla bokgoleng bjo itšego. Ba bangwe ba tla ela hloko gomme ba bangwe ba ka se dire bjalo. Eupja bohle ba tla ba le sebaka sa go kwa.
‘Ba Tla Kwa Bjang?’
8. Gaešita lege batho ba ka bonala ba tšere boemo bja bona malebana le therešo, ke mabaka afe ao mo gongwe a ka fetolago dikgopolo tša bona?
8 Mohlomongwe re nagana gore tšhemo e itšego e gatile mogato o tiilego gomme e ikemišeditše go gana molaetša wa rena goba gaešita le go ganetša. Eupja gopola, boemo maphelong a batho bo fetoga ka mehla. Mo gongwe ba ka lebana le mathata a mafsa goba maemo gosasa, bekeng e tlago, goba kgweding e tlago, ao a ka dirago gore ba amogele therešo. Mo gongwe ba ka kwa ka ditiragalo tše šoro lefaseng goba mohlomongwe ba tlaišwa ke mathata a tša boiphedišo, bolwetši, goba lehu ka lapeng. Dilo tše bjalo mo gongwe di ka ba dira gore ba phakgame gomme ba rate go ithuta selo seo se bakago kgateletšo ya bona. Ge e ba re dula re bolela, gona ba tla tseba moo ba swanetšego go retologela gona.
9. Modiro wa rena wa boboledi o ka bapišwa bjang le wa badiri ba bahlakodiši lefelong la kotsi?
9 Boemo bja rena bo ka bapišwa le bja badiri ba bahlakodiši lefelong la kotsi, go swana le ka morago ga tšhišinyego ya lefase. Ba bangwe mo gongwe ba ka ba ba be ba dira lefelong leo go lona go bego go hwetšwa baphologi ba sego kae, eupja taba ya gore badiri-gotee le bona ba be ba hwetša baphologi ba bantši lefelong le lengwe e be e ka se ba dire gore ba nyefiše gomme ba tlogele. Go e na le moo, badiri ka moka ba bahlakodiši ba kgotlelela ka go se lape gaešita lege ba nagana gore mo gongwe go ka se hlwe go e-ba le baphologi ba bangwe lefelong leo ba le abetšwego. Ka gona ka dinako tše dingwe, ba ka hwetša mophologi o mongwe. Lesolo la go tsoma le emišwa feela ge nako yeo e fetilego e bontšha gore ga go sa na kholofelo. Ee, lesolo la rena la go tsoma ga se la hlwa le emišwa, re sa dutše re hwetša dikete-kete tša bao ba ratago go hlakodišwa lefaseng le la kgale gomme ba phologe ‘masetla-pelo a magolo.’ (Kutollo 7:9, 14) Gaešita le mafelong ao go wona go dirilwego gabotse le moo batho ba bantši ba sa arabelego, go sa dutše go e-na le mafelelo a itšego. Le gona go na le mabaka a oketšegilego bakeng sa go tšwela pele ka go bolela.
10. Ke bjang feela moo batho ba tla tsebago moo ba tlago go retologela gona ge ba rata go tsoma therešo, ka go ya ka Ba-Roma 10:13, 14?
10 Batho ba swanetše go tšwela pele ba gopotšwa gore: “ba xo tlo phološwa ke ba ba bitšaxo ’ina la Morêna.” Lega go le bjalo, ka ge Paulo a tšwela pele lengwalong la gagwe go Ba-Roma, “ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?” (Ba-Roma 10:13, 14) Mantšu a a gatelela go o mongwe le o mongwe wa rena go nyakega ga go phegelela boboleding bja ditaba tše di lokilego tša Mmušo wa Modimo.
11. Ke boikarabelo bofe bjo re nago le bjona go bafsa bao ba golago go ba batho ba bagolo?
11 Ka ge nako ya bofelo e ile ya tšwela pele, bana ba belegwe gomme ba gola ya ba batho ba bagolo goba ba fihla nywageng ya boikarabelo. Gantši batho ba ba bafsa ga se ba ka ba theetša therešo. Batswadi ba bona mo gongwe ba ka ba ba ile ba gana molaetša gaešita le go bolela gampe malebana le wona. Eupja mo nakong ye bafsa ba ba gotše ka mo go lekanego go ka inaganela ka noši ka go hlonama mabapi le maemo a lefase, mabapi le bokamoso, le mabapi le morero wa bophelo. Le bona ba swanetše go bitša leina la Jehofa ge e ba ba tla phološwa. Eupja “ba tlo dumêla bya’ng xe ba sešo ba Mo kwa?” (Ba-Roma 10:14) Mabakeng a mantši bafsa ba le batho ba bagolo ba nywaga ya magareng ba amogela therešo, ka gona re swanetše go ba tsoma gomme re bolele le bona.
12. Go tšwela pele ga rena ka modiro wa boboledi go bopa bjang pontšho ya kgaugelo ya Jehofa?
12 Therešo ya gore tsela e sa dutše e butšwe bakeng sa boboledi ke pontšho ya kgaugelo ya Jehofa. Moapostola Petro o a ngwala: “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêlê pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô. Le tsebê xore se se Le phološaxo ké xo se fêle pelo xa Morêna.” (2 Petro 3:9, 15) Kganyogo ya Jehofa ya gore mehuta ka moka ya batho e phološwe ga e bontšhwe feela ka go dumelela ga gagwe ka go se fele pelo nako pele a tliša kahlolo, eupja le gona e bontšhwa le ka go tšwela pele ga gagwe a kgopela batho gore ba retologele go yena gomme ba phološwe. (1 Timotheo 2:4) Ge re dutše re tšwela pele re bolela ditaba tše di lokilego, ruri re gatelela kgaugelo ya Modimo, gomme ka tsela ye re a mo tumiša.
Go Phema Molato wa Madi
13, 14. (a) Modiro wa rena wa boboledi o ka bapetšwa bjang le modiro wa mohlapetši, go etša ge go boletšwe boporofeteng bja Hesekiele? (b) Ke ka baka la’ng Paulo a be a ka re o “hlatswegile mading a bohle,” gomme ke bjang feela Dihlatse tša Jehofa di ka bolelago se lehono?
13 Boikarabelo bja Dihlatse tše ineetsego tša Jehofa bja go lemoša batho ka kahlolo e tlago ya Modimo bo ka bapišwa le bja Hesekiele mehleng ya gagwe. O ile a bewa e le mohlapetši ntlong ya Isiraele. Kabelo ya gagwe e be e le go lemoša ba-Isiraele gore kahlolo e be e tla ba tlela ge e ba ba sa fetoge ditseleng tša bona tše mpe. Ge e ba yena, e le mohlapetši a be a palelwa ke go kwatša temošo, kahlolo e be e sa dutše e tla tlela batho ba babe, eupja madi a bona a be a tla ba godimo ga hlogo ya mohlapetši yo a sa elego hloko. Ka se Jehofa o bontšha kgopolo ya gagwe ka go tliša kahlolo: “Xa ke kxahlwe ke lehu la mo-dira-dibe. Se se nkxahlaxo ké xe mo-dira-dibe à boa, a lahla tsela yeo ya xaxwe, a phela. Boang! Boang! Le lahlê ditsela tša lena tše mpe. Le hwêla’ng, lena ba moloko wa Isiraele?”—Hesekiele 33:1-11.
14 Moapostola Paulo o ile a lemoga boikarabelo bja gagwe e le mohlapetši, gomme a bolela le bagolo ba Efeso gore: “Ke hlatswegile mading a bohle.” Ke ka baka la’ng a be a bolela se? O tšwela pele: “Gobane ga nka ka le fihlela ka se le tsebiše morero ka moka wa Modimo.” (Ditiro 20:26, 27, Phetolelo ya Kgale) Go bjalo le ka sehlopha sa mohlapetši lehono, e lego mašaledi a tloditšwego a balatedi ba Jesu Kriste. Ba ka moka, gotee le ba fetago dimilione tše tharo ba bagwera ba bona bao ba nago le kholofelo ya go phologa bofelo bja tshepedišo ye ya dilo gomme ba hwetše bophelo bjo bo sa felego lefaseng, le ka mohla ga se ba ka ba swanela go nyefiša go bolela ditaba tše di lokilego tša Mmušo wa Modimo le go lemoša ka kotlo e tlago ya kahlolo ya gagwe. Ka tsela ye ba phema molato wa madi.
15. Ka go ya ka Hesekiele kgaolo 9, ke bomang bao ba bego ba swawa, gomme ke mang yo a bego a swaya?
15 Modiro wa boboledi lehono o hlaloswa ka tsela ya boporofeta go Hesekiele kgaolo 9. Mo kotlo ya Jehofa e be e rulaganyeditšwe motse wa Jerusalema. Pele ga go tlišwa ga kahlolo yeo, monna yo a aperego leokodi gomme a e-na le pilwana ya mongwadi lethekeng la gagwe o botšwa gore a phatše motse gomme a swaye diphatla tša bohle bao ba bobolago ka baka la makgapha a dilo tšeo di dirwago moo. Ge modiro wo wa go swaya o phethilwe, bohle bao ba lego motseng ka ntle le bao ba swaetšwego go phologa ba be ba tla bolawa. Monna ka morago ga go phetha ka katlego modiro wa gagwe wa go swaya, o ile a bega gore: “Ke dirile ka mo O ntaetšexo ka xôna!” (Hesekiele 9:11) O ile a tšwetša pele kabelo ya gagwe ka go botega go fihla bofelong.
16. (a) Monna yo a aperego leokodi o swantšhetša bomang lehono? (b) Kgang ya go godišwa ga bogoši bja Jehofa e re tutueletša bjang gore re tšwele pele re bolela?
16 Monna yo a aperego leokodi o swantšhetša mašaledi a tloditšwego a balatedi ba Kriste, gomme ba tlatšwa ke “lešaba le lexolo” la “dinku tše dingwê.” Kgang e kgolo lehono go swana le mehleng ya Hesekiele, ke go phagamišwa ga bogoši bja Jehofa. Mabapi le bofelo bja tshepedišo e kgopo ya dilo ya gona bjale ntweng ya mohla mogolo wa Modimo Ra-matla-ohle, Jehofa o re: “Gomme ditšhaba di tlo tseba gore ke Nna Jehofa.” (Kutollo 7:9; Johane 10:16; Hesekiele 39:7, Phetolelo ya Kgale) Gore ditšhaba di tsebe se, ke mo go gapeletšegago gore bahlanka ba Jehofa mo lefaseng ba tšwele pele ba bolela ka leina la gagwe le morero e le bohlatse go ditšhaba ka moka.
17, 18. (a) Go tšwela pele ga rena re bolela go re thuša bjang gore re dule re phakgame? (b) Ke pego efe yeo ka moka ga rena re ratago go e dira go Jehofa ge a emiša modiro wa boboledi, gomme ke bjang feela re ka dirago se?
17 Ka go tšwela pele re bolela ditaba tše di lokilego tša Mmušo, re kgomarela go phakgama ga rena. Re dula re lemoga bohlokwa bja leina la Jehofa le morero wa gagwe. Ge e ba re nyefiša, gona kholofelo ya rena ya go holofela Mmušo e tla fokola, gomme ra gogwa ke “dipelaêlô le mahumô le mabose a bophelô byono, . . . [ra] se buduše selo.” (Luka 8:14) Ka go kgotlelela ka mafolofolo go boleleng “ditaba tše di lokilego,” gona re latela ka go botega taelo ya Morena wa rena, Jesu Kriste: “Fahloxang, Le phakxamê, Le rapêlê, xobane lebaka la tšôna xa Le le tsebe. Xomme tše ke Le botšaxo tšôna ke botša bohle, ke re: Phakxamang!”—Mareka 13:10, 33, 37.
18 Ka gona, anke ka moka ga rena re phegelele tabeng ya go tsoma ‘bao ba bobolago’ ge feela Jehofa a sa dutše a dumelela nako ya se. Anke ka moka ga rena go sa šetšwe ge re le mašaledi a tloditšwego goba re le “dinku tše dingwê,” re botege tabeng ya go rwala kabelo ya rena ya go bolela ditaba tše di lokilego tša Mmušo lefaseng ka moka le le agilwego gore e be bohlatse go ditšhaba ka moka. (Mateo 24:14) Ge Jehofa ka noši a emiša modiro wo ka go thoma ‘masetla-pelo a magolo,’ eka o mongwe le o mongwe wa rena a ka kgona go bolela go Jehofa gore, ‘Re dirile kamoo o re laetšego ka gona!’
Na o a Gopola?
◻ Dipego di bontšha’ng ge e le ka boboledi bja rena?
◻ Mabaka a mangwe ao ka wona re swanetšego go tšwela pele re bolela ke afe?
◻ Boboledi bja rena ke pontšho ya kgaugelo ya Jehofa bjang?
◻ Re ka ba bjang bao ba hlatswegilego mading a batho ka moka?
◻ Boboledi bja rena bo re thuša bjang gore re dule re phakgame?
[Chart on page 28]
DIPEGO TŠA BOBOLEDI KA NYWAGA E ŠUPAGO
Palo ya ba Bao ba Bilego Palo ya
Kolobeditšwego Gona Segopotšong Dithuto tša Beibele
1981 119 836 5 987 893 1 475 177
1982 138 540 6 252 787 1 586 293
1983 161 896 6 767 707 1 797 112
1984 179 421 7 416 974 2 047 113
1985 189 800 7 792 109 2 379 146
1986 225 868 8 160 597 2 726 252
1987 230 843 8 965 221 3 005 048