Tšwela Pele o Lemoša ka Modiro o sa Tlwaelegago wa Jehofa

“Morêna ó tlo tsoxa bo-ka mola thabeng ya Peratsime, a xalefa bo-ka mohla wola moeding wa Gibeoni.”—JESAYA 28:21.

1, 2. Ke modiro ofe o sa tlwaelegago woo Jehofa a ilego a o dira bakeng sa batho ba Gagwe mehleng ya Dafida?

TIRO e makatšago e le ka kgonthe! Modiro wo o tlogago o sa tlwaelega! Se ke seo Jehofa a ilego a se direla batho ba gagwe mehleng ya bogologolo morago kua lekgolong la bo-11 la nywaga B.C.E. Le gona, tiro ye e makatšago e be e le mohlala wa selo se se sa tlwaelegago ka go fetišiša seo a tla tlogago a se dira kgaufsinyane. Tiro yeo ya bogologolo e be e le eng? Kapejana ka morago ga gore Dafida a bewe go ba kgoši kua Jerusalema, ba-Filisita ba baagišane ba ile ba thoma tlhaselo, gomme se se ile sa hlohleletša Jehofa gore a dire tiro e sa tlwaelegago. Sa pele, ba-Filisita ba ile ba thoma go hlasela moeding wa Refaima. Dafida o ile a botšiša Jehofa seo a bego a swanetše go se dira gomme a laelwa gore a ye go hlasela. Ka go kwa lentšu la Jehofa, Dafida o ile a fenya o šoro dira tše matla tša ba-Filisita kua Baali-Peratsime. Eupja ba-Filisita ga ba ka ba amogela phenyo. Go se go ye kae, ba ile ba boela ba ya go senya le go hula ka mo go oketšegilego moeding wa Refaima, gomme Dafida o ile a tsoma tlhahlo gape go Jehofa.

² Lebakeng le o ile a botšwa gore a dike ba-Filisita ka nthago ka madira a gagwe. Jehofa o itše: “Xe O e-kwa mešitô kwa dinthleng tša dihlare tša Baka, O hlaxanêlê, xobane ké mo Morêna à tl’o xo ba a Xo etile pele xo fediša madirá a Ba-Filisita.” Se ke sona seo se diregilego. Dafida o ile a ema go fihla ge Jehofa a tšweletša mešito dintlheng tša sekgwa sa baka—mohlomongwe ka ledimo le matla. Ka bjako, Dafida le madira a gagwe ba ile ba botoga moo ba bego ba iphihlile gona gomme ba hlasela Ba-Filisita bao ba gakanegilego, ba ba fenya ka polao e kgolo. Medimo ya diswantšho ya bodumedi yeo ba-Filisita ba e tlogetšego e rapaletše mogoleng wa ntwa e ile ya kgoboketšwa gotee gomme ya senywa.—2 Samuele 5:17-25; 1 Koronika 14:8-17.

3. Ke ka baka la’ng tiro e makatšago ya Jehofa e be e le e kgahlišago go ba-Juda ba mehleng ya Jesaya, gomme ke ka baka la’ng e swanetše go ba e kgahlišago go Bojakane lehono?

³ Wo e be e le modiro o sa tlwaelegago, e lego tiro e sa tlwaelegago yeo e dirilwego ke Jehofa malebana le Ba-Filisita le bakeng sa kgoši ya gagwe yeo e tloditšwego. Tiro ye e kgolo ke e kgahlišago ka mo go kgethegilego ka gobane moporofeta Jesaya o ile a lemoša gore Jehofa o be a tla dira selo se sengwe se se makatšago le se matla ka mo go swanago malebana le matagwa a moya a Juda. Ka gona, baetapele ba bodumedi ba sa botegego ba mehleng ya Jesaya ba be ba swanetše go ela hloko. Bojakane lehono bo swanetše go ela hloko ka gobane seo se diragaletšego Juda e be e le mohlala wa seo se tlago go feleletša se wetše Bojakane.

“Malaô ké a Makôpana”

4, 5. (a) Jesaya o hlalosa bjang ka mo go kwagalago boemo bjo bo sa lešego di welago bja baetapele ba bodumedi ba mehleng ya gagwe? (b) Ke’ng seo se dirago gore Bojakane bo je di sa welego lehono?

⁴ Sa pele, Jesaya o ile a utolla therešo ya gore dikgwerano tšeo matagwa ao a moya a bogologolo a bego a di botile e be e le bofora, e le maaka. Ka morago o ile a bontšha gabotse gore bao ba holofetšego maaka a ba be ba tloga ba sa hlaba kgobe ka mootlwa. O Itše: “Xobane malaô ké a makôpana, xe motho a re ke a naba; kobô e a hlaela, xe motho a re ke aparê.” (Jesaya 28:20) Mang le mang yo a nabago malaong a makopana kudu o hwetša gore maoto a gagwe a tšwela ntle phefong. Ka lehlakoreng le lengwe, ge a huna matolo e le gore a lekane malaong a makopana, kobo e hlaela kudu, gomme karolo e kgolo ya mmele wa gagwe e sa le ka ntle. Go sa šetšwe seo a se dirago, karolo e nngwe ya gagwe e ka ntle phefong.

⁵ Ge re bolela ka mokgwa wa seswantšhetšo, ao e bile maemo a batho ba mehleng ya Jesaya bao ba bego ba beile kholofelo ya bona setšhabelong sa maaka ba bego ba le go ona. Gape e sa dutše e le maemo ao a sa lešego di welago ao bao lehono ba beago kholofelo ya bona go setšhabelo sa Bojakane sa bofora ba lego go ona. Go bjalo ka ge e ka ba phefong. Ye ga se nako ya go tsoma boiketlo dithulaganyong tša lefase tša khutšo le polokego. Ge Bojakane bo lebana le ditiro tšeo di tlago tša kahlolo ya Modimo, go gwerana ga bjona le babuši ba dipolitiki go ka se bo nee khomotšo e borutho.

Tiro e Makatšago ya Jehofa

6. Jehofa o be a tla gata mogato bjang malebana le Juda, gomme o tla gata mogato bjang malebana le Bojakane?

⁶ Ka morago ga go hlalosa ka mo go kwagalago maemo a sa lešego di welago a Jerusalema ya mehleng ya gagwe—le a Bojakane bjo bo sa botegego bja mehleng yeno—Jesaya o tšwela pele ka gore: “Jehofa o tla tsoga bjalo ka mola Thabeng ya Peratsime o tla galefa bjalo ka kua kgaufsi le Moedi wa Gibeoni gore a tle a dire tiro ya gagwe—tiro ya gagwe e a makatša—le gore a dire modiro wa gagwe—modiro wa gagwe ke o makatšago.” (Jesaya 28:21, NW) Ee, Jesaya o lemošitše gore go se go ye kae Jehofa o tla tsoga bjalo ka ge a ile a dira kua Baali-Peratsime. Eupja mo nakong yeo o be a tla gata mogato malebana le batho ba gagwe ba hlokago tumelo, gomme o be a tla dira bjalo ka lefula la meetse leo le sa thibegego leo le tšhologago ka lešoba letamong leo le senyegilego. Kgwerano ya Jerusalema le lehu e be e tla ipontšha e le yeo e se nago mohola. Ka tsela e swanago, Jehofa kgaufsinyane o tla gata mogato malebana le Bojakane, gomme bo tla hwetša gore dikgwerano tša bjona ka moka tše di tagago le lefase ke tše di sa rego selo. Phuthego ya bjona ka moka e kgolo e tla thubaganywa gomme balatedi ba bjona ba gašanywa. Medimo ya bjona ya maaka e tla fišwa lore-lore.

7. Ke ka baka la’ng merero ya Jehofa mabapi le Juda e bitšwa ‘e makatšago’ le ‘e sa tlwaelegago’?

⁷ Ke ka baka la’ng Jesaya a bitša tiro ya Jehofa malebana le Jerusalema modiro o makatšago le wo o sa tlwaelegago? Ee, Jerusalema e be e le lefelo la borapedi bja Jehofa le motse wa kgoši ya Jehofa e tloditšwego. (Psalme 132:11-18) Ka baka leo, le ka mohla e be e se ya ka ya senywa pele ga moo. Tempele ya wona e be e se ya ka ya fišwa. Ngwako wa bogoši wa Dafida wo o kilego wa hlongwa Jerusalema o be o se wa ka wa phekgolwa. Dilo tše bjalo di be di sa naganwe le gatee. E be e le mo go tlogago go sa tlwaelega gore Jehofa o be ka nagana ka go dumelela dilo tše bjalo di direga.

8. Ke temošo efe yeo Jehofa a ilego a e nea ya go tla ga tiro ya gagwe e sa tlwaelegago?

⁸ Eupja Jehofa o ile a nea temošo e swanetšego ka baporofeta ba gagwe gore ditiragalo tše tšhošago di be di tla direga e le ka kgonthe. (Mika 3:9-12) Ka mohlala, moporofeta Habakuku, yo a phetšego lekgolong la bošupa la nywaga B.C.E., o itše: “Bonang tša kua dithšabeng! Lebelešang! Le tlo kxotsa wa xo thšoxa; xobane mehleng yeno ke dira modirô wo Le ka se kexo la dumêla xe Le ka fo botšwa. Xobane ké Nna é, ke tsošaxo Ba-Kaladea, sethšaba se sehloxo, se lebelô, se se yaxo le bophara bya lefase, sé tšea madulô a e sexo a sôna. Ké se se šoro se se šiišaxo.”—Habakuku 1:5-7.

9. Jehofa o ile a phethagatša temošo ya gagwe malebana le Jerusalema ka tsela efe?

⁹ Ka 607 B.C.E. Jehofa o ile a phethagatša temošo ya gagwe. Ka morago ga go dumelela madira a Babele gore a hlasele Jerusalema o ile a a dumelela gore a senye motse gotee le tempele. (Dillo tša Jeremia 2:7-9) Go feta moo, o ile a dumelela Jerusalema e senywa ka lekga la bobedi. Ka baka la’ng? Ka morago ga nywaga e 70 ba le bohlankeng, ba-Juda bao ba itsholago ba ile ba dumelelwa go boela morago nageng ya gabo bona, gomme mafelelong tempele e nngwe e ile ya agwa Jerusalema. Lega go le bjalo, ba-Juda ba ile ba tlogela Jehofa gape. Lekgolong la pele la nywaga C.E., Paulo o ile a tsopolela ba-Juda ba mehleng ya gagwe mantšu a Habakuku, ka go rialo a lemoša gore boporofeta bjo bo be bo tla phethega gape nakong e tlago. (Ditiro 13:40, 41) Jesu ka noši o ile a lemoša ka mo go kgethegilego gore Jerusalema le tempele ya yona di be di tla senywa ka baka la go hloka tumelo ga ba-Juda. (Mateo 23:37–24:2) Na ba-Juda bao ba lekgolong la pele la nywaga ba ile ba ela hloko? Aowa. Go swana le bo-rakgolokhukhu ba bona, ba ile ba gana temošo ya Jehofa ka mo go feletšego. Ka gona, Jehofa o ile a boeletša modiro wa gagwe o makatšago. Jerusalema le tempele ya yona di ile tša senywa ka 70 C.E. ke madira a Roma.

10. Jehofa o tla gata mogato bjang malebana le Bojakane kgaufsinyane?

¹⁰ Ka gona, ke ka baka la’ng motho o mongwe a swanetše go nagana gore Jehofa a ka se dire se se swanago mehleng ya rena? Therešo ke gore o tla phethagatša morero wa gagwe gaešita lege o bonala o makatša e bile o sa tlwaelega go bao ba gononago. Lebakeng le, ke Bojakane bjo a tlago go gata mogato malebana le bjona, e lego bjoo ka go swana le Juda ya bogologolo, bo ipolelago gore bo rapela Modimo eupja e le bjo bo senyegilego wa go lahlwa. Jehofa ka Dafida wa gagwe o Mogolo, Kriste Jesu, o tla tlela “Ba-Filisita” ba Bojakane ka nako yeo ba sa e lebelelago. O tla dira modiro wa gagwe o sa tlwaelegago go fihla boemong bja go fedišetša sa ruri mašaledi a mafelelo a ditshepedišo tša bodumedi bja Bojakane.—Mateo 13:36-43; 2 Ba-Thesalonika 1:6-10.

Go Lemoša ka Tiro ya Jehofa

11, 12. Dihlatse tša Jehofa di ile tša lemoša bjang ka dikahlolo tšeo di tlago tša Jehofa?

¹¹ Dihlatse tša Jehofa di ile tša lemoša ka nywaga e mentši ka tiro ye ya kahlolo yeo e tlišwago ke Jehofa. Di ile tša bolela gore go senywa ga Jerusalema le tempele ya yona ka 607 B.C.E. le ka 70 C.E. e be e le ditemošo tša boporofeta tša seo se tlago go wela Bojakane. Go feta moo, di ile tša bontšha gore Bojakane bo fetogile karolo ya mmušo wa lefase wa bodumedi bja maaka, e lego Babele o Mogolo, ka baka la bohlanogi bja bjona. Ka baka la se, dikahlolo tša Modimo go Babele o Mogolo di tla tlišwa ka mo go kgethegilego go Bojakane, ka ge e le karolo yeo e nago le molato o mogolo kudu ya tlhakatlhakano yeo ya bosathane.—Kutollo 19:1-3.

¹² Dihlatse tša Jehofa di ile tša šupa temošong ya boporofeta bja Beibele gore ka nako e swanetšego ya Jehofa, dinyatsi tša Babele o Mogolo tša bopolitiki di tla mo fetogela. Ge e di swantšha e le dinaka tše lesome tša sebata se sekhubedu, Kutollo e lemoša ka gore: “Xe e le dinaka [tše lesome] tše O di bonexo, le sôna Sebata, di tlo hlôya seotswa [Babele o Mogolo] seo, di tlo se dira lešope, tša se hlobodiša, tša ja dinama tša sôna, tša se thšuma ka mollô.” (Kutollo 17:16) Bojakane bja bodumedi bo tla tšhungwa le go senywa gotee le madumedi a mangwe ka moka a maaka. Se e tla ba tiro ya Jehofa e makatšago, e lego modiro wa gagwe o sa tlwaelegago wa mehleng ya rena.

13. Ke bjang lehono dikarabelo mabapi le ditemošo tša Jehofa e bilego tše swanago le tšeo Jesaya a ilego a kopana le tšona?

¹³ Ge Dihlatse tša Jehofa di nea temošo mabapi le tshenyego ye e tlago, gantši di a segwa le go kwerwa. Batho ba ipotšiša gore di nagana gore ke tšona bomang go ka bolela dilo tše bjalo. Bojakane bo bonala e le bjo bo tiilego le bjo bo sa šišinyegego. Ee, ba bangwe ba nagana gore maemo a bjona a bile a a kaonefala. Mebušo yeo e bego e bo gatelela morago bjale e bo neile tokologo e kgolwanyane ya go dira dilo! Lega go le bjalo, ge e le gabotse Bojakane bo swanetše go ela hloko keletšo ya Jesaya: “Le se kê la kwêra, xore ’tlemo tša lena di se tlo fsineletšwa; xobane nna ke kwile Lentšu la Morêna wa mašaba xe a tiiša a re: Thsenyô e tlo tlêla lefase ka moka.”—Jesaya 28:22; 2 Petro 3:3, 4.

14. Ke bjang ditlamo tša Bojakane e tlago go ba tše matla le tše tiilego?

¹⁴ Ka kakaretšo, Bojakane bo tla tšwela pele e le lenaba la Kgoši le Mmušo. (2 Ba-Thesalonika 2:3, 4, 8) Lega go le bjalo, ka nako e swanago ditlamo tša bjona e tla ba tše matla le tše tiilego. Ka mantšu a mangwe, tshenyego ya bjona e tla kgonthišetšwa go iša pele. Jehofa a ka se ke a lahla phetho ya gagwe ya go senya Bojakane bjalo ka ge a sa ka a lahla phetho ya gagwe ya go dumelela go senywa ga Jerusalema le tempele ya yona ka 607 B.C.E.

‘Khudugang go Bjona’

15. Ke tsela efe ya go tšhaba yeo e bulegetšego batho ba dipelo tše di botegago?

¹⁵ Motho a ka phonyokga bjang madimabe a Bojakane? Morago mehleng ya Isiraele, Jehofa o ile a roma baporofeta ba botegago go ya go tsošološetša batho ba dipelo tše botegago borapeding bjo bo sekilego. Lehono, o tsošitše Dihlatse tša gagwe, tšeo ga bjale di balwago ka dimilione, bakeng sa morero o swanago. Di pepentšha boemo bja go hwa moyeng bja Bojakane ka go se boife. Ka go dira bjalo, di boeletša ka potego ditaelo tšeo di swanago le dikotlo tša mekgoši ya Kutollo dikgaolo 8 le 9. Go feta moo, di phatlaladitše ka mafolofolo kgothatšo yeo e ngwadilwego go Kutollo 18:4: “Khuduxang! Lena ba sethšaba sa-ka, xore le se tlo . . . wêlwa ke ’kotlo tša wôna.” “Wôna” ye go bolelwago ka yona mo ke Babele o Mogolo, e lego mmušo wa lefase wa bodumedi bja maaka, woo setho sa wona se se etelelago pele e lego Bojakane.

16. Ke ka tsela efe ba dimilione ba tšhabilego bodumeding bja maaka?

¹⁶ Ga e sa le go tloga ka 1919, kudu-kudu ga e sa le go tloga ka 1922, lešaba le le golago la batho ba boleta le ile la lahla Babele o Mogolo e le go amogela temošo yeo. Mathomong e bile ba dikete, ya tla ya ba ba makgolo a dikete, gomme mo nakong ye ba dimilione ba ikarogantše le bodumedi bja maaka, kudu-kudu Bojakane, ba tšhabela borapeding bjo bo sekilego. (Jesaya 2:2-4) Ba tseba gore ke feela ka go tlogela Babele o Mogolo moo ba ka efogago dikotlo tša yona, tšeo di tla feleletšago ka go fedišwa ga yona ge nako e fihla ya gore modiro o sa tlwaelegago wa Jehofa o phethwe.

17, 18. Ke bjang Jehofa a fetogilego mphapahlogo wa bokwala le seala sa botšhepi go batho ba gagwe?

¹⁷ Moporofeta Jesaya o hlalosa boemo bjo bo thabišago bja bao ba emelago borapedi bjo bo sekilego. O re: “Mohla woo Morêna wa mašaba e tlo ba yêna mofapahlôxô wa bokwala le seala sa bothšepi sa mašalêla a ’thšaba s’axwe. Moahlodi ó tlo mo nea môya wa tokô, boxale ó tlo bo nea bao ba xo thibêla manaba dikxorong.”—Jesaya 28:5, 6.

¹⁸ Ka baka la go botegela ga bona therešo, Jehofa ke mphapahlogo o sa hwego wa letago go ditho tša sehlopha sa molaki yo a botegago le yo bohlale. Se se bile bjalo kudu-kudu ga e sa le go tloga ka 1926. Ngwageng woo, tokollo ya January 1 ya The Watch Tower e ile ya gatelela bohlokwa bja go godiša leina la Jehofa sehlogong se se šišinyago se se rego “Ke Mang e a Tlago go Godiša Jehofa?” Ga e sa le go tloga nakong yeo, Bakriste ba ba tloditšwego ba ile ba phatlalatša leina leo lefaseng ka bophara go feta le ge e le neng pele. Ka 1931 ba ile ba gokaganywa kgaufsi kudu le Jehofa ka go amogela leina Dihlatse tša Jehofa. Go feta moo, lešaba le legolo la dinku tše dingwe le lona le ile la tšwa Bojakaneng le go Babele o Mogolo ka moka. Le lona le ile la amogela leina la Modimo. Mafelelo e bile afe? Jehofa ka noši—go e na le boipušo bja nakwana bja setšhaba—o fetogile mphapahlogo wa bokwala le seala sa botšhepi go batho ba fetago dimilione tše nne dinageng tše e ka bago tše 212 le dihlakahlakeng tša lewatle. A tokelo e kaakang yeo ba bilego le yona ya go rwala leina la Modimo a nnoši e a phelago le wa therešo!—Kutollo 7:3, 4, 9, 10; 15:4.

“Môya wa Morêna ó tlo Dula mo xo Yêna”

19. Ke mang yo a dutšego kahlolong, gomme ke bjang Jehofa a fetogilego moya wa toka go yena?

¹⁹ Jehofa o fetogile ‘moya wa toka’ go Jesu ‘yo a dutšego kahlolong.’ Nakong ya ge Jesu a be a le mo lefaseng, o ile a gana go fenywa ke moya o tagago wa ditswalano le lefase. Lehono, e le Kgoši ya Jehofa yeo e beilwego sedulong sa bogoši, o tletše moya o mokgethwa woo o mo hlahlago gore a dire diphetho tše leka-lekanego le tše bohlale. Boporofeta bjo bo phethagetše go Jesu: “Môya wa Morêna ó tlo dula mo xo yêna, e lexo môya wa bohlale, le wa thlaloxanyô, môya wa keletšo le wa matla, môya wa tsebô le wa xo šia Morêna.” (Jesaya 11:2) Ka kgonthe, Jehofa ka Jesu o tla “dira toka mothaladi wa go ela gomme toko ya ba sedirišwa sa go lekanetša.” (Jes. 28:17, NW) Mola manaba a tagilwego moyeng a tla fenywa phedišong, toka e tla dirwa leineng le lekgethwa la Jehofa le bogošing bja legohle.

20, 21. Mantšu a Jesaya 28:1-22 a go kgoma ka tsela efe?

²⁰ Ka gona, a tlhaloso e botse gakaakang yeo boporofeta bjo bja Jesaya kgaolo 28 bo re swaretšego yona lehono! Ge e ba re phema matagwa a moya a Bojakane gomme re kgomarela borapedi bjo bo sekilego, re tla šireletšega ge Jehofa a dira tiro ya gagwe e makatšago le modiro wa gagwe o sa tlwaelegago. Re thaba gakaakang go tseba se! Le gona, re thaba gakaakang ka go ba le kgonthe ya gore ge dilo tše di phethagala, o mongwe le o mongwe o tla gapeletšega go tseba gore Jehofa wa mašaba o gatile mogato bakeng sa batho ba gagwe ba botegago le bakeng sa go ikgodiša ka noši ka Jesu Kriste!—Psalme 83:17, 18, PK.

²¹ Ka gona, eka Bakriste ka moka ba therešo ba ka tšwela pele ba lemoša ba sa boife ka tiro e makatšago ya Jehofa. Anke ba phegelele go bolela ka tiro e makatšago ya Jehofa. Bjalo ka ge ba dira, anke ba kwatše go bohle gore re na le kholofelo e sa šišinyegego Mmušong wa Modimo ka tlase ga Kgoši ya gagwe yeo e beilwego sedulong sa bogoši. Eka phišego ya bona, boikemišetšo le potego di ka tlaleletša tumišong ya ka mo go sa felego ya Modimo ra-matla-ohle, Jehofa.—Psalme 146:1, 2, 10.

Na o ka Gopola?

◻ Ke ka baka la’ng Bojakane bo sa jego di welago?

◻ Ke’ng seo Jehofa a ilego a se rera bakeng sa Jerusalema, gomme ke ka baka la’ng se e be e le ‘se se makatšago’ le ‘se se sa tlwaelegago’?

◻ Ke temošo efe yeo Dihlatse tša Jehofa di ilego tša e phatlalatša mabapi le Bojakane, gomme ke karabelo efe yeo di ilego tša e hwetša?

◻ Batho ba ka tšhabela bjang seo se tlago go wela Bojakane?

[Seswantšho go letlakala 24]

Jehofa o tla boeletša tiro ya gagwe e makatšago, gomme mo nakong ye e tla ba malebana le Bojakane