Bophelo le Bodiredi bja Jesu

Keletšo e Nngwe Gape e Phošollago

GE BA sa dutše ba le ka ngwakong kua Kaperenaume, go boledišanwa ka selo se sengwe gape ka ntle le ngangišano ya baapostola ya mabapi le yo e lego o mogolo. Tiragalo ye le yona mo gongwe e ka ba e diragetše ge ba boela Kaperenaume, ge Jesu ka noši a be a se gona. Moapostola Johane o bega ka gore: “Re bone motho à lêlêka meôya e mebe ka Leina la xaxo, à sa sepele le rena; ra mo iletša ka xobane à sa sepele le rena.”

Go molaleng gore Johane o lebelela baapostola e le sehlopha se nnoši se nago le leina la bafodiši. Ka gona o nagana gore monna yoo o be a dira mediro e matla ka mo go sa swanelago ka gobane e be e se karolo ya sehlopha sa bona.

Lega go le bjalo, Jesu o a eletša: “Se mo iletšeng, xobane xa xo motho e a kaxo dira mohlôlô ka Leina la-ka, a tloxa a nkxoboša. E a sa lwexo le rena, ó a re lwêla. Xobane e a kaxo Le noša sexwana sa meetse ka Leina la-ka, ruri, ke a Le botša, a ka se hlokišwe moputsô wa xaxwe.”

Go be go sa nyakege gore monna yo a latele Jesu e le ka kgonthe gore a be ka lehlakoreng la gagwe. Phuthego ya Bokriste e be e se ya hlwa e hlongwa, ka gona go se be ga gagwe karolo ya sehlopha sa bona go be go sa bolele gore e be e le wa phuthego e arogilego. Monna yo o be a tloga a dumela leineng la Jesu gomme ka go rialo o ile a atlega go leleka meoya e mebe. O be a dira selo seo se bego se bapa gabotse-botse le seo Jesu a boletšego gore se swanetšwe ke moputso. Jesu o bontšha gore ka go dira se, a ka se lahlegelwe ke moputso wa gagwe.

Eupja go thwe’ng ge nkabe monna yo a ile a kgopišwa ke mantšu le ditiro tša baapostola? Se e be e tla ba taba e šiišago kudu! Jesu o a lemoša: “E a kaxo kxopiša e mongwê wa ba banyenyane ba ntumêlaxo bá, yêna xo ka be xo le kaone xe lwalá la xo šila le ka tlêmêlwa molaléng wa xaxwe, ’me a lahlêlwa lewatleng.”

Jesu o bolela gore balatedi ba gagwe ba swanetše go tloša maphelong a bona selo lege e le sefe se ba se ratago go swana le letsogo, leoto goba leihlo tšeo di ka ba dirago gore ba kgopje. Go kaone gore o se be le selo se se rategago gomme o tsene Mmušong wa Modimo go e na le gore o se kgomarele gomme o lahlelwe Gehenna (mokgobo wa matlakala o tukago kgaufsi le Jerusalema), yeo e swantšhetšago tshenyego ya ka mo go sa felego.

Le gona Jesu o a lemoša: “Le bônê xore Le se nyatšê e mongwê wa ba banyenyane bá; ka xobane Nna ke a Le botša, Barongwa ba bôná kwa lexodimong ba hlwa ba bôna sefahloxô sa Tate wa maxodimong.” Ka morago o gatelela bohlokwa bja “ba banyenyane” ka go bolela ka monna yo a nago le dinku tše 100 eupja a lahlegelwa ke e tee. Jesu o hlalosa gore monna yo o tla tlogela tše 99 a ye go tsoma e timetšego, gomme ge a e hwetša o tla e thabela go feta tše 99. Jesu o phetha ka gore, “Le Tata-weno wa maxodimong xa a rate xe le o tee wa ba banyenyane bá a ka timêla.”

Jesu mo gongwe o nagana ka ngangišano e bego e le gare ga baapostola ba gagwe gomme o opeletša ka gore: “Dulang Lé na le letswai, Le phedišanê ka leaxô.” Dijo tše se nago tatso di dirwa gore di latswege ka mo go oketšegilego ka letswai. Ka gona, letswai la tshwantšhetšo le dira gore seo motho a se bolelago go be bonolo go se amogela. Go ba le letswai le bjalo go tla thuša go boloka khutšo.

Eupja ka baka la go se phethagale ga motho, ka dinako tše dingwe dikgohlano tše šoro di tla ba gona. Le gona Jesu o nea dikeletšo tša kamoo di ka lokišwago ka gona. Jesu o re, “Xe ngwan’eno a senya, mo sôlê Lè le seng; xe a ka kwa, xôna O tlo rua ngwana weno.” Jesu o eletša gore ge a sa go theetše, “yaa xo yêna ó na le yo mongwê le xe e le ba babedi, xore ditaba di dulê di na le hlatse tše pedi le xe e le tše tharo.”

Jesu o re, iša taba go “phuthêxô” e le feela selo sa mafelelo se kaone se ka dirwago, e lego go balebeledi ba phuthego ba nago le boikarabelo bao ba ka neago kahlolo ya mafelelo. Jesu o phetha ka gore, ge mofoši a ka se phele ka go dumelelana le phetho ya bona, “xôna O mo semê wa-ntlê le mohlanoxi.”

Balebeledi ba swanetše go kgomarela ka kelohloko ditaelo tše lego ka Lentšung la Modimo ge ba dira diphetho tše bjalo. Ka gona, ge ba hwetša motho a e-na le molato gomme a swanetšwe ke kotlo, kahlolo ‘e tla ba e šetše e tlemilwe kua legodimong.’ Le gona ge ba “hunolla lefaseng,” ke gore, ba hwetša motho a se na molato, gona se se tla ba se šetše se ‘hunollotšwe kua legodimong.’ Mabapi le ditaba tše bjalo tšeo di hlahlobišišwago ka kelohloko pele ga ge kahlolo e ka newa, Jesu o re, “mo ba babedi le xe e le ba bararo ba kaxo phuthêxa ka Leina la-ka, Nna ke tlo ba xare xa boná.” Mateo 18:6-20; Mareka 9:38-50; Luka 9:49, 50.

◆ Ke ka baka la’ng mehleng ya Jesu go be go sa nyakege go sepela le yena?

◆ Taba ya go kgopiša e monyenyane ke e šiišago gakaakang, gomme Jesu o bontšhitše bohlokwa bja ba bjalo ba banyenyane bjang?

◆ Ke eng seo mo gongwe se hlohleleditšego kgothatšo ya Jesu ya go kgothatša baapostola gore ba be le letswai mo go bona?

◆ Bohlokwa bja go ‘tlema’ le bja go ‘hunolla’ ke bofe?