Na Modimo o Nea Meputso?

EE, O a putsa. Ka gona, na ke boithati go hlankela Modimo go lebeletšwe moputso? Aowa, ka gobane yena ka noši o bea meputso ka pele ga bahlanka ba gagwe ba ba botegago. Ge e le gabotse, ka ge e le Modimo wa toka le lerato Jehofa o ithweša boikarabelo bja go putsa ba ba mo hlankelago. Lentšu la gagwe go Ba-Hebere 11:⁠6 le bolela ka boripana gore: “Motho yo a batamelago Modimo o swanetše go dumela dilong tše pedi, sa pele gore Modimo o gona gomme sa bobedi gore Modimo o putsa ba ba mo tsomago.”​—⁠Phillips.

Go ba le tumelo ya kgonthe go Modimo go tliša segwera sa gagwe, gomme segwera se se lebiša moputsong. Modimo o šegofatša ba ba tsomago go amogelwa ke yena ka pelo ka moka.

Meputso ke Ditiro tša Lerato

Jehofa o nyaka gore re tsebe gore ke yena mohuta wa Modimo yo a putsago ba ba mo ratago. Ka mohlala, batswadi ba ba naganelago ba nyaka ditsela tša go putsa ngwana wa bona yo a dirago mešongwana ya ka gae ka boikemišetšo ka baka la go rata batswadi. Batswadi ba ka nea se se fetišago dinyakwa tša bophelo, ba putsa ngwana ka mpho e kgethegilego. Ka dinako tše dingwe mpho e ka ba ya ba tšhelete e tsenywago polokelong bakeng sa go nea tšhireletšego ya ngwana ya nakong e tlago. Ka gona, Modimo ga a swane le batho ba ba hlokago tebogo goba ba ba sa naganelego ba ba ba direlago dilo ka lerato goba potego. Jehofa o na le pelo e borutho gomme o batamela kgaufsi le bagwera ba gagwe. Ge e ba o kgomarela tumelo ya go dumela go yena, a ‘ka se ke a go lahla, a ka se ke a go tlogela.’​—⁠Ba-Hebere 13:⁠5.

Modimo o leboga le go amogela bohle ba ba mo direlago gaešita le mediro e menyenyane kudu, a ba nea dibaka tše di oketšegilego tša go mo tseba. Mantšu a Jesu go Mateo 10:​40-42 a swantšhetša ntlha yeo ka gore: “E a Le amoxêlaxo, ó amoxêla Nna; xomme e a amoxêlaxo Nna, ó amoxêla E a nthomilexo. E a amoxêlaxo moporofeta ka xe a na le leina la moporofeta, ó tlo fiwa teboxô ya moporofeta. E a amoxêlaxo moloki ka xe a na le leina la moloki, ó tlo fiwa teboxô ya moloki. E a xêlaxo e mongwê wa banyenyane bá sexô sa meetse a bataxo, ka xe a na le leina la morutiwa, ruri ke a Le botša, a ka se tingwê moputsô wa xaxwe.”

Jesu o be a romilwe ke Tatagwe, Jehofa. Ka gona, motho yo a amogelago barutiwa ba Kriste ka botho​—⁠e ka ba e le baporofeta, banna ba ba lokilego goba ba banyenyane⁠—​o amogela Kriste le Modimo yo a romilego Kriste. Ruri motho yoo o tla šegofatšwa; a ka se ke a hlokišwa moputso. Polokelo ya gagwe ya mahumo a moya e tla tlala kudu. Ka baka la’ng? Ka gobane Jehofa o gopola gaešita le tiro e nyenyane kudu ya go thekga Mmušo wa gagwe, gomme tiro yeo e ka se ke ya hlokišwa moputso.​—⁠Ba-Hebere 6:⁠10.

Ka mo go kgahlišago, Petro yo e lego morutiwa wa Jesu o ile a botšiša Jesu ka go lebanya ge e ba yena le baapostola-gotee le yena ba be ba tla hwetša moputso a re: “Ši-di; rena re tloxetše tšohle [ra go latela, NW]; se re tl’o xo se hwetša ké eng?” (Mateo 19:​27) Jesu ga se a lebelela potšišo e le e sa swanelago, eupja o ile a nea karabo ya go dumela, a re: “Mang le mang a tloxetšexo lapa labô, xoba bana babô, xoba dikxaetšedi, xoba tat’axwe le mm’axwe, xoba bana, xoba mašemo è le ka ’baka la leina la-ka, ó tlo hwetša tše di fetišaxo tšeo kxolê-kxolê, le byôna bophelô byo bo sa felexo e tlo ba kabêlô ya xaxwe.”​—⁠Mateo 19:⁠29.

Meputso ya Gona Bjale le ya Nakong e Tlago

Karabo yeo Jesu a e neilego e bontšhitše gore balatedi ba gagwe ba putswa bobedi gona bjale le nakong e tlago. Moputso o mongwe wa gona bjale ke go ba ga bona karolo ya lapa le le katologago la ditšhaba ka moka la banababo rena le dikgaetšedi ba moya. Lege dikereke tša Bojakane di ngongorega ka baka la go fokotšega ga ditho tša tšona le go hlaela ga thekgo, diholo tša diboka tša Dihlatse tša Jehofa di falala ka tsela ya seswantšhetšo. Dihlatse tše difsa tše makgolo a dikete di kolobetšwa ngwageng o mongwe le o mongwe.

Moputso o mongwe gape ke khutšo ya monagano e nago le kgotsofalo le lethabo tšeo go gwerana le Modimo le go mo tseba go di tlišago. Ee, “boineelo go Modimo gotee le kgotsofalo” ke moputso o mogolo. (1 Timotheo 6:⁠6) Bo bonagatša boemo bja lethabo bja monagano e le ka kgonthe ge motho a kgona go bolela go etša moapostola Paulo gore: “Nna ke ithutile xo kxôlwa ke tše ke naxo le tšôna [maemong lege e le afe, NW],” ke gore, go kgotsofala.​—⁠Ba-Filipi 4:⁠11.

Nakwana pele ga lehu la gagwe, Paulo o ile a ngwala ka moputso wa nakong e tlago wa “mohlatswana o monyenyane” wa balatedi ba Jesu ba ba tloditšwego​—⁠e lego moputso wa go tsogela bophelong bja legodimong: “Mphapahlôxô wa xo re ke lokile o šetše o beilwe pele xa-ka; ké wo ke tl’o xo o newa ke Morêna Moahlodi wa xo loka ka letšatši leo; è se nna fêla; ó tlo o nea bohle ba ba ratilexo xe a bônaxala.”​—⁠Luka 12:​32; 2 Timotheo 4:​7, 8.

Balatedi ba Jesu ba dimilione bao e lego “dinku [tša gagwe] tše dingwê” ba fagahlela moputso wa nakong e tlago wa bophelo bjo bo sa felego lefaseng le le fetotšwego paradeise. (Johane 10:​16) Jesu o kgonthišeditše gore balatedi ba gagwe ba ba hwago ba tla “lefelwa tsogong ya ba ba lokilego.”​—⁠Luka 14:​14, PK.

Bona Moputso ka Mahlo a Kgopolo

Ke mo go nepagetšego go leka go bona ka mahlo a kgopolo ditšhegofatšo tše bjalo gaešita lege go se na motho yo a tsebago ka go lebanya seo di tlago go swana le sona. Na ga o kgone go kwa lethabo le le hlalositšwego go Jesaya 25:⁠8 e rego: “Lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle”? Leka go ba le seswantšho-kgopolo sa mantšu a Jesaya 32:​17 e rego: “Modirô wa tokô e tlo ba kaxišô; ’me tokô e tlo tliša xo iketla le xo holofêla ka xo sa felego.” Ee, batho ka moka ba tla be ba šoma gotee ka bogwera bja kgonthe. (Jesaya 65:​21-25) Gaešita le lehono, modiro o mafolofolo o feleletša ka magae a mabotse le ditšweletšwa tša maemo a godimo kudu. Ka gona, lefaseng le lefsa la Modimo batho ba ba phetšego gabotse maemong a phethagetšego ba tla kgona go tšweletša selo lege e le sefe se se nyakegago go dira gore bophelo e be bjo bo thabišago.​—⁠Psalme 37:⁠4.

Meputso yeo Modimo a e neago ga se ya tirelo ya rena e tumišegago, eupja e tlišwa ke lerato la gagwe e le mpho go sa šetšwe boemo bja rena bja leabela bja sebe. (Ba-Roma 5:​8-10) Lega go le bjalo, go na le kgokagano magareng ga moputso o fagahletšwego le boitshwaro bja rena. Re swanetše go tsoma Jehofa ka go tšwa pelong ka tumelo ya sebete le kgotlelelo. (Ba-Hebere 10:​35-39) Ka mantšu a mangwe, “ka moka tše Le di diraxo, Le di dirê ka pelo e rataxo, e ke Le dirêla Modimo, e sexo batho. Le dirê Lè tseba xore moputsô wa bohwa Le tlo o fiwa ke Modimo.” Ee, o nea meputso.​—⁠Ba-Kolose 3:​23, 24.