Puku ya Nahume e thoma ka mantšu a: “Dipolelo malebana le Ninife,” e lego motse-mošate wa Asiria. Ka baka la’ng? Ka gobane go etša ge moporofeta Nahume a hlalosa ka morago, Ninife e be e le ‘motse wa madi . . . wa go tlala maaka le bohlakodi.’ (Nahume 1:1; 3:1) Na o be a bolela ka go feteletša? Ga go bjalo le gatee!

Ge Ninife e be e senyega, tshenyo ya yona e be e le e feletšego mo e lego gore lefelo leo e bego e le go lona le ile la lebalwa ka makgolo-kgolo a nywaga. Batho ba bangwe ba ba ntšhago diphošo ba nyaditše Beibele gomme ba bolela gore motse wo le ka mohla ga se wa ka wa ba gona. Eupja o bile gona e le ka kgonthe! O ile wa hwetšwa gape, gomme seo baepi ba marope ba se hweditšego moo se be se thabiša e le ka kgonthe!