Bophelo le Bodiredi bja Jesu

Jesu o Sola Baganetši ba Gagwe

JESU o gakantšhitše baganetši ba gagwe ba bodumedi kudu moo ba boifago le go mmotšiša se sengwe gape. Ka gona, o ikemišetša go pepentšha go se tsebe selo ga bona. O a ba botšiša: “Le re’ng ka Kriste? Ké morwa wa mang?”

Bafarisei ba araba ba re, “ké wa Dafida.”

Gaešita lege Jesu a sa ganetše gore Dafida ke rakgolo-khukhu wa nama wa Kriste goba wa Mesia, fela o a botšiša: “Xomme Dafida à le Moyeng, ò re’ng xe a re [go Psalme 110]: Mong wa-ka! à e-ra yêna? xe a re: Morêna o boditše Mong wa-ka a re: Dula ka letsoxong la-ka le letona, ke bê ke dirê manaba a xaxo boxatô bya ’naô tša xaxo. Byale Dafida xe a mo re: Mong wa-ka! a ka ba morwa wa xaxwe byang?”

Bafarisei ba a homola ka gobane ga ba tsebe seo Kriste goba motlotšwa a lego sona e le ka kgonthe. Mesia ga se fela setlogolwana seo e lego motho sa Dafida go etša ge Bafarisei ba dumela seo e le ka kgonthe, eupja o be a le legodimong gomme o be a feta Dafida ka bogolo goba e le Morena wa gagwe.

Jesu ge bjale a retologela go mašaba le go barutiwa ba gagwe, o ba lemoša ka ba-mangwalo le Bafarisei. Ka ge ba ba ruta Molao wa Modimo gomme ‘ba dutše sedulong sa Moše,’ Jesu o opeletša ka gore: “Kwang tšohle tše ba Le botšaxo tšôna, Le yê ka tšôna.” Eupja o oketša ka gore: “Le se kê la ba etša medirong ya bôná; xobane ba a bolêla, ’me xa ba dire.”

Ke baikaketši gomme Jesu o ba sola ka mantšu a swanago le ao a ilego a a bolela nakong ya ge a be a e-ja ntlong ya Mofarisei o mongwe dikgweding tša pele ga moo. O re: “Medirô ya bôná ka moka ba e dirêla xo bônwa ke batho.” O nea mehlala, o re:

“Ba kxanthša mangwalwana [matlojana] a dithapêlô.” Matlojana a a manyenyane a bego a tlemelelwa phatleng goba letsogong a be a e-na le dikarolo tše nne tša Molao: “Ekisodo 13:​1-10, 11-16; le Doiterenomio 6:​4-9; 11:​13-21. Eupja Bafarisei ba godiša matlojana a e le gore ba itire bao e ka rego ba fišegela Molao kudu.

Jesu o tšwela pele ka gore ba ‘lelefatša matobolo a dikobo tša bona.’ Ba-Isiraele go Numeri 15:​38-40 ba laelwa gore ba dire matobolo dikobong tša bona, eupja Bafarisei ba lelefatša a bona go feta kamoo motho o mongwe a ka dirago ka gona. Dilo tšohle di direlwa gore ba bonwe! Jesu o a kgalema, “Ba kxanyoxa dibaka tša pele.”

Ka manyami, barutiwa ba gagwe le bona ba kgomilwe ke kganyogo ye ya go kganyoga maemo. Ka gona o a ba eletša: “Lena Le se kê la dumêla leo la Rabi, xobane wa lena Moruti ké o tee, ké Kriste; ’me lena ka moka Le bana ba o tee. Le se kê la bitša wa mo lefaseng la re: Tata-wešo! Xobane Tata-weno ké o tee wa maxodimong. Le se kê la bitšwa ka la Kêtapele, xobane wa lena Mo-êta-pele ké o tee, ké Kriste.” Barutiwa ba swanetše go ntšha ka go bona kganyogo ya go rata go ba ba pele! Jesu o ba kgala ka gore: “E moxolo mo xo lena a e bê mo-Le-diredi.”

Ka morago o bolela lelokelelo la madimabe go ba-mangwalo le Bafarisei gomme o ba bitša baikaketši gantši. O re ba ‘kgonyela batho mmušo wa magodimo’ gomme ‘ba ja malapa a bahlologadi ka go ba fora ka dithapelo tše telele.’

Jesu o re, “Le ba madi-mabe lena basepediši Le lexo difofu.” O sola go hloka ga Bafarisei mehola ya moya bjalo ka ge go bontšhitšwe ke dikgethollo tša boithatelo tšeo ba di dirago. Ka mohlala, ba re ‘Ge motho a ena ka ntlo-kgethwa ga se molato, eupja molato ke ge a ena ka gauta ya yona.’ Ka go hlokomela ga bona gauta ya tempele kudu go feta go hlokomela mohola wa moya wa lefelo leo la borapedi, ruri ba bontšha bofofu bja bona bja boitshwaro.

Jesu go etša ge a dirile nakong ya pele, o sola Bafarisei bakeng sa go hlokomologa “tše dikxolo Molaong, e lexo tokô kahlolong le kxauxêlô le pôtêxô,” mola ba ela hloko kudu go ntšhwa ga sa-lesome goba karolo ya lesome ya merogo yeo e sego selo.

Jesu o bitša Bafarisei ‘basepediši ba e lego difofu ba ba minolotšago monang, eupja kamela ba e metša.’ Ba minolotša monang beineng ya bona e sego fela ka gobane e le khunkhwane, eupja ka gobane e le yeo ka mokgwa wa borapedi e sego ya hlweka. Lega go le bjalo, go nyatša ga bona ditaba tše dikgolo tša Molao go bapišwa le go metša kamela yeo le yona e lego phoofolo ye ka mokgwa wa borapedi e sego ya hlweka. Mateo 22:​41–23:​24; Mareka 12:​35-40; Luka 20:​41-47; Lefitiko 11:​4, 21-24.

◆ Ke ka baka la’ng Bafarisei ba homola ge Jesu a ba botšiša mabapi le seo Dafida a se boletšego go Psalme 110?

◆ Ke ka baka la’ng Bafarisei ba lelefatša matlojana a bona a mangwalana a dithapelo le matobolo a dikobo tša bona?

◆ Ke keletšo efe yeo Jesu a e neago barutiwa ba gagwe?

◆ Ke dikgethollo dife tša boithatelo tšeo Bafarisei ba di dirago, gomme Jesu o ba sola bjang bakeng sa go hlokomologa ditaba tše dikgolo?