Pono ya Beibele

Bakriste ba Swanetše go Lebelela Bjang Mmisa?

GO YA ka The New York Times, Makatholika ao a ineetšego a dumelelana le Mopapa John Paul II yoo a sa tšwago go “tiišetša gore kereke e lebelela go se tle Mmiseng ga Mokatholika e le sebe.” Mmisa ke eng? Na kereke le Beibele di a dumelelana tabeng ye?

Ka pukung ya Things Catholics Are Asked About, moperisita wa Katholika Martin J. Scott o hlalosa Mmisa ka tsela e latelago: “Mmisa ke sehlabelo se se se nago madi sa Mmele le Madi a Kriste. Calvary e be e le sehlabelo se se nago le madi sa Kriste. Ge e le gabotse Mmisa ke sehlabelo se se swanago le seo se diretšwego sefapanong. Se ga se seka-polelo, ga se tshwantšhišo goba pheteletšo.” O bolela gape gore: “Go thwe Mmisa o tliša Morwa wa Modimo dialetareng tša rena, le go Mo neela e le sehlabelo go Modimo.”

Na Mmisa ke wa Mangwalo?

Makatholika ao a botegago a dumela gore Mmisa o theilwe thutong ya Mangwalo. E le bohlatse, ba šupa mantšung a Jesu a nakong ya seo se tlwaetšego go bitšwa Selalelo sa Mafelelo. Ge a be a abela baapostola ba gagwe senkgwa le beine, Jesu o boletše ka senkgwa gore: “Se ke mmele wa-ka.” Ge a be a bolela ka beine o itše: “Se ke madi a-ka.” (Mateo 26:26-28)a Makatholika a dumela gore ge a be a bolela mantšu a, Jesu ge e le gabotse o be a fetošeditše senkgwa le beine go ba mmele le madi a gagwe. Lega go le bjalo, New Catholic Encyclopedia (1967) e lemoša gore: “Ga se ra swanela go ithekga kudu ka go ba ga kgonthe ga mantšu a rego ‘Se ke mmele wa-ka’ goba ‘Se ke madi a-ka.’ . . . Ka gobane mafokwaneng a bjalo ka ‘puno ke bofelo bja lefase’ (Mt 13.39) goba ‘Ke nna morara wa kgonthe’ (Jn 15.1) [lediri “go ba”] le bolela feela go bontšha goba go emela.” Ka go rialo, gaešita le saeklopedia ye ya ditsebi e dumela gore mantšu a Mateo 26:26-28 ga a bontšhe gore senkgwa le beine di ile tša fetošwa mmele le madi tša kgonthe tša Jesu Selalelong sa Mafelelo.

Motho yo mongwe a ka gopola gore Jesu o kile a re: “Ke nna senkgwa se se phelago se se theogilego se e-tšwa legodimong. . . . Mang le mang yo a jago nama ya-ka gomme a nwa madi a-ka o na le bophelo bjo bo sa felego.” (Johane 6:51, 54) Ba bangwe ba bao ba bego ba theeditše Jesu ba ile ba tšea mantšu a gagwe ka kgopolo ya kgonthe gomme ba tšhoga. (Johane 6:60) Eupša re ka botšiša gore, Na Jesu o ile a fetoša nama ya gagwe a e dira senkgwa tiragalong yeo? Ga go bjalo le gatee! O be a bolela ka tsela ya seswantšhetšo. O be a itshwantšha le senkgwa ka gobane o be a tla nea batho bophelo ka sehlabelo sa gagwe. Johane 6:35, 40 e bontšha gabotse gore go ja le go nwa go be go tla dirwa ka go bontšha tumelo go Jesu Kriste.

Ka ge Mmisa e le tirelo ya motheo ya Kereke ya Katholika, motho a ka letela gore Mangwalo a e thekge. Ga a e thekge. The Catholic Encyclopedia (kgatišo ya 1913) e hlalositše lebaka ka gore: “Mothopo o mogolo wa thuto ya rena ke setlogo seo go tloga mehleng ya kgale se bolelago mohola o mogolo [wa go lopa] wa Sehlabelo sa Mmisa.” Ee, Mmisa wa Roma Katholika o theilwe setlogong e sego Beibeleng.

Go sa šetšwe gore se swarwa ka potego gakaakang, setlogo seo se ganetšanago le Beibele ga se amogelege go Modimo. Jesu o ile a sola baetapele ba bodumedi ba mehleng ya gagwe ka gore: “Le dirile gore lentšu la Modimo le se šome ka mekgwa ya lena ya setlogo.” (Mateo 15:6) Ka ge Jesu a be a lebelela Lentšu la Modimo le le bohlokwa, anke re hlahlobeng thuto mabapi le Mmisa go ya ka pono ya Mangwalo a Makgethwa.

Kriste o Dirilwe Sehlabelo—Gakae?

Kereke ya Katholika e ruta gore nako le nako ge go binwa Mmisa, Jesu o dirwa sehlabelo, gaešita le ge e bolela gore ga a hwe ka tsela ya kgonthe le gore sehlabelo ga se sa madi. Na Beibele e dumelelana le pono ye? Hlokomela Ba-Hebere 10:12, 14: “[Jesu] o neetše sehlabelo se tee feela bakeng sa dibe, gomme ka morago a dulela sa ruri setulong sa gagwe, ka letsogong le letona la Modimo. Ka matla a sehlabelo seo se tee, o fihleletše phethego e sa felego ya batho ka moka bao ba kgethegilego.”

Lega go le bjalo, Mokatholika yo a botegago a ka gana ka gore: ‘Na Jesu o be a ka se swanelwe ke go itira sehlabelo gantši? Ka moka re dira dibe gantši.’ Karabo ya Beibele e ngwadilwe go Ba-Hebere 9:25, 26: “[Kriste] ga a swanelwe ke go ikgafa leboelela. . . . O tšweletše gatee ya ba moka mafelelong a mehla ya bofelo, bakeng sa go fediša sebe ka go ineela e le sehlabelo.” Hlokomela se gabotse: Kriste “ga a swanelwe ke go ikgafa leboelela.” Go Ba-Roma 5:19, moapostola Paulo o hlalosa lebaka ka gore: “Ka go se kwe ga motho o tee [Adama] ba bantši ba dirilwe badira-dibe, ka gona ka tiro ya motho o tee ya toka [Jesu] ba bantši ba tla lokafatšwa.” Tiro e tee ya Adama ya go se kwe e re dirile ka moka ga rena gore re be balata ba lehu; tiro e tee ya Jesu ya topollo e theile motheo bakeng sa rena ka moka bao ba bontšhago tumelo sehlabelong seo gore dibe tša rena di lebalelwe gona bjale le gore re thabele bophelo bjo bo sa felego nakong e tlago.

Go na le phapano efe ge e ba Jesu a dirilwe sehlabelo gatee goba ge e ba a dirwa sehlabelo gantši? Ke taba ya go leboga bohlokwa bja sehlabelo sa Jesu. Yeo ke mpho e kgolo kudu yeo e kilego ya newa—mpho e bohlokwa kudu, e phethegilego kudu, yeo le ka mohla e ka se nyakego go boeletšwa.

Ruri sehlabelo sa Jesu se swanelwa ke go gopolwa. Eupša go na le phapano magareng ga go gopola tiragalo le go e boeletša. Ka mohlala, banyalani bao ba binago segopotšo sa lenyalo la bona ba ka gopola letšatši leo ba nyalanego ka lona, ka ntle le go dira monyanya gape. Ngwaga o mongwe le o mongwe, Dihlatse tša Jehofa di bina segopotšo sa lehu la Jesu, di dira bjalo ka tsela yeo Jesu a laetšego ka yona—“e le go [mo] gopola” e sego go mo dira sehlabelo. (Luka 22:19) Go oketša moo, ngwaga ka moka Bakriste ba katanela go hlagolela tswalano e borutho le Jehofa Modimo ka Jesu Kriste ka go dira gore maphelo a bona, ditiro tša bona le ditumelo tša bona di dumelelane le Mangwalo a Makgethwa.

Gantši go dira bjalo go bolela go fetoša kgopolo ya bona. Eupša Dihlatse di thabela go tseba gore ge e ba di thekga Lentšu la Modimo ka potego go e na le go thekga setlogo sa batho, di tla šegofatšwa. Le gona ge e ba di bontšha tumelo mading a Jesu ao a neilwego e le sehlabelo, ao a tšholotšwego gatee ya ba moka mo e nyakilego go ba nywageng e dikete tše pedi e fetilego, a tla ba hlatswa dibe ka moka.—1 Johane 1:8, 9.

Ge e ba o tla rata go amogela tsebišo e oketšegilego goba o tla rata gore motho yo mongwe a go etele bakeng sa go tla go swara thuto e sa lefelelwego ya legae ya Beibele le wena, hle ngwalela go Watch Tower, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 5.

[Mongwalo wa tlase]

[Seswantšho go letlakala 31]

Mmisa wa St. Giles (ditaba ka botlalo)

[Credit Line]

Erich Lessing/Art Resource, NY