Na Lentšu la Modimo le Ruta Thuto ya go Tswalwa Gape ka Mmele o Mongwe?

MOTHO lege e le ofe yo a hlahlobago Beibele ka kholofelo ya go hwetša thekgo bakeng sa thuto ya go tswalwa gape ka mmele o mongwe o swanetše go šegama. Ga go na mo o tlago go hwetša gore batho ba kile ba phela maphelo a pele. Go feta moo, o ka se ke wa hwetša dipolelwana tše bjalo ka “go tswalwa gape ka mmele o mongwe” goba “go fetišetšwa ga moya mmeleng o mongwe” goba “moya o sa hwego” ka Beibeleng.

Lega go le bjalo, ba bangwe ba ba dumelago thuto ya go tswalwa gape ka mmele o mongwe ba leka go hlalosa go hlaela mo ga thekgo ya Beibele ka go bolela gore kgopolo ya go tswalwa gape ka mmele o mongwe e be e tumile mehleng ya bogologolo moo tlhaloso lege e le efe e bego e tla ba tshenyo ya nako. Ee, thuto ya go tswalwa gape ka mmele o mongwe ke ya kgale kudu, eupja go sa šetšwe kamoo e lego ya kgale ka gona goba kamoo e bego e tumile ka gona goba go se bjalo, potšišo e sa dutše e eme, Na Beibele e a e ruta?

Go 2 Timotheo 3:​16, 17 (PK), moapostola Paulo o ngwadile gore: “Gobane lengwalo ka moka le buduletšwe ke Modimo, gomme le loketše go ruta, le go kgodiša, le go lokiša, le go godišetša go lokeng, gore motho wa Modimo e be yo a phethegilego, yo a lokišeditšwego modiro o mongwe le o mongwe o botse.” Ee, Beibele ke Lentšu le le buduletšwego ke Modimo, tsela ya go fetišetšwa ga molaetša wa gagwe go lapa la motho. Go etša ge Paulo a ngwadile, e dira gore mmotšiši yo a botegago e be yo a “phethegilego, yo a lokišeditšwego” go araba dipotšišo ka moka tše bohlokwa mabapi le bophelo, go akaretša dipotšišo mabapi le nako e fetilego, ya gona bjale le e tlago.

Gape Paulo o boletše gore: “Mola Lè tlêlwa ke Lentšu le le bexo le bolêlwa ke rena, Lè sa ka la le amoxêla bo-ka lentšu la batho, la le amoxêla è le la Modimo, la therešô.” (1 Ba-Thesalonika 2:​13) Ka ge Beibele e rwele dikgopolo tša Modimo e sego tša batho ba ba sa phethagalago, ga se ra swanela go makatšwa ke go hwetša gore Beibele e fapana gantši le dikgopolo tša motho gaešita lege di be di dutše di tumile nywageng ka moka. Eupja o ka re, ‘Na Beibele bonyenyane ga e šišinye thuto ya go tswalwa gape ka mmele o mongwe mafelong a mangwe?’

Ditemana tše di Kwešišwago ka mo go Fošagetšego

Ba ba dumelago thuto ya go tswalwa gape ka mmele o mongwe ba bolela gore Beibele e bolela taba ye ka boripana go Mateo 17:​11-13 (PK), moo Jesu a kgokaganyago Johane Mokolobetši le moporofeta wa kgale Eliya. Lengwalo le le balega ka gore: “Ruri, Eliya o tlo tla pele, gomme o tlo buša a lokiša tšohle. Gomme ke a le botša, Eliya o šetše a tlile, . . . Ke mo barutiwa ba lemogilego, goba o ba botša ka Johane mokolobetši.”

Na Jesu ka go bolela se o be a bolela gore Johane Mokolobetši o be a tswetšwe gape ka mmele wa moporofeta Eliya? Johane ka boyena o be a tseba gore e be e se yena. Lebakeng le lengwe ge a be a botšišwa gore, “A O Eliya?”, Johane o ile a araba ka mo go kwalago gore: “Aowa!” (Johane 1:​21) Lega go le bjalo, go be go boletšwe e sa le pele gore Johane o be a tla eta Mesia pele “ka môya wa Eliya le ka matla a xaxwe.” (Luka 1:​17; Maleaki 4:​5, 6) Ka mantšu a mangwe, Johane Mokolobetši e be e le “Eliya” ka kgopolo ya gore o be a phetha modiro wo o bego o swana le wa Eliya.

Go Johane 9:​1, 2 re bala gore: “Xe a [Jesu] iphetêla, a bôna motho e a tswetšwexo è le sefofu. Barutiwa ba xaxwe ba mmotšiša ba re: Moruti, xo sentše mang? A e ka ba yêna xoba batswadi ba xaxwe, xe a tlo tswalwa e le sefofu?” Ba bangwe ba ba dumelago thuto ya go tswalwa gape ka mmele o mongwe ba bolela gore ka ge monna yo a be a tswetšwe a foufetše, sebe sa gagwe se swanetše go ba se dirilwe bophelong bja pele.

Eupja go sa šetšwe selo seo se rotošitšego potšišo ya barutiwa, karabo ya Jesu e swanetše go ba ya makgaola-kgang. O boletše gore: “Xa xo a senya yêna, le xe e le batswadi ba xaxwe.” (Johane 9:⁠3) Se se ganetša thuto ya go tswalwa gape ka mmele o mongwe, e bolelago gore bogole bo bakwa ke dibe tša bophelong bjo bo fetilego. Ntlha ya gore ga go na motho yo a ka dirago sebe pele ga ge a belegwa e hlalositšwe gape ke Paulo ge a be a ngwala ka Esau le Jakobo gore ba be “bà sešo ba bêlêxwa, bà sešo ba dira botse le bobe.”​—⁠Ba-Roma 9:⁠11.

Tsogo, e Sego go Tswalwa Gape ka Mmele o Mongwe

Gaešita lege Beibele e sa thekge thuto ya go tswalwa gape ka mmele o mongwe, ga go na motho yo a swanetšego go ikwa a šegamešitšwe. Molaetša wa Beibele o nea selo se sengwe se se homotšago kudu go feta kgopolo ya go tswalwa gape lefaseng le le tletšego bolwetši, manyami, bohloko le lehu. Ga se feela gore se Beibele e se neago ke se se homotšago eupja ke therešo, ke Lentšu la Modimo ka noši.

Paulo o hlalositše thuto e kgothatšago ka tsela ye: “Kholofêlô ye ke holofetšexo Modimo ka yôna . . . , ya xo re: Bahu ba tlo tsoxa, bohle, baloki le ba s’a lokaxo.” Lentšu “tsogo,” goba sebopego se sengwe sa lona, le tšwelela ka makga a fetago 50 Mangwalong a Bakriste a Segerika gomme Paulo o bolela ka yona e le thuto ya motheo ya tumelo ya Bokriste.​—⁠Ditiro 24:​15; Ba-Hebere 6:​1, 2.

Go molaleng gore go tsošwa bahung go bolela gore lehu le gona. Ga go na mo o tlago go hwetša go ukangwa lege e le gofe ga gore motho o na le moya o sa hwego ka Beibeleng. Ge nkabe motho a e-⁠na le moya o sa hwego wo o aroganego le mmele lehung gomme wa ya lefelong la ka mo go sa felego legodimong goba diheleng goba wa tswalwa gape ka mmele o mongwe, gona go be go ka se nyakege tsogo. Ka lehlakoreng le lengwe, ditemana tše di ka bago lekgolo tša Beibele di bontšha gore moya wa motho ga se o sa hwego, eupja o a hwa e bile o a senyega. Beibele e bolela ka go dumelelana ka lehu e le leganetši la bophelo, ke gore go se be gona ge go bapišwa le go ba gona.

Lehu goba go se be gona, e be e le kotlo bakeng sa sebe sa Adama le Efa go Modimo. E be e le kotlo, e sego tsela ya go tsena bophelong bja go se hwe lefelong le lengwe. Modimo o boletše ka mo go kwalago gore ba be ba tla boela mo ba bego ba e-⁠tšwa gona​—⁠leroleng la lefase: “O nthšitšwe mmung; O lerole; ’me sa xaxo ké xo boêla leroleng.” (Genesi 3:​19) Ba be ba se na moya o sa hwego pele ga ge ba bopša ke Modimo le go bewa lefaseng tšhemong ya Edene, le gona ba be ba se na wona ka morago ga ge ba hwile.

Go tsoga lehung go swantšhwa le go tsoga borokong, goba go khutšeng. Ka mohlala, Jesu o itše ka Latsaro yo a bego a e-⁠ya go mo tsoša: “Latsaro . . . ó robetše; xomme ke ya xo mo tsoša borokong.” (Johane 11:​11) Mabapi le moporofeta Daniele, re bala gore: “O tlo khutša, wa tlo bá wa tsoxa xo tlo amoxêla kabêlô ya xaxo bofelong bya matšatši.”​—⁠Daniele 12:⁠13.

Bophelo bjo bo sa Felego Lefaseng

Mafelelo e tla ba afe bakeng sa ba ba tsošwago lehung? Beibele e bolela ka mehuta e mebedi ya tsogo​—⁠ya legodimong le ya lefaseng. Tsogo ya lefaseng e tla ba mafelelo bakeng sa bontši bja ba ba kilego ba phela gomme ba hwa. Ke ba sego kae kudu ba ba amogelago tsogo ya legodimong, go ya go buša le Kriste Mmušong wa Modimo wa legodimong. (Kutollo 14:​1-⁠3; 20:⁠4) Tsogo ya lefaseng e tla thoma neng? E tla thoma ka morago ga ge tshepedišo ye ya gona bjale e kgopo e sentšwe ke Modimo gomme “lefase le lefsa,” e lego lekoko le lefsa la go loka la batho le tšweletše.​—⁠2 Petro 3:​13; Diema 2:​21, 22; Daniele 2:​44.

‘Lefaseng le lefsa’ go ka se sa ba le bolwetši goba tlaišego. Gaešita le lehu le ka se sa hlwa le e-⁠ba gona eupja le tla tšeelwa sebaka ke tebelelo ya bophelo bjo bo sa felego. “Modimo ó tlo phomola mexôkxô ka moka mahlong a bôná; le lehu le ka se hlwê le e-⁠ba xôna; le xe e le manyami le dillô le bohloko, di ka se hlwê di e-⁠ba xôna; xobane tša pele di fetile.” (Kutollo 21:⁠4) Gape, mopsalme o boletše e sa le pele gore: “Baloki e ba beng ba naxa, ba dula mo xo yôna ka mehla le ka mehla.” (Psalme 37:​29) Jesu o boletše ka mo go swanago gore: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.”​—⁠Mateo 5:⁠5.

Bapiša dikholofetšo tšeo tše dikgolo tša Modimo le thuto ya go tswalwa gape ka mmele o mongwe. Go ya ka kgopolo yeo, go naganwa gore o boela nako le nako go phela tshepedišong e swanago e gobogilego ya dilo ya kgale. Seo se be se tla bolela gore o tšwela pele o dikologilwe ke bokgopo, tlaišego, bolwetši le go hwa modikologong wo o nyakilego o sa fele. Yeo ke tebelelo e se nago kholofelo gakaakang!

Ka gona, Beibele e araba dipotšišo tše di rego, Na o kile wa phela pele? le Na o tla phela gape? ka tsela ye: Aowa, ga se wa ka wa phela bophelo bjo bongwe ka ntle le bja gona bjale. Eupja go a kgonega gore o dire gore bophelo bja gago e be bjo bo tšeago nako e telele, ee, bjo bo sa felego. Lehono, “mehleng [ye] ya bofêlô” ya tshepedišong ye ya gona bjale o ka ba le kholofelo ya go phologa bofelo bja lefase le gomme wa tsena lefaseng le lefsa la Modimo ka ntle le go hwa. (2 Timotheo 3:​1-⁠5; Kutollo 7:​9-15) Goba ge e ba o e-⁠hwa pele lefase le lefsa la Modimo le fihla, o ka ba le kholofelo ya go tsošetšwa bophelong bjo bo sa felego lefaseng la paradeise.​—⁠Luka 23:⁠43.

Ge e ba o bontšha tumelo go Jesu, mantšu a Jesu go Mareta nakong ya ge kgaetšedi ya gagwe Latsaro a hwile a tla šoma le go wena, go sa šetšwe se se ka diregago: “Ké Nna tsoxô le bophelô. E a ntumetšexo ó tlo phela le xe a ka hwa. Xomme e a phelaxo á ntumêla, a ka se kê a bá a hwa xo iša xo sa felexo.”​—⁠Johane 11:​25, 26.

Adama o be a se na moya o sa hwego, eupja o ile a boela leroleng ge a e-⁠hwa

Lentšu la Modimo le ruta tsogo, e sego go tswala gape ka mmele o mongwe