“Go Ngwadilwe gwa thwe”

1-3. Ke phetho efe ya bohlokwa yeo Jesu a bego a nyaka gore batho ba Natsaretha ba e fihlelele, gomme o ba nea bohlatse bofe?

KE MATHOMONG a bodiredi bja Jesu. Kriste o boetše Natsaretha, motseng wa gabo. Pakane ya gagwe ke go thuša batho gore ba fihlelele phetho e bohlokwa kudu, ya gore: Ke Mesia yo go boletšwego ka yena nako e telele e sa le pele! O ba nea bohlatse bofe?

² Ga go pelaelo gore ba bantši ba be ba letetše mohlolo. Ba be ba kwele ka dipego tša mediro e makatšago yeo Jesu a e dirilego. Lega go le bjalo, ga a dire pontšho e bjalo. Go e na le moo, o ya sinagogeng ka ge a tlwaetše. O a emelela gore a bale, gomme o newa lengwalo la go phuthwa la Jesaya. Ke lengwalo le letelele leo le ka bago le tatilwe dikotaneng tše pedi, gomme Jesu ka kelohloko o phutholla lengwalo leo go tloga kotaneng e nngwe go ya go e nngwe go fihlela a hwetša karolo yeo a e tsomago. Ke moka o balela godimo karolo yeo ga bjale e lego Jesaya 61:1-3.—Luka 4:16-19.

³ Go molaleng gore batheetši ba gagwe ba tseba karolo yeo. Ke boporofeta bjo bo bolelago ka Mesia. Leihlo le lengwe le le lengwe ka sinagogeng le be le tsepeletše Jesu. Go aparetše setu. Ke moka Jesu o thoma go hlalosa, mohlomongwe o dira seo ka botlalo gore: “Lehono lengwalo le leo le sa tšwago go le kwa le phethagetše.” Batheetši ba gagwe ba kgotsa mantšu a mabose ao a bego a etšwa molomong wa gagwe, eupša ga go pelaelo gore ba bantši ba sa dutše ba nyaka go bona pontšho e makatšago. Go e na le moo, Jesu ka sebete o diriša mohlala wa Mangwalo go pepentšha go hloka tumelo ga bona. Go se go ye kae, batho ba Natsaretha ba leka go mmolaya!—Luka 4:20-30.

4. Jesu o beile mohlala ofe bodireding bja gagwe, gona re tla hlahloba’ng kgaolong ye?

⁴ Jesu mo o thoma mokgwa woo a ilego a o latela nakong ya bodiredi bja gagwe ka moka. O be a ithekgile kudu ka Lentšu la Modimo le le buduletšwego. Therešo ke gore mehlolo ya gagwe e be e le bohlokwa kudu bakeng sa go bontšha gore o be a na le moya wa Modimo. Lega go le bjalo, ga go na selo seo se bego se le bohlokwa kudu go Jesu go feta Mangwalo a Makgethwa. Anke re hlahlobeng mohlala woo a o beilego tabeng ye. Re tla hlahloba kamoo Mong wa rena a tsopotšego Lentšung la Modimo, a lwetšego Lentšu la Modimo le kamoo a hlalositšego Lentšu la Modimo.

Go Tsopola Lentšung la Modimo

5. Jesu o be a nyaka gore batheetši ba gagwe ba tsebe’ng, gona o bontšhitše therešo ya mantšu a gagwe bjang?

⁵ Jesu o be a nyaka gore batho ba tsebe moo molaetša wa gagwe o tšwago gona. O itše: “Seo ke se rutago ga se sa ka, eupša ke sa yo a nthomilego.” (Johane 7:16) Lebakeng le lengwe, o ile a re: “Ga ke dire selo ka la ka; eupša ke bolela dilo tše go etša ge Tate a nthutile.” (Johane 8:28) O okeditše ka gore: “Dilo tšeo ke le botšago tšona ga ke di bolele ka la ka; eupša Tate yo a lego boteeng le nna o dira mediro ya gagwe.” (Johane 14:10) Tsela e nngwe yeo Jesu a hlatsetšego therešo ya mantšu ao e be e le ka go tsopola leboelela Lentšung la Modimo leo le ngwadilwego.

6, 7. (a) Jesu o tsopotše Mangwalo a Seheberu go fihla bokgoleng bofe, gona ke ka baka la’ng seo se makatša? (b) Tsela ya Jesu ya go ruta e be e fapana bjang le ya bamangwalo?

⁶ Go hlahloba ka kelohloko mantšu a Jesu ao a begilwego go utolla gore o tsopotše ka go lebanya goba ka go se lebanye tekanyo ya ka godimo ga seripagare sa dipuku tša Mangwalo a Seheberu. Mathomong seo se ka kwagala se sa makatše. O ka ipotšiša lebaka leo ka lona nywageng e meraro le seripa ya go ruta ga gagwe le go dira boboledi a sa kago a tsopola go tšwa dipukung ka moka tšeo di buduletšwego tšeo di bego di hwetšagala. Lega go le bjalo, ge e le gabotse a ka ba a dirile seo. Gopola gore go begilwe karolo e nyenyane kudu ya mantšu le ditiro tša Jesu. (Johane 21:25) Ge e le gabotse, ka diiri tše mmalwa feela o ka balela godimo mantšu a Jesu ka moka a begilwego. Ga bjale, akanya o bolela ka Modimo le Mmušo wa gagwe ka diiri tše mmalwa feela gomme o dira boiteko bja go tsopola tekanyo ya ka godimo ga seripagare sa dipuku tša Mangwalo a Seheberu! Go feta moo, mabakeng a mantši Jesu o be a se a swara mangwalo a go phuthwa. Nakong ya Thuto ya gagwe ya Thabeng yeo e tumilego, o ile a akaretša ditsopolo tše dintši tša Mangwalo a Seheberu ka go lebanya le ka go se lebanye—a di tsopola ka moka ka hlogo!

⁷ Ditsopolo tša Jesu di be di bontšha gore o be a tloga a hlompha Lentšu la Modimo ka mo go tseneletšego. Batheetši ba gagwe ba ile “ba makatšwa ke mokgwa wa gagwe wa go ruta, gobane o be a ba ruta bjalo ka motho yo a nago le matla a bolaodi, e sego bjalo ka bamangwalo.” (Mareka 1:22) Ge bamangwalo ba be ba ruta, ba be ba rata go tsopola seo se bitšwago molao wa molomo, ba tsopola borabi ba rutegilego ba dinakong tše di fetilego. Jesu le ka mohla ga se a ka a tsopola molao woo wa molomo goba borabi e le bao ba ka botwago. Go e na le moo, o be a lebelela Lentšu la Modimo e le leo le ka botwago. Leboelela, o be a re: “Go ngwadilwe gwa thwe.” O ile a diriša leboelela mantšu ao goba a swanago le ona ge a be a ruta balatedi ba gagwe le ge a be a phošolla dikgopolo tše di fošagetšego.

8, 9. (a) Jesu o ile a bontšha bjang gore o bota Lentšu la Modimo ge a be a hlwekiša tempele? (b) Ke ka tsela efe baetapele ba bodumedi ba ilego ba bontšha gore ga ba hlomphe Lentšu la Modimo ge ba be ba le ka tempeleng?

⁸ Ge Jesu a be a hlwekiša tempele ya kua Jerusalema o ile a re: “Go ngwadilwe gwa thwe: ‘Ntlo ya ka e tla bitšwa ntlo ya thapelo,’ eupša lena le e dira lewa la bahlakodi.” (Mateo 21:12, 13; Jesaya 56:7; Jeremia 7:11) Letšatši pele ga moo, o be a dirile mediro e mentši e makatšago moo. Bašemanyana bao ba bego ba kgahlegile kudu ba ile ba thoma go mo reta. Lega go le bjalo, baetapele ba bodumedi ba ile ba botšiša Jesu ba galefile ge e ba a kwele seo bana bao ba bego ba se bolela. O ile a araba ka gore: “Ee. Na ga se la ka la bala gore: ‘O dirile gore melomo ya bana le masea e go tumiše’?” (Mateo 21:16; Psalme 8:2) Jesu o be a nyaka gore banna bao ba tsebe gore Lentšu la Modimo le be le dumelela seo se bego se diragala moo.

⁹ Baetapele bao ba bodumedi ka morago ba ile ba kgobokana gomme ba ya go Jesu ba mo phegelela ka gore: “Dilo tše o di dira ka matla afe?” (Mateo 21:23) Jesu o be a bontšhitše Mothopo wa matla a gagwe gantši le ka mo go kwagalago. O be a se a ka a ithomela dithuto tše difsa goba gaešita le go itlhamela tšona. O be a fo ba a diriša seo Lentšu la Tatagwe leo le buduletšwego le se bolelago. Ka gona, baperisita bao le bamangwalo ba be ba tloga ba bontšha go se hlomphe Jehofa le Lentšu la gagwe. Ba be ba tloga ba swanelwa ke go kgalengwa ke Jesu ge a dutše a pepentšha maikemišetšo a bona a kgopo.—Mateo 21:23-46.

10. Re ka ekiša bjang Jesu tseleng yeo re dirišago Lentšu la Modimo ka yona, gomme ke didirišwa dife tšeo re nago le tšona tšeo Jesu a bego a se natšo?

¹⁰ Ka go swana le Jesu, Bakriste ba therešo lehono ba ithekga ka Lentšu la Modimo ge ba le bodireding. Dihlatse tša Jehofa di tsebja lefaseng ka bophara ka mafolofolo a tšona a go boledišana le batho ba bangwe ka molaetša wa Beibele. Dikgatišo tša rena di tsopola le go bontšha ditemana tše dintši tša Beibele. Ge re le bodireding, re dira bjalo ka go katanela go akaretša Mangwalo neng le neng ge re bolela le batho. (2 Timotheo 3:16) Re thaba kudu ge motho yo mongwe a re dumelela go bala Beibele le go ahlaahla bohlokwa bja Lentšu la Modimo le seo le se bolelago! Ga re na monagano wa Jesu o phethagetšego, eupša re na le didirišwa tše dintši tšeo Jesu a bego a se natšo. Go tlaleletša go Beibele e feletšego yeo e gatišitšwego ka maleme a oketšegago, re na le didirišwa tše dintši tša go ithuta Beibele bakeng sa go re thuša go hwetša temana le ge e le efe yeo re ka e nyakago. A re ikemišetšeng gore neng le neng ge re hwetša sebaka re tšwele pele re tsopola Beibele le go dira gore batho ba e bale!

Go Lwela Lentšu la Modimo

11. Ke ka baka la’ng Jesu a ile a swanelwa ke go lwela Lentšu la Modimo gantši?

¹¹ Jesu o ile a hwetša gore Lentšu la Modimo le be le hlaselwa gantši, eupša seo ruri ga se sa ka sa mo makatša. Jesu o ile a botša Tatagwe thapelong gore: “Lentšu la gago ke therešo.” (Johane 17:17) Le gona Jesu o be a tseba gabotse gore Sathane, e lego “mmuši wa lefase,” ke “moaketši le tatago maaka.” (Johane 8:44; 14:30) Ge Jesu a be a gana diteko tša Sathane, o ile a tsopola Mangwalo ka makga a mararo. Sathane o ile a tsopola temana e tee ya Dipsalme, a e kgopamiša ka boomo, gomme Jesu o ile a mo fetola ka go lwela Lentšu la Modimo ge a be a le diriša gampe.—Mateo 4:6, 7.

12-14. (a) Baetapele ba bodumedi ba ile ba bontšha bjang go se hlomphe Molao wa Moshe? (b) Jesu o ile a lwela Lentšu la Modimo bjang?

¹² Jesu o ile a lwela Mangwalo a Makgethwa gantši ge a be a dirišwa gampe, ka bošaedi e bile a kgopamišwa. Barutiši ba bodumedi ba mehleng ya gagwe ba ile ba diriša Lentšu la Modimo ka tsela e kgopamego. Ba ile ba šetša kudu go latela dikarolwana tše dinyenyane tša Molao wa Moshe eupša ba sa šetše go latela melao ya motheo yeo melao yeo e bego e theilwe go yona. Ka gona ba ile ba kgothaletša borapedi bja go ithola kgwara, bjoo motho a tshwenyegago ka ponagalo ya ka ntle go e na le go tshwenyega ka ditaba tše bohlokwa—tše bjalo ka toka, kgaugelo le potego. (Mateo 23:23) Jesu o ile a lwela Lentšu la Modimo bjang?

¹³ Thutong ya gagwe ya Thabeng, Jesu o ile a diriša leboelela polelwana ya gore “le kwele gore go ile gwa thwe,” pele a tsopola taelo e tšwago Molaong wa Moshe. O be a tla latela ka polelwana ya gore “eupša ke re go lena,” ke moka a hlalose molao wa motheo woo o bego o tseneletše go feta Molao wo batho ba bego ba o latela ka go ithola kgwara. Na o be a lwantšhana le Molao? Aowa, o be a o lwela. Ka mohlala, batho ba be ba tseba gabotse molao o rego: “O se ke wa bolaya.” Eupša Jesu o ile a ba botša gore go hloya motho go be go lwantšhana le seo molao woo o bego o se bolela. Ka mo go swanago, go hlagolela dikganyogo tše di fošagetšego ka motho yo mongwe yo e sego molekane wa gago go be go lwantšhana le molao wa motheo woo molao wa Modimo wa go thibela bohlotlolo o theilwego go wona.—Mateo 5:17, 18, 21, 22, 27-39.

¹⁴ Mafelelong, Jesu o itše: “Le kwele gore go ile gwa thwe: ‘O rate moagišani wa gago gomme o hloye lenaba la gago.’ Eupša ke re go lena: Tšwelang pele le rata manaba a lena le go rapelela bao ba le tlaišago.” (Mateo 5:43, 44) Na taelo ya gore o “hloye lenaba la gago” e be e etšwa Lentšung la Modimo? Aowa, kgopolo ye ya go hloya lenaba la gago e be e le selo seo baetapele ba bodumedi ba bego ba itlhametše sona. Ba ile ba bebofatša Molao o phethagetšego wa Modimo ka dikgopolo tša batho. Jesu o ile a lwela ka sebete Lentšu la Modimo gore le se tutuetšwe gampe ke metlwae ya batho.—Mareka 7:9-13.

15. Jesu o ile a lwela Molao wa Modimo bjang ge o be o dirwa gore o bonagale o gatelela kudu gaešita le go ba o thata?

¹⁵ Baetapele ba bodumedi ba ile ba ba ba hlasela Molao wa Modimo ka go o dira gore o bonagale o gatelela kudu gaešita le go ba o thata. Ge barutiwa ba Jesu ba be a ekga diako tše mmalwa tša mabele ge ba be ba phatša mašemong, ba bangwe ba Bafarisei ba ile ba bolela gore ba be ba tshela molao wa Sabatha. Jesu o ile a diriša mohlala wa Mangwalo go lwela Lentšu la Modimo kgahlanong le pono ye e kgopamego. O ile a bolela ka karolo yeo e tšwelelago gatee feela ka Mangwalong yeo e bolelago ka senkgwa sa ka tempeleng seo se ilego sa šomišwa ka ntle ga sekgethwakgethwa—ge Dafida le banna bao ba bego ba swerwe ke tlala ba be ba se ja. Jesu o ile a bontšha Bafarisei bao gore ba be ba sa kwešiše morero wa kgaugelo ya Jehofa le lešoko la gagwe.—Mareka 2:23-27.

16. Ke’ng seo baetapele ba bodumedi ba ilego ba se dira ka molao wa Moshe wa mabapi le tlhalo, gona Jesu o ile a arabela bjang?

¹⁶ Le gona baetapele ba bodumedi ba ile ba dira melawana ya semolao yeo e bego e bebofatša matla a Molao wa Modimo. Ka mohlala, Molao o be o dumelela monna go hlala mosadi wa gagwe ge e ba a ka hwetša “selo se sengwe seo a se bonego se sa hlomphege” go yena, e lego bothata bjoo go lego molaleng gore e be e le bjo bogolo kudu gomme bo dira gore lapa leo le nyatšege. (Doiteronomio 24:1) Lega go le bjalo, mehleng ya Jesu, baetapele ba bodumedi ba be ba diriša tumelelo yeo e le sehlare sa ntšhirela bakeng sa go dumelela monna go hlala mosadi wa gagwe ka mabaka a fapafapanego—gaešita le ka go fiša dijo tša gagwe tša go lalela!a Jesu o ile a bontšha gore ba be ba tloga ba šaeditše mantšu a buduletšwego a Moshe. Ke moka o ile a bolela ka tekanyetšo ya Jehofa ya mathomong ya lenyalo, ya go ba le molekane o tee, gomme a bolela gore boitshwaro bjo bo gobogilego bja dikopano tša botona le botshadi ke bjona feela lebaka le le kwagalago la tlhalo.—Mateo 19:3-12.

17. Bakriste lehono ba ka ekiša Jesu bjang go lweleng Lentšu la Modimo?

¹⁷ Balatedi ba Kriste lehono ba ikwa ba gapeletšega ka mo go swanago go lwela Mangwalo a Makgethwa ge a hlaselwa. Ge baetapele ba bodumedi ba bolela gore ditekanyetšo tša boitshwaro tša Lentšu la Modimo di šiilwe ke nako, ge e le gabotse ba hlasela Beibele. Le gona, Beibele e a hlaselwa ge madumedi a ruta dithuto tša maaka gomme a di hlalosa e le dithuto tša Beibele. Re go tšea e le tokelo go lwela Lentšu la Modimo le le sekilego la therešo—ka mohlala, ge re bontšha gore Modimo ga se karolo ya Borarobotee. (Doiteronomio 4:39) Ka nako e swanago, re lwela Lentšu la Modimo ka bohlale, ka moya o boleta le ka tlhompho e tseneletšego.—1 Petro 3:15.

Go Hlalosa Lentšu la Modimo

18, 19. Ke mehlala efe yeo e bontšhago gore Jesu o be a na le bokgoni bjo bo makatšago bja go hlalosa Lentšu la Modimo?

¹⁸ Jesu o be a phela legodimong ge Mangwalo a Seheberu a be a ngwalwa. Ruri o swanetše go ba a ile a thabela kudu sebaka sa go tla lefaseng go tlo tšea karolo go hlaloseng Lentšu la Modimo! Ka mohlala, nagana ka letšatši leo le gopolegago la ka morago ga tsogo ya gagwe ge a be a kopana le barutiwa ba gagwe ba babedi tseleng e yago Emause. Pele ba ka lemoga gore e be e le mang, ba ile ba mmotša kamoo ba bego ba nyamile e bile ba gakanegile ka gona ka baka la lehu la Mong wa bona yo a rategago. O ile a arabela bjang? “Ge a thoma ka Moshe le mangwalo a Baporofeta ka moka, a ba hlathollela dilo tše di lego mabapi le yena ka Mangwalong ka moka.” Ba ile ba kgomega bjang? Ka morago ba boledišana ba re: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?”—Luka 24:15-32.

¹⁹ Moragonyana lona letšatšing leo, Jesu o ile a kopana le baapostola ba gagwe le ba bangwe. Ela hloko seo a ilego a ba direla sona: “A bula menagano ya bona ka mo go feletšego gore ba kwešiše seo se bolelwago ke Mangwalo.” (Luka 24:45) Ga go pelaelo gore tiragalo yeo e thabišago e ba gopoditše dinako tše dintšintši tšeo Jesu a ba diretšego selo se se swanago—a se direla le motho le ge e le ofe yo a bego a tla theetša. Gantši o be a tsopola mangwalo ao a tlwaelegilego ke moka a a hlalose ka mokgwa woo o kgomago menagano ya batheetši ba gagwe ka tsela e makatšago—moo batheetši ba gagwe ba bego ba feleletša ba eba le kwešišo e mpsha le e tseneletšego ka Lentšu la Modimo.

20, 21. Jesu o ile a hlalosa bjang mantšu ao Jehofa a a boditšego Moshe kua sehlareng seo se tukago mollo?

²⁰ Tiragalong e nngwe e swanago le yeo, Jesu o be a bolela le sehlopha sa Basadutsei. E be e le sehlotswana sa bodumedi bja Sejuda seo se bego se dirišana le baperisita ba Bajuda gomme se sa dumele gore go na le tsogo. Jesu o ba boditše gore: “Ge e le mabapi le tsogo ya bahu, na ga se la ka la bala seo Modimo a ilego a le botša sona, a re: ‘Ke nna Modimo wa Aborahama, Modimo wa Isaka le Modimo wa Jakobo’? Ke Modimo wa ba phelago, e sego wa bahu.” (Mateo 22:31, 32) Le e be e le lengwalo leo ba bego ba le tseba gabotse, le ngwadilwe ke monna yo Basadutsei ba bego ba mo hlompha kudu—Moshe. Lega go le bjalo, na o bona matla a tlhaloso ya Jesu?

²¹ Moshe o ile a boledišana le Jehofa sehlareng seo se tukago mollo moo e ka bago ka ngwaga wa 1514 B.C.E. (Ekisodo 3:2, 6) Ka nako e yeo, Aborahama o be a na le nywaga e 329 a hwile, Isaka a na le e 224 a hwile mola Jakobo a be a na le e 197 a hwile. Lega go le bjalo, Jehofa o boletše gore: “Ke nna” Modimo wa bona. Basadutsei bao ba be ba tseba gore Jehofa ga a swane le modimo o itšego wa bahu wa baheitene, moo a bušago lefase la boikgopolelo. Aowa, ke Modimo “wa ba phelago,” go etša ge Jesu a boletše. Seo se swanetše go ba se bolela’ng? Jesu o phethile ka mantšu a matla ao a rego: “Go yena bohle ba a phela.” (Luka 20:38) Bahlanka ba rategago ba Jehofa bao ba hwilego, ba ka se tsoge ba lebetšwe ke monagano o sa tlalego le o sa lebalego wa Modimo. Ruri morero wa Jehofa wa go tsoša batho ba bjalo ke o kgonthišeditšwego moo go ka bolelwago ka bona gore ba a phela. (Baroma 4:16, 17) Na yeo ga se tlhaloso e kgahlišago kudu ya Lentšu la Modimo? Ga go makatše ge “mašaba [a ile] a kgotsa”!—Mateo 22:33.

22, 23. (a) Re ka ekiša Jesu bjang ge re hlalosa Lentšu la Modimo? (b) Re tla ahlaahla’ng kgaolong e latelago?

²² Lehono Bakriste ba na le tokelo ya go ekiša tsela ya Jesu ya go hlalosa Lentšu la Modimo. Ke therešo gore ga re na monagano o phethagetšego. Lega go le bjalo, gantši re kgona go boledišana le ba bangwe ka lengwalo leo ba le tsebago le go ba hlalosetša dikarolo tša lona tšeo go ka diregago gore ga se ba ka ba di ela hloko le ka mohla. Ka mohlala, go ka direga gore maphelong a bona ka moka ba boaboeleditše mantšu a rego, ‘leina la gago a le kgethwe’ le a gore ‘Mmušo wa gago a o tle,’ eupša ba sa tsebe gore leina la Modimo ke mang goba gore Mmušo wa gagwe ke eng. (Mateo 6:9, 10, bapiša le Beibele ya Sepedi) Ruri re tloga re na le sebaka se sebotse sa go nea ditlhaloso tše di kwagalago le tše bonolo tša ditherešo tše bjalo tša Beibele ge e ba motho yo mongwe a re dumelela!

²³ Go tsopola Lentšu la Modimo, go le lwela le go le hlalosa ke dinotlelo tše dikgolo tša go ekiša tsela ya Jesu ya go bolela le ba bangwe ka therešo. Anke ga bjale re hlahlobeng tše dingwe tša ditsela tše di atlegago tšeo Jesu a di dirišitšego go fihlelela dipelo tša batheetši ba gagwe ka ditherešo tša Beibele.