JESU o eme a le tseleng ya go ya Kesarea Filipi gomme o ruta lešaba gotee le baapostola ba gagwe. O ba botša tsebišo ye e makatšago: “Ruri ke a Le botša, mo xo ba ba emexo fá xo na le ba ba tl’o xo bôna Morwa-motho à e-tla à le mmušong wa xaxwe, bôná ba sešo ba kwa lehu.”

Barutiwa ba swanetše go makala gore ‘Jesu a ka ba a be a bolela’ng?’ Mo e ka bago beke ka morago Jesu o sepela le Petro, Jakobo le Johane gomme ba namela thaba e telele. Mo gongwe ke bošego ka ge barutiwa ba swerwe ke boroko. Ge Jesu a sa rapela, o fetoga lebopo pele ga bona. Sefahlogo sa gagwe se thoma go phadima go etša letšatši gomme diaparo tša gagwe di taga go etša seetša.

Pono ye e ipontšha e le e matlafatšago gakaakang go Jesu gotee le go barutiwa ba gagwe! Pono e bjalo ka ge eka ke ponelo-pele ya letago la Mmušo wa Kriste. Ge e le gabotse, barutiwa ba bone “Morwa-motho à e-tla à le mmušong wa xaxwe” go fo etša ge Jesu a be a holofeditše beke pele ga moo. Ka morago ga lehu la Jesu, Petro o ile a ngwala mabapi le go ‘ba bao ba bonego ka mahlo bogolo bja Kriste ge ba be ba na le yena thabeng e kgethwa.’